Daaneela 3:1-30
-
Kawoy Nebukadanaxori essido worqqa misiliya (1-7)
-
Misiliyawu goynnanaadan azaziis (4-6)
-
-
Heezzu Ibraaweta azazettokkona giidi mootidosona (8-18)
-
‘Nuuni ne xoossatuyyo haggaazokko’ (18)
-
-
Eexxiya itoone taman olettidosona (19-23)
-
Tamaappe attido malaaliyabaa (24-27)
-
Kawoy Ibraawetu Xoossaa keehi sabbiis (28-30)
3 Kawoy Nebukadanaxori geesay 60u wara,* qassi gomppay 6 wara* gidido worqqa misiliya* medhdhiis. I hegaa Baabiloone moottan* Duura dembban essiis.
2 Yaatidi Kawuwa Nebukadanaxori satirappeti,* eta maaddiyageeti, haariyageeti, zoriyageeti, buquraa wottiyosan aawatiyageeti, daannati, maaraa naagissiyageetinne moottata* ayssiyageeti ubbay Kawuwa Nebukadanaxori essido misiliya anjjissuwawu shiiqanaadan yootana mala kiittiis.
3 Hegaa gishshawu satirappeti, eta maaddiyageeti, haariyageeti, zoriyageeti, buquraa wottiyosan aawatiyageeti, daannati, maaraa naagissiyageetinne moottata* ayssiyageeti ubbay Kawuwa Nebukadanaxori essido misiliya anjjissuwawu shiiqidosona, qassi eti Nebukadanaxori essido misiliya sinttan eqqidosona.
4 Awaajjiyagee cenggurssaa xoqqu oottidi hagaadan giis: “Asa zaretoo, deretoonne dumma dumma doonata haasayiyageetoo, kawoy inttena hagaadan azaziis;
5 malkkataa, pulaaliya, heezzu zooze diittaanne baqettan waaxettida hara miishshatu cenggurssaa, qassi gita pulaaliyanne hara muuziqa miishshatu ubbaa cenggurssaa intte siyiyo wode, Kawuwa Nebukadanaxori essido worqqa misiliyawu gufannidi goynnanaadan azaziis.
6 Gufannidi goynnenna ooninne eexxiya itoone taman sohuwara olettana.”
7 Hegaa gishshawu, asa zareti, deretinne dumma dumma doonata haasayiyageeti ubbay malkkataa, pulaaliya, heezzu zooze diittaanne baqettan waaxettida hara miishshatu cenggurssaa, qassi hara muuziqa miishshatu ubbaa cenggurssaa siyido wode Kawuwa Nebukadanaxori essido worqqa misiliyawu gufannidi goynnidosona.
8 He wode Kaladatuppe amaridaageeti sinttawu kiyidi Ayhudata mootidosona.*
9 Eti Kawuwa Nebukadanaxorayyo hagaadan giidosona: “Bonchchettida kawuwawu, neeni merinawu deꞌa.
10 Bonchchettida kawuwawu, neeni malkkataa, pulaaliya, heezzu zooze diittaanne baqettan waaxettida hara miishshatu cenggurssaa, qassi gita pulaaliyanne hara muuziqa miishshatu ubbaa cenggurssaa siyiya asay ubbay worqqa misiliyawu gufannidi goynnanaadan azazadasa;
11 qassi gufannidi goynnenna ooninne eexxiya itoone taman olettanaadan azazadasa.
12 Shin Baabiloone moottaa* aysuwan maaddanaadan neeni sunttido, Sidiraaqa, Misaaqanne Abddanaaga giyo amarida Ayhudati deꞌoosona. Bonchchettida kawuwawu, ha asati ne azazuwa bonchchokkona. Eti ne xoossatuyyo haggaazokkona, qassi eti neeni essido worqqa misiliyawu goynnennan ixxidosona.”
13 He wode Nebukadanaxori hanqquwa eexxi kiyidi Sidiraaqa, Misaaqanne Abddanaaga ehanaadan azaziis. Yaatin he asata kawuwa sintti ehiidosona.
14 Nebukadanaxori etawu hagaadan giis: “Sidiraaqaa, Misaaqaanne Abddanaagoo, intte ta xoossatuyyo haggaazekketanne taani essido worqqa misiliyawu goynnennan ixxideta giyogee tumee?
15 Haꞌꞌi intte malkkataa, pulaaliya, heezzu zooze diittaanne baqettan waaxettida hara miishshatu cenggurssaa, qassi gita pulaaliyanne hara muuziqa miishshatu ubbaa cenggurssaa siyiyo wode, taani medhdhido misiliyawu gufannidi goynnanawu giigi uttidaba gidikko, loꞌꞌo. Shin intte goynnennan ixxikko, eexxiya itoone taman sohuwara olettana. Qassi ta kushiyappe inttena ashshana danddayiya xoossi oonee?”
16 Sidiraaqi, Misaaqinne Abddanaagoy kawuwaayyo hagaadan zaaridosona: “Bonchchettida Nebukadanaxoraa, ha yohuwan nuuni neeyyo zaarana koshshennattenne.
17 Bonchchettida kawuwawu, nuuni taman olettikkokka, nuuni awu haggaaziyo nu Xoossay eexxiya itoone tamaappenne ne kushiyappe nuna ashshana danddayees.
18 Shin I nuna ashshana xayikkokka, bonchchettida kawuwawu, nuuni ne xoossatuyyo haggaazennaagaa woy neeni essido worqqa misiliyawu goynnennaagaa era.”
19 Yaatin Nebukadanaxori Sidiraaqa, Misaaqanne Abddanaago bolli hanqquwa eexxi kiyiisinne etayyo A somꞌꞌoy laamettiis,* qassi itoone tamaa haroodeegaappe laappun kushe darissidi suulissanaadan I azaziis.
20 I ba olanchchatuppe amarida mino asati Sidiraaqa, Misaaqanne Abddanaaga qachchanaadaaninne eexxiya itoone taman olanaadan azaziis.
21 Hegaa gishshawu, ha asati bantta kaabbata, qophetanne hara maayota ubbaa maayi uttidaashin eta qachchidi eexxiya itoone taman olidosona.
22 Kawoy keehi minttidi azazidobaa gaasuwan, itoone tamay likkee baynna suuluwa suullin Sidiraaqa, Misaaqanne, Abddanaaga efiida asata tamaa lacoy woriis.
23 Shin ha heezzu asati Sidiraaqi, Misaaqinne Abddanaagoy qashetti uttidi eexxiya itoone taman olettidosona.
24 Yaanin Kawuwa Nebukadanaxori yayyidi eesuwan eqqi denddidi bana zoriyageetuyyo, “Nuuni qachchidi taman olido asati heezza gidokkonaayye?” yaagiis. Eti awu, “Ee, bonchchettida kawuwawu” yaagidi zaaridosona.
25 I hagaadan giis: “Beꞌite! Taani qashettibeenna oyddu asati tamaa giddon yaa haa hemettiyogaa beꞌays; eti qohettibookkona, qassi oyddanttoogee xoossatu naꞌa milatees.”
26 Nebukadanaxori eexxiya itoone tamaa penggiyakko shiiqidi, “Inttenoo, Ubbaappe Xoqqa Xoossaayyo haggaaziya Sidiraaqaa, Misaaqaanne Abddanaagoo, kiyidi haa yiite!” yaagiis. Yaagin Sidiraaqi, Misaaqinne, Abddanaagoy tamaa giddoppe kiyidosona.
27 Yan shiiqida satirappeti, eta maaddiyageeti, haariyageetinne kawuwa zoriyageeti ha asatu bollaa tamay aynne qohibeennaagaanne* eta huuphiya binnaanaappe issuwakka laxibeennaagaa, qassi eta kaabbati aynne laamettibeennaagaanne haray atto tamaa peenoykka eta bolli baynnaagaa beꞌidosona.
28 Yaatin Nebukadanaxori hagaadan giis: “Ba kiitanchchaa kiittidi bawu haggaaziyageeta ashshida, Sidiraaqa, Misaaqanne, Abddanaago Xoossay sabetto. Eti an ammanettidi kawuwa azazuwa azazettennan ixxidosona, qassi bantta Xoossaappe hara ay xoossawunne haggaazanaappe woy goynnanaappe hayqqanawu dooridosona.*
29 Yaaniyo gishshawu Sidiraaqa, Misaaqanne Abddanaago Xoossaa bolli aybanne haasayiya ay asanne, ay deriyanne, woy ay doonanne haasayiya asa busakkanaadan, qassi eta keettati dere sheeshsha keetta* gidanaadan taani azazuwa kessays; ayssi giikko, hagaadan ashshana danddayiya hara ay xoossinne baawa.”
30 Hegaappe guyyiyan kawoy Sidiraaqayyo, Misaaqayyonne Abddanaagoyyo Baabiloone moottan* gita maataa immiis.*
Footnotes
^ Woykko “hawulttiya.”
^ Woykko “awuraajjan.”
^ Ha bonchcho sunttaa birshshettay “haaruwa naagiyageeta;” hegee ha sohuwan, Baabiloone Haaruwan moottata haariyageeta qonccissees.
^ Woykko “awuraajjata.”
^ Woykko “awuraajjata.”
^ Woykko “Ayhudatu sunttaa bashshidosona.”
^ Woykko “awuraajjaa.”
^ Woykko “A xeelay muleera laamettiis.”
^ Woykko “bollan tamawu wolqqi baynnaagaanne.”
^ Woykko “bantta bollaa aatti immidosona.”
^ Woykko geella, “buuraa oliyosa; oshaa duunne.”
^ Woykko “awuraajjan.”
^ Mise, “hirattanaadan oottiis.”
