Daaneela 6:1-28
6 Dariyosi kumetta kawotettan 120u satirappeta* sunttanawu maaciis.
2 Kawoy eta bolli heezzu xoqqa sunttata sunttiis, etappe issoy Daaneela; qassi eti kawoy qohettenna mala satirappetu oosuwa xomoosoosona.
3 He wode Daaneeli oogaappenne leqqiya ayyaanay an deꞌiyo gishshawu, hara xoqqa sunttatuppenne satirappetuppe aadhdhiyogaa bessiis, qassi kawoy ba kumetta kawotettan awu gita maataa immanawu koyiis.
4 He wode xoqqa sunttatinne satirappeti kawotettaa allaalletuura gayttidaagan Daaneela mootanawu gaasuwa koyidosona, shin I ammanettiyagaa gidiyo gishshawunne xaasayiyobi woy mooriyobi an beettana danddayibeenna gishshawu eti A mootiyo gaasuwa woy ayba mooronne demmana danddayibookkona.
5 Yaanin asati hagaadan giidosona: “Nuuni ha Daaneela A Xoossaa higgiyara gayttidaagan gidikkoppe attin, A mootiyo gaasuwa mule demmokko.”
6 Yaatidi ha xoqqa sunttatinne satirappeti issippe kawuwakko gelidi awu hagaadan giidosona: “Bonchchettida Kawuwa Dariyosaa, merinawu deꞌa.
7 Bonchchettida kawuwawu, 30u gallassawu nenappe attin, ay xoossanne woy ay asanne woossiya ooninne gaammotu ollan olettanaadan kawotettaa azazoy kiyana malanne hegaa callidi* polissana mala kawotettaa xoqqa sunttati, satirappeta maaddiyageeti, satirappeti, kawuwa zoriyageetinne haariyageeti ubbay issippe zorettida.
8 Haꞌꞌi, bonchchettida kawuwawu, azazuwa kessada A bolli parama; yaatikko shaarettana danddayenna, Meedoonatunne Parssetu higgiya maaraadan hegee laamettana danddayenna.”
9 Yaagin Kawuwa Dariyosi azazuwaninne callidoban paramiis.
10 Shin Daaneeli azazoy paramettidoogaa erosaara ba soo biis; A keettawu bolla bagga kifiliyawu Yerusalaamekko simmida maskkooteti dooyetti uttidosona, qassi I hegaappe kase ubbatoo oottiyogaadan gallassan heezzutoo gulbbatidi ba Xoossaa woossiisinne sabbiis.
11 He wode he asati Daaneela soo umbbubuletti* gelidi I ba Xoossaa sinttan woossishiininne watiwatishin demmidosona.
12 Hegaa gishshawu, eti kawuwakko shiiqidi kawotettay callidobaa A hassayissidi, “Bonchchettida kawuwawu, 30u gallassawu nenappe attin, ay xoossanne woy ay asanne woossiya ooninne gaammotu ollan olettana bessees giidi callidoban paramabeykkii?” yaagidosona. Kawoy etawu, “Ha allaallee shaarettana danddayenna, Meedoonatunne Parssetu higgiya maaraadan mintti azazidoba” yaagiis.
13 Eti sohuwara kawuwawu hagaadan giidosona: “Bonchchettida kawuwawu, Yihudaappe omooddettidi yiidaageetuppe issoy, Daaneeli ne azazuwakka, neeni callada paramidobaakka bonchchenna; I gallassan heezzutoo woossees.”
14 Kawoy hegaa siyosaara keehi hirggiisinne Daaneela ashshiyo ogiya qoppiyogaa doommiis, qassi away wullana gakkanaashin A ashshanawu bawu danddayettida ubbabaa oottiis.
15 Wurssettan he asati issippe kawuwakko gelidi kawuwawu hagaadan giidosona: “Bonchchettida kawuwawu, Meedoonatunne Parssetu higgiyan kawoy callido aybinne woy I kessido ay azazoynne laamettana danddayennaagaa akeeka.”
16 Hegaa gishshawu, kawoy azazin eti Daaneela efiidi gaammotu ollan olidosona. Kawoy Daaneelawu, “Neeni ubbatoo awu haggaaziyo ne Xoossay nena ashshana” yaagiis.
17 Hegaappe simmin, shuchchaa ehiidi ollaa doonaa* bolli wottidosona, qassi kawoy Daaneelaara gayttidaagan aybinne laamettenna mala, ba maatafa migiduwaninne ba xoqqa maataawatu maatafa migiduwan shuchchaa bolli maatafaa wottiis.
18 Yaatidi kawoy ba garuwa biis. I he qammi xoomiis, aybinkka allaxxanawu koyibeenna,* qassi xiskkana danddayibeenna.*
19 Wurssettan, wonttimaattan kawoy denddidi, eesotiiddi gaammotu ollaakko biis.
20 I ollaakko matidi azzaniiddi ba qaalaa xoqqu oottidi Daaneela xeegiis. Kawoy Daaneela, “Merinawu deꞌiya Xoossawu haggaaziya Daaneelaa, neeni ubbatoo awu haggaaziyo ne Xoossay nena gaammotu doonaappe ashshana danddayidee?” yaagidi oychchiis.
21 Daaneeli sohuwara kawuwawu hagaadan giis: “Bonchchettida kawuwawu, merinawu deꞌa.
22 Ta Xoossay ba kiitanchchaa kiittidi gaammotu doonaa gorddiis, yaatin eti tana qohibookkona; ayssi giikko, tanan bali baynnaagaa I beꞌiis. Qassi bonchchettida kawuwawu, taani ne bolli ay mooronne oottabeykke.”
23 Kawoy keehippe ufayttiisinne Daaneela ollaappe kessanaadan azaziis. Eti ollaappe Daaneela kessido wode, I aynne qohettibeenna; ayssi giikko, I ba Xoossan ammanettiis.
24 Hegaappe simmin kawoy azazin, Daaneela mootida* asata ehiidi eta naatuuranne eta machchotuura gaammotu ollan olidosona. Eti ollawu wurssettaa gakkennan deꞌishin, gaammoti eta sophidi eta meqettaa ubbaa mentterettidosona.
25 Hegaappe guyyiyan, Kawuwa Dariyosi kumetta saꞌan deꞌiya asa zaretuyyo, deretuyyonne dumma dumma doonata haasayiyageetuyyo ubbawu hagaadan giidi xaafiis: “Sarotettay intteyyo kumi palaho!
26 Ta kawotettaa mootta ubban deꞌiya asay Daaneela Xoossaa sinttan yayyidi kokkorana bessees gaada azazuwa kessays. Ayssi giikko, I merinawu deꞌiya Xoossaa, qassi I merinawu eqqidi deꞌees. A kawotettay mulekka xayenna, qassi A haaroy* merinawu deꞌees.
27 I naageesinne ashshees, qassi saluwaninne saꞌan malaatatanne malaaliyabata oottees; ayssi giikko, I Daaneela gaammotu doonaappe* ashshiis.”
28 Hegaa gishshawu, ha Daaneeli Dariyosa kawotettaaninne Parssiya Qiiroosa kawotettan gita maatan oottiis.
Footnotes
^ Ha bonchcho sunttaa birshshettay “haaruwa naagiyageeta;” hegee ha sohuwan, Baabiloone Haaruwan moottata haariyageeta qonccissees.
^ Woykko “teqqidi.”
^ Woykko “buꞌetti.”
^ Woykko “geliyosaa.”
^ Woykko geella, “muuziqa miishshaa kaaꞌiya ooninne yibeenna.”
^ Mise, “A xiskkoy appe baqatiis.”
^ Woykko “sunttaa bashshida.”
^ Woykko “I ubbaa haariyo wolqqay.”
^ Mise, “kushiyappe.”
