Na Iehova e ‘faaite i te parau aro’

“E Atua mau â to outou Atua no te mau atua atoa nei, e te Fatu no te mau arii nei, e te faaite hoi i te parau aro.”—DAN. 2:47.

EAHA TA OUTOU E PAHONO?

Eaha te mau parau rii faufaa no nia i te ananahi ta Iehova i faaite mai?

Te faahohoˈa ra na afii e ono matamua o te puaa taehae i te aha?

Eaha te tuearaa e vai ra i rotopu i te puaa taehae e te tii rahi ta Nebukanesa i ite?

1, 2. Eaha ta Iehova i faaite ia tatou, e no te aha?

 TEIHEA faatereraa te itehia hou te Basileia o te Atua e haamou ai i te mau faatereraa taata? Ua ite tatou i te pahonoraa, o Iehova hoi te Atua o te faaite mai i te parau aro. Maoti te mau papai a te peropheta Daniela e a te aposetolo Ioane i ite ai tatou o vai tera mau faatereraa.

² Ua horoa Iehova ia raua ra te mau orama no nia i te mau puaa taehae. Ua faaite atoa oia ia Daniela i te auraa o te tii metara rahi ta ˈna i ite i roto i te taoto tohu ta ˈNa i faatae atu. Ua haapapai Iehova i te reira i roto i te Bibilia ia faufaahia tatou. (Roma 15:4) Ua hinaaro hoi oia e ia papu atu â to tatou tiaturiraa e ua fatata te Basileia i te haamou i te mau faatereraa taata atoa.—Dan. 2:44.

3. Eaha te titauhia ia taa na mua roa no te maramarama i te mau parau tohu, e no te aha?

³ Aita te mau faatiaraa a Daniela e a Ioane e faaite noa ra o vai na arii, aore ra na faatereraa taata, e vau. Oia atoa râ te mau puai e fa mai te tahi i muri iho i te tahi. E maramarama tatou i teie mau parau tohu i te taime noa e taa ˈi ia tatou te auraa o te parau tohu matamua roa o te Bibilia. No te aha? Ua taaihia hoi te Bibilia taatoa e te mau parau tohu atoa i te reira.

TE HUAAI O TE OPHI E TE PUAA TAEHAE

4. O vai na tuhaa e piti o te huero o te vahine, e eaha ta te reira e rave?

⁴ I muri iti aˈe i te orureraa hau i Edene, ua fafau Iehova e e noaa to te ‘vahine huaai,’ aore ra huero. * (A taio i te Genese 3:15.) E haaparuparu teie huero  i te afii o te ophi, o Satani. I muri iho, ua faaite Iehova e e na roto mai te huero ia Aberahama, i te nunaa Iseraela, i te opu o Iuda e i te utuafare o te arii Davida. (Gen. 22:15-18; 49:10; Sal. 89:3, 4; Luka 1:30-33) O te Mesia ra o Iesu te tuhaa matamua o teie huero. (Gal. 3:16) E o te mau melo faatavaihia i te varua o te amuiraa Kerisetiano te piti o te tuhaa. (Gal. 3:26-29) E faaohipa te Atua i to ˈna Basileia, faaterehia e Iesu e teie mau Kerisetiano faatavaihia, no te haamou ia Satani.—Luka 12:32; Roma 16:20.

5, 6. (a) Ehia rahiraa puai rahi ta Daniela e Ioane i ite? (b) Te faahohoˈa ra te mau afii o te puaa taehae o te Apokalupo i te aha?

⁵ Ua faaite atoa te parau tohu matamua faahitihia i Edene e e noaa to Satani “huaai.” E riri rahi to to ˈna huaai i te huero o te vahine. O vai te huaai o te ophi? O te feia atoa e riri ra i te Atua e e aro ra i to ˈna nunaa, mai ia Satani. I te roaraa o te tuatapaparaa, ua faanaho Satani i to ˈna huaai ei faanahoraa poritita, aore ra basileia, rau. (Luka 4:5, 6) Mea iti râ tei aro tia ˈtu i te nunaa o te Atua, te nunaa Iseraela anei aore ra te amuiraa o te mau Kerisetiano faatavaihia. Mea faufaa ia ite i te reira, no te mea e taa ia tatou no te aha te mau orama a Daniela e Ioane e faahiti ai e vau noa puai rahi.

⁶ I te area matahiti 96, ua faatae Iesu tei faatiahia i te hoê anairaa orama maere mau i te aposetolo Ioane. (Apo. 1:1) I roto hoê, ua ite Ioane i te Diabolo, faahohoˈahia ei teni, i te tiaraa i te pae tahatai o te moana. (A taio i te Apokalupo 13:1, 2. *) Ua ite atoa oia i te hoê puaa huru ê i te haerea mai mai raro mai i te moana e no ǒ mai to ˈna mana i te Diabolo ra. I muri iho, ua ite Ioane i te hoê puaa uteute e na afii e hitu. E hohoˈa te reira o te puaa o te Apokalupo 13:1. Ua faaite te hoê melahi ia ˈna e te faahohoˈa ra na afii e hitu o te puaa uteute “e hitu arii,” aore ra faatereraa. (Apo. 13:14, 15; 17:3, 9, 10) A papai ai Ioane i te buka Apokalupo, e pae arii tei topa, te vai nei  hoê, e “aitâ te tahi i tae mai.” O vai teie mau basileia, aore ra puai o te ao nei? E hiˈopoa anaˈe i na afii taitahi o te puaa faataahia i roto i te Apokalupo. E haapii rahi atoa mai tatou i te mau papai a Daniela tei horoa i te mau parau rii faufaa no nia i teie mau basileia, i te tahi taime, tau senekele hou ratou a fa mai ai.

AIPHITI E ASURA—NA AFII E PITI MATAMUA

7. Te faahohoˈa ra te afii matamua ia vai, e no te aha?

⁷ Te faahohoˈa ra te afii matamua o te puaa ia Aiphiti. No te aha? O Aiphiti te puai rahi matamua tei faaite i to ˈna riri i nia i te nunaa o te Atua. Ua fafauhia e e na roto mai te huero o te vahine i te huaai o Aberahama, tei rahi mai i Aiphiti. No reira, haavî ihora Aiphiti ia Iseraela. Ua hinaaro Satani e haamou i te nunaa o te Atua hou a tae mai ai te huero ma te turai ia Pharao ia haapohe i te aiû tamaroa Iseraela atoa. Aita râ Iehova i faatia i te reira e ua faaora ˈtura i to ˈna nunaa i te faatîtîraa i Aiphiti. (Exo. 1:15-20; 14:13) I muri iho, horoa ˈtura Oia i te Fenua tǎpǔhia no te mau Iseraela.

8. O vai te piti o te afii, e eaha ta ˈna i tamata i te rave?

⁸ Te faahohoˈa ra te piti o te afii o te puaa ia Asura. Ua tamata atoa teie basileia puai i te faaore i te nunaa o te Atua. Parau mau, na Iehova i faaohipa ia Asura no te faautua i te basileia o na opu hoê ahuru no to ratou haamoriraa i te idolo e faaroo ore. Ua tamata râ ratou i te haru ia Ierusalema. Ua hinaaro paha Satani e faaore i te opu hui arii e aratai tia ˈtu ia Iesu. E ere râ te opuaraa a Iehova e ia haruhia Ierusalema. Faaora semeio atura ïa oia i to ˈna nunaa taiva ore ma te haamou i te nuu Asura.—Arii 2, 19:32-35; Isa. 10:5, 6, 12-15.

BABULONIA—TE TORU O TE AFII

9, 10. (a) Eaha ta Iehova i faatia ia rave to Babulonia? (b) Eaha tei titauhia ia tupu hou a itehia ˈi te tupuraa o te parau tohu?

⁹ Te faahohoˈa ra te toru o te afii o te puaa ta Ioane i ite i te basileia o Babulonia te oire pu. Ua faatia Iehova i to Babulonia ia haamou ia Ierusalema e ia hopoi tîtî i to ˈna nunaa. Na mua ˈtu râ, ua faaara Iehova i te mau Iseraela faaroo ore i te ati ta ratou e faaruru. (Arii 2, 20:16-18) Ua tohu oia e aita e arii faahou te parahi i nia i “te terono a Iehova” i Ierusalema. (Par. 1, 29:23) Ua fafau atoa Iehova e e tae mai te hoê huaai o te arii Davida e o ˈna “te Fatu mau” o teie mana arii.—Ezk. 21:25-27.

¹⁰ Ua faaite te tahi atu parau tohu e e tae mai te Mesia, aore ra Tei faatavaihia, a tavini ai te mau ati Iuda i te hiero. (Dan. 9:24-27) Ia au i te tahi atu parau tohu, papaihia hou Iseraela a hopoi-tîtî-hia ˈi i Babulonia, e fanauhia te Mesia i Betelehema. (Mika 5:2) Ia tupu teie mau parau tohu, e titauhia ïa ia tiamâ mai te mau ati Iuda ia Babulonia, ia hoˈi ratou i ǒ ratou e ia patu faahou ratou i te hiero. E ere râ i te peu matauhia e Babulonia ia tuu i te feia ta ratou i haru. E nafea ïa? Ua faaite Iehova i te pahonoraa i ta ˈna mau peropheta.—Am. 3:7.

11. Mea nafea te buka a Daniela e o te Apokalupo i faataa ˈi i te Hau emepera Babulonia? (A hiˈo i te nota i raro i te api.)

¹¹ Tei rotopu te peropheta Daniela i te feia i hopoi-tîtî-hia i Babulonia. (Dan. 1:1-6) Na roto ia ˈna, ua faaite Iehova i te anairaa basileia e itehia ia topa Babulonia. Ua tatara Iehova i te auraa o taua mau parau aro ra ma te faaohipa i te mau taipe taa ê. Ei hiˈoraa, i roto i te hoê moemoeâ no ǒ mai i te Atua ra, ua ite te arii Babulonia ra o Nebukanesa  i te hoê tii rahi hamanihia e te metara rau. (A taio i te Daniela 2:1, 19, 31-38.) Na roto ia Daniela, ua faaite Iehova e te faahohoˈa ra te upoo auro o te tii rahi i te Hau emepera Babulonia. * Ua faahohoˈahia te puai o te ao nei e mono mai ia Babulonia e te ouma e te rima ario. O vai teie puai e eaha to ˈna huru i nia i te nunaa o te Atua?

MEDAI PERESIA—TE MAHA O TE AFII

12, 13. (a) Eaha ta Iehova i faaite no nia i te toparaa o Babulonia? (b) No te aha e nehenehe ai e parau e o Medai Peresia te maha o te afii o te puaa taehae?

¹² Hau atu i te hoê hanere matahiti hou te tau o Daniela, ua faaite Iehova na roto i te peropheta Isaia i te mau parau rii faufaa no nia i te puai o te ao nei o te haru ia Babulonia. Ua faaite Iehova e nafea te oire o Babulonia e topa ˈi. Oia atoa râ te iˈoa o te taata haru, oia hoi o Kuro no Peresia. (Isa. 44:28–45:2) E piti â orama ta Daniela i ite no nia i te Puai Medai Peresia o te ao nei. I roto hoê, e au teie basileia i te hoê daba ua tia te hoê paeau i nia. E ua parauhia oia ia “amu e ia rahi.” (Dan. 7:5) I roto i te tahi atu orama, ua ite Daniela i teie puai o te ao nei faataipehia e te hoê mamoe oni e piti tara.—Dan. 8:3, 20.

¹³ Ua faaohipa Iehova i te Hau emepera Medai Peresia no te faatupu i te parau tohu ma te faataahuri ia Babulonia e ma te faahoˈi i te mau Iseraela i ǒ ratou. (Par. 2, 36:22, 23) Tera râ, ua tamata teie puai rahi i te faaore i te nunaa o te Atua. Ia au i te buka Bibilia a Esetera, e opuaraa ino mau ta Hamana te faatere hau nui no Peresia. Ua faanaho oia e taparahi i te mau ati Iuda atoa e ora ra i roto i te tuhaa fenua o te Hau emepera Peresia e ua faataa atoa i te taio mahana o tera taparahiraa. Ua faaora râ Iehova i to ˈna nunaa i te riri o te huaai o Satani. (Ese. 1:1-3; 3:8, 9; 8:3, 9-14) E nehenehe ïa e parau e o Medai Peresia te maha o te afii o te puaa o te Apokalupo.

HELENI—TE PAE O TE AFII

14, 15. Eaha te mau parau rii faufaa ta Iehova i faaite no nia i te Hau emepera Heleni i tahito?

¹⁴ Te faahohoˈa ra te pae o te afii o te puaa taehae o te Apokalupo ia Heleni. Mai ta Daniela i faaite a tatara ˈi oia i te auraa o ta Nebukanesa i ite i roto i to ˈna taoto, te faahohoˈa ra te opu e te humaha veo o te tii rahi i te hoê â puai. Ua ite atoa Daniela e piti orama o te horoa ra i te mau tuhaa rii faahiahia mau no nia i te basileia no Heleni e to ˈna faatere rahi roa ˈˈe.

¹⁵ I roto hoê orama, ua faaauhia Heleni i te hoê nemera e maha pererau, ei faaiteraa e e upootia oioi teie hau emepera i nia i te tahi atu mau nunaa. (Dan. 7:6) I roto i te tahi atu orama, ua faataa Daniela mea nafea te hoê puaaniho oni e tara rahi to ˈna i te haapohe-oioi-raa i te hoê mamoe oni e piti tara, oia hoi o Medai Peresia. Ua parau Iehova ia Daniela e te faahohoˈa ra te puaaniho oni ia “Iavana,” oia hoi o Heleni, e te tara rahi i te hoê o to ˈna mau arii. I muri aˈe, ua papai Daniela e e fati te tara rahi e e monohia te reira e na tara iti aˈe e maha. Noa ˈtu e ua papaihia teie parau tohu tau senekele hou Heleni a riro mai ai ei puai rahi, ua tupu iho â te mau parau rii faufaa atoa. Ua aratai o Alexandre le Grand, te arii puai aˈe o Heleni i tahito,  i to ˈna nuu no te aro ia Medai Peresia. Ua fati râ teie tara rahi i te poheraa teie arii i te 32raa noa o to ˈna matahiti a puai roa ˈi te faito o to ˈna mana. Rave ihora ta ˈna tenerara taitahi e maha i te hoê tuhaa o to ˈna basileia.—A taio i te Daniela 8:20-22.

16. Eaha ta Antiochus IV i rave?

¹⁶ I muri aˈe i te haruraa ia Medai Peresia, ua faatere Heleni ia Iseraela. I tera taime, ua hoˈi te mau ati Iuda i te Fenua tǎpǔhia e ua patu faahou i te hiero i Ierusalema. O ratou noâ te nunaa maitihia e Iehova e o te hiero patu-faahou-hia noâ te pu o te haamoriraa mau. I te senekele piti râ hou te Mesia, ua hamani ino to Heleni, te pae o te afii o te puaa taehae, i te nunaa o te Atua. Ua hamani o Antiochus IV, hoê o na feia aiˈa o te hau emepera amahamaha a Alexandre, i te hoê fata no te atua etene i te hiero i Ierusalema. E ua parau oia e e haapohehia te feia atoa e pee i te haapaoraa ati Iuda. E ohipa ino mau â teie no ǒ mai i te hoê tuhaa o te huaai o Satani! Fatata râ Heleni i te monohia e te tahi atu puai o te ao nei. O vai te ono o te afii o te puaa taehae?

ROMA—TE ONO O TE AFII, “MEA RIARIA E TE MEHAMEHAHIA”

17. Eaha te tuhaa taa maitai o te Genese 3:15 ta te ono o te afii i faatupu?

¹⁷ O Roma te puai rahi a ite ai Ioane i te orama o te puaa taehae. (Apo. 17:10) Ua faatupu Roma, te ono o te afii, i te hoê tuhaa taa maitai o te parau tohu o te Genese 3:15. Ua faaohipa Satani i te hau Roma no te haaparuparu i te “poro avae” o te huero. Mea nafea? Ma te pari haavare e ua orure hau o Iesu e ma te haapohe ia ˈna. (Mat. 27:26) Oioi râ teie pepe i te ora no te mea ua faatia-faahou-hia mai Iesu e Iehova.

18. (a) O vai te nunaa apî ta Iehova i maiti, e no te aha? (b) Mea nafea te huaai o te ophi e tamau noa ˈi i te faaite i to ˈna riri i nia i te huero o te vahine?

¹⁸ Ua tauturu te mau aratai haapaoraa o Iseraela i to Roma ia te haru ia Iesu e ua patoi te rahiraa o te nunaa Iseraela ia ˈna. No reira Iehova i faarue ai ia ratou ei nunaa no ˈna. (Mat. 23:38; Ohi. 2:22, 23) Maiti atura oia i te hoê nunaa apî, ‘te Iseraela o te Atua.’ (Gal. 3:26-29; 6:16) O te amuiraa o te mau Kerisetiano faatavaihia teie nunaa, e ati Iuda e e Etene atoa to roto. (Eph. 2:11-18) I muri aˈe i to Iesu poheraa e tia-faahou-raa, ua tamau te huaai o te ophi i te faaite i to ˈna riri i nia i te huero o te vahine. E rave rahi taime to Roma tamataraa i te faaore i te amuiraa Kerisetiano, te piti o te tuhaa o te huero. *

19. (a) Mea nafea Daniela i te faataaraa i te ono o te puai o te ao nei? (b) Eaha te hiˈopoahia i roto i te tahi atu tumu parau?

¹⁹ I roto i te moemoeâ ta Daniela i faataa ia Nebukanesa, ua faahohoˈahia Roma e na avae auri o te tii rahi. (Dan. 2:33) Ua ite atoa Daniela i te hoê orama o te faataa maitai ra i te Hau emepera Roma, oia atoa râ te puai o te ao nei o te na roto mai ia Roma. (A taio i te Daniela 7:7, 8.) A tau senekele, e au Roma i te hoê puaa “mea riaria e te mehamehahia, e te puai rahi.” Ia au râ i te parau tohu, ‘hoê ahuru tara’ te fa mai mai roto mai i teie hau emepera. E tupu atoa mai te tahi atu tara iti o te riro ei mea puai aˈe i te tahi atu. Eaha teie na tara hoê ahuru, e o vai te tara iti? Te tuea ra teie tara iti i teihea tuhaa o te tii rahi o te moemoeâ a Nebukanesa? Na te tumu parau ïa i te api 16 e pahono mai.

[Nota i raro i te api]

[Uiraa haapiiraa]