Paraleipomeno buka matamua 29:1-30
29 Parau atura te arii Davida i te amuiraa taatoa: “Mea apî ta ˈu tamaiti o Solomona, o ta te Atua i maiti,+ e aita oia i ineine,+ e mea rahi te ohipa, e ere hoi teie hiero* no te taata, no te Atua râ o Iehova.+
2 Ua horoa rahi au ia ˈu no te faaineineraa i te paturaa o te fare o to ˈu Atua. Ua horoa vau i te auro, te ario, te veo, te auri,+ te raau,+ te ofai sema e te ofai taa ê, te ofai iti nehenehe no te faaunauna, te ofai maitai roa e rave rau e te ofai sisa e rave rahi.
3 E no to ˈu oaoa rahi i te fare o to ˈu Atua,+ te rave atoa ra vau i te auro e te ario i roto i ta ˈu iho faufaa+ no te horoa no te fare o to ˈu Atua, hau atu i te mau mea atoa ta ˈu i faaineine no taua fare moˈa ra,
4 oia hoi 3 000 taleni* auro no Ophira+ mai e 7 000 taleni ario tamâhia no te tapiri i nia i te mau pǎpai piha,
5 te auro no te mau mea auro, e te ario no te mau mea ario, e no te mau ohipa atoa a te feia rimaî. I teie nei, o vai i rotopu ia outou i teie mahana o te hinaaro e pûpû i te ô ia Iehova?”+
6 Pahono maira ïa te huiarii o te mau opu fetii, te huiarii o te mau opu o Iseraela, te mau raatira tausani e raatira hanere,+ e te mau raatira o te haapao i te mau ohipa a te arii.+
7 Horoa maira ratou no te fare o te Atua mau: 5 000 taleni auro, 10 000 darekona,* 10 000 taleni ario, 18 000 taleni veo e 100 000 taleni auri.
8 Te taata atoa e ofai maitai roa ta ˈna, ua horoa ïa i te reira ia tuuhia ˈtu i roto i te vairaa taoˈa o te hiero o Iehova, o ta Iehiela+ ati Geresona+ e haapao.
9 Ua oaoa te nunaa i te pûpû i tera mau ô horoa noa, ua horoa hoi ratou na Iehova ma te aau taatoa,+ e ua oaoa roa atoa te arii Davida.
10 Arue atura Davida ia Iehova i mua i te amuiraa taatoa. Teie ta Davida i parau: “Ia aruehia oe, e Iehova te Atua o Iseraela to matou metua tane e a muri noa ˈtu.
11 E Iehova, na oe te mana,+ te puai rahi,+ te nehenehe, te hanahana e te teitei,*+ na oe hoi te mau mea atoa i nia i te raˈi e i nia i te fenua.+ Na oe te mana arii e Iehova!+ O oe anaˈe te faatere i nia i te taatoaraa.
12 No ǒ mai ia oe te taoˈa rahi e te hanahana,+ e na oe e faatere i te mau mea atoa.+ Tei roto i to rima te mana+ e te puai+ no te faariro i te taata ei taata rahi+ e no te horoa i te puai i te taatoaraa.+
13 E teie nei, e to matou Atua, te haamauruuru nei matou ia oe e te arue nei matou i to iˈoa hanahana.
14 “O vai râ vau e o vai to ˈu nunaa ia pûpû matou i te mau ô horoa noa mai teie? No ǒ mai hoi te mau mea atoa ia oe ra, e no roto mai i to rima te mau mea atoa ta matou i pûpû ia oe.
15 E feia ěê e te purutia hoi matou i mua ia oe, mai to matou mau tupuna atoa.+ E au to matou pue mahana i te fenua nei i te ata,+ aita e tiaturiraa.
16 E Iehova to matou Atua, teie mau taoˈa atoa ta matou i faaineine no te patu i te hoê fare no oe, o te faahanahana i to iˈoa moˈa, no roto mai ïa i to rima e na oe te reira.
17 E to ˈu Atua, ua ite maitai au e hiˈopoa oe i te aau+ e e mauruuru oe i te hapa ore.*+ Ua pûpû vau i teie mau mea atoa ma te aau tae* e te oaoa rahi nei au i te ite i to nunaa i ǒ nei e pûpû ra i te ô horoa noa.
18 E Iehova, te Atua o Aberahama, o Isaaka, e o Iseraela, to matou mau tupuna, a tauturu i teie nunaa ia tamau i teie huru feruriraa horoa noa e ia tavini ia oe ma te aau taatoa.+
19 E a tauturu i ta ˈu tamaiti o Solomona ia haapao ma te aau taatoa+ i ta oe mau faaueraa, ta oe mau haamanaˈoraa e ta oe mau ture.+ A tauturu ia ˈna ia rave i tera mau mea atoa e ia patu i te hiero* o ta ˈu i faaineine i te ohipa no te paturaa.”+
20 Parau atura Davida i te amuiraa taatoa: “I teie nei, a arue ia Iehova to outou Atua.” Arue aˈera te amuiraa taatoa ia Iehova te Atua o to ratou mau tupuna. Piˈo ihora ratou e tipapa ihora i mua ia Iehova e i mua i te arii.
21 I tera mahana e to muri iho, ua pûpû ratou i te tusia ia Iehova e ua pûpû ratou i te tusia taauahi+ ia Iehova: 1 000 puaatoro oni apî, 1 000 mamoe oni, 1 000 fanauˈa mamoe oni, e ta ratou mau tusia uaina.+ Ua pûpû ratou e rave rahi tusia no Iseraela taatoa.+
22 Ua tamaa e ua inu ratou i mua ia Iehova i tera mahana ma te oaoa rahi.+ E no te piti o te taime, ua faaarii ratou ia Solomona te tamaiti a Davida e ua faatavai ia ˈna i mua ia Iehova ei aratai.+ Ua faatavai atoa ratou ia Zadoka ei tahuˈa.+
23 Parahi ihora ïa Solomona i nia i to Iehova terono+ ei arii ei mono ia Davida to ˈna metua tane. Ua manuïa ta ˈna faatereraa e ua faaroo te ati Iseraela taatoa ia ˈna.
24 Ua auraro te huiarii taatoa,+ te mau aito puai,+ e pauroa te tamaiti a te arii Davida+ i te arii Solomona.
25 Ua faariro Iehova ia Solomona ei taata rahi roa i te aro o Iseraela taatoa e ua horoa ˈtu oia i te hanahana aita i noaa aˈenei i te tahi arii o Iseraela na mua ˈtu ia ˈna.+
26 Mea na reira te faatereraa Davida te tamaiti a Iese ia Iseraela.
27 E 40 matahiti to ˈna faatereraa ia Iseraela. I Heberona ua faatere oia 7 matahiti,+ e i Ierusalema ua faatere oia 33 matahiti.+
28 Ua pohe Davida i to ˈna ruhiruhiaraa,+ ua fanaˈo oia i te hoê oraraa maoro, te taoˈa rahi e te hanahana. E riro maira Solomona ta ˈna tamaiti ei arii ei mono ia ˈna.+
29 No te aamu o te arii Davida, mai te omuaraa e tae atu i te hopea, ua faatiahia i roto i te mau papai a Samuela te taata tatara orama, Natana+ te peropheta, e Gada+ te taata ite orama.
30 Te faatia ra tera mau papai i ta Davida faatereraa, to ˈna puai, e te mau ohipa i tupu no ˈna, no Iseraela e no te mau faatereraa arii atoa ati aˈe.
Nota i raro i te api
^ Aore ra “pare,” “aorai.”
^ 1 taleni: 34,2 kg. Hiˈo i te tuhaa hau B14.
^ E moni auro no Peresia. Hiˈo i te tuhaa hau B14.
^ Aore ra “tura.”
^ Aore ra “haerea afaro.”
^ Heb: “ma te tia o to ˈu aau.”
^ Aore ra “pare,” “aorai.”
