Maganu jaala ikkate, isire rosanna iso hagiirsiisannore assa hasiissannohe. Hatto assittoro, Maganu atewa “shiqqi yaanno.” (Yaiqoobi 4:8) Qullaawu Maxaafi, Maganu “ninkewiinni dixeertiˈrino” yee jawaachishannonke.—Soqqamaasinete Looso 17:27.

•  Magano afate assa hasiissannonkere

•  Magano afate daafira mannu hedannota soˈro ikkitino hedo

 Qullaawa Maxaafa nabbawi

•  Qullaawu Maxaafi yaannore: “Qullaawa Borro baala Maganunnihu Qullaawu Ayyaani kulanna borreessinoonnite.”—2 Ximootewoosi 3:16.

•  Qummeeshshu tiro: Qullaawu Maxaafi Qixxeessaanchi Maganoho. Isi hedosi Qullaawa Maxaafa borreessi manni surrera worino. Isi hiittoo heeshsho heeˈnammora hasiˈrannoro, konni baxxino Maxaafi giddo kulinonke. Qoleno isi hiittoo Maganootiro, lawishshaho baxillesi, taashshosinna maarosi kulinonke.—Fulo 34:6; Marro 32:4.

•  Assa dandaattore: Qullaawa Maxaafa barru baala nabbawi. (Iyyaasu 1:8) Nabbawattore hiinci woy heeshshi gotti assite hedi. Tenne assate ateneeto togo yite xaˈmi: ‘Tini Maganu daafira maa rosiissannoe?’—Faarso 77:12.

   Lawishshaho, Ermiyaasi 29:11 nabbabbe kaˈe, ateneeto togo yite xaˈmi: ‘Maganu anera halchannori maati? Keerehonso baote? Isi rabbisiˈra baxannohonso, albillitte dancha heeshsho heeˈrammora halchanno Maganooti?’

 Kalaqama hixamanyite lai

•  Qullaawu Maxaafi yaannore: “Alame kalaqantuhunni kayise mannaho leellannokkihu Maganu dani, hegere wolqasinna Maganimmasi, isi kalaqino kalaqami aana xabbe leeltanno.”—Roomu Sokka 1:20.

•  Qummeeshshu tiro: Mittu angate ogimma loosi ogeessu daafira, woy mitte maashine hatte maashine seekkinohu daafira kultannori noonte gede, illete leellanno kalaqamino Maganu ayimma daafira kulannori no. Lawishshaho, hedate dandoonkenna mannu surre xurqa ikkase Maganu hayyore kultanno; qoleno arrishshotenna wole beeddahe giddo noo wolqa Maganu wolqa hendeemmo gede assitannonke.—Faarso 104:24; Isayaasi 40:26.

•  Assa dandaattore: Yanna gaaˈmite, kalaqamu daafira rosi. Konne assatto woyite, ateneeto togo yite xaˈmi: ‘Kalaqamu aana laˈneemmo ogimma Maganu daafira maa kultanno?’ Hige kalaqamu Kalaqaanchu daafira kulannonkekkihu batinyu coyi no. Isi Qullaawa Maxaafa uyinonkehu iseraati.

 Maganu suˈma woshshi

•  Qullaawu Maxaafi yaannore: “Isi . . . suˈmaˈya ayirrisanno [“suˈmaˈya afino,” Haaro Alame Tiro] daafira goleemmosi. Woshshiˈrannoe woyite, ‘Yee’ yeemmosi.”—Faarso 91:14, 15.

•  Qummeeshshu tiro: Suˈmisi Yihowa ikkino Magani, suˈmasi affinorenna suˈmasi ayirrinyunni woshshitannore ille wore towaatannonsa. a (Fulo 6:3, lekkaalliidi qaagiishsha; Milkiyaasi 3:16) Maganu suˈmasi kule, isonooto ninkera egensiisinonke. Isi “Ani Yihowaati. Suˈmiˈyano konneeti” yiino.—Isayaasi 42:8, Haaro Alame Tiro.

•  Assa dandaattore: Yihowa daafira coyiˈratto woyite, suˈmasi woshshi.

 Huuccattotenni Yihowa hasaawisi

•  Qullaawu Maxaafi yaannore: “Kaaliiqi . . . woshshidhannorira baalaho mule no.”—Faarso 145:18.

•  Qummeeshshu tiro: Yihowa ammanatenni huuccidhannosiriwa shiqqi yaanno. Magano magansiˈneemmo doogga giddo mitte huuccattote; qoleno huuccatto iso ayirrinseemmota leellishshanno.

•  Assa dandaattore: Ganyite Magano huucciˈri. (1 Teselonqe 5:17) Yaachishannoherenna giddokkita isira hasaaphi.—Faarso 62:8. b

 Ammanakki kaajjishiˈri

•  Qullaawu Maxaafi yaannore: “Ammaˈna nookkiha Magano hagiirsiinsara didandiinanni.”—Ibiraawoota 11:6.

•  Qummeeshshu tiro: Maganunniwa shiqate, iso ammaˈna hasiissannonke. Qullaawu Maxaafi kulanno garinni, ammanate yaa Maganu noota ammana calla ikkitukkinni, iso woˈmu wodaninni addaxxate; qoleno coyiˈrino qaali woˈmannotanna seerisi halaale ikkinota woˈmunni woˈma hawaqiˈrate. Mittu manchi ledo dancha jaalooma kalaqiˈrate, hakkonne mancho ammana hasiissanno.

•  Assa dandaattore: Ammana heedhannonkehu egenno heedhunkerooti. (Roomu Sokka 10:17) Konni daafira, Qullaawa Maxaafa xiinxallite Maganonna amaalesi addaxxa dandaattota buuxi. Yihowa Farciˈraasine Qullaawa Maxaafa xiinxallissannohe. c

 Magano hagiirsiisannore assi

•  Qullaawu Maxaafi yaannore: “Magano baxate yaa hajajosi agadhate.”—1 Yohaannisi 5:3.

•  Qummeeshshu tiro: Yihowa, dandaaminsa deerrinni hajajosi agadhite baxxannosita leellishshannoriwa shiqqi yaanno.

•  Assa dandaattore: Qullaawa Maxaafa xiinxallatto woyite, Maganu baxannorenna giwannore huwatate woˈnaali. Ateneeto togo yite xaˈmi: ‘Kalaqaanchoˈya hagiirsiisate maa maa woyyeessiˈra hasiissannoe?’—1 Teselonqe 4:1.

 Maganu amaale harunsite danchummasi qamasse lai

•  Qullaawu Maxaafi yaannore: “Kaaliiqi shaqqado ikkinota shiqqine [“qamassine,” Haaro Alame Tiro] laˈe.”—Faarso 34:8.

•  Qummeeshshu tiro: Maganu, danchummasi heeshshonke giddo qamanse laˈnammora koyisinonke. Baxillesinna kaaˈlosi heeshshokkinni laittoro, isiwa shiqa hasiˈrattoti dihuluullissannote.

•  Assa dandaattore: Qullaawa Maxaafa nabbawatto woyite, heeshshokki giddo amaalesi harunsa dandaatto gara hedi; qoleno tini abbitanno atoote heeshshokkinni laˈˈate woˈnaali. (Isayaasi 48:17, 18) Hakkiinni saeno, Maganu kaaˈlonni qarra dandee sainohu, uminsatano ikko maatensa heeshsho woyyeessiˈrinohu, hattono giddiidi harshammo afiˈra dandiino manni xagge hixamanyite xiinxalli. d

 Soˈro ikkitino hedo: Mannu Maganu ayimma afa didandaanno.

 Halaale: Maganu daafira afa dandiineemmokki coyi nooti dikaandannite; lawishshaho, illete leellannokkiha ayyaanu bisosi huwata didandiineemmo. Ikkollana, Magano afa dandiinanni. Isinni Qullaawu Maxaafi, hegere heeshsho afiˈrate Magano afa hasiissannonketa kulanno. (Yohaannisi 17:3) Qullaawu Maxaafi Kalaqaanchinkere, ayimmasi, isi mannahonna baattote hedinore, hattono seerasi kulannohu ninke mannu oosora leellanno garinniiti. (Isayaasi 45:18, 19; 1 Ximootewoosi 2:4) Aleenni laˈnummonte gede, Qullaawu Maxaafi Maganu suˈmano kulanno. (Faarso 83:18) Konni daafira, Magano afa calla ikkikkinni isi jaalla ikka dandiineemmo.—Yaiqoobi 4:8.