Huuccatto Assiˈra Hasiissannoehu Mayiraati? Maganu Huuccattoˈya Macciishshe Qolanno?
Qullaawu Maxaafi mayyaanno?
Ee, qolanno. Qullaawu Maxaafino ikko heeshshonke giddo laˈnoommori, Maganu huuccatto macciishshe qolannota buuxisanno. Qullaawu Maxaafi togo yaanno: “[Maganu] ayirrissannosirira hasiisannonsare baala aannonsa; raarensa macciishshe gatisannonsa.” (Faarso 145:19) Ikkirono, Maganu huuccattokki macciishshanno gede ati assa hasiissannoheri no.
Maganu assinammora hasiˈrannore
Yesuusa, Maariyaami, qullaawoota, sokkaasine woy misile ikkikkinni Magano huucciˈra hasiissannonke. ‘Huuccatto macciishshannohu’ Magano Yihowa callaati.—Faarso 65:2, 3.
Maganu fajjo ledo sumuu yaannore woy Qullaawu Maxaafi rosiisanno garinni isi fajjino coye huucciˈra.—1 Yohaannisi 5:14.
Yesuusi silxaane huwante, isi suˈminni huucciˈra hasiissannonke. Yesuusi, “Ane widoonni ikka hoogiro, ayino Anniˈyawa daannohu dino” yiino.—Yohaannisi 14:6.
Huluullammummokkinni ammanatenni huucciˈra hasiissannonke; hasiisanno woyite ammana ledinke yine huucciˈra dandiineemmo.—Maatewoosi 21:22; Luqaasi 17:5.
Ninkeneeto heeshshi assine, hattono giddonketa fushshine Maganoho kuˈla hasiissannonke. Qullaawu Maxaafi Magano, “Woˈmunkura Aliidiha ikkite heedhenni jooguulle towatatto” yaanno.—Faarso 138:6.
Agurrummokki huucciˈra. Maganu Qaali togo yaanno: “Agurtinikkinni huuccidhe!”—1 Teselonqe 5:17.
Maganu illachishannokki coyibba
Sirchokki woy gaˈrekki. “Halaalinta Maganu manna mallaadannokkita xa buuxoommo. Aye gosano ikkiro Maganu waajjannosihanna dancha loosannoha baxanno.”—Soqqamaasinete Looso 10:34, 35.
Ikkite huucciˈratto gara. Huuccatto ofolte, kumbuulte, guluphite, woy uurrite assiˈra dandaatto.—1 Duduwo 17:16; Nehimiya 8:6; Daanieeli 6:10; Maarqoosi 11:25.
Coyidhe woy wodanunni calla huucciˈra. Wolu manni macciishshikki wodanikkinni calla huucciˈratto huuccatto nafa Maganu macciishshanno.—Nehimiya 2:1-6.
Qarrisinohe coyi jawano ikko shiima. Maganu ‘atere malannohu iso ikkino daafira, qarrisannohere baala isi aana tuqqatto gede’ amaalinohe.—1 Pheexiroosi 5:7.