“Ane suˈminni huuccidhinannire baala Anniˈya aannoˈne.” —Yohaannisi 16:23.

Yesuusi coyiˈrinori Yihowa misillate, qullaawootu, sokkaasinete, woy reyitino annuwinke widoonni ikkikkinni Yesuusi Kiristoosi suˈminni huucciˈnammora hasiˈrannota leellishanno. Yesuusi suˈminni Magano huucciˈneemmo woyite, Yesuusi assinonkere huwantoommota leellinsheemmo. Yesuusi, “Ane widoonni ikka hoogiro, ayino Anniˈyawa daannohu dino” yiino.—Yohaannisi 14:6.

“Qarraˈne baala isira hasaaphe.”—Faarso 62:8.

Huucciˈneemmo woyite Yihowa baxillaanchu anninke gede assine hasaawisa hasiissannonke. Huuccattote maxaafa nabbawa woy yinoommota yaa dihasiissannonke; hatteentenni giddonketa ayirrinyunni isira hasaapha hasiissannonke.

“Isi hedino garinni huucciˈneemmore baala macciishshannonke.”—1 Yohaannisi 5:14.

Qullaawu Maxaafi Yihowa ninkera maa assannonkeronna ninkeno isira maa assinammora hasiˈrannoro kulannonke. Maganu huuccattonke macciishshanno gede “isi hedino garinni” huucciˈra hasiissannonke. Togo assate, iso seekkine anfeemmo gede Qullaawa Maxaafa xiinxalla hasiissannonke. Hatto ikkiro, huuccattonke Magano hagiirsiissannota ikkitanno.

Hasiisannohe coyi daafira huucciˈri. Heeshshote lowo geeshsha hasiisannonkere yaano sagale, uddanonna galleemmo mine afiˈrate huucciˈra dandiineemmo. Dancha doorsha doodhineemmo gede hayyo aankeranna iillannonke qarra dandiine saˈneemmo gede kaaˈlankerano huucciˈra dandiineemmo. Ammana ledankeranna gatona yaankera hattono kaaˈlankera Magano huucciˈra dandiineemmo.—Luqaasi 11:3, 4, 13; Yaiqoobi 1:5, 17.

Wolootaho Huucce. Oosonsa baxanno anninna ama oosonsa mimmitu ledo baxanturo hagiidhanno. Yihowano uullate aana noo oososi mimmitu ledo baxantara hasiˈranno. Galtenkera, maatenkera, oosonkera hattono jaallankera huucca hasiissannonke. Rosaanchu Yaiqoobi “Kuˈu kuˈunnira huucco” yee borreessino.—Yaiqoobi 5:16.

Huuccattotenni Magano Galatte. Qullaawu Maxaafi Kalaqaanchinke daafira togo yaanno: “[Isi] dancha looso loosa diagurino. Gordunni xeena soyannoˈne; gideno yannatenni aannoˈne; sagaletenninna hagiirrunni wodana kassi assannoˈne.” (Soqqamaasinete Looso 14:17) Maganu assinonkere baala hendeemmo woyite huuccattotenni iso galatate kakkaˈneemmo. Heeˈneemmo garino Magano galanteemmota leellishannoha ikka hasiissannosi.—Qolasiyaasi Sokka 3:15.

Mito woyite giddonkenni huucciˈnoommo huuccattora bayichonko dawaro afiˈra hoongeemmo daafira, hexxo mudhinammora dandiineemmo. Hatto yaa Maganoho ninkeri didhiwannosi yaateni? Deeˈni. Hanni agurrummokkinni huucciˈra hasiissannonketa leellishannoha aane noo lawishsha laˈno.

Umi birxichira qummi assinoonnihu Istiivi, “Agurummokkinni huucciˈra hoogoommoro, hexxo mudhe hoogoommo” yiino. Agurikkinni huucciˈranno gede kaaˈlinosiri maati? Isi Qullaawa Maxaafa xiinxalle huuccatto assiˈranna agurikkinni huucciˈra hasiissannosita rosino. Istiivi togo yiino: “Lubbote jaallaˈya baxillunni lowore kaaˈlitinoe daafira, Magano huuccattotenni galaxxeemmosi. Xa albinni roore hagiirraamo ikkoommo.”

“Maganu ane gedee manni huuccatto dimacciishshanno” yite heddannoti Jeenina? Ise togo yitino: “Waagu dinoe yee hedeemma woyite, hatto yee hedeemmahu mayiraatiro wodancheemma gede kaaˈlaera Magano huucciˈroomma.” Tini kaaˈlitinosehu hiittoonniiti? Ise “Maganoho hasaaphaˈya, aneneeto isi laˈˈannoe garinni laeemma gedenna wodaniˈya bushiishiero nafa isi hakko garinni laˈˈannoekkita afeemma gede kaaˈlitinoe” yitino. Hakkiinni mayi ikkiyya? Ise togo yitino: “Huuccatto Yihowa seekke afeemma gede, isi baxillaanchonna towaatanno Magano, Annanna Jaala ikkinota wodancheemma gede kaaˈlitinoe; isi hasiˈranno garinni agurummakkinni huucciˈrummaro woˈmanka woyite kaaˈlannoe.”

Hanni Isabeeli woˈnaalshano laˈno. Ise godowinni heedheenna akimootu iltanno qaaqqi fayyo ikkinokkita kultinose. Isabeeli lowo geeshsha massino. Mitu isinni godowu gato huntanno gede amaaltinose. Ise “Lowo geeshsha yaadoomma daafira reyammaraati yee hedoomma” yitino. Hakkiinni maa assituyya? “Kaaˈlaera Magano marro marro hige huucciˈroomma” yitino. Gedensoonni ise fayyimmate qarri noosiha labbaa qaaqqo (suˈmasi Jeraardi yinoonni) iltino. Isabeeli Maganu huuccattose macciishshinohu gede assite heddino? Eewana! Hiittoonni? Ise togo yitino: “Xa 14 diro ikkinosi qaaqqiˈya fayyimmate qarri noosiha ikkirono, hagiirru noo heeshsho heeˈranni noota laeemma woyite, Maganu Yihowa huuccattoˈya seekke macciishshinota wodanchoomma. Qaaqqiˈya Maganu uyinoete muxxe eltooti.”

Ise coyidhinori faarsaasinchu coyiˈrinore qaangeemmo gede assannonke; isi togo yiino: “Kaaliiqa, gadadaammu huuccatto macciishshite, jawaachishattonsa; maccakkino insa widira [qolatto.]” (Faarso 10:17) Tenne afanke Magano agurrummokkinni huucciˈneemmo gede kaaˈlitannonke.

Qullaawu Maxaafi giddo Yesuusi huucciˈrinota batinye huuccatto borreessinoonni. Lowo geeshsha egennantinoti rosaanosira rosiisino huuccattooti. Tenne huuccattonni maa ronseemmo?