Umi Saamueeli 9:1-27
-
Saamueeli Saaoolinni xaadi (1-27)
9 Biiniyaami gaꞌre wido ikkinohu Qiisi yinannihu mittu lowo geeshsha dureessu manchi no; isi Biiniyaamichu Afiya beetti, Bekoraati beetti, Tseroori beetti, Abiieeli beettooti.
2 Isira Saaooli yinannihu lowo geeshsha xumu wedellichu beetti noosi; Israeelete giddo xummete iso ikkannohu dino; qoleno isi hojja baalanka manna rooranno.*
3 Saaooli anni Qiisi harre* baꞌeennasi beettisi Saaoolira, “Soqqamaanote giddonni mitto adhite hadhe harre hasi ballo” yiisi.
4 Insano Efireemihu ilaalaamu qooxeessinna Shaliisha gobba widoonni higge hadhu; harre kayinni diaffino. Insa Shaꞌꞌaaliimi gobba widoonni saꞌu; kayinni harre hakkono dino. Biiniyaamootu gobba baalano tuqqino; harre kayinni diaffino.
5 Insa Tsuufi gobba iillituta Saaooli ledosi nooha soqqamaanchosi togo yii: “Anniꞌya harrennire agure ninke daafira yaadannokki gede, amo agurre hingona.”
6 Soqqamaanchu kayinni togo yee qoli: “Kuneeti, konni katamira mittu ayirradu Maganu manchi no. Isi coyiꞌrannori baalu woꞌmikkinni digatanno. Xa hakkira haꞌnona kai. May afino isi harre hiikko afiꞌneemmoro kulankera dandaanno.”
7 Hatte yannara Saaooli soqqamaanchosi togo yii: “Haꞌra haꞌneemmona, manchoho maa haaꞌne haꞌneemmo? Ogorinkera daabbo dino; halaalaanchu Magani manchira afansha assine uyneemmori mitturino dino. Ma assinummoro woyyakka?”
8 Hakko daafira soqqamaanchu galagale Saaoolira togo yii: “Kuneeti! Anewa shiima birru saante no.* Halaalaanchu Magani manchira ise oyemmo; isino harre hiikko afiꞌneemmoro kulannonke.”
9 (Hunda Israeelete waro mittu manchi Maganu biddishsha hasiꞌrara haꞌranno woyte togo yaanno: “Amme ajuuja laꞌꞌannohuwa haꞌnona.” Korkaatuno xaa yannara masaalaanchoho yinanniha hatte yannara ajuuja laꞌꞌannoho yinanni.)
10 Hakkiinni Saaooli soqqamaanchosi, “Dancha yootto. Kai haꞌnona” yii. Hakko daafira insa halaalaanchu Magani manchi heeꞌranno katama hadhu.
11 Insa katamunniwa massitanno doogo gooddidhanni heedhe, waa dirriꞌrara haꞌranni noo seenninni xaaddu. Konnira seenne, “Ajuuja laꞌꞌanno manchi heeꞌrannohu kowiichooti?” yite xaꞌmitu.
12 Insano, “Ee kowiichooti; hakkoye albaꞌneenni noona rakkine marre; mannu techo gotti yiino baycho kakkalo shiqishiꞌranno daafira isi katama daye no.
13 Katama eꞌinanni heedhinenni, sagale itara gotti yiino baycho haꞌrara albaanni isinni xaaddinanni. Kakkalo intara albaanni huuccatto assannohu iso ikkino daafira, mannu isi mara geeshsha diꞌꞌitanno. Hakkunni gedensaanni koysamino manni ita dandaanno. Hakko daafira isinni xaaddinannina rakkine hadhe.”
14 Konnira insa katama martu. Katama mereero iillitanno woyte Saamueeli gotti yiino baycho fulate insanni xaadara daanni no.
15 Saaooli daara mittu barrira albanni Yihowa Saamueelira togo yiino:*
16 “Gaꞌa tenne yannara Biiniyaami gobbanni dayno mancho atewa soyemmo. Atino iso manniꞌya Israeelete aana massagaancho assite buuri; isino mannaꞌya Filisxeemootu anganni gatisanno. Korkaatuno ikke gadadaaꞌmino gara laoommo; raarensanno anewa iillitino.”
17 Saamueeli Saaooli laita Yihowa togo yiisi: “‘Mannaꞌya gashshannoho’* yuummohe manchi konneeti.”
18 Hakkiinni Saaooli waalchunniwa Saamueeliwa shiqqi yee, “Ajuuja laꞌꞌanno manchi mini hiikkootiro kulie ballo” yii.
19 Saamueelino Saaoolira togo yee qoli: “Ajuuja laꞌꞌanno yini manchi aneeti. Ane balaxxe gotti yiino baycho fuli; techo sagale ane ledo ittinanni. Soodo haꞌrattona; anino afa hasiꞌrattore baalankare* kuleemmohe.
20 Sasu barrira albaanni baꞌino harre daafira yaaddooti; korkaatuno insa anfoonni. Israeelete heeꞌrannohu ayirradu coy baalu ayeho? Atehanna annikki mini baalunniha diꞌꞌikkino?”
21 Hatte yannara Saaooli togo yee qoli: “Ani Israeelete gaꞌre giddo shiimiidite Biiniyaami gaꞌre wido diꞌꞌikkoommo? Maateꞌyano Biiniyaami gaꞌre giddo noo maate baalantenni ajjinota diꞌꞌikkitino? Ikkina togo yiittoehu mayraati?”
22 Hakkiinni Saamueeli Saaoolinna soqqamaanchosi haaꞌre sagale intanni mine masse, ayirrado darga ofoshshiishinsa; hakko mito 30 ikkanno manni no.
23 Saamueeli sagale qishannoha, “‘Badde wori’ yee uummohe maala abbi” yii.
24 Hatte yannara sagale qishannohu tafu maala noo gedeenni abbe Saaoolira albaanni wori. Hakkiinni Saamueeli togo yii: “Albakkiinni noohu bande worroonniho. Konni baxxino barrira yite atera badde wortinohona iti. Korkaatuno, ‘Wosina koysoommo’ yee kuloommonsa.” Hakko daafira, Saaooli hakko barra Saamueeli ledo iti.
25 Hakkiinni insa gotti yiino baychinni katama dirritu; Saamueelino Saaooli ledo mineho aanaanni seekkinoonni darga* hasaawanni keeshshi.
26 Insa gutte kaꞌu; qoleno duuꞌmo saaqquta Saamueeli Saaooli mineho aanaanni seekkinoonni darga* woshshe, “Haꞌrattona qixxaawi” yii. Hakko daafira Saaooli qixxaawi; hakkiinni isinna Saamueeli gobbara fultu.
27 Insa katamunni fulte eela higge dirritanni heedheenna, Saamueeli Saaooli togo yii: “Soqqamaanchu alba hige haꞌranno gede kuli.” Hakkiinni soqqamaanchu alba hige haꞌrita, “Ati kayinni, Maganu qaale macciishshiisheemmohena noottowa uurri” yiisi.
Lekkaalliidi Qaagiishshuwa
^ Noo gedeenni tirriro, “qote ale lowo geeshsha seedaho.”
^ Noo gedeenni tirriro, “Meya harre.”
^ Noo gedeenni tirriro, “Ruuwe birru seqile.” Mitte seqile 11.4 giraame ikkitanno. Guwuursha B14 lai.
^ Noo gedeenni tirriro, “maccasi fanino.”
^ Woy “agarannoho.”
^ Noo gedeenni tirriro, “Wodanikkira noore baalankare.”
^ Woy “sagannatete.”
^ Woy “sagannate.”
