Umi Saamueeli 8:1-22
8 Saamueeli geedhi yannara oososi Israeelete daanyoota asse shoomino.
2 Bayru beettisi suꞌmi Iyyueeliiti; maaꞌnu beettisi suꞌmi Abiyahiiti; insa Bersaabehi yoo yitanno.
3 Oososi kayinni anninsa faale dihadhino; insa doogimale qiniite afiꞌrate sharrantanno; gubbo ittanno hattono yoo shokkishshanno.
4 Yannate gedensaanni Israeelete cimeeyye mitteenni gamba yite Saamueeliwa Raama daggu.
5 Insa togo yitusi: “Kuneeti! Xaate ati geedhootto; ikkollana oosokki ate faale dihadhino. Konnira wole dagante gede yoo yaannonke moote moohisinke.”
6 Ikkollana, “Yoo yaannonke moote moohisinke” yaansa Saamueeli dihagiirsiissinosi.* Hakkiinni Saamueeli Yihowa huucciꞌri;
7 Yihowano Saamueeli togo yiisi: “Mannu yaannohere baala macciishshi; korkaatuno mootensa ikkeemmota gibbinohu aneetilla ikkinnina ate diꞌꞌikkino.
8 Gibitsete gobbanni fushshummonsa barrinni kayisse techo geeshsha tenne assitanni no; insa ane agurte wole magannara soqqantino; xa ate aanano tenne assitanni no.
9 Hakko daafira yitannohere baala macciishshi. Ikkollana kaajjishshe qorophisiisinsa; moohannonsa mootera maa assate qoosso heedhannosirono kulinsa.”
10 Konnira Saamueeli moote moohisansara xaꞌmiꞌri mannira Yihowa yiinore baala kulinsa.
11 Isi togo yiinsa: “Moohannoꞌne mootera aane noore assate qoosso noosi: Oosoꞌne haaꞌre gama saragallisira woranno; gama faradaasine assanno; gama saragallisira albaanni doddannore assanno.
12 Isi kumu roorrootanna ontawu roorroota asse shoomanno; mito baatto loossannosire, mito gide middannosire hattono olu uduunnenna saragallu uduunne seekkitannore assiꞌranno.
13 Seenneꞌne haaꞌre shitto loosannore, sagale qishannorenna daabbo ganannore assanno.
14 Isi seyno seynoha loosidhinanniha, woyneꞌnehanna ejersu kaashshiꞌne darga adhe soqqamaanosira aanno.
15 Gidiꞌnehanna woyneꞌneha tonnunni mitte anga adhe, ledosi gashshaanoranna soqqamaanosira aanno.
16 Labballonna meya soqqamaanoꞌne, hattono seynoha laloꞌnenna harreꞌne adhe umisi loosira horoonsiꞌranno.
17 Saadaꞌne giddonni tonnunni mitto adhanno; kiꞌneno soqqamaanosi ikkitinanni.
18 Kiꞌne umiꞌnenni doodhitinoonni mootenni kainohunni wiꞌlitinanni barri daanno; ikkollana hakko barra Yihowa dimacciishshannoꞌne.”
19 Ikkollana mannu Saamueeli yiinota macciishsha giwe togo yii: “Deeꞌni, mootella moohinsankera hasiꞌneemmo.
20 Hakkiinni wole daga gede ikkineemmo; mootenke yoo yaannonke, massagannonke, hattono olu yannara olamannonke.”
21 Saamueelino mannu coyiꞌrinore baala macciishshihu gedensaanni, mannu yiinota Yihowara kuli.
22 Yihowa Saamueeli togo yii: “Yitinoheta macciishshi; gashshannonsa mooteno moohisinsa.” Hakkiinni Saamueeli Israeelete manna, “Mittu mittunku katamaꞌne higge” yiinsa.
Lekkaalliidi Qaagiishshuwa
^ Noo gedeenni tirriro, “busha labbe leeltinosi.”
