Umi Saamueeli 6:1-21
-
Filisxeemootu Taawoota Israeele qoltu (1-21)
6 Yihowa Taawooti Filisxeemete qoqqowira lamala agana keeshshino.
2 Filisxeeme kakkalaanonna kiilaano woshshite, “Yihowa Taawoota hiissinummoro woyyanno? Dargasi qola dandiineemmo gara kullenke” yitu.
3 Insano togo yitu: “Israeelete Magani Yihowaha gondooru taawoota sokkinanni woyte, saote kakkalo ledo sokke ikkinnina mulla anganni sokkinoonte. Hurtinannihu hatto assitiniro callaati; isi xaa geeshsha qorichishanni nooꞌnehu mayraatirono affinanni.”
4 Konnira Filisxeemootu, “Saote kakkalora maa sonkummoro woyyanno?” yite xaꞌmitu. Insano togo yitu: “Kiꞌne baalunkunna gashshaanoꞌne aana uwino qoomami mitto ikkino daafira, Filisxeemete gashshaano kiiro bikkinni onte culka quntudhote suudinninna onte culka yemahu suudinni seekkitine sokke.
5 Gobbaꞌne huntanni noo quntudhonna yemahi suudi misilla seekkanna Israeelete Magano ayirrisa hasiissannoꞌne. Hatto assitiniro, isi kiꞌne, maganoꞌnenna gobbaꞌne qorichisha agurannoha ikkara dandaanno.
6 Gibitsootunna Feriooni gede wodanaꞌne mayra dilleessitinanni? Maganu buuto qorichishinsata insa Israeele hadhara agurtino; hakkiinni Israeele hadhino.
7 Xa mitte haaro gaarenna siittu ledo noore qambara worre egenninoonnikkita lame saa qixxeesse. Kuri saada gaarete ledo waaxxe; siittansa kayinni insawiinni baddine mine gatisse.
8 Yihowa Taawoota haadhine gaarete aana worre; saote kakkalora sokkinannita culku misilla isi mule noo saaxine giddo worre. Hakkiinni isi doogosi hige haꞌrara agurtine,
9 hige haꞌrannowa seekkitine laꞌe. Isi qoqqowosi Beeti-shemeeshi hige haꞌriro, konne lowo qarra abbinonkehu Maganonsaati yaate. Hakkiira hige haꞌra hoogiro kayinni, qarru iillinonkehu hedeweelchooti ikkinnina abbinonkehu iso ikkinokkita anfeemmo.”
10 Mannuno yitunsa gede assi. Insa lame siittu ledo noo saa haadhe gaarete ledo waaxxu; siittansa kayinni mine gatissu.
11 Hakkiinni insa Yihowa Taawoota, culku yemahenna quntudhote misilla worroonni saaxine gaarete aana wortu.
12 Lalu Beeti-shemeeshi massitanno doogo amade haꞌri. Insa kawa kaꞌa higikkinni mitte doogo amade humbaa yaanni alba hige haꞌri. Filisxeemete gashshaano baalano Beeti-shemeeshi danni geeshsha lalu hoode hadhu.
13 Hatte yannara Beeti-shemeeshi manni xeichaamu xawira sinde mixxanni no. Insa gotti yite laꞌanno woyte Taawoota affu; iso laꞌino daafira lowo geeshsha hagiidhitu.
14 Gaare hadhe Beeti-shemeeshichu Iyyaasu gate mittu jawu kinchi mule uurritu. Insano hatte gaare bocce saada Yihowara shilqote kakkalo assite shiqishshu.
15 Leewaawootu Yihowa Taawootanna giddo culku misilla worroonni saaxine dirrisse jawu kinchi aana wortu. Beeti-shemeeshi mannino hakko barra Yihowara shilqote kakkalonna kakkalo shiqishi.
16 Onte Filisxeemete gashshaano tenne laꞌuti, hakko barranni Eqirooni higgu.
17 Filisxeemootu, saote kakkalora onte quntudhote suude afidhinota culku misilla Yihowara sokkino. Insa tenne sokkinohu mitte Ashidoodira, mitte Gaazara, mitte Asqeloonira, mitte Geetiranna mitte Eqirooniraati.
18 Culku yemahi misile, onte Filisxeemete gashshaano gashshitino katamma baalate yaano qiishonnitenna huxxa afidhinokki qachuwa kiironni sonkoonnite.
Yihowa Taawoota aanaho wortuhu jawu kinchi techo barri geeshsha naqaashshe ikke Beeti-shemeeshichu Iyyaasu gate heeꞌranno.
19 Ikkollana Maganu, Yihowa Taawoota laino daafira Beeti-shemeeshi manna shee gudi. Manninsa giddonni 50,070* manna shii; mannuno Yihowa lowo manna gudino daafira wiꞌli.
20 Konnira Beeti-shemeeshi manni, “Konni qullaawu Magani Yihowa albaanni uurra dandaannohu ayeti? Ninkewiinni haꞌre hiikko gawaꞌlakka?” yee xaꞌmi.
21 Konnira insa Qiriyati-yeariimi heedhannoriwa manna sokke, “Filisxeemootu Yihowa Taawoota qoltinona daggine kiꞌnewa haadhe” yitu.
Lekkaalliidi Qaagiishshuwa
^ Noo gedeenni tirriro, “70 manna, 50,000 manna.”
