Umi Saamueeli 1:1-28
1 Efireemihu ilaalaamu qooxeessira Raamataymi-tsofiimi heeꞌrannohu Hilqaana yinannihu mittu Efireemichu manchi no; Hilqaana Yeroaamiho; Yeroaami Eelihuho; Eelihu Tohuho; Tohu Tsuufiho.
2 Isira lame galte noosi; mittete suꞌmi Haannaati; mitteehu Finaanaati. Finaanara ooso noose; Haannara kayinni ooso dinose.
3 Kuni manchi diru kiiro heeꞌranno kataminni magansiꞌraranna olantote Mootichi Yihowara kakkalo shiqishiꞌrara* Seelo fulanno. Hakkiicho lame Eeli ooso Hofiininna Finihaasi Yihowara kakkalaano ikkite soqqantanno.
4 Mitto barra Hilqaana kakkalo shiqishanni heeꞌre, galtesi Finaanara hattono labballunna seennu oososera baalaho qeecha qeechansa uyinsa;
5 Haanna kayinni lowo geeshsha baxanno daafira, isera qeecha roorse uynose; ikkollana Yihowa isera ila diuynose.*
6 Qoleno isera Yihowa ila uynosekki daafira, ginase woꞌmanka woyte qussitanni caacceessitannose.
7 Ise diru kiiro hatto assitannose; Haanna Yihowa minira fultu kiiro, ginase qussitanni waaddannose daafira wiꞌlitanni sagale nafa diꞌꞌittanno.
8 Ikkollana minaannise Hilqaana togo yiise: “Haanna, mayra wiꞌlatta? Mayra diꞌꞌitatta? Togo mayra dadillatta?* Tonne labballi ooso ani dirooreemmohe?”
9 Hakkiinni insa Seelo itenna age kaihu gedensaanni, Haanna kaꞌe hadhu. Hatte yannara kakkalaanchu Eeli Yihowahu qullaawu mini* waalchi mule ofolle no.
10 Haanna lowo geeshsha caaccaabbino;* ise hururante wiꞌlitanni Yihowa huuccidhu.
11 Ise togo yite xano xaꞌnitu: “Olantote Mooticha Yihowa, soqqamaanchokkira iillanni noo qarra laꞌe qaaggittoeronna ane soqqamaanchokki hawittokkinni labbaa qaaqqo uyittoero, anino heeshshosi diro woꞌma Yihowara eemma; umosino milaace dikissanno.”
12 Ise Yihowa albaanni huuccatto assidhanni lowo yanna keeshshitu; hatte yannara Eeli afoose laꞌꞌanni no.
13 Haanna qoonqose macciishshantukkinni suumese calla milli assitanni wodanisenni huuccidhanni no. Hakko daafira Eelira dimbitinoha lawinosi.
14 Eelino, “Dimbu higannohekkihu mamooti geeshshaati? Woyne aga aguri” yiise.
15 Haannano togo yite qoltu: “Mootichaꞌya, diiwedimboomma; ani lowo yaaddo nooe manchooti;* woyne woy wole mittono dimbisanno ago diagoomma; giddoꞌyata gudise Yihowara kuꞌlanni noomma.
16 Xaa geeshsha huucciꞌranni keeshshoommahu qarriꞌyanninna yaaddoꞌyanni kainohunni ikkino daafira, ane soqqamaanchokki shota mancho gede assite kiirtooti.”
17 Hakkiinni Eeli, “Keerunni haꞌri; Israeelete Magani huucciꞌroottare oohena” yee qoli.
18 Iseno, “Ane soqqamaanchokki woꞌmanka woyte danchatennilla qaagie” yitu. Hakkiinni mancho kaꞌe hadhu; sagaleno ittu; hakkunni gedensaanni albisera dadillu dileellino.
19 Insano soodo gutte kaꞌe Yihowa albaanni kumbuultu; hakkunni gedensaanni Raama noo qaensa higgu. Hilqaana galtesi Haanna ledo goxi;* Yihowano qaagise.*
20 Mittu diri* giddo Haanna godobbe labbaa qaaqqo iltu; ise, “Yihowa huucciꞌre afiꞌroommaho” yite suꞌma Saamueeli* yite fushshitusi.
21 Yannate gedensaanni, Hilqaana Yihowara diru kakkalo kakkalaranna xanosi fushshaate shiqishara maatesi baala haaꞌre haꞌri.
22 Haanna kayinni dihadhino; korkaatuno ise minaannisera togo yite kultino: “Qaaqqu unuuna aguranni heeꞌreennanni abbeemma; isi Yihowa albira shiqanno; heeshshosi diro woꞌmano hakko heeꞌranno.”
23 Minaannise Hilqaanano, “Atera dancha lawe leellihere assi. Qaaqqo unuuna hoolatta geeshsha mine ofolli. Yihowa yoottare wonshohe” yiise. Hakko daafira qaaqqo unuuna hoolta geeshsha iso towaaxxitanni mine ofoltu.
24 Iseno qaaqqo unuuna hooltanni heedhenni, qaaqqu ledo sasu diri booto, mitte iife safaraancho* bulleenna mitto gambaycho woyne haadhe Seelo daggu; qaaqqono Seelo Yihowa minira abbitu.
25 Insa booto gorrihu gedensaanni qaaqqo Eeliwa abbi.
26 Iseno, “Mootichaꞌya, heeshshonniha ikkakkinni* xaareemmana, ani konne baycho ate ledo uurre Yihowa huucciꞌrumma manchooti.
27 Konne qaaqqo aaera huucciꞌroomma; Yihowano huucciꞌroommaha uynoe.
28 Anino qole iso Yihowara eemma;* isi heeshshosi diro baala Yihowaha ikkanno.”
Isino* hakko Yihowara kumbuuli.
Lekkaalliidi Qaagiishshuwa
^ Woy “kumbuulara.”
^ Noo gedeenni tirriro, “otoottose cufino.”
^ Woy “wodanikki mayra dadillanno?”
^ Koye kulloonnihu xaadooshshu dunkaanaati.
^ Woy “lubbose caaccaabbu.”
^ Woy “ayyaaniꞌya hiiqqamino manchooti.”
^ Woy “siimu xaadooshshe assi.”
^ Noo gedeenni tirriro, “alba higise.”
^ “Yannasira” yaano ikkara dandaanno.
^ “Maganu Suꞌma” yitanno tiro afiꞌrino.
^ Mite 22 litire ikkitanno. Guwuursha B14 lai.
^ Woy “lubbokkinni.”
^ Noo gedeenni tirriro, “liqiisseemma.”
^ Koye kulloonnihu Hilqaana ikkinoti egennantinote.
