Umi Saamueeli 29:1-11
-
Filisxeemootu Daawiti ammana gibbu (1-11)
29 Filisxeemootu olantonsa baala Afeeqi gamba assidhu; Israeeleno Iyziraeeli noo bue mule dukkaꞌnitu.
2 Filisxeemete gashshaanono xibbenna kume assine gaammoonni olantonsa ledo saꞌu; Daawitinna mannisino Ankusira hale ikke haꞌranni no.
3 Filisxeemete roorrooti kayinni, “Kuri Ibiraawooti kowiicho ma assitanni no?” yitu. Ankusino Filisxeemete roorrootira togo yee qoli: “Kuni Israeelete moote Saaooli soqqamaancho Daawitiiti; isi mitto diro saꞌanno yanna ane ledo heeꞌrino. Isi anewa daye heeꞌra hanafinkunni techo barri geeshsha, mitte bunsheno diafoommosi.”
4 Ikkollana Filisxeemete roorrooti isira hanqite fuu yite togo yitu: “Manchu higanno gede assi. Kuni manchi woroottosi darga higanno gede assi. Isi olu yannara alba ninkenkuwa higannokki gede, olunniwa ledonke dirranno gede assitooti. Isi mootichisi albaanni ayirrinye afiꞌrate manninke umo mure isiwa massa agurranna woluri assa dandaannori nooni?
5 Kuni manchi
‘Saaooli kume shiino;Daawiti kayinni tonne kume shiino’ yinanni faarsinanni sirbinisiha Daawiti diꞌꞌikkino?”
6 Hakko daafira Ankusi Daawiti woshshe togo yii: “Heeshshote Magani Yihowanni xaareemmona, ati kullannire diafiꞌroottoho; olantoꞌya ledo olu qacha haꞌroottoro anera tashshi yaannoe; korkaatuno anewa dagge heeꞌra hanafittonkunni techo barri geeshsha, mitte bunsheno diafoommohe. Kayinni gashshaano diammaꞌnitannohe.
7 Konnira qaekki keerunni higi; Filisxeemete gashshaano dadillisannore mittoreno assitooti.”
8 Ikkirono Daawiti Ankusira togo yii: “Mayra? Ani ma assummo? Ani soqqamaanchikki atewa daye heeꞌra hanafummonkunni techo barri geeshsha assoommo bunshe nooni? Mootichiꞌya ledo haꞌre diinnasi ledo olameemmokkihu mayraati?”
9 Ankusino Daawitira togo yii: “Ati ane albaanni Maganu sokkaasinchi gedee danchaati. Filisxeemete gashshaano kayinni, ‘Isi olaho ledonke haꞌranno gede assitooti’ yitinoe.
10 Konnira xa ledokki dagginori mootichikki soqqamaano ledo guttine kaꞌe; hakkiinni arrishsho lekka abbitanni heedheennanni kaꞌine hadhe.”
11 Konnira Daawitinna mannisi Filisxeemete gobba haꞌrara gute kai; Filisxeemeno Iyziraeeli hadhu.
