Umi Saamueeli 5:1-12

  • Taawoota Filisxeemete qoqqowo massini (1-12)

    • Daagooni saala duqqi (1-5)

    • Filisxeemootu qoomantu (6-12)

5  Filisxeeme halaalaanchu Magani Taawoota qafadduhu gedensaanni, Ebeeniezeerinni Ashidoodi haadhe abbitu. 2  Filisxeeme halaalaanchu Magani Taawoota abbite Daagooni minira* eessite, Daagooni mule wortu. 3  Ashidoodi manni soodo gute kae laꞌꞌanno woyte, Daagooni Yihowa Taawooti albaanni uulla uwe gombisame nooha affu. Konnira insa Daagooni kayisse dargasi wortu. 4  Layinki soodono kaꞌe laꞌanno woyte, Daagooni Yihowa Taawooti albaanni uulla uwe gombisame no. Daagooni uminna lamenti angasi murante waalchoho ubbe no. Dargaho qulxuꞌme lawanno bisisi widiidi* callu gatino. 5  Techo geeshsha Daagooni kakkalaanonna Daagooni minira eꞌannori baalu Ashidoodi nooha Daagooni waalcho qaaffe saꞌannohu iseraati. 6  Yihowa anga Ashidoodi manna qorichishshino; isi Ashidoodinna qooxeessinsara noo manna quntudhotenni gane gudino. 7  Ashidoodi manni konne coye lae togo yii: “Angasi ninkenna maganonke Daagooni qorichishshanni noo daafira, Israeelete Magani Taawooti ninke ledo keeshshanno gede assitinoonte.” 8  Konnira insa manna sokke Filisxeemete gashshaano baala gamba assite, “Israeelete Magani Taawoota hiissinummoro woyyanno?” yite xaꞌmitu. Insano, “Israeelete Magani Taawoota Geeti massinona” yite qoltu. Konnira Israeelete Magani Taawoota hakkira haadhe hadhu. 9  Taawoota hakkira massituhu gedensaanni, Yihowa katama qorichishi; mannuno mase qece yaanno gede assi. Katamu mannano aja akkala quntudhotenni qorichishi. 10  Konnira insa halaalaanchu Magani Taawoota Eqirooni sokku; ikkollana halaalaanchu Magani Taawooti Eqirooni iillita, Eqirooni manni, “Ninkenna mannanke shiishiishshara halaalaanchu Magani Taawoota ninkewa abbitino!” yee raari. 11  Hakkiinni insa manna sokke Filisxeemete gashshaano baala gamba assite togo yitu: “Israeelete Magani Taawoota kawiinni hoollenke; ninkeno manninkeno goonfeemmokki gede baychosi qolle.” Katamu manni baalu lubbonsara waajje qece yiino; korkaatuno halaalaanchu Magani anga buuto qorichishshinonsa; 12  reyikkinni gatino mannira quntudho fultinonsa. Katamu manni kaaꞌlote raaranno raareno iimira gordo fultu.

Lekkaalliidi Qaagiishshuwa

^ Woy “galma.”
^ Noo gedeenni tirriro, “Daagooni.” Daagooni misile gama wido manna gama wido qulxuꞌmicho labbannota ikkitukkinni digattino.

Tenne borrota koppete qoosso