Umi Saamueeli 21:1-15
21 Gedensoonni Daawiti kakkalaanchu Ahimeleeki noowa Noobi haꞌri. Ahimeleeki Daawitinni xaaditi huxiꞌre qece yee iso togo yii: “Callikki mayra dayitto? Ledokki mannu mayra hoogi?”
2 Daawitino kakkalaanchu Ahimeleekira togo yee qoli: “Moote mitto coye assammora hajajinoe; ikkollana isi, ‘Soyanni noommohe hajo daafiranna oommohe hajajo daafira mittuno afoonke’ yiinoe. Manniꞌya ledono mama xaandeemmoro hasaamboommo.
3 Konnira onte daabbo noohero woy heeꞌriherino heeꞌriro uyie.”
4 Kakkalaanchu kayinni Daawitira togo yee qoli: “Baalunku manni itanno gedee daabbo angaꞌya dino; kayinni mannikki meyate ledo xaade egenninokkiha* ikkiro qullaawa daabbo no.”
5 Daawitino kakkalaanchoho togo yee qoli: “Konni albaanni olaho fulummo yannante gede, xaano meentu ninkewa shiqe diegennino. Wole yannarano olaho fulleemmo woyte manniꞌya bisi qullaawa ikkiro, techo hakkiinni roore qullaawa hiitto diꞌꞌikkanno!”
6 Hakko daafira kakkalaanchu wole daabbo nookki daafira, isira qullaawa daabbo uysi; Maganu albaanni shiqino tima Yihowa albinni hoollanni barra iibbado daabbo worranni.
7 Hakko barra Saaooli soqqamaano giddo mittu Yihowa albaanni keeshsha gidde ikkitinosi daafira, hakko no. Suꞌmisi Doyqiiti; isi Edoomichahonna Saaooli allaalaasine roorrichaati.
8 Hakkiinni Daawiti Ahimeleeki togo yii: “Moote kulinoe sokka mudditinota ikkitino daafira, bise woy olu bagado diamadoommona hige atewa urde woy bise nooni?”
9 Kakkalaanchuno togo yii: “Ati Eelahi Xeichira* shiittohu Filisxeemichu Gooliyaadi bise no; hakkoye efuudete badheenni hoccunni xaaxante no. Ise agurranna koye wole nookki daafira hasiꞌrittoro adhi.” Daawitino “Ise gedeeta dianfannina uyiexa” yii.
10 Hakko barra Daawiti kae Saaooliwiinni xooqi; gedensoonni isi Geeti Moote Ankusiwa haꞌri.
11 Ankusi soqqamaano iso togo yitu: “Kuni gobbasi moote Daawiti diꞌꞌikkino?‘Saaooli kume shiino;Daawiti kayinni tonne kume shiino’ yinanni faarsinanni sirbinisihu diꞌꞌisooti?”
12 Daawiti konne coye wodanaho wodhi; Geeti Moote Ankusino lubbora waajji.
13 Hakko daafira isi insa albaanni wodana fayyinokkihu gede ikki; qoleno mereeronsa* macharaaraamu gede ikki. Katamu waalcho bibbice gudi; gaccisi ereedano gororunni huni.
14 Jeefote Ankusi soqqamaanosira togo yii: “Kuni manchi macharaaraamohowe! Tenne affinanni heedhinenni anewa mayra abbitini?
15 Konne albaꞌyaanni macharaaraamu gede ikkannoha anewa abbitinoonnihu ani macharaaraamo hoogeennaati? Kuni manchi mineꞌya ea hasiissannosi?”
