Umi Saamueeli 7:1-17
7 Konnira Qiriyati-yeariimi manni daye, Yihowa Taawoota tullote aana noohuwa Abinaadaabi minira haaꞌre massi; insa beettosi Aliaazaari Yihowa Taawoota agaranno gede qulleessitu.
2 Taawootu Qiriyati-yeariimi dayinku 20 diri woꞌmu saino; Israeelete mini baaluno Yihowa hasiꞌra* hanafi.
3 Saamueelino Israeelete mine baala togo yii: “Woꞌmu wodaniꞌnenni Yihowawa higginanniha ikkiro, wole gobba magannanna Astaarooti misilla mereeriꞌnenni fushshitine hunne; woꞌmu wodaniꞌnenni Yihowara calla soqqamme; hatto assitinanniha ikkiro, isi Filisxeemete anganni gatisannoꞌne.”
4 Hatte yannara Israeele Baꞌꞌaalinna Astaarooti misilla hunte Yihowara calla soqqantu.
5 Hakkiinni Saamueeli togo yii: “Israeele baala Mitsipha gamba asse; anino kiꞌne daafira Yihowa huucceemmona.”
6 Insano Mitsipha gamba yite, waa hinkiilte Yihowa albaanni duntu; hakko barra xoonte hossu. Insa hakko, “Yihowa aana cubbo loonsoommo” yitu. Saamueelino Mitsipha Israeelete daanya ikke soqqama hanafi.
7 Filisxeeme, Israeele mitteenni Mitsipha gamba yite noota macciishshitu yannara Filisxeemete gashshaano Israeele qassara fultu. Israeele tenne macciishshituti Filisxeemootunni kainohunni waajjitu.
8 Israeeleno Saamueeli, “Kaaꞌlannonke gedenna Filisxeemete anganni gatisannonke gede, Maganonke Yihowa huucca agurtooti” yitu.
9 Hakkiinni Saamueeli mitto qananni noo wiliiꞌlicho haaꞌre Yihowara shilqote kakkalo shiqishi; isi Yihowa Israeele kaaꞌlanno gede huuccatto assi; Yihowano dawaro qolisi.
10 Saamueeli shilqote kakkalo shiqishanni heeꞌreenna Filisxeeme Israeele qassara shiqqe daggu. Yihowa hakko barra Filisxeemete aana gordu beleqanno gede assi; Isi insara ragu baꞌꞌannonsa gede assino; insano Israeelete albaanni qeelantu.
11 Hatte yannara Israeelete manni Mitsiphanni fule Filisxeeme shorre, wodiidi Beeti-kaari geeshsha gani.
12 Hakkiinni Saamueeli mitto kincho haaꞌre Mitsiphanna Yeshaani mereero wori; isi “Yihowa xaa geeshsha kaaꞌlinonke” yee suꞌma Ebeeniezeeri* yee fushshi.
13 Filisxeeme konni garinni qeelantu; insa layinkita Israeelete qoqqowo didaggino; Saamueeli lubbotenni noo yanna baalate Yihowa Filisxeeme Israeele horritara difajjino.
14 Qoleno Filisxeeme Israeeletewiinni adhitinoti Eqirooninni Geeti geeshsha noo katamma Israeelete higgu; Israeele katammate gaangaawira noo qoqqowono Filisxeemete anganni qoꞌlitu.
Amooraawootunna Israeelete mereerono keeru kalaqami.
15 Saamueeli lubbotenni noo yanna baala Israeelete daanya ikkino.
16 Isi diru kiiro Beeteli, Gilgaalinna Mitsipha haꞌranni hakko qooxeessira heedhanno Israeele baalate yoo yiino.
17 Ikkollana minisi noohu Raama ikkino daafira, hakkira higanno; hakkono Israeelete yoo yaanno. Isi hakkiicho Yihowara kakkalote darga seekkino.
