Umi Saamueeli 3:1-21
-
Saamueeli masaalaancho ikki (1-21)
3 Qaaqqu Saamueeli Eeli albaanni Yihowara soqqamanni no; ikkollana hatte yannara Yihowa qaale woꞌma woyte dianfanni; ajuuja laꞌꞌano gari geeshsha dirosantinote.
2 Ille daafurte laꞌꞌa gibbinosihu Eeli mitto hashsha maꞌnasira goxe no.
3 Maganu caabbichino dixoino; Saamueelino Maganu Taawooti noowa Yihowahu qullaawu* mini giddo goxe no.
4 Hakkiinni Yihowa Saamueeli woshshisi. Isino, “Yee” yii.
5 Isi Eeliwa dodanni mare, “Woshshittoeni? Kune dayummowe!” yii. Eeli kayinni, “Ani diwoshshoommohena marte goxi” yiisi. Isino haꞌre goxi.
6 Xaano Yihowa, “Saamueeli!” yee woshshi. Saamueelino kae Eeliwa mare, “Woshshittoeni? Kune dayummowe!” yii. Isi kayinni, “Beettoꞌya ani diwoshshoommohena hadhe goxi” yiisi.
7 (Saamueeli xaara Yihowa diafino; Yihowa qaalino dixawinosi.)
8 Konnira Yihowa sayikkimeeshsho, “Saamueeli!” yee woshshi. Isino kae Eeliwa mare, “Woshshittoeni? Kune dayummowe!” yii.
Hatte yannara Eeli, qaaqqo woshshanni noohu Yihowa ikkinota huwati.
9 Konnira Eeli Saamueeli, “Hadhe goxi; tenne woshshihero kayinni, ‘Yihowa, ani soqqamaanchikki macciishsheemmona coyiꞌri’ yii” yiisi. Saamueelino haꞌre basesira goxi.
10 Yihowa daye hakkiicho uurre albinte gede, “Saamueeli! Saamueeli!” yee woshshisi. Saamueelino, “Ani soqqamaanchikki macciishsheemmona coyiꞌri” yii.
11 Yihowa Saamueelira togo yiisi: “Kuneeti! Ani Israeelete giddo macciishshannohu baalu macca cuꞌmiꞌranno coye assammoraati.
12 Hakko barra Eeli mini daafira coyiꞌroommore baala hanafotenni kayse jeefote geeshsha wonsheemmo.
13 Isi afino bunshenni kainohunni minisira hegerera yoo yeemmota kulisi; oososi Magano runtino; isi kayinni diseejjino.
14 Eeli mini assino sao kakkalleenna woy fushshaate shiqinsheenna nafa horo diagurantanno yee Eeli minira xaaroommohu iseraati.”
15 Saamueeli sooda geeshsha goxi; hakkiinni Yihowa mini waalchuwa fani. Saamueeli laino ajuuja Eelira kula waajjino.
16 Ikkollana Eeli Saamueeli, “Beettoꞌya, Saamueeli!” yee woshshi. Isino, “Kune dayommo!” yii.
17 Eelino togo yee xaꞌmisi: “Kulinoheri maati? Eeggatena kulinohere mittoreno maaxxootie. Kulinoheri giddonni mittore nafa maaxittoero, Maganu qorichishohe; hakkiinni sainoreno assohe.”
18 Konnira Saamueeli mittoreno maaxikkinni gudise kulisi. Isino, “Kuni Yihowawiinni daynoreeti. Isi dancha lawe leellisire assona” yii.
19 Saamueeli lophanni haꞌri; Yihowano ledosi no; coyiꞌranno qaali mittuno uulla diuwanno.*
20 Daaninni kayse Bersaabehi geeshsha noo Israeele baala Saamueeli Yihowa masaalaancho ikke dooraminota affu.
21 Yihowa albinte gede, Seelo ajuujatenni leella diagurinosi. Korkaatuno Yihowa Saamueelira ayimmasi leellishinosi; Yihowa tenne assinohu qaalisi widoonniiti.
