Umi Saamueeli 13:1-23
13 Saaooli moote ikki woyte, . . .* diriho; isi Israeelete lame diro gashshino.
2 Saaooli Israeelete giddonni 3,000 labballo doorino; kuri giddonni 2,000 Mikimaashinna Beetelihu ilaalaamu qooxeessira Saaooli ledo no; 1,000 ikkitannori qole Biiniyaamootu qoqqowira Gibia Yoonaataani ledo no; isi gatino manna mitto mittonka dunkaaninsawa haꞌrisi.
3 Yoonaataanino Geeba noota Filisxeemete olanto qase qeeli; Filisxeemootuno tenne macciishshitu. Hakkiinni Saaooli, “Ibiraawootu macciishshito!” yine gobba baalate xurumba ufuunfanni gede assi.
4 Israeelete manni baalu, “Saaooli Filisxeemete olanto qase qeelino; qoleno Filisxeeme Israeele boshshidhe gibbino” yaanno duduwo macciishshi. Hakko daafira mannu Gilgaali daye Saaooli haꞌrunsanno gede woshshini.
5 Filisxeemeno 30,000 olu saragalla, 6,000 faradaasine hattono baaru shaafi gede batidhino olanto adhite Israeelete ledo olantara gamba yitu; insano fulte Beeti-aweenira soojjaatoonni Mikimaashi dukkaꞌnitu.
6 Israeelete mannino buutote qarri amadinonsa daafira, mase quubbi yiino; hakko daafira mannu, goddate, ballate, kinnate, boonnatenna way balla giddo maaxamino.
7 Mitu Ibiraawooti isinni Yordaanoosi tayisse Gaadinna Giiliyaadi gobba hadhino. Saaooli kayinni Gilgaali keeshshino; iso haꞌrunsanni noo mannino waajje huxiꞌrino.
8 Isino Saamueeli yiinoti murroonni yanna iillita geeshsha lamala barra agari; Saamueeli kayinni Gilgaali didayno; mannuno Saaooli agure billaalli.
9 Jeefote Saaooli, “Shilqote kakkalonna mittimmate kakkalo anewa abbe” yii. Hakkiinni isi shilqote kakkalo shiqishi.
10 Ikkollana isi shilqote kakkalo shiqishe kaꞌꞌanni heeꞌreennanni, Saamueeli day. Hakko daafira Saaooli Saamueelinni xaadaranna iso maassiꞌrara fuli.
11 Hakkiinni Saamueeli, “Kuni assoottori maati?” yii. Saaoolino togo yee qoli: “Mannu ane agure haꞌranni noota, atino murroonni yannara dayottokkita hattono Filisxeeme Mikimaashi gamba yitinota laoommo.
12 Hakko daafira togo yee hedummo: ‘Xa Filisxeemootu Gilgaali dirrite qassaeraati; ani qole kaaꞌlannoe gede* Yihowa dihuucciꞌroommo.’ Hakko daafira qarrame shilqote kakkalo shiqishoommo.”
13 Hatte yannara Saamueeli Saaoolira togo yii: “Gowwimmate looso loosootto. Maganikki Yihowa hajajinohe hajajo diagadhootto. Agadhoottoha ikkoommero, Yihowa gashshootekki Israeelete aana hegerera kaajjishanno.
14 Xa kayinni gashshootikki digeedanno. Yihowa giddosi baxxanno mancho afiꞌranno; Yihowa iso mannisira massagaancho asse shoomanno; korkaatuno ati Yihowa hajajo diagadhootto.”
15 Hakkiinni Saamueeli kae Gilgaalinni Biiniyaamootu qoqqowira nooha Gibia haꞌri. Saaoolino manna kiiri; ledosi noo manni mito 600 ikkanno.
16 Saaooli, beettisi Yoonaataaninna ledonsa noo manni Biiniyaamootu qoqqowira Geeba keeshshi; Filisxeemootuno Mikimaashi dukkaꞌnitu.
17 Olanto sase gaamo ikkite Filisxeemete qachinni fultanno. Mitte gaamo Shuaali gobba Ofirahi doogo amadde hadhanno;
18 wole gaamo Beeti-horooni doogo amadde hadhanno; sayikki gaamo kayinni Tseboymi xeicho leellishanno danna eela higge laꞌanni halalla higge hadhanno.
19 Hatte yannara Israeelete gobba baalate siwiila tumanno manchi dino; korkaatuno Filisxeemootu, “Ibiraawootu bise woy urde tunsiisidhoonke” yitino.
20 Konnira Israeele baala maarasha, bushshu qotto, meesane woy haanto tunsiisidhara Filisxeemootunniwa dirritanno.
21 Maarasha, bushshu qotto, sasi-farqaamo zaaffa, meesanenna gatima tunsiisiꞌrate mitte fime* baantanni.
22 Olu barra Saaoolinna Yoonaataani ledo noo manni giddo mittu angano bise woy urde dino; olu uduunni noonsari Saaoolinna beettosi Yoonaataani callaati.
23 Hatte yannara Filisxeemete olanto Mikimaashi noo xeicho sayissanno doogo fultu.
