Umi Saamueeli 4:1-22
4 Saamueeli qaali Israeele baalate iilli.
Hakkiinni Israeele Filisxeemete ledo olantara fultu; insa Ebeeniezeeri mule dukkaꞌnitu; Filisxeeme kayinni Afeeqi dukkaꞌnitu.
2 Filisxeeme Israeelete ledo olantara qixxaabbe daggu; oluno goola ikki; Filisxeeme Israeele qeeltu; olu giddo 4,000 ikkitanno Israeele gooffu.
3 Mannu qacha higita Israeelete cimeeyye togo yitu: “Yihowa techo Filisxeemootu qeeltankera fajjinohu mayraati?* Ledonke ikkanno gedenna diinnanke anganni gatisannonke gede, Yihowaha gondooru taawoota Seelonni haaꞌne haꞌno.”
4 Hakko daafira insa manna Seelo sokku; mannuno kirubeelete aleenni* zuufanete ofollinohu olantote Mootichi Yihowaha gondooru taawoota hakkiinni duhe abbi. Eeliti lame ooso Hofiininna Finihaasino halaalaanchu Maganihu gondooru taawooti ledo no.
5 Yihowahu gondooru taawooti qacha daanni heeꞌreennanni, Israeele baala raaretenni baatto milli assitu.
6 Filisxeeme tenne raare macciishshite, “Ibiraawootu qachira nooti tini may raareeti ikka?” yitu. Jeefote insa Yihowa Taawooti qacha daynota affu.
7 Filisxeemootu, “Qachansa Maganu dayno!” yite waajjite qece yitu. Konnira insa togo yitu: “Baꞌnummo! Konni albaanni togoori ikke diegenninowe!
8 Tasinke bai! Konni wolqaataamu Magani anganni ay gatisannonke? Halalla Gibitsoota addi addi qoomaminni ganinohu konne Maganooti.
9 Filisxeemete manna, worbuulle ikke! Labballimmaꞌne xa leelto; hakkunni kaꞌa Ibiraawootu kiꞌnera soqqantannonte gede, kiꞌneno insara soqqantinannire ikkitinanni. Waajja agurtine worbimmatenni olamme.”
10 Konnira Filisxeeme Israeelete ledo olante qeeltu; mittu mittunku manchino dunkaani dunkaanisiwa xooqi. Olunniwa lowo manni waxaaxino; Israeelenniti 30,000 lekkatenni hadhanno olanto reytino.
11 Maganu Taawootino qafadami; Eeliti lame ooso Hofiininna Finihaasino reytino.
12 Hakko barra mittu Biiniyaamichi uddanosi dare, umisira buko giggishshiꞌre olu baychinni buuwanni Seelo day.
13 Manchu hakkiira iillanno woyte, Eeli Maganu Taawooti daafira hedanna wodanu goxa giweennasi, doogote gama barcimaho ofolle agare no. Manchuno duduwo kulara katama ei; katamu woꞌmuno raare ikki.
14 Eelino raare macciishshe, “Tini raare mayinnite?” yee xaꞌmi. Duduwo haaꞌre abbi manchi rahe Eeliwa mare ikkinore kulisi.
15 (Hatte yannara Eelira 98 diro ikke no; illesino jaaroorte laꞌꞌa gibbe noosi.)
16 Hakkiinni manchu Eelira, “Olu baychinni dayommohu aneeti! Olu baychinni xooqe dayommohu techooti” yii. Isino, “Beettoꞌya may makkinoyya?” yee xaꞌmi.
17 Duduwo abbi manchino togo yee kulisi: “Israeele Filisxeemete albinni xooqqino; insa qeelantino hattono lowo manni reyno; lame oosokki Hofiininna Finihaasino reytino; halaalaanchu Magani taawootino qafadamino.”
18 Duduwo abbi manchi, halaalaanchu Magani Taawooti daafira kulisita, Eeli waalchu mule ofolle noo barcimi aaninni badhe hige uwi; geedhinonna duꞌma ikkino daafira haxo hiiqqame rey. Isi Israeelete 40 diro yoo yiino.
19 Hatte yannara beettisi Finihaasi galte godowinni no; ilano rakke no. Ise halaalaanchu Magani Taawooti qafadama, hattono ballisenna minaannise reyo macciishshite godowa amaxxite heeshshi yitu; hakkiinni hedeweelcho gamaaꞌmite iltu.
20 Reytara haafattanni heedheenna mulese uurre noo meenti, “Labbaa qaaqqo iloottana jawaatilla” yiise. Ise kayinni mittoreno didawartino; wodanano diassitino.
21 Halaalaanchu Magani Taawooti qafadamino daafira hattono ballisenna minaannise reyno daafira, “Ayirrinyu Israeeletewiinni hoꞌlino” yite qaaqqoho suꞌma Ikaaboodi* yite fushshitu.
22 Ise, “Halaalaanchu Magani Taawooti qafadamino daafira, ayirrinyu Israeeletewiinni hoꞌlino” yitu.
