Umi Saamueeli 22:1-23
22 Hakko daafira Daawiti hakkiinni fule xooqe mare Adulaami godira maaxami. Roduuwisinna annisi mini baalu tenne macciishshiti isi noowa haꞌri.
2 Qoleno qarru amadinonsari, asalu giddo ubbinorinna yaaddinori* baalu isiwa martu; isino roorrichansa ikki. Isi ledo 400 ikkanno manni no.
3 Daawiti gedensoonni hakkiinni kae Moaabi noo Mitsipha haꞌre, Moaabi mootera togo yii: “Maganu assannoere afammo geeshsha anniꞌyanna amaꞌya atewa heeꞌrona ballo.”
4 Hakko daafira Daawiti insa Moaabi mootewa wori; insano Daawiti qiishote giddo noo yanna baalantera hakko heedhu.
5 Yannate gedensaanni masaalaanchu Gaadi Daawitira togo yii: “Qiishote giddo keeshshitootina kaꞌe Yihudu gobba haꞌri.” Konnira Daawiti haꞌre Hereeti dubbira heeꞌri.
6 Saaooli Daawitinna ledosi noo manna anfoonnita macciishshi. Hatte yannara Saaooli Gibia gotti yiino baycho noote Tamaarisiki haqqicho hunda urde amaxxe ofolle no; soqqamaanosi baalano iso gaangeessite no.
7 Hakkiinni Saaooli gaangeessite noo soqqamaanosi togo yii: “Kiꞌne Biiniyaamootu hanni macciishsheꞌꞌe ballo. Issey beetti ane gede kiꞌne baalunkura gatenna woynete irsha aannoꞌne? Kiꞌne baalanka kumunna xibbu roorroota asse shoomannoꞌne?
8 Kiꞌne baalunku anera gano gantinoonni! Beettiꞌya, Issey beetti ledo gondooro ei woyte kulinoehu dino! Beettiꞌya, soqqamaanchiꞌya anera finqilanno gede assinota kiꞌne giddo anera golame kulinoehu mittuno dino; kune isi techono ane aana kaino.”
9 Hakkiinni Saaooli gaangeessite noo soqqamaano giddonni Doyqi yinanni Edoomichi togo yee qoli: “Issey beetti Noobi heeꞌrannohu Akixuubi beetti Ahimeleekiwa daanna afoommo.
10 Ahimeleekino isi daafira Yihowa xaꞌmino; sinqeno uynosi. Isi Filisxeemichu Gooliyaadi bise nafa uynosi.”
11 Hakkawoyintenni moote, kakkalaanchu Akixuubi beetto Ahimeleekinna Noobi heedhannore annisi mini kakkalaano baala sokkaancho soye woshshi. Konnira insa baalunku mootenniwa daggu.
12 Saaoolino, “Akixuubi beetto macciishshi ballo!” yii. Isino “Mootichaꞌya macciishshanni noommo” yee qoli.
13 Saaoolino isira togo yii: “Issey beettira daabbonna bise uyte hattono isi daafira Magano xaꞌmite, atino isino anera gano gantinoonnihu mayraati? Kuneeti isi anera finqilino hattono duge shaaera agare no.”
14 Hatte yannara Ahimeleeki mootete togo yee qoli: “Soqqamaanokki baalate giddo Daawiti gede addaxxinannihu* nooni? Isi mootete balloho, agaraasinekkira roorrichaho hattono minikki giddo ayirradoho.
15 Maaho isi daafira Magano techolla huuccoommo? Togo yaattoti dihedoommote! Soqqamaanchikki tenne hajo daafira mittore afinori dinona, moote soqqamaanchosinna anniꞌya mine baala busha assoonke.”
16 Moote kayinni, “Ahimeleeki, atino annikki mini baaluno reytinanni” yii.
17 Hatte yannara moote iso gaangeessite noo agaraasine* togo yii: “Daawitira halantino daafira, hadhine Yihowa kakkalaano shitine gudde! Insa Daawiti xooqanni noota affanni heedhenni anera dikultinoe!” Mootete soqqamaano kayinni Yihowa kakkalaano shitara anga dikayissino.
18 Hakkiinni moote Doyqi, “Hadhe kakkalaano ati shii!” yii. Edoomichu Doyqino baychonkonni haꞌre kakkalaano shee gudi. Isi hakko barra shalaalatenni gannoonni efuude uddiꞌrinoha 85 manna shiino.
19 Qoleno isi kakkalaanote katama Noobi bisetenni gani; isi labbaaha ikko meyata, qaaqqo woy marqa qaaqqo, hando, harrichonna geꞌreewo bisetenni gudi.
20 Ikkollana Akixuubi beetti Ahimeleeki ooso giddonni Abiyaataari yinannihu gate fule, Daawiti haꞌrunsara xooqe isiwa mari.
21 Abiyaataari Daawitira, “Saaooli Yihowa kakkalaano shiino” yee kuli.
22 Hatte yannara Daawiti Abiyaataarira togo yii: “Edoomichu Doyqi hakko barra hakko noo daafira tenne Saaoolira kulannota afoommo. Annikki mine noohu baalu reyora* xaꞌmammeemmohu aneeti.
23 Ati anewa heeꞌri. Ate lubbo* hasannohu ane lubbono* hasannoha ikkino daafira, waajjitooti; gawajjannoherinnino agareemmohe.”
