Umi Saamueeli 2:1-36
2 Hakkiinni Haanna togo yite huuccidhu:
“Wodaniꞌya Yihowanni hagiidhino;Buudiꞌyano Yihowanni gotti gotti yiino.*
Diinnaꞌyara afoo wonshe coyiꞌreemma;Korkaatuno gatisaanchimmakkinni tashshi yiinoe.
2 Yihowa gedeehu qullaawu wolu mittuno dino;Ate gedeehu wolu dino;Maganonke, jawu kinchi gedeehu ate callaati.
3 Naaxxatenni coyiꞌra agurre;Afiiꞌnennino booꞌnate qaali horo fuloonke;Korkaatuno Maganu Yihowa egennaamoho;Looso baala taashshe keenannohu isooti.
4 Wolqaataammu digaanna hiiqqantino;Leqe yitinori kayinni jawaante afidhino.
5 Duubbe heedhannori daabbote yite mannaho soqqantanno;Hudidhinori kayinni konni kaꞌa dihudidhanno.
Ilaweelo lamala ooso iltino;Lowoti labballi ooso noose mancho kayinni callase gattino.
6 Yihowa shaanno; lubboteno woranno.*Isi Waamma* dirrisanno; hakkiinnino fushshanno.
7 Yihowa buxisanno; qoleno duroonsanno;Isi shollishanno; gotti gottino assanno.
8 Isi gadadaamma bukote aaninni kaysanno;Isi buxane buluulu* aaninni kaysanno,Ayirrinyu barcima oye,Ayirraddu ledo ofoshshiishannonsa.
Baattote heelliichuwa Yihowate;Aanansano guma uytanno baatto worino.
9 Isi ammanantinosiri qaafo agaranno;Bushuullu kayinni tunsote baꞌanno;Korkaatuno manchu umisinni qeelle diafiꞌranno.
10 Yihowa gibbannosire cancananno;*Isi hanqosi leellishannonsa yannara gordu beleqanno.
Yihowa uullate qacce geeshsha yoo yaanno;Isi moohisinoha wolqaataamo assanno.Buudhinosihurano buudasi gotti gotti assanno.”*
11 Hakkunni gedensaanni, Hilqaana Raama noo minisira haꞌri; qaaqqu kayinni kakkalaanchu Eeli anga heeꞌre Yihowa soqqamaancho ikki.
12 Eeliti labballi ooso bushuulleho; insa Yihowa diayirrissannoreeti.
13 Mannu kakkalaanote hasiisannore abbanno woyte aane noore assitanno: Ay manchino kakkalo shiqishanno yannara, kakkalaanchu soqqamaanchi maala ganfanni heeꞌneennanni sasi-farqaamo shukka haaꞌre daanno;
14 isi hakkonne shukka xiltaame saynera, lami-kasaame midaanora, afalaalete* giddora woy mitto kasa afidhino midaano giddora eessanno. Hakkiinni shukku haaꞌre fushshannori ikkireno ikkiro kakkalaanchu umisira adhanno. Insa Seelo dagganno Israeele baala hatto assitanno.
15 Qoleno kakkalo shiqishiꞌranno manchi cooma nafa shilqishikkinni, kakkalaanchu soqqamaanchi manchunniwa daye, “Kakkalaanchu buꞌra maala ikkinnina ganfoonni maala adhannokki daafira duꞌrinshanni maala uy” yaanno.
16 Manchuno, “Balanxe cooma shilqisha hasiissanno; hakkiinni hasiꞌroottoha* umikkira adhatto” yaannosi woyte isi, “Deeꞌni, xaannilla uyie; giwittoro kayinni wolqatenni adheemmo!” yaanno.
17 Yihowara shiqqanno kakkalo ayirrissinokki daafira, soqqamaanote cubbi Yihowa albaanni lowo geeshsha batiꞌri.
18 Saamueeli kayinni shiimu heeꞌrenni, shalaalatenni gannoonni efuude uddiꞌre* Yihowa albaanni soqqamanno.
19 Amasi minaannise ledo diru kiiro, diru kakkalo shiqishshara dagganno woyte aanaanni uddiꞌranno uddano* gante haadhe abbitannosi.
20 Eeli Hilqaananna galtesi togo yee maassiꞌri: “Yihowara uytini* qaaqqi darga Yihowa tenne galtenni ila oohe.” Insano mininsara higgu.
21 Yihowa Haanna qaagise;* iseno godobbe wole sase labballonna lame seenne iltu. Qaaqqu Saamueelino Yihowa albaanni lophanni haꞌri.
22 Hatte yannara Eeli lowo geeshsha geedhe no; ikkollana labballi oososi Israeele baalate aana assitannoha busha coye baalanna xaadooshshu dunkaani waalchira soqqamanno meenti ledo goxxannota macciishshi.
23 Isino togo yaannonsa: “Togoo coye mayra assitinanni? Kiꞌne daafira mannu baalu bushare coyiꞌranna macciishsheemmo.
24 Oosoꞌya agurre, Yihowa manni mereero hasaawamanna macciishsheemmo coy dancha diꞌꞌikkino.
25 Mittu manchi wolu aana sao assiro, wolu manchi hakko manchira Yihowa huuccara dandaanno;* kayinni mittu manchi Yihowa aana sao assiro ay huuccannosi?” Ikkollana Yihowa insa shaate murciꞌrino daafira, insa anninsa yiinota macciishsha gibbino.
26 Saamueeli kayinni, Yihowanna mannu albaanni aana lophanninna roore ayirrinye afiꞌranni haꞌri.
27 Mittu Maganu manchi Eeliwa daye togo yii: “Yihowa togo yaanno: ‘Annuwakki mini Gibitsete Feriooni mine borojje ikke noo waro aneneeto dileellishoommonsa?
28 Annuwikki mini kakkalaano ikke soqqamaera, kakkalo shiqishara kakkalote darga fulara, hixaana giiraranna* albaꞌyaanni efuude uddiꞌrara Israeelete gaꞌre baalate giddonni dooramino; qoleno Israeele* shilqote shiqishshanno fushshaate baala annuwikki minira oommo.
29 Miniꞌyawa shiqqanno gede hajajoommo kakkalonna fushshaate mayra mishshini? Anenni roore oosokki mayra ayirrisitto? Manniꞌya Israeele shiqishshanno fushshaati giddonni sey seyha ite misate umikkira mayra adhitto?
30 “‘Konnira Israeelete Magani Yihowa qaali togo yaanno: “Ate mininna annikki mini hegerera soqqantinannie yee kuloommoꞌne.” Xa kayinni Yihowa togo yaanno: “Horonta hatto diasseemmo; korkaatuno ayirrissannoere ayirriseemmo; mishshannoeri mishantanno.”
31 Kuneeti! Minekki jawu manchi heeꞌrannokki gede, atenna annikki mini jawaante* huneemmo barri daanno.
32 Israeelete assinoonnihu batinyu danchu coy mereero mineꞌya diina laꞌꞌatto; layinkita minekki jawu manchi diheeꞌranno.
33 Minikki giddonni kakkalote dargaꞌya soqqamara gatiseemmo manchi, illekki dunkitannonna dadillatto* gede assannohe; minikki giddonni rooru kayinni bisetenni goofanno.
34 Oosokki Hofiininna Finihaasira iillannori atera malaate ikkannohe; lamunku mitto barra reytanno.
35 Hakkiinni ammanamino kakkalaancho kaysiꞌreemmo. Isi wodaniꞌya halcho* wonshanno. Anino geedote mine mineemmosi; isi woꞌmanka woyte ani buudhoommohu albaanni haꞌranno.
36 Minikki giddonni gatinohu ay manchino woxe baantasiranna shiimu timira yee isiwa daye guluphanno; hakkiinni, “Eeggatena shiima tima iteemmo gede kakkalaanchimmate loosira worreꞌꞌe” yaanno.’”
Lekkaalliidi Qaagiishshuwa
^ Woy “Yihowa jawaante uynoe.” Qaallate Tiro lai.
^ Woy “heeshshonniha assanno.”
^ Woy “Sioole.” Qaallate Tiro lai.
^ “Ishine tunganni darginni” yaano ikkara dandaanno.
^ “Yihowa ledo yekkeerantannori masse qece yitanno” yaano ikkara dandaanno.
^ Woy “Yihowa jawaante aannosi.” Qaallate Tiro lai.
^ Woy “jawa dissite.”
^ Woy “lubbokki wojji yitinoha.”
^ Noo gedeenni tirriro, “qodhe.”
^ Woy “anga afidhinokki uddano.”
^ Noo gedeenni tirriro, “liqiissitini.”
^ Noo gedeenni tirriro, “alba higise.”
^ “Maganu tirasira dandaanno” yaano ikkara dandaanno.
^ “Kakkalote wiliile wiliishshara” yaano ikkara dandaanno.
^ Noo gedeenni tirriro, “Israeelenniti labballi ooso.”
^ Noo gedeenni tirriro, “cigile.”
^ Woy “lubbokki daafurtanno.”
^ Woy “wodaniꞌyanna lubboꞌya giddo noore.”
