Umi Saamueeli 30:1-31
30 Sayikki barra Daawitinna mannisi Tsiqilaagi higanno woyte, Amaaleeqootu wodiidi gobbanna* Tsiqilaagi horrite no; insa Tsiqilaagi bala tuggino hattono giira qassino.
2 Insa meentonna hakko noore baala jawa shiima qafadde haadhe hadhu. Mitto manchono dishitino; qafaddinoha baala kayinni haadhe hadhino.
3 Daawitinna mannisi katama daanno woyte, katamaho giira qanse heeꞌnoonni; minaamuwansa hattono labballonna seenne oosonsa qafande haaꞌne haꞌnoonni.
4 Konnira Daawitinna ledosi noo manni shaqqe wolqa hooga geeshsha huuronsa naggi asse wiꞌli.
5 Daawitire lamenta galte yaano Iyziraeelitte Akinoaaminna bashsho Qermeloosichu Naabaali galte Abigaeelino qafande haaꞌne haꞌnoonni.
6 Daawiti mannisi kinnatenni awwaalasira maꞌlanni noo daafira, lowo geeshsha yaadi; korkaatuno insa baalunku* labballonna seenne oosonsa hooggino daafira, lowo geeshsha caaccaabbino. Ikkollana Daawiti Maganisi Yihowanni jawaante afiꞌri.
7 Hakkiinni Daawiti Ahimeleeki beetto kakkalaancho Abiyaataari, “Efuude kawira abbi ballo” yii. Abiyaataarino efuude Daawitiwa abbi.
8 Hakkiinni Daawiti Yihowa togo yee xaꞌmi: “Konne horrinke manna hordofoni? Iillammokka?” Isino, “Ee, iillite qafandoonnire baala qolattona hordofi” yiisi.
9 Daawitino baychonkonni ledosi noohu 600 manni ledo fuli; insano Besoori noohu Moolu Lagichi geeshsha hadhu; gamu manni kayinni badhe hige gati.
10 Daawiti ledosi noohu 400 manni ledo hordofanni alba hige haꞌrita, daafure quubbi yiino daafira Besoori nooha Moola Lagicha tayse saꞌꞌa dandiinokkihu 200 manni kayinni badhe hige gati.
11 Insa xawoho mitto Gibitsicha affe Daawitiwa abbitu. Hakkiinni sagalenna waa uytusi;
12 qoleno shiima balasete qeeqqanna lame mooshshinoonniha woynete tima uytusi. Isi sase barranna sase hashsha waa waasa yiinokki daafira, itihu gedensaanni jawaante afiꞌri.*
13 Daawitino iso, “Ati ayeho? Dayottohu mamiinniiti?” yee xaꞌmi. Isino togo yii: “Ani mittu Amaaleeqichira borojjicho ikke soqqameemmo Gibitsichaati; ikkollana sasu barri albaanni dhiwamoommo daafira, mootichiꞌya hune haꞌrinoe.
14 Keritaawootunnita wodiidi gobba,* Yihudu qoqqowonna Kaaleebita wodiidoonni noo gobba* horrinoommo; Tsiqilaagino giira qansoommo.”
15 Hatte yannara Daawiti isira togo yii: “Hakku horri manni noowa massattoe?” Isino togo yee qoli: “Shaattoekki gedenna mootichiꞌyara sayisse aattoekki gede Maganu suꞌminni xaarittoero, hakkonni horri manniwa masseemmohe.”
16 Konnira isi insa baatto baalate farsha yite noowa massisi; martanno woyte insa Filisxeemetenna Yihudu gobbanni lowo qafado adhitino daafira, ittanninna agganni qeexaaꞌlitanni no.
17 Hakkiinni Daawiti soodo tunse heeꞌreenna hanafe, layinki hawarro geeshsha insa qasi; gaala gulufe xooqinoha 400 manna agurranna mittuno digatino.
18 Daawiti Amaaleeqootu adhitinore baala qolsiisi; lamenta galtesino gatisi.
19 Shiimunni jawu geeshsha insaha ikkinori giddonni bainori dino. Insa labballonna seenne oosonsa hattono qafande adhine haꞌnoonnire qoꞌlitu; Daawiti insa adhitinore baalankare qolsiisi.
20 Qoleno Daawiti Amaaleeqootu geꞌreewo, meꞌꞌenna lalo baala adhi; insano hoshshansara albaanni gantanni haadhe hadhu. Insa, “Tini Daawiti qafadooti” yitu.
21 Hakkiinni Daawiti lowo geeshsha daafurtino daafira ledosi haꞌra hoogge, Besoori Moolu Lagichiwa gatturi 200 manniwa day; insano Daawitinna ledosi noo manninni xaaddara fultu. Daawiti insa noowa shiqqi yiiti, keerensa xaꞌmi.
22 Ikkollana Daawiti ledo hadhuri giddo mitu bushunna tidhinokki manni togo yii: “Insa ledonke hadhinokki daafira, abbiꞌnoommo qafado giddonni mittoreno diuyneemmonsa; insa mittu mittunku galtensanna oosonsa calla adhite hadhona.”
23 Daawiti kayinni togo yiinsa: “Roduuwaꞌya, Yihowa uynonke coye hatto assa dihasiissannoꞌne. Isi agarinonke hattono horrinonke manna angankera sayse uyno.
24 Kiꞌne yitinoonnirira sumuu yaannohu nooni? Olaho haꞌrinohura iillanno qeechinna uduunne agarinohura iillanno qeechi taaloho. Baalunku taalo beeqqitanno.”
25 Hakko barrinni kayse techo barri geeshsha, Daawiti yiinori Israeelete wodhonna seera ikki.
26 Daawiti Tsiqilaagi higiti, jaallasi ikkitinori Yihudu cimeeyyera, “Yihowa diinnawiinni haaꞌnoonni qafado giddonni kiꞌnera uynoonni afanshi* kuneeti” yee qafadote giddonni gama soyinsa.
27 Isi afansha Beeteli noorira, Raamooti Negeebi* noorira, Yatiiri noorira,
28 Aroeeri noorira, Sifimooti noorira, Eshitemoa noorira,
29 Rakaali noorira, Yerahimieeli katammara noorira, Qenaawootu katammara noorira,
30 Horma noorira, Boriashaani noorira, Ataaki noorira,
31 Kebirooni nooriranna Daawitinna mannisi duucha hige haꞌrino baycho heedhannorira baalaho soy.
