¿Kay killasmanta Torremanta Qhawaj revistasta leerqankichu? ¿Kay tapuykunaman kutichiyta atiwajchu?

¿Imaynatá congregacionesta waturejkuna, ancianospis, Diospa llajtanpa kamachisqanta japʼikunanku tiyan?

Mana thutuspa kasukunanku tiyan. Tapurikunkuman: “¿Hermanosta kallpachanichu Jehovata kasukunankupaj? ¿Jehovaj kamachisqanta kasukunipachachu?”, nispa (w16.11, página 11).

¿Maykʼajmantapachataj cristianos Jatun Babiloniapi presos jina karqanku?

Apóstoles wañupusqankumanta pisi tiemponman, Jatun Babiloniapi presos jina karqanku. Chaypacha uj qotu runas jatunchakuyta qallarerqanku. Chantá Iglesiaqa, Romaj gobiernonwan chhapukorqa, cheqa cristianostataj chinkachiyta munarqa. Chay cristianosqa Jesuspa rijchʼanachinanmanta trigowan ninakorqanku. Paykunaqa niraj 1914 wata kashajtin, Jatun Babiloniamanta tʼaqakusharqankuña (w16.11, páginas 23-25).

¿Imaraykutaj Lefèvre dʼÉtaples Bibliata francesman tijrachisqan may sumaj karqa?

Kay 1520 wataspi Lefèvre sutiyoj runa Bibliata francés parlayman tijracherqa, tukuy runas leenankupaj. Chay Bibliaqa mayta yanaparqa Martín Luterota, William Tyndaleta, Juan Calvinotawan (wp16.6, páginas 10-12).

¿Imaynataj aychaj munayninpi yuyaj runa, chantá imaynataj espiritoj munayninpi yuyaj runarí? (Rom. 8:6)

Aychaj munayninpi yuyajqa, munaynillanpi yuyan, chayllamantataj parlan. “Espíritoj munaynimpi” yuyajrí, Diosta astawan sirviypi yuyan, Pay jina yuyananpajtaj kallpachakun. Aychaj munayninpi yuyayqa wañuyman pusan. Diospa atiyninpi yuyaytajrí kausayman pusan, sonqo tiyaykuymantaj (w16.12, páginas 15-17).

¿Imaynatá llakiyninchejta pisiyachisunman?

Aswan allin kajta ñaupajman churaspa. Noqanchejmanta maychus kajta yuyaspa. Samarikuspa, Jehovaj ruwasqasninpi tʼukurispa. Asirikuspa, ejerciciosta ruwaspa. Sumajtataj puñuspa (w16.12, páginas 22, 23).

¿Imaynapitaj Enoc “apasqa karqa” “mana wañuyta” rikunanpaj? (Heb. 11:5)

Ichá Jehová Diosqa, Enocta chinkacherqa mana ñakʼarispa wañunanpaj (wp17.1, páginas 12, 13).

¿Imaraykú llampʼu sonqo kananchej tiyan?

Noqanchejmanta maychus kajllata yuyanapaj. Reparakunapajtaj wakin imasta mana ruwayta atisqanchejta, chayri chayta ruwanapaj mana derechoyojchu kasqanchejta. Yuyarikunataj imata ruwasqanchejpis wajkunata yanapasqanta chayri llakichisqanta (w17.01, página 18).

¿Imaynatá ñaupa tiempopi Jehová Llajtanta Kamachejkunata yanaparqa, imaynatataj kay tiempopi yanapashan?

Jehovaqa atiyninwan paykunata yanaparqa Palabranta entiendenankupaj. Angelesnejtapis yanapallarqataj runasman willamunankupaj. Palabrannejtapis yuyaycharerqa. Ajinallatataj kay tiempopipis Llajtanta Kamachejkunata yanapashan (w17.02, páginas 26-28).

¿Imastaj yanapawasunchej Wawanta qosqanmanta Jehovaman agradecekunapaj?

Kay tawa imaspi tʼukurisunman: 1) Jehová Wawanta qosqanpi, 2) imaraykuchus qosqanpi, 3) imastachus qonanpaj ruwasqanpi, 4) Wawanta qosqanrayku imatachus kunan japʼiyta atisqanchejpi (wp17.2, páginas 4, 5).

Imatapis ruwananchejta nejtinchejña, ¿waj jinamanta ruwayta atisunmanchu?

Parlasqanchejta juntʼananchejpuni kajtinpis, wakin kutisqa waj jinamanta ruwananchej kanqa. Ninivitas juchankumanta pesachikojtinku, Diosqa manaña ruwarqachu imatachus ruwayta yuyasqanta. Kausayninchej manaña ñaupajta jinachu kajtin chayri publicacionespi astawan yuyaychaykunata tarejtinchej, ichapis imatachus ruwayta yuyasqanchejta waj jinamanta ruwananchej kanqa (w17.03, páginas 16, 17).

¿Imaraykú manapuni allinchu cuento qʼepi kananchej?

Imaraykuchus astawan phiñanakuyta rikhurichisunman. Imastachus parlasqanchej cheqa kajtinpis, wajpa sonqonta nanachinman (w17.04, página 21).