1, 2. (a) Ken a duna nos un konsenshi, i dikon nos mester ta gradisidu ku nos tiné?

YEHOVA DIOS a krea hende ku boluntat liber, esta, e libertat pa skohe pa nan mes. Ademas, el a duna nan algu hopi balioso: un konsenshi. Kiko e konsenshi akí ta? E ta manera un bos ku ta bisa nos kiko ta bon i kiko ta malu. Si nos us’é bon, e por yuda nos tuma desishon sabí i evitá di hasi loke ta malu. Pues, nos konsenshi ta un muestra ku Yehova ta stima nos i ku e ta deseá pa hende hasi loke ta bon.

² Tur ser humano tin un konsenshi. (Lesa Romanonan 2:14, 15.) Aunke mayoria di hende no ta sigui e normanan di Beibel, tòg tin algun ku ta hasi loke ta bon i ta odia loke ta malu. Pa motibu di nan konsenshi, nan ta evitá di kometé maldat i aktonan kruel. Bo por imaginá bo mes kon mundu lo tabata si hende no tin un konsenshi? Probablemente nos lo tende di kosnan muchu mas pió. Nos por ta hopi gradisidu anto ku Dios a duna hende un konsenshi!

3. Kon un konsenshi bon entrená por ta un bon influensia pa e kongregashon?

 ³ Aunke hende en general no ta hasi kaso di nan konsenshi, sirbidónan di Yehova sí ke entrená nan konsenshi. Ademas, nan ke pa nan konsenshi ta na armonia ku loke Beibel ta bisa ta bon i malu. Un konsenshi bon entrená ta promové union den kongregashon. Sinembargo, pa nos entrená nos konsenshi, nos mester bai mas aleu ku djis sa loke Beibel ta bisa. E Palabra di Dios ta indiká ku nos mester tin amor i fe tambe. Apòstel Pablo a skirbi: “Meta di e instrukshon akí ta pa nos tin amor ku ta sali for di un kurason limpi, di un bon konsenshi i di fe sin hipokresia.” (1 Tim. 1:5) Segun ku nos ta entrená i hasi kaso di nos konsenshi, nos amor pa Yehova lo oumentá i nos fe lo bira mas fuerte. E manera ku nos ta usa nos konsenshi ta mustra e grado di nos spiritualidat, e kondishon di nos kurason i si di bèrdat nos ke agradá Yehova. Ku otro palabra, nos konsenshi ta revelá ki klase di persona nos ta realmente.

4. Kon nos por entrená nos konsenshi?

⁴ Awor, kon nos por entrená nos konsenshi? Nos mester studia Beibel regularmente, meditá riba loke nos a siña i pidi Yehova yuda nos apliká esaki. Klaru ku esaki ta enserá mas ku djis yena nos kabes ku informashon i siña regla. Nos estudio di Beibel por yuda nos konosé Yehova kada bes mas mihó komo persona. Nos por siña mas tokante su personalidat, su kualidatnan i loke e ta gusta i no ta gusta. Asina nos konsenshi lo kuadra mas ku Yehova su manera di pensa, i esei lo motivá nos pa sigui imit’é.

5. Kiko nos lo konsiderá den e artíkulo akí?

⁵ Pero kisas nos ta puntra nos mes: Kon un konsenshi bon entrená por yuda nos tuma desishonnan sabí? Kon nos por respetá e konsenshi di nos rumannan? I kon nos konsenshi por motivá nos pa hasi loke ta bon? Ku e preguntanan ei na mente, laga nos konsiderá tres área den kua nos konsenshi por yuda nos: (1) asuntu di salú, (2) rekreo i (3) e trabou di prediká.

6. Ki situashon un kristian por enfrentá ora ta trata di asuntu di salú?

⁶ Beibel ta animá nos pa evitá kosnan ku por hasi nos daño i pa nos ta moderá den nos kustumbernan manera komementu i bebementu. (Pro. 23:20; 2 Kor. 7:1) Segun ku nos ta apliká prinsipionan bíbliko, esei por yuda nos protehá nos salú na un manera rasonabel. Klaru ku esei no ke men ku nos no ta bira malu òf bieu. Den algun pais, bo por haña tratamentu konvenshonal serka un doktor òf na hospital. Òf bo por opta pa bai serka un profeshonal ku por duna bo tratamentu òf remedi basá riba produktonan natural. Vários sukursal sa haña karta di rumannan tokante un òf otro tratamentu. Hopi sa puntra: “Un Testigu di Yehova por tuma un sierto tratamentu?”

7. Kiko nos mester tene kuenta kuné ora di tuma desishon relashoná ku tratamentu médiko?

⁷ Ni sukursal ni e ansianonan di kongregashon no por tuma desishon pa un ruman ora ta trata di asuntu di salú, asta si e puntra nan kiko pa hasi. (Gal. 6:5) Naturalmente, nan por mustra e ruman prinsipionan bíbliko ku e tin ku tene kuenta kuné ora di tuma un desishon. Por ehèmpel, un kristian mester kòrda riba e mandamentu pa “sigui apstené . . . di sanger.” (Echo. 15:29) Ku esei na mente, nos no por aseptá ningun tratamentu médiko ku ta enbolbé sanger ni  un di su kuater komponentenan prinsipal. Sinembargo, tin tratamentu ku ta enbolbé uso di frakshon chikitu di sanger. Den tal kaso, kada kristian mester disidí a base di su konsenshi bon entrená si e ta aseptá e tratamentu ei òf no. * Ki otro prinsipio bíbliko por yuda nos ora di skohe un tratamentu médiko?

8. Kon Filipensenan 4:5 por yuda nos ora ta trata di asuntu di salú?

⁸ Promé ku nos tuma kualke desishon, ta bon pa nos pensa riba e siguiente prinsipio bíbliko: “Hende sin eksperensia ta kere tur kos ku bis’é, hende sabí mes ta pensa.” (Prov. 14:15, BPK) Nos sa ku pa algun malesa no tin kura. P’esei, nos mester tene kuidou ora hende rekomendá nos tratamentu ku ta primintí ‘shelu i tera’ sin ku nan por duna nos prueba di e supuesto resultadonan. Bou di inspirashon, Pablo a skirbi: “Laga tur hende mira ki rasonabel boso ta.” (Flp. 4:5) Si nos ta rasonabel, nos no ta bai dediká asina tantu tempu na asuntu di salú i laga kosnan spiritual keda na di dos lugá. Nos lo por bira egoista si nos laga asuntu di salú bira e kos di mas importante den nos bida. (Flp. 2:4) Nos sa ku aktualmente nos no por tin un salú perfekto. P’esei, laga nos pone kosnan spiritual na promé lugá den nos bida.—Lesa Filipensenan 1:10.

9. (a) Kiko por pone e union di kongregashon na peliger? (b) Kon Romanonan 14:13 i 19 ta yuda nos tuma bon desishon ora ta trata di asuntu di salú?

⁹ Un kristian rasonabel no ta imponé su opinion riba otronan. Den un pais na Europa, un pareha kasá a kuminsá promové sierto píldora i plan di dieta. Nan a asta konvensé algun ruman pa tuma esakinan. Ora e rumannan no a haña e resultadonan deseá, hopi di nan a rabia. Awor, e pareha por a disidí pa nan mes si nan kier a tuma sierto píldora i sigui un dieta. Pero tabata bale la pena pa pone e union di e kongregashon na peliger djis pa esei? Den promé siglo, e kristiannan na Roma tabatin diferente opinion tokante sierto kuminda- i selebrashonnan. Ki konseho Pablo a duna nan? Tokante e selebrashonnan el a bisa: “Un hende ta haña ku un dia ta mas importante ku e otro; un otro ta haña ku e dia ei ta meskos ku tur otro; laga kada hende keda plenamente konvensí den su mente.” Manera nos por a mira, nos mester tene kuidou pa nos no pone nos rumannan trompeká.—Lesa Romanonan 14:5, 13, 15, 19, 20.

10. Dikon nos mester respetá desishon di nos rumannan ora ta trata di asuntunan personal? (Wak e promé plachi.)

¹⁰ Tin biaha nos no ta komprondé dikon  un ruman a tuma un sierto desishon riba un asuntu personal. Kiko nos mester hasi e ora ei? Nos no mester ta kla pa husg’é òf purba di fòrs’é pa kambia su punto di bista. Kisas su konsenshi ta “débil” ainda i e mester entren’é mihó, òf su konsenshi ta muchu sensitivo den sierto asuntunan. (1 Kor. 8:11, 12) Di otro banda, kisas ta nos mester entrená nos konsenshi pa e kuadra mas ku prinsipionan di Beibel. Nos tur mester tuma nos propio desishon ora ta trata di asuntu di salú i aseptá e konsekuensianan.

11, 12. Ki konseho di Beibel por yuda nos skohe rekreo apropiá?

¹¹ Yehova a traha nos di tal manera ku nos por disfrutá i benefisiá di rekreo. Sálomon a bisa ku tin “un tempu pa hari” i “un tempu pa baila.” (Ekl. 3:4) Pero no ta tur rekreo ta apropiá, relahante òf refreskante. Ademas, nos mester evitá di dediká muchu tempu na rekreo. Kon nos konsenshi por yuda nos disfrutá di rekreo ku Yehova ta aprobá?

¹² Beibel ta bisa ku nos tin ku rechasá “e obranan di karni.” Esakinan ta inkluí “fornikashon, impuresa, kondukta sinbèrgwensa, idolatria, bruheria, hostilidat, bringamentu, yalursheit, atake di rabia, pleitamentu, desunion, sekta, envidia, buracheria, korementu di paranda i kosnan por estilo.” Pablo a bisa ku “esnan ku ta praktiká e tipo di kosnan ei lo no risibí e Reino di Dios.” (Gal. 5:19-21) Relashoná ku esei, nos por puntra nos mes: Mi konsenshi ta motivá mi pa evitá deportenan agresivo òf violento? E ta yuda mi rechasá e spiritu di kompetensia i di nashonalismo ku tin den hopi deporte? Mi konsenshi ta yuda mi evitá pelíkulanan ku ta kontené esenanan pornográfiko òf ku ta presentá inmoralidat, buracheria òf spiritismo komo algu normal?

13. Kon 1 Timoteo 4:8 i Proverbionan 13:20 por yuda nos ora di skohe rekreo?

¹³ Prinsipionan di Beibel ta yuda nos entrená nos konsenshi ora di tuma desishon ku tin di haber ku rekreo. Por ehèmpel, 1 Timoteo 4:8 ta bisa ku “entrenamentu físiko ta yuda ku algu.” Hopi hende ta di akuerdo ku ehersisio ta bon pa nos salú físiko i mental. Pero, kiko si nos ta gusta hasi deporte den grupo? Ta importá ku ken nos ta hasi esei? Proverbionan 13:20 ta bisa: “Esun ku anda ku hende sabí lo ta sabí, ma un kompañero di hende bobo lo sufri daño.” Ta bisto anto ku ta importante pa laga nos konsenshi bon entrená guia nos ora di skohe rekreo.

14. Kon un famia a apliká e prinsipionan na Romanonan 14:2-4?

¹⁴ Christian ku Daniela tin dos yu teenager. Christian ta konta: “Durante nos anochi di Adorashon Komo Famia nos a trata e tema di rekreo. Nos tur a bai di akuerdo ku sierto rekreo ta bon i otronan no. Tambe nos a papia tokante e tipo di amigu ku nos mester tin. Un di nos yu muhénan a konta nos ku algun hóben Testigu na su skol tabata komportá nan mes den un forma inapropiá den pousa i ku el a sinti e preshon pa hasi meskos ku nan. Nos a yud’é mira ku kada un di nos tin un konsenshi, i ku nos mester laga esaki guia nos ora di skohe kiko nos lo hasi i ku ken nos lo anda.”—Lesa Romanonan 14:2-4.

15. Kon Mateo 6:33 por yuda bo plania ki ora pa rekreá?

¹⁵ Tambe bo mester pensa tokante ki ora bo ta rekreá. Ta bo reunionnan, sirbishi i estudio personal ta bini na promé  lugá den bo bida? Òf ta rekreo ta bai promé ku bo aktividatnan spiritual? Kua ta mas importante pa bo? Hesus a bisa: “Sigui buska anto promé e Reino i e hustisia di Dios, i lo e duna boso tur e kosnan akí.” (Mat. 6:33) Bo konsenshi ta motivá bo pa sigui e konseho akí di Hesus?

16. Kon nos konsenshi ta motivá nos pa prediká?

¹⁶ Un bon konsenshi no ta djis yuda nos evitá di hasi loke ta malu, sino e ta motivá nos tambe pa hasi bon obra. Un di e obranan akí ta e trabou di prediká di kas pa kas i duna testimonio informal. Pablo su konsenshi a motiv’é pa hasi esei. El a bisa: “Pasobra ta mi obligashon esei ta. Realmente, ai di mi si mi no deklará e bon notisia!” (1 Kor. 9:16) Ora nos imitá Pablo, nos konsenshi ta duna nos e siguransa ku nos ta hasiendo loke ta bon. I ora nos ta prediká na otro hende, ta komo si fuera nos ta motivá nan konsenshi pa hasi loke ta korekto. Ta manera Pablo a splika: “Nos ta revelá e bèrdat, i di e manera ei nos ta rekomendá nos mes na tur hende den bista di Dios.”—2 Kor. 4:2.

17. Kon Jacqueline a laga su konsenshi gui’é?

¹⁷ Tempu ku Jacqueline tabatin 16 aña di edat, el a haña lès di biologia na skol. Den e lès ei nan a haña splikashon riba e tema di evolushon. Jacqueline a konta: “Semper mi tabata partisipá den klas, pero den e lès akí mi konsenshi no a permití mi hasi esei pasobra mi no por apoyá e teoria di evolushon. Mi a aserká e mener i a splik’é mi posishon. Pa mi sorpresa, e tabata hopi amabel i el a duna mi e oportunidat pa hasi un presentashon dilanti di klas tokante e tema di kreashon.” Pa motibu ku Jacqueline a hasi kaso di su konsenshi bon entrená, el a sintié hopi bon. Bo konsenshi ta motivá bo pa hasi meskos?

18. Dikon un konsenshi bon entrená ta hopi importante pa un kristian?

¹⁸ Nos mester ta determiná pa sigui biba na armonia ku e prinsipionan di Yehova. Nos konsenshi por yuda nos hopi bon den esei. Ora nos ta studia e Palabra di Dios regularmente, meditá riba loke nos a siña i hasi esfuerso pa apliká esei, nos ta sigui entrená nos konsenshi. Di e manera ei, nos konsenshi lo ta un ekselente guia den nos bida kristian.