1, 2. Kon Dios ke pa nos tur ador’é?

BO TA un hóben ku ta forma parti di e hermandat mundial di Testigunan di Yehova? Si ta asina, bo por tin sigur ku bo ta un persona masha balioso pa e kongregashon kristian. Tur aña, un gran kantidat di hóben ta batisá rònt mundu. Ta un goso pa mira asina tantu hóben usa nan bida pa sirbi Yehova!

² Komo hóben, kasi sigur bo ta gusta pasa tempu huntu ku otro hóbennan. Ta bèrdat ku nos ta sinti nos bon ora nos ta disfrutá di ratunan agradabel huntu ku hende di nos edat. No opstante, sea ku nos ta hóben òf hende di edat òf sea kual sea nos rasa, kultura, posishon sosial òf edukashon, Dios ke pa nos ador’é huntu. Apòstel Pablo a skirbi ku e boluntat di Dios ta pa “tur sorto di hende ser salbá i yega na un konosementu eksakto di e bèrdat.” (1 Tim. 2:3, 4) Ademas, Revelashon 7:9 ta mustra ku ta hende di “tur nashon, tribu, pueblo i idioma” ta adorá Dios.

3, 4. (a) Ki aktitut hopi hóben tin awendia? (b) Kon Pablo a deskribí e kongregashon kristian na Efesionan 4:25?

³ Tin un diferensia grandi entre e hóbennan ku ta sirbi Yehova i otro hóbennan! Hopi hóben ku no ta sirbi Yehova ta pensa  solamente riba nan mes i ta interesá únikamente den loke nan ke. De echo, algun investigadó a bisa ku awendia hóbennan ta mas egoista ku nunka. E manera ku nan ta papia i loke nan ta bisti ta mustra ku nan no tin rèspèt pa hende mas grandi ku nan; nan ta pensa ku e hendenan akí ta ouderwets.

⁴ Nos ta mira e aktitut ei tur kaminda. P’esei, hóbennan ku ke agradá Yehova tin ku hasi tur nan esfuerso pa evitá e aktitut ei. Den promé siglo tambe Pablo mester a spièrta e kristiannan pa nan evitá un aktitut asina, ku el a deskribí komo “e spiritu ku awor ta obra den e yunan di desobedensia.” (Lesa Efesionan 2:1-3.) Nos ta elogiá nos hóbennan ku ta hasi kaso di e spièrtamentu akí i ku ta traha huntu ku nan rumannan den kongregashon. Nan aktitut ta demostrá ku nan ta komprondé loke Pablo a bisa, esta, ku nos tur ta “parti di ún kurpa,” e kongregashon kristian. Pues, nos mester traha den union ku otro. (Efe. 4:25) I segun ku e fin di e mundu akí ta yega mas serka, ta bira mas importante ainda pa nos ta uní. Awor, laga nos trata algun ehèmpel bíbliko ku lo yuda nos mira dikon ta asina importante pa nos ta uní.

5, 6. Kiko nos por siña for di e relato di Lòt i su yu muhénan?

⁵ Den pasado, Yehova su sirbidónan a haña nan ku vários situashon difísil. Pero Yehova a yuda nan i a protehá nan ora nan tabata uní i a yuda otro. P’esei, Dios su sirbidónan djawe, sea ku nan ta hóben òf di edat, sigur por siña un lès for di e ehèmpelnan bíbliko akí. Laga nos trata e ehèmpel di Lòt.

⁶ Lòt i su famia tabata den peliger pasobra nan tabata biba den Sódoma, un stat ku tabata a punto di ser destruí. Algun angel di Dios a urgi Lòt pa bandoná e stat i buska refugio den e serunan. Nan a bis’é: “Hui pa bo salba bo bida.” (Gén. 19:12-22) Lòt i su dos yu muhénan a obedesé. Lamentablemente, otro miembronan di su famia sí no a hasi kaso. Por ehèmpel, Lòt su futuro yernonan a kere ku ta chansa, òf wega, Lòt tabata hasi ora ku el a bisa nan ku nan mester a bandoná e stat. Esei a kosta nan nan bida. (Gén. 19:14) Lòt i su dos yu muhénan so a sobrebibí, pasobra nan a obedesé Dios i a keda uní.

7. Kon e echo ku e pueblo di Dios tabata uní ora nan a sali for di Egipto a benefisiá nan?

⁷ Laga nos wak un otro ehèmpel. Ora e israelitanan a sali for di Egipto, nan no a hasi esei den vários grupito independiente ku a kue nan mes rumbo. I ora Yehova a parti e laman, Moises no a pasa meimei di e laman su so ni ku djis un par di israelita. Mas bien, ku e protekshon di Yehova, henter e nashon a pasa huntu kuné. (Éks. 14:21, 22, 29, 30) I “un multitut di tur klase di hende” ku no tabata israelita tambe a bai huntu ku nan. Nan tur a keda huntu komo un solo grupo. (Éks. 12:38) Imaginá bo ku un par di hende, por ehèmpel un grupo di hóben, lo a disidí di skohe nan mes rumbo, kisas tumando un ruta ku nan a pensa tabata mihó. Esei sigur lo tabata algu bobo ya ku nan lo no tabatin e protekshon di Yehova.—1 Kor. 10:1.

8. Kon e pueblo di Dios a mustra ku nan tabata uní den tempu di Yehosafat?

⁸ Den tempu di Rei Yehosafat, e pueblo di Dios a haña nan ku un enemigu masha fuerte ku kier a ataká nan: “un multitut grandi” ku a bini for di áreanan den serkania. (2 Kró. 20:1, 2) Kon nan a reakshoná? Wèl, nan no a bai purba di vense nan enemigu riba nan mes forsa; mas bien, nan a konfia den Yehova i a buska refugio den dje. (Lesa 2 Krónikanan 20:3, 4.) I nan no  a hasi esaki individualmente, kada persona na su manera. Beibel ta bisa ku “henter Huda tabata pará dilanti di SEÑOR, ku nan yu chikitunan, nan esposanan i nan yunan.” (2 Kró. 20:13) Sí, henter e pueblo, tantu hóben komo adulto, a keda huntu, a konfia den Yehova i a sigui su guia. I Yehova a protehá nan di nan enemigunan. (2 Kró. 20:20-27) Esaki ta un bon ehèmpel ku ta mustra kon e pueblo di Dios por enfrentá oposishon komo grupo!

9. Kiko nos ta siña tokante union for di e kristiannan di promé siglo?

⁹ E kristiannan di promé siglo tambe a sirbi Dios huntu, den pas i armonia. Por ehèmpel, hopi hudiu i prosélito ku a bira kristian tabata presta atenshon na “siñansa di e apòstelnan, na kompartí tur loke nan tabatin ku otro, na kome huntu i na hasi orashon.” (Echo. 2:42) E union akí tabata spesialmente bisto durante persekushon, momentonan ku mas nan tabatin mester di otro. (Echo. 4:23, 24) Bo no ta di akuerdo ku ta masha importante pa nos keda uní i kooperá ku otro durante tempunan krítiko?

10. Na ki tempu nos mester ta mas uní ku nunka?

¹⁰ Pronto, humanidat lo enfrentá un di e periodonan di mas skur di historia humano. Profeta Yoël a deskribié komo “un dia di skuridat i tiniebla.” (Yoël 2:1, 2; Sof. 1:14) E tempu ei, e pueblo di Dios mester ta mas uní ku nunka. Hesus a bisa: “Tur reino ku ta dividí ta kaba na nada.”—Mat. 12:25.

11. Kiko Salmo 122:3 i 4 ta siña nos tokante union? (Wak e promé plachi.)

¹¹ Ora, e periodo skur akí dal aden, nos mester ta realmente uní. Kon asina? Wèl, pa nos por haña un idea, ta bon pa analisá e manera ku kasnan di Herúsalèm di antigwedat tabata konstruí. Nan tabata asina serka di otro ku e salmista a deskribí Herúsalèm komo “un stat trahá ku kas un riba otro.” Komo ku e habitantenan tabata biba hopi serka di otro, fásilmente nan por a yuda otro i protehá otro i esei a laga nan sinti nan safe. Kisas ta e echo ku e kasnan tabata asina serka di otro a laga e salmista kòrda riba e union spiritual ku henter e nashon di Israel tabata disfrutá di dje ora tur e tribunan tabata reuní pa adorá Yehova huntu. (Lesa Salmo 122:3, 4.) Awe i durante e dianan difísil ku tin tras di porta tambe ta masha importante pa e pueblo di Yehova keda huntu i uní!

12. Kon nos por sobrebibí ora “Gòg di tera di Magòg” ataká e pueblo di Dios?

¹² Awor, dikon ta asina importante pa nos ta uní durante e dianan difísil ku ta na kaminda? Na Ezekiel kapítulo 38, Beibel ta profetisá ku e tempu ei “Gòg di tera di Magòg” lo ataká e pueblo di Yehova. E tempu ei, nos no mester laga nada kousa divishon entre nos i siguramente nos lo no bai buska protekshon di e mundu akí. Mas bien, nos tin ku uni mas aun ku otro. Klaru ku nos lo no sobrebibí djis pasobra nos ta forma parti di un grupo. Nos kada un individualmente tin ku demostrá ku nos ta konfia den Yehova i ta obedes’é. Si nos hasi asina, Yehova i Hesus lo yuda nos sobrebibí e atake di Gòg i drenta e mundu nobo. (Yoël 2:32; Mat. 28:20) Pero kiko di esnan ku separá nan mes for di e tou di Dios i kue nan mes rumbo? Nan lo ser salbá?—Mik. 2:12.

13. Ki lès hóbennan por siña for di loke nos a trata te asina leu?

¹³ Hóben, bo ta mira e peliger di alehá bo mes i sigui bo mes kaminda manera hopi hóben sa hasi? Nos ta aserkando un tempu den kua nos tur, tantu hóben komo hende di mas edat, lo tin mester di otro. P’esei, awor ta tempu pa nos fortalesé nos amistat ku nos rumannan i sirbi Yehova  huntu den union, loke ta vital pa nos por ser salbá.

14, 15. (a) Ku ki propósito Yehova ta entrená tantu hóben komo hende grandi awendia? (b) Ki konseho Yehova ta duna nos pa yuda nos keda uní?

¹⁴ Yehova ta yuda nos pa nos por “sirbié skouder ku skouder.” (Sof. 3:8, 9, NW) Sí, e ta preparando nos pa futuro ora ku lo e kumpli ku su propósito pa “reuní tur kos atrobe den Kristu.” (Lesa Efesionan 1:9, 10.) Yehova ke pa tur su kriaturanan, tantu esnan den shelu komo esnan riba tera, ta uní komo un solo famia ku ta ador’é. I no tin duda ku Yehova lo logra esaki. I hóbennan por forma parti di e famia ei pa semper. Kiko di abo hóben? Bo ta mira e importansia di keda uní ku e organisashon di Yehova?

¹⁵ Yehova ta siña nos pa, for di aworakí, nos ta uní pa asina nos por biba na pas ku otro den e mundu nobo. Bes tras bes, e Skritura ta animá nos pa “preokupá pa otro,” pa “tene tierno kariño pa otro,” pa “sigui konsolá otro” i “fortalesé otro.” (1 Kor. 12:25; Rom. 12:10; 1 Tes. 4:18; 5:11) Yehova sa ku nos ta imperfekto i ku esei por stroba nos di keda uní ku otro. P’esei, e ta urgi nos pa sigui “pordoná otro libremente.”—Efe. 4:32.

16, 17. (a) Kiko ta un propósito di nos reunionnan? (b) Kiko hóbennan por siña for di e ehèmpel di Hesus?

¹⁶ Yehova ta usa nos reunionnan tambe pa yuda nos keda uní. Ún di e propósitonan di nos reunionnan ta loke Hebreonan 10:24 i 25 ta trese padilanti, esta, pa “stimulá otro pa mustra amor i hasi bon obra.” Tuma nota ku Yehova a perkurá nos reunionnan pa nos por “animá otro,” muchu mas ainda ora nos ta mira ku “e dia ta yega serka.”

¹⁷ Hesus a pone un bon ehèmpel pa nos pasobra e tabata gusta reuní huntu ku e pueblo di Dios. Ora e tabatin 12 aña di edat, el a asistí na un reunion grandi den tèmpel huntu ku su mayornan. Pero na un dado momento, su mayornan a pèrd’é. Akaso el a bai asosiá ku otro hóbennan? Nò. Hose i Maria a hañ’é den e tèmpel, papiando ku e maestronan tokante e Skritura.—Luk. 2:45-47.

18. Dikon orashon ta kontribuí na e union ku tin den kongregashon?

¹⁸ Un otro manera ku nos por fortalesé  nos union ta di hasi orashon pa nos rumannan. Ora nos ta hasi orashon spesífiko na nan fabor, nos ta keda konsiente ku ta importante pa preokupá pa nos rumannan. I no ta kristiannan maduro so mester stima nan rumannan, animá nan na reunion i hasi orashon pa nan. Hóben, abo tambe ta hasi e kosnan ei pa asina yuda fortalesé e union den kongregashon? Si ta asina, esei ta yuda bo keda mas uní ku bo rumannan i leu di e mundu di Satanas ora ku esaki yega na su fin.

19-21. (a) Den ki manera eksepshonal nos ta demostrá ku nos ta parti di un solo kurpa? Duna algun ehèmpel. (b) Kiko nos ta siña for di e manera ku nos rumannan ta yuda otro ora di desaster?

¹⁹ Tin hopi ehèmpel ku ta mustra ku awe tambe Yehova su pueblo “ta uní.” (Rom. 12:5) Nos ta mira evidensia kla di esaki durante tempu di kalamidat. Na desèmber 2011, un tormenta tropikal a asotá e isla Mindanao di Filipinas i kousa inundashon pisá. Riba un solo anochi, mas ku 40.000 kas a keda inundá; entre esakinan tabatin kasnan di nos rumannan tambe. E sukursal di e pais a bisa ku “promé ku nan komiténan di alivio por a kuminsá ku nan trabou, ya rumannan di otro área a kuminsá manda yudansa” via sukursal.

²⁰ Asina tambe, ora un temblor fuerte i despues un tsunami a asotá e parti ost di Hapon, e rumannan a sufri un gran pèrdida. Algun ruman a pèrdè tur kos. Por ehèmpel, Yoshiko, un ruman muhé ku tabata biba un 40 kilometer for di e Salòn di Reino, a pèrdè su kas kompleto. El a bisa: ‘Nos a keda gratamente sorprendí ora nos a tende ku e superintendente di sirkuito i un otro ruman hòmber a bin buska nos drechi un dia despues di e temblor.’ Ku un smail grandi riba su kara, Yoshiko a sigui bisa: ‘Nos a apresiá mashá kon nos kongregashon a perkurá na un manera ekselente pa nos nesesidatnan spiritual. Fuera di esei, nos a haña yas, sapatu, tas i pidjama.’ Un miembro di e komité di ousilio a komentá: “Rumannan di rònt Hapon a traha huntu pa yuda otro. Tabatin rumannan ku a bini for di Merka pa yuda. Ora a puntra nan dikon nan a hasi e biahe largu ei, nan a bisa: ‘Nos ta sinti nos uní ku nos rumannan na Hapon, i nan mester di yudansa.’” Bo no ta orguyoso ku bo por forma parti di un organisashon ku ta asina interesá den su miembronan? Bo por ta sigur ku Yehova ta masha kontentu di mira kon uní su sirbidónan ta.

²¹ Si for di aworakí nos ta uní ku otro, nos lo ta prepará pa huntu enfrentá situashonnan difísil ku lo bini den futuro. I si akaso mes nos pèrdè kontakto ku nos rumannan di otro partinan di mundu, nos lo tin nos rumannan lokal. Fumiko, un ruman muhé na Hapon ku a sobrebibí un tifon, a bisa: ‘E fin ta tras di porta. Pues, nos mester sigui yuda nos rumannan segun ku nos ta spera e tempu ku lo no tin ningun desaster mas.’

22. Kon union ku nos rumannan lo benefisiá nos den futuro?

²² Laga nos hasi nos esfuerso aworakí pa keda uní pa asina nos por ta prepará pa sobrebibí fin di e mundu malbado i dividí akí. Yehova lo salba su pueblo, meskos ku el a hasi den pasado. (Isa. 52:9, 10) P’esei, sea ku bo ta hóben òf un persona adulto, kòrda ku lo bo ser salbá si bo keda uní ku e pueblo di Dios. Un otro kos ku por yuda nos sobrebibí ta si nos tin apresio pa loke nos a risibí kaba. E siguiente artíkulo ta mustra dikon esei ta importante.