Promé Karta pa e Tesalonisensenan 4:1-18
4 Rumannan, nos a siña boso kon boso mester biba pa boso agradá Dios,+ i bon mirá, boso ta hasiendo esei. Awor, nos ta pidi boso, sí, nos ta roga boso, den nòmber di Señor Hesus, pa boso sigui hasi esei mas ainda.
2 Boso sa di e instrukshonnan* ku nos a duna boso den nòmber di Señor Hesus.
3 Esaki ta boluntat di Dios: Boso mester ta santu,+ i boso mester apstené di inmoralidat seksual.*+
4 Kada un di boso mester sa kon pa dominá su kurpa+ pa e keda santu+ i onorabel.
5 Boso no mester sigui mal ehèmpel di hende di e nashonnan ku no konosé Dios,+ pasobra nan ta entregá nan mes na deseo* seksual deskontrolá+ sin nunka keda satisfecho.
6 Niun hende no mester hasi loke no ta apropiá* relashoná ku e kosnan ei i perhudiká su ruman, pasobra, manera nos a bisa boso kaba i manera nos a spièrta boso bon kla, Yehova* ta kastigá tur hende ku ta kometé e tipo di pikánan ei.
7 Dios no a yama nos pa hiba un bida impuru, sino pa nos ta santu.+
8 Pues, un persona ku ta rechasá e spièrtamentunan ei, no ta rechasando hende sino Dios,+ kende ta duna boso su spiritu santu.+
9 Sinembargo, nos no tin nodi di skirbi boso pa bisa boso pa stima otro manera ta famia di otro boso ta,+ pasobra Dios mes a siña boso pa stima otro.+
10 De echo, boso ta demostrando e tipo di amor ei kaba na tur e rumannan den henter Masedonia. Pero Rumannan, nos ke animá boso pa sigui hasi esei kada bes mas tantu.
11 Pone komo meta pa boso hiba un bida trankil,+ pa boso no mete den asuntu di otro hende+ i pa boso traha ku boso man,+ manera nos a instruí boso.
12 E ora ei, hende ku no ta parti di e kongregashon kristian* por mira ku boso ta hiba un bida desente+ i ku boso no tin mester di nada.
13 Ademas, Rumannan, nos ke pa boso komprondé kiko lo pasa ku e rumannan ku a muri,*+ pa asina boso no bira tristu manera e hendenan ku no tin speransa.+
14 Nos tin fe ku Hesus a muri i ku el a ser lantá for di morto.+ Si ta asina, nos mester tin fe tambe ku Dios lo lanta e disipelnan di Hesus ku a muri for di morto, pa asina nan por ta huntu kuné.*+
15 Loke nos ta bisa boso awor ta basá riba loke Yehova* ta bisa: Nos, ku lo ta na bida durante e presensia di Señor, sigur lo no ser resusitá promé ku e personanan ku a muri kaba.
16 Pasobra Señor mes lo baha for di shelu, i lo e yama ku un stèm ku tin outoridat, sí, ku stèm di arkangel,+ i lo tin zonido di e tròmpèt di Dios, i e disipelnan di Kristu ku a muri lo resusitá promé.+
17 Despues, nos ku lo ta na bida lo ser hibá den nubia pa nos ta huntu ku nan+ i pa nos kontra ku Señor+ den laira. Asina nos lo ta semper huntu ku Señor.+
18 Pues, sigui konsolá otro ku e palabranan ei.
