Filipos 2:1-30
2 Kanian, no walay pampapasesegan lapud si Kristo, no walay panagligliwa lapud aro, no walay panangiyansakit ed sakey tan sakey, no walay panamabli tan panangabagey,
2 paliket yo ak a maong diad pankakasakey na nonot yo tan panangaro yo, diad pankakasakey yo ed kamarerwa, a saksakey so nononoten yo,
3 tan diad antokaman a gawaen yo et aliwa kayo komon a makolkol odino mapaatagey, noagta mapaabeba so nonot yo, ya ipasen yon mas atagey so arum nen say sikayo,
4 tan itultuloy yon ipatnag so panangiyansakit ed arum, tan aliwan say pankaabigan yo labat so nonoten yo.
5 Pansiansia yo ed inkasikayo iyan panagnonot a wala met ed si Kristo Jesus,
6 ya anggaman kaparpara toy Dios, agto ninonot so panamsam, salanti, pian makapipara ed Dios.
7 Andi, noagta tinaynan to so amin a walad sikato tan inawat toy kipapasen na sakey ya aripen tan nagmaliw a too.
8 Nagkalalo ni, sanen sikatoy walad kipapasen na sakey a too, sikatoy nampaabeba tan nagmaliw a matulok anggad ipapatey, on, ipapatey ed panamairapan a kiew.*
9 Lapud saya met, sikatoy intandoro na Dios ed mas atagey a posisyon tan maaron inikdan to na ngaran ya atagey nen say arum niran ngaran,
10 ta pian diad ngaran nen Jesus so talimukoran na amin na saramay walad tawen tan saramay walad dalin tan saramay walad dalem na dalin,
11 tan bidbiren na amin a si Jesu-Kristo so Katawan diad kigloriaan na Dios ya Ama tayo.
12 Lapud saya, inad-arok ira, diad naynay yon itutulok a mabulbulos, ya aliwa labat a sano wadtan ak noagta nagkalalo la natan ya anggapo ak, itultuloy yon pansagpotan so dilin kilalaban yo tekep na takot tan giwgiw;
13 ta say Dios so mamapabiskeg ed sikayo, ya iiter to ed sikayo so pampilalek tan pakayarin manggaway panlabayan to.
14 Itultuloy yon gawaen so amin a bengatla ya anggapoy pannguronguro tan paneebatan,
15 ta pian malinis kayo tan anggapoy kasalanan yo, ananak na Dios ya andian na pakabalawan ed limog na pikewet tan mauges a kailalakan. Diad sayan mundo et onsisinag kayo a singa silesilew,
16 ya ombebemben kayon malet ed salita na bilay, pian makapanliket ak diad agew nen Kristo, ta say impambatik ko odino impansagpot ko et aliwan anggapoy kakanaan.
17 Balet anggano iyiibung ak la diad altar a singa sakey ya apay ya iinumen nipaakar ed panaglingkor, ya angitontonan ed sikayo na pananisia, maliket ak tan miliket ak ed sikayon amin.
18 Diad ontan met a paraan, manliket kayo met tan miliket kayo ed siak.
19 Balet maniilalo ak ed Katawan a Jesus a nibakik la komon a tampol ed sikayo si Timoteo, pian manliket ak sano nakabatan ko iray nipaakar ed sikayo.
20 Ta anggapo lay arum ya ibakik a walaan na awawey a singa sikato a peteg a mangasikaso ed saray bengatlan nipaakar ed sikayo.
21 Ta say aanapen na arum et say nipaakar ed inkasikaran dili, aliwan say nipaakar ed si Kristo Jesus.
22 Balet amta yo a pinaneknekan to la a sikatoy manepeg, a sikatoy nampaaripen a kaibak pian nikayat so maong a balita, a singa sakey ya anak a kaiba na ama.
23 Kanian saya so too ya iilaloan kon ibaki sano anengneng ko la no anto iray nagawa ed siak.
24 On, matalek ak ed Katawan a magano ak met lan onla ed sikayo.
25 Balet, iisipen ko a kaukolan ya ibakik ed sikayo si Epafrodito, say agik tan kakimeyan ko tan kaparak a sundalo, ya imbaki yon manlingkor ed siak parad saray pankaukolan ko,
26 lapud pipirawaten to a nanengneng to kayon amin tan sikatoy nanermen a maong lapud nadngelan yo a sikatoy nansakit.
27 On, sikatoy nansakit anggad ngalngali la ompatey; balet sikatoy kinasian na Dios, diad tua et aliwan sikato labat, noagta pati siak met, pian ag-onloor so ermen ko.
28 Kanian magangganat ak lan mangibaki ed sikato pian manliket kayo lamet tan agak la manermen sano sikatoy nanengneng yo.
29 Sikatoy awat yo sirin a malikeliket unong a niyugali yo la ed Katawan; tan itultuloy yon pablien iray ontan a lalaki,
30 ta nisengeg ed kimey na Katawan et sikatoy inatey lawari, ya inyan to ed kapeligroan so bilay to, ta pian napanlingkoran to ak, a saya so agyo nagawaan lapud anggapo kayo dia.
