Filipos 3:1-21

3  Kaunoran, agagik, mantultuloy kayon manliket ed Katawan. Ta aliwan makapabelat ed siak so pangisulat ed sikayo na saraya lanlamang a bengatla, noagta parad kaligenan yo.  Manalwar kayo ed saray aso,* manalwar kayo ed saray manggagawa na makaderal iran bengatla, manalwar kayo ed saramay mamuputot ed laman.*  Ta sikatayo iramay tuan asegat, a manlilingkor ed Dios diad panamegley na espiritu to tan mangipapasirayew ed si Kristo Jesus tan ag-itayo manmamatalek ed laman.  Balet siak, no bilang wala ni arum, so peteg a walaan na saray rason pian manmatalek met ed laman. No iisipen na arum a too a walaray rason to pian manmatalek ed laman, mas lalo ak ni:  asegat ak ed komawalon agew, a nanlapu ak ed kapolian na Israel diad tribu nen Benjamin, sakey ak a Hebreo a nianak manlapud saray Hebreo; no nipaakar ed ganggan, sakey ak a Fariseo;  no nipaakar ed inkaseseg, pinasegsegang ko so kongregasyon; no nipaakar ed inkatunong diad panamegley na ganggan, pinaneknekan kon malinis ak.  Ingen ta antokaman iray bengatla a makagunggona ed siak, impasen ko irayan anggapoy kakanaan nisengeg ed Kristo.  On, nipaakar ed satan, ipapasen ko met so amin a bengatla bilang anggapoy kakanaan nisengeg ed mabmablin pikakabat ed si Kristo Jesus a Katawan ko. Nisengeg ed sikato et agko kawkawanan a naandi so amin a bengatla tan impasen ko iratan bilang dakerakel a dutak, ta pian nagamoran koy Kristo  tan napaneknekan a nikasakey ak ed sikato, tan walaan ak na inkatunong a manlalapud Dios lapud pananisia ed si Kristo, aliwan say inkatunong kon dili a resulta na ganggan, 10  ta pian amtak so nipaakar ed sikato tan say pakayari nipaakar ed inkioli to tan say panagmak met na ir-irap to, ya akaparaan ak ya ompatey a singa impatey to, 11  pian nanengneng ko no kasin nagamoran koy mas masakbay a kioli manlapud inaatey. 12  Aliwan lapud inawat ko la itan odino ayadyari ak la, noagta manggugunaet ak pian naawat ko met imay sengegan na impamili ed siak nen Kristo Jesus. 13  Agagi, agko ipapasen a sankabembenan ko la itan; balet nia labat so nibagak ed satan: Legan a lilingwanan ko iray bengatlan binenegan ko la tan dadampoten iray bengatlan walad arapen, 14  manggugunaet ak a maong pian naawat ko so premyo ed panatawag na Dios ed tawen diad panamegley nen Kristo Jesus. 15  Kanian, onia met la komon so panagnonot tayon amin a tinmakken la; tan no diad antokaman a paraan et duma lay akateenan na nonot yo, iparungtal na Dios ed sikayo so dugan panagnonot. 16  Anggaman ontan, antokaman so inaligwasan tayo la, mantultuloy itayo ni komon ya onaligwas a singa ed dati lan gagawaen tayo. 17  Mankakasakey kayo a mangalig ed siak, agagi, tan imano yon maong iramay ontutumbok ed ehemplo ya impanengneng mi ed sikayo. 18  Ta dakdakel so mankukurang a kakabusol na panamairapan a kiew* nen Kristo, a mabetbet ko ran sasalambiten nensaman balet natan et sasalambiten ko met ira ya atekepay lua, 19  tan say pansumpalan da et kadederal, tan say dios da et say eges da, tan say ipapasirayew da et saray nepeg dan ibaing, tan say nononoten da et saray bengatla diad dalin. 20  Sikatayo balet, say kanepegan tayo bilang mibabaley et walad tawen, a ditan so panlapuan na samay tatalaranan tayon manangilaban, say Katawan tayon Jesu-Kristo, 21  a diad pangusar to na pakayarin walad sikato et pasimbaloen to so niyabeban laman tayo pian magmaliw a kapara na maglorian laman to, tan ipasakop to met ed sikato so amin a bengatla.

Paimanod leksab

Fil 3:2 * Salanti, “agmalinis a totoo.”
Fil 3:2 * Salanti, “saramay manusuporta ed panagsegat.”
Fil 3:18 * Nengnengen so Apendise 6.