Filipos 1:1-30

1  Si Pablo tan si Timoteo, ya ariripen nen Kristo Jesus, so nansulat ed amin a masanto a walad Filipos a nikasakey ed si Kristo Jesus, tan ed saray manangasikaso tan saray katulongan a lingkor:  Nawalaan kayo komon na agnaparaan a kaabigan tan deen a manlalapu ed Dios ya Ama tayo tan ed Katawan a Jesu-Kristo.  Naynay ak a misasalamat ed Dios ko kapagno nanonotan ta kayo  diad kada pampipikasik a masimoon parad sikayon amin, a legan kon gagawaen iraya et malikeliket ak  lapud tulong yo parad maong a balita manlapud unonan agew ya impangawat yo ed satan anggad sayan bekta.  Ta matalek ak nipaakar ed saya, a samay angigapo na maabig a kimey ed sikayo et itultuloy ton sumpalen itan anggad agew nen Jesu-Kristo.  Manepeg labat ya onia so isipen ko nipaakar ed sikayon amin, lapud wala kayo ed pusok, sikayon amin a kaibak ya akaawat na agnaparaan a kaabigan, diad impakaprisok tan diad impangidepensak tan impansagpot ko pian nawalaan ak na legal a kanepegan a mangipulong na maong a balita.  Ta amta na Dios a makakailiw ak lan maong ed sikayon amin ta papablien ta kayo a singa ed panamabli nen Kristo Jesus.  Tan naynay kon ipipikasi ya ombaleg ni komon a nagkalalo so panangaro yo tekep na suston pikakabat tan aralem a pakatebek; 10  a naynay yon seguroen iray mas importantin bengatla, ta pian magmaliw kayon anggapoy pakabalawan tan agyo natiror so arum anggad agew nen Kristo, 11  tan napano kayoy matunong a bunga, diad panamegley nen Jesu-Kristo, parad kigloriaan tan kirayewan na Dios. 12  Natan labay kon naamtaan yo, agagi, a saray agawa ed siak et nanresulta ed inyaligwas na maong a balita imbes ya akaamper, 13  kanian akabatan ed limog na amin a Guardia na Emperador tan arum nin totoo so nipaakar ed impakaprisok lapud panlilingkor ko ed Kristo; 14  tan karaklan ed saray agagi ed Katawan, a nagmaliw a matalek lapud impakaprisok, so lalon makmakpel tan andian na takot a mangipupulong ed salita na Dios. 15  Tua, ipupulong na arum so Kristo diad panibeg tan pilalaslasan, balet say arum et diad kaabigay-linawa. 16  Sarayay unor ya abitla et mangipupulong ed Kristo lapud aro, ta amta ra a niyakar ak dia pian mangidepensa ed maong a balita; 17  balet saramay unonan abitla et manggagawa ed satan lapud pikokolkol, ya aliwan malinis so motibo ra, ta nononoten day mamawala na panirapan ko legan ya akapriso ak. 18  Anto sirin so nikuan tayo? Anggapo, noag say nipupulong si Kristo ed amin a paraan, balanglan diad pankunkunwari odino diad katuaan, tan panliliketan ko iya. Diad tua, naynay ak met a manliliket, 19  ta amtak a manresulta iya ed kilalaban ko lapud masimoon a pikakasi yo tan pakakaawat ko na espiritu nen Jesu-Kristo, 20  unong ed magunaet a pantatalaran ko tan paniilalok ya agak balot nabaingan. Balet lapud inkakpel kon mansalita et nitandoro natan si Kristo, a singa nensaman la, diad panamegley na laman ko, balanglan mabilay ak odino inatey ak. 21  Ta nipaakar ed siak, no manbilay ak et manbilay ak parad si Kristo, tan no ompatey ak et pakagunggonaan ko itan. 22  Natan no mantultuloy ak a manbilay diad sayan laman, dakel ni so nakimeyan ko—ingen ta agko ibaga no dinan so pilien ko. 23  Agko amta no dinan so pilien ko ed sarayan dua; balet say labay ko et say kibulos ta pian nakaibak lay Kristo, ta segurado ak a saya so magmaong ni. 24  Balet, mas nakaukolan a mansiansia ak ni ed sayan laman nisengeg ed sikayo. 25  Kanian lapud matalek ak ed saya, amtak a mansiansia ak ni tan miayam ak ed sikayon amin pian onaligwas kayo tan manggayaga kayo diad pananisia yo, 26  ta pian manleppua so liket yo nipaakar ed si Kristo Jesus nisengeg ed siak lapud nakaiba ta kayo lamet. 27  Manugali kayo komon ya onnepeg ed maong a balita nipaakar ed Kristo ta pian, sano makakar ak ditan tan napinengnengan ta kayo odino andi, narengelan ko so nipaakar ed sikayo, ya ontatalindeg kayo ed sakey ya espiritu tan nankakasakey kayon mansasagpot parad pananisia ed maong a balita, 28  tan agkayon balot natataktakot ed saray kalaban yo. Amin irayan bengatla et paneknek a naderal ira, balet nilaban kayo; tan sayan paneknek et manlalapud Dios, 29  lapud niiter ed sikayo so pribilehyo nisengeg ed si Kristo, ya aliwa labat a manisia kayo ed sikato, noagta manirap kayo met nisengeg ed sikato. 30  Ta mipupuligesgesan kayo met a singa anengneng yo ed siak tan singa ed narerengelan yo ni natan nipaakar ed siak.

Paimanod leksab