Colosas 3:1-25
3 Balet, no binilay kayo la a kaiba na Kristo, itultuloy yon anapen iray bengatlan walad tawen, a ditan et akayurong so Kristo diad nikawanan na Dios.
2 Iyapasakey yoy kanonotan yo diad saray bengatlan walad tawen, aliwan diad saray bengatlan walad dalin.
3 Ta inatey kayo, tan say bilay yo et niyamot ed kinen Kristo a nikasakey ed Dios.
4 Sano nipatnag so Kristo, salanti, say bilay tayo, nipatnag kayo met a kaiba to diad gloria.
5 Kanian, patey yo iray kabiangan na laman yo a walad dalin nipaakar ed pilalawanan,* karutakan, kagletan ed sekso, makapasakit a pilalek, tan inkaagum, a saya et idolatriya.
6 Nisengeg ed saratan a bengatla et onsabi so sanok na Dios.
7 Nensaman et nambilay kayo met ya ontan iray gagawaen yo.
8 Balet natan et ekal yo la iratan ya amin ed inkasikayo, say sanok, pasnok, inkauges, makapasakit iran salita, tan agla nepeg ya ompaway ed sangi yo so mabanday a tongtongan.
9 Agkayo mantitilaan. Lakseb yo la so daan a personalidad pati saray kagagawa na satan,
10 tan isulong yoy balon personalidad, a diad panamegley na suston pikakabat et napapasimbalo itan pian magmaliw a kaulibay na samay Sakey ya amalsa ed satan,
11 a dia et anggapoy Griego odino Judio, panagsegat odino agpanagsegat, dayo, Escita,* aripen, bulos a too, balet si Kristo so amin a bengatla tan sikatoy walad amin.
12 Unong ed saya, bilang saray pinili na Dios, masanto tan inad-aro, isulong yo so panangabagey, kaabigan, kapaabebaan na nonot, inkaulimek, tan andukey a panag-anos.
13 Mantultuloy kayon manaanosan tan mabulos a manpeperdonaan no wala man so sengegan na panreklamo na sakey ed sananey. No panon a mabulos si Jehova ya amerdona ed sikayo, ontan met so gawaen yo.
14 Balet, niarum ni ed sarayan amin a bengatla, isulong yo so aro, ta saya so ayadyarin bedber na pankakasakey.
15 Ontan met, manuley komon ed kapusoan yo so deen na Kristo, ta diad tua et atawag kayo ed satan pian magmaliw a sakey a laman. Tan ipanengneng yon misalsalamat kayo.
16 Manayam komon ed sikayo so amin a karunongan nipaakar ed salita na Kristo. Itultuloy yon ibangat tan bilinen so sakey tan sakey diad panamegley na saray salmo, saray panangidayew ed Dios, mararakep iran espiritual a kanta, ya impapuso yon kansionen iratan parad si Jehova.
17 Tan antokaman so sasalitaen yo odino gagawaen yo, gawa yo so amin a bengatla diad ngaran na Katawan a Jesus, a pisalamatan yo so Dios ya Ama tayo diad panamegley to.
18 Asawan bibii, manpasakop kayo ed kaasawaan yo, ta manepeg itan ed Katawan.
19 Asawan lalaki, itultuloy yon aroen so kaasawaan yo tan agkayo komon maruksa ed sikara.
20 Ananak, matulok kayo komon ed atateng yo diad amin a bengatla, ta makapaliket iya ed Katawan.
21 Kaamaan, agyo papasyodoten so ananak yo, ta pian ag-ira nadismaya.
22 Ariripen, matulok kayo komon ed totoon kakatawan yo diad amin a bengatla, a say panlingkor yo et aliwa labat a sano walay makakanengneng, a singa saray managpaliket ed totoo, noagta diad masimoon a puso, a walaan na takot ed si Jehova.
23 Antokaman so gagawaen yo, gawa yo itan ed interon kamarerwa a singa parad si Jehova, tan aliwan parad totoo,
24 ta amta yo a makaawat kayo na tawir ed si Jehova bilang tumang yo. Manpaaripen kayo ed Katawan, si Kristo.
25 Segurado a samay manggagawa na mauges et nadusa ed mauges a ginawa to, ta say Dios et agmanangidumaduma.
