Colosas 1:1-29
1 Siak, si Pablo, sakey ya apostol nen Kristo Jesus diad panamegley na linawa na Dios, tan si Timoteo ya agi tayo,
2 so nansulat ed saray masanto tan saray matoor ya agagi a nikasakey ed si Kristo diad Colosas:
Nawalaan kayo komon na agnaparaan a kaabigan tan deen a manlalapu ed Dios ya Ama tayo.
3 Naynay kamin misasalamat ed Dios ya Ama na Katawan tayon Jesu-Kristo sano ipipikasi mi kayo,
4 ta nadngelan mi so pananisia yo nipaakar ed si Kristo Jesus tan say panangaro yo ed amin a masanto
5 lapud ilalo a nitarya ed sikayo diad katawenan. Sayan ilalo et nadngelan yo nensaman sanen nipulong so katuaan na satan a maong a balita.
6 Satan a maong a balita ya akasabi ed sikayo et manbubunga tan ondaraak ed interon mundo a singa nagagawa met ed limog yo, manlapu la ed agew a nadngelan yo tan sigpot yon akabatan so katuaan na agnaparaan a kaabigan na Dios.
7 Ontan so naaralan yo ed si Epafras a kapara tayon aripen ya inad-aro, a sakey a matoor a lingkor nen Kristo parad sikatayo,
8 ya angibalita met ed sikami na aro yo ya apawala ed panamegley na espiritu.
9 Kanian manlapu la nen nadngelan mi itan, agkami ontutundan mangipipikasi ed sikayo tan kekerewen mi a napano kayo komon na suston pikakabat nipaakar ed linawa na Dios diad amin a karunongan tan pakatalos ed panamegley na masanton espiritu,
10 ta pian manbilay kayon makana ed si Jehova pian sikatoy napaliket yon maong legan a manbubunga kayo ed amin a maabig a kimey tan ondaraak so suston pikakabat yo ed Dios,
11 a napapabiskeg kayon maong unong ed maglorian biskeg to ta pian sigpot kayon makapansungdo tan maliket kayon makapan-anos na andukey,
12 a pisalamatan yoy Ama a tinmulong pian magmaliw kayon manepeg a minabang ed tawir na saray masanto a walad liwawa.
13 Inliktar to itayo ed pakauley na kabilungetan tan inyalis to itayo ed panarian na inad-aro ton Anak,
14 a diad panamegley to et nibulos itayo lapud dondon, salanti, say kaperdona na saray kasalanan tayo.
15 Sikato so kaulibay na agnanengneng a Dios, say panguloan na amin a pinalsa;
16 ta diad panamegley to et apalsa so amin niran bengatlan walad tawen tan walad dalin, saray bengatlan nanengneng tan agnanengneng, balanglan saratan et trono odino pakauley odino gobierno odino autoridad. Apalsa so amin niran bengatla diad panamegley to tan parad sikato.
17 Ontan met, sikatoy wala la antis na amin niran bengatla tan diad panamegley to et apalsa so amin niran bengatla,
18 tan sikato so ulo na say laman, say kongregasyon. Sikato so gapoan, say panguloan ya unonan inmoli manlapud inaatey, ta pian sikatoy magmaliw ya unaan ed amin a bengatla;
19 ta nanliketan na Dios a manayam ed sikato so amin a bengatlan nagnap,
20 tan diad panamegley nen Kristo et makapikareenan ed Dios so amin niran bengatla, balanglan saratan et bengatlan walad dalin odino bengatlan walad tawen. Sayan pikakareenan et niwala diad panamegley na dala to a nipaagus diad panamairapan a kiew.*
21 On, sikayoy nisian tan kakabusol nensaman lapud say nononoten yo et mauges iran gawa,
22 kanian impikareenan to kayo natan ed inkasikato diad panamegley na laman na samay sakey ya inatey, ta pian niyarap to kayo ed sikato bilang masanto tan andiay pakabalawan tan anggapoy pakaakusaan,
23 daput no mantultuloy kayo ed pananisia, a niletneg ed pundasyon tan mansiasiansian malet tan agniyaarawi ed ilalo nipaakar ed satan a maong a balita a nadngel yo, tan saya so nipulong la ed amin a pinalsa diad silong na tawen. Siak, si Pablo, so nagmaliw a ministro nipaakar ed sayan maong a balita.
24 Manliliket ak natan ed saray paniirap ko parad sikayo, tan papanoan ko no anto so kulang pian nasagmak ko met ed laman ko iray impanirap na Kristo parad say laman to, salanti, say kongregasyon.
25 Nagmaliw ak a ministro ed sayan kongregasyon unong ed responsabilidad ya inter ed siak na Dios parad pankaabigan yo pian sigpot kon ipulong so salita na Dios,
26 say sagradon sekreto a niyamot diad apalabas iran sistema na mundo tan diad apalabas iran kailalakan. Balet natan et nipaparungtal la itan ed saray masanton lingkor to,
27 a diad sikara et maliket ya impaamta na Dios no anto iray maglorian kayamanan na sayan sagradon sekreto ed limog na saray nasyon. Saya et si Kristo a nikasakey ed sikayo, say ilalon makapibiang ed gloria to.
28 Sikato imay ipupulong mi, a bibilinen tan ibabangat mi so kada too ed amin a karunongan, ta pian niyarap mi ed Dios so kada too bilang nagnap a nikasakey ed si Kristo.
29 Lapud saya et mansasagpot ak, tan manggugunaet ak diad tulong na pakayari to ya uusaren to ed siak.
