Colosas 2:1-23
2 Ta labay kon naamtaan yo so pansasagpot kon maong nisengeg ed sikayo tan ed saramay walad Laodicea tan ed amin iramay agni akanengneng ed siak,
2 ta pian naligliwa so kapusoan da, tan mankakasakey ira ed aro. Diad onian paraan et nawalaan ira na saray kayamanan, salanti, say malinew tan seguradon pakatalos ontan met ed suston pikakabat ed sagradon sekreto na Dios, salanti, nipaakar ed si Kristo.
3 Diad sikato et maalwar a niyamot so amin a kayamanan na karunongan tan pikakabat.
4 Ibabagak iya pian anggapo so toon mamalikdo ed sikayo diad panamegley na makatangguyor iran panagkatunongan.
5 Ta anggano anggapo ak ditan, sankanonot ta kayo, a manliliket ak tan nanenengneng ko a mauksoy kayo tan mabiskeg so pananisia yo ed si Kristo.
6 Kanian, lapud inawat yo lay Kristo Jesus a Katawan, mantultuloy kayon mankurang a nikasakey ed sikato,
7 a nilamut tan niletneg ed sikato tan napapabiskeg ed pananisia, unong ya imbangat ed sikayo, a napanopano kayo na pananisia sano misasalamat kayo.
8 Manalwar kayo: ompan walay mamatit ed sikayo ya usaren toy minumundon karunongan tan maapan panagpalikdo unong ed tradisyon na totoo, unong ed inuugaw iran bengatla ed mundo tan aliwan unong ed si Kristo;
9 ta walad sikato so amin a kualidad na Dios.
10 Kanian wala la ed sikayo so inkagnap diad panamegley to, say ulo na amin a gobierno tan autoridad.
11 Lapud relasyon yo ed sikato et asegat kayo, aliwan diad panamegley na lima na too, noagta diad impangekal ed makasalanan a laman, lapud ontan so nepeg a pakasegat na saramay kien nen Kristo,
12 ta niponpon kayo a kaiba to diad panamegley na sakey a bautismo a singa ed sikato, tan lapud relasyon yo ed sikato et apaoli kayo diad panamegley na pananisia yo ed samay agawaan na pakapanyari na Dios, ya amaoli ed sikato manlapud inaatey.
13 Niarum ni, anggano inatey kayo lapud saray impakalingo yo tan ag-impakasegat na laman yo, binilay kayo na Dios pian makapikasakey kayo ed si Kristo. Maaron pinerdona na Dios so amin ya impakalingo tayo
14 tan binural toy insulat a dokumento, ya akasulatan na saray ganggan tan satan et sumpad sikatayo; tan inekal to la itan diad impangipasak to ed satan diad panamairapan a kiew.*
15 Diad panamegley na saya et nilakseban to iray gobierno tan saray autoridad, ya imparungtal to ra ed arap na totoo bilang saray atalo to, ya imparada to ra.
16 Kanian anggapo komon so mangukom ed sikayo diad panangan tan panag-inum yo odino nipaakar ed piesta odino ed panagngilin ed balon bulan odino ed sabaton;
17 ta saratan a bengatla et anino na saray bengatlan onsabi, balet say peteg ya iyaanino na saratan et say Kristo.
18 Anggapo komon so toon manamsam ed premyo yo, a panliliketan toy kunkunwarin panagpaabeba tan panagdayew na saray anghel, a “tatalindegan” to iray anengneng to, a nagmaliw a mapaatagey anggano andian na dugan rason lapud minumundon kanonotan to,
19 balet ag-ombebemben a malet ed samay ulo, a diad panamegley na saya et ombabaleg so interon laman unong ed pamapabaleg na Dios, a natataryaan tan mauk-uksoy ya atuop iyan laman ed panamegley na saray langolangoan tan ula-ulat na satan.
20 No inatey kayo la a singa si Kristo nipaakar ed inuugaw iran bengatla ed mundo, akin et manbibilay kayo ni a singano kabiangan kayo na mundo tan manpapasakop kayo ni ed saray ganggan ya:
21 “Agmo eegnaan odino tatawayan odino didiwiten,”
22 iray bengatla a niganan naderal diad panguusar ed saratan, unong ed saray ganggan tan bangabangat na totoo?
23 Saratan a bengatla et ipapatnag ed sakey a klase na panagdayew a gagawaen unong ed dilin panlabayan tan kunkunwarin panagpaabeba, diad panamairap ed laman tan singano walaan iratan na karunongan; balet anggapoy kakanaan na saratan pian nadaeg iray pilalek na laman.
