2 Timoteo 4:1-22
4 Iganggan ta ka diad arap na Dios tan si Kristo Jesus, ya aturon mangukom ed saray mabilay tan saray inaatey, diad panamegley na kiparungtal to tan say panarian to,
2 ya ipulong mo so salita, maganat mon gawaen itan diad maabig a panaon tan diad makapagonigon a panaon, mamaat ka, manimbawa ka, mamaseseg ka, tekep na andukey a panag-anos tan dunong ed panagbangat.
3 Ta onsabi so panaon ya agda nayarian ya awaten so suston bangat, balet, unong ed saray pilalek dan dili et pilien da iramay mangibangat ed sikara na labalabay dan narengel;
4 tan agda labay a dengelen so katuaan, noag say labay dan dengelen et saray palson istorya.
5 Balet, manlikas ka ed amin a bengatla, itepel moy irap, gawam so kimey na sakey ya ebanghelisador, sigpot mon sumpalen so ministeryom.
6 Ta iyiibung ak la a singa iinumen ya apay, tan magano lay aturon panaon a kibulos ko.
7 Akilaban ak diad maabig a pilalaban, sinumpal koy pambabatik ko, tinumbok koy pananisia.
8 Manlapu la ed sayan bekta et wala lay akaparaan a korona na inkatunong parad siak, a saya so iter na Katawan, say matunong ya ukom, bilang tumang ko ed satan ya agew, balet aliwa labat a parad siak, noagta parad amin met a manpipirawat ed isabi to.
9 Gawam so anggaay nayarian mo ya onla ed siak a tampol.
10 Ta tinaynan to ak nen Demas lapud inaro toy kaplesan a sistema na mundo tan linma ed Tesalonica; si Crescente et linma ed Galacia, si Tito et linma ed Dalmacia.
11 Si Lucas labat so kaibak. Itagar moy Marcos, ta sikatoy mausa-usar ed siak diad ministeryo.
12 Balet imbakik lay Tiquico diad Efeso.
13 No onla ka dia, awit mo imay balabal ya intilak ko ed kinen Carpo diad Troas, tan saramay lukot, nagkalautla ed saramay katat a nansulatan.
14 Agaylay impaneral ed siak nen Alejandro a managpanday na gansa (sikatoy balesen komon nen Jehova unong ed saray gawa to)
15 tan manalwar ka met ed sikato, ta kinontra ton maong iray imbaga mi.
16 Diad inmunan impandepensak et anggapoy dinmapag ed siak, noagta tinaynan da ak ya amin (ag-itan komon isingil ed sikara)
17 balet walad abay ko so Katawan tan pinabiskeg to ak, pian diad panamegley ko et sigpot a nasumpal so panagpulong tan narengel itan na amin a nasyones; tan inliktar to ak ed sangi na leon.
18 Iliktar ak na Katawan ed amin a gawan mauges tan ilaban to ak parad mangatatawen a panarian to. Sikatoy nigloria komon lawas ed andi-anggaan. Amen.
19 Ikomustaan mo ak ed si Prisca tan Aquila tan ed sankaabungan nen Onesiforo.
20 Si Erasto et nansiansia ed Corinto, balet si Trofimo et intilak ko diad Mileto ta mansasakit.
21 Gawam so anggaay nayarian mo a makasabi dia antis na ambetel a panaon.
Manpapakomusta ed sika si Eubulo, pati si Pudente tan si Lino tan si Claudia tan amin ya agagi.
22 Niwala komon so Katawan ed espiritun ipapatnag mo. Niwala komon ed sikayo so agnaparaan a kaabigan to.
