2 Timoteo 1:1-18
1 Siak, si Pablo, ya apostol nen Kristo Jesus ed panamegley na linawa na Dios unong ed sipan a bilay a nagamoran diad pikakasakey ed si Kristo Jesus,
2 so nansulat ed sika, Timoteo, ya ana’kon inad-aro:
Nawalaan ka komon na agnaparaan a kaabigan, panangasi, deen a manlalapu ed Dios ya Ama tan ed si Kristo Jesus a Katawan tayo.
3 Misalsalamat ak ed Dios, a panlilingkoran ko a singa ginawa na inmuunan atateng ko tan malinis so konsiensiak, a sankanonot ta kan naynay ed masimoon a pikekerew ko, diad labi tan agew
4 a pirpirawat ta kan nanengneng, sano nanonotan ko iray luam, ta pian manliket ak a maong.
5 Ta pinonot koy matuan pananisiam, a singa say pananisia nen baim a Loida tan inam a Eunice, tan matalek ak a wala met iya ed sika.
6 Nisengeg ed saya et ipanonot ko ed sika a pandarlang mon singa apoy so langkap na Dios a niiter ed sika sanen intapew ko iray limak ed sika.
7 Ta say espiritu na Dios et agto itayo pagmaliwen a matakot, noagta mamawala itan ed sikatayo na pakayari tan aro tan limpion kanonotan.
8 Kanian agmo ibabaing so pampulong nipaakar ed Katawan tayo, odino siak ya apriso nisengeg ed sikato, noagta itepel mo met so irap parad maong a balita diad panamegley na pakayari na Dios.
9 Inlaban tan tinawag to itayo bilang masanto, aliwan lapud saray gawa tayo, noagta lapud mismon gagala to tan agnaparaan a kaabigan to. Sakbay na andukerukey iran panaon et niiter la itan ed sikatayo diad panamegley nen Kristo Jesus,
10 balet natan et malinlinew lan nipatnag itan diad inkiparungtal na Manangilaban tayo, si Kristo Jesus, a pinaandi to so ipapatey ingen ta impalinew to ed sikatayo no panon so pakawalaan na bilay ya anggapoy kabulok diad panamegley na maong a balita,
11 a diad saya et aturo ak a managpulong tan apostol tan managbangat.
12 Nisengeg ed saya et itetepel ko met irayan bengatla, balet agak ombabaing. Ta kabat ko imay papanisiaan ko, tan matalek ak a nayarian ton alwaran so inmatalek ko ed sikato anggad satan ya agew.
13 Pansiansiam ed inkasika so pangaligan a maabig iran salita a nadngel mo ed siak pati say pananisia tan panangaro ed si Kristo Jesus.
14 Alwaran mo iyan maabig a nimatalek ed sika diad panamegley na masanton espiritu a walad sikatayo.
15 Amtam ya inkaindan ak na amin a totoo diad distrito na Asia. Kaiba ed sikara si Figelo tan Hermogenes.
16 Kasian komon na Katawan so sankaabungan nen Onesiforo, ta naynay to ak a papabiskegen, tan agto ak imbaing anggano akagulonggulong ak.
17 Balet sanen sikatoy akakar ed Roma, siak so sineetan ton inanap tan aromog to ak.
18 Sikatoy kasian komon na Katawan a Jehova diad satan ya agew. Tan amtam so amin ya impanlingkor to diad Efeso.
