2 Timoteo 2:1-26
2 Kanian sika, ana’ko, mantultuloy kan manpabiskeg diad panamegley na agnaparaan a kaabigan a nagagamoran diad pikakasakey ed si Kristo Jesus,
2 tan saray nadngel mo ed siak a sinuportaan na dakel a tasi et imatalek mo ed saray matoor a lalaki pian magmaliw met iran kualipikadon manbangat ed arum.
3 Itepel mo met so irap bilang maong a sundalo nen Kristo Jesus.
4 Anggapo so sundalo a mannenegosyo legan a walad serbisyo, ta pian napaliket to imay angilista ed sikato bilang sakey a sundalo.
5 Niarum ni, siopaman a mibibiang ed saray pagalaw so agnakoronaan no agto tinumbok iray totontonen ed pagalaw.
6 Say makulin dumaralos so nepeg ya unonan minabang ed saray bunga na intanem to.
7 Nonot mon naynay so ibabagak; iter na Katawan ed sika so pakatebek ed amin a bengatla.
8 Nodnonot mo a si Jesu-Kristo et pinaoli manlapud inaatey tan sikatoy bini nen David, unong ed maong a balita ya ipupulong ko;
9 a nipaakar ed saya et mantetepel ak na irap anggad impakabalor ko ed prisoan a singa sakey a managgaway-mauges. Balet, say salita na Dios et ag-abalor.
10 Lapud saya et susungdoan ko so amin a bengatla nisengeg ed saray pinili, pian nilaban met ira diad pikakasakey da ed si Kristo Jesus tan nawalaan ira na andi-anggaan a gloria.
11 Napanmatalkan so salitan: No inatey itayon sankakaiba, manbilay itayo met a sankakaiba;
12 no mantultuloy itayon mansungdo, sankakaiba itayo met a manuley bilang arari; no sikatoy iburi tayo, sikatayoy iburi to met;
13 no ag-itayo manmatoor, sikatoy matoor nin siansia, ta agto nayarian ya iburi so inkasikato.
14 Panonotan mo ran naynay nipaakar ed sarayan bengatla, tan bilang tasi et bilin mo ra ed arap na Dios ya agda pansasangsangan iray salita, ta anggapon balot so nagunggona ed saya lapud makaderal iya ed saramay onderengel.
15 Gawam so anggaay nayarian mo ya iyarap so inkasika ed Dios bilang makanepegan na panangabobon to, sakey a komikimey ya anggapoy nepeg ton ibaing, a dugay panguusar to ed salita na katuaan.
16 Balet paliisan mo iray andi-kakanaan a salita a mamapabanday ed bengatlan masanto; ta sikaray lalon onloor ed ag-inkamaridios da,
17 tan say salita ra et onkayat a singa gangrena.* Kaiba ed sikara si Himeneo tan Fileto.
18 Sarayan lalaki et sinmian ed katuaan, ya ibabaga ran agawa lay kikioli; tan dederalen day pananisia na arum.
19 Balet, akaletneg nin siansia so malet a pundasyon na Dios, ya onia so akatatak: “Kabat nen Jehova iramay kayarian to,” tan: “Amin komon ya ontatawag ed ngaran nen Jehova et ipulisay da so ag-inkatunong.”
20 Natan diad sakey a baleg ya abung et walaray pananginan a gawa ed balitok tan pilak ontan met ed kiew tan pitek, tan say arum et parad mapagalang a gagala balet say arum et parad aliwan mapagalang a gagala.
21 Kanian, no sarayan unor ya abitla et paliisan na sakey, sikatoy magmaliw a pananginan parad mapagalang a gagala, apasanto, mausar ed akankayarian ed sikato, akaparaan parad amin a maabig a gawa.
22 Kanian, arawian mo iray pilalek ya inuugaw, balet seetan mon ipatnag so inkatunong, pananisia, aro, deen, a kaiba iramay walaan na malinis a puso ya ontatawag ed Katawan.
23 Niarum ni, paliisan mo iray makulangkulang tan andiay-kabaliksan a pansusuppiatan, ta pansengegan iratan na pankokolkol.
24 Balet say aripen na Katawan et agnepeg a mikolkol, noagta mauyamo ed amin, kualipikadon manbangat, ag-ombabawi sano walay manggawa na mauges ed sikato,
25 maulimek a mangibangat ed saramay agmipakna ed ibabaga to; agla piga ya abuloyan ira na Dios a magbabawi pian nawalaan ira na suston pikakabat ed katuaan,
26 tan ompawil so dugan panagnonot da tan makablos ira ed patit na Diablo, ta akalotan to ran mabilay pian gawaen da so linawa to.
