2 Timoteo 3:1-17
3 Balet amtaen mo iya, a diad kaunoran iran agew et onsabi iray nikadkaduma tan mair-irap a panaon.
2 Ta saray totoo et magmaliw a maaro ed inkasikaran dili, maaro ed kuarta, mapaspasirayew, mapaatagey, maayew, agmatulok ed atateng da, agda amtay misalamat, aliwa ran matoor,
3 anggapoy panangaro ra ed kapamilyaan da, agdan balot labay so mipaknaan, managpauges ira, anggapoy panangontrol da ed dili ra, masesebeg ira, agda aaroen so kamaongan,
4 traidor ira, anawet so ulo ra, makinon ira, mas inaro ra so likeliket nen say Dios,
5 singano walay debosyon da ed Dios balet agnapatnagan ed bilay da so pakayari na satan.* Arawian mo irayan totoo.
6 Ta saraya so panlalapuan na saramay masilib a mamapalikdo ed saray sankaabungan tan mangokontrol ed saray makapuy a bibiin makasalanan, ya asagyat ed nanduruman pilpilalek,
7 tan naynay iran manaaral ingen ta agdan balot naaamtaan so suston pikakabat ed katuaan.
8 Singa ed insumpa nen Janes tan Jambres ed si Moises, ontan met so isusumpa na sarayan totoo ed katuaan, a pikewet so panagnonot da, tan ag-ira naabobonan nipaakar ed pananisia.
9 Anggaman ontan, agda la nituloy so gagawaen da, ta mapatpatnag la ed amin so inkaambagel da, a singa ed inkaambagel na saraman a duaran lalaki.
10 Balet sika et tinumbok mon maong so ibabangat ko, say kabibilay ko, say gagalak, say pananisiak, say andukey a panag-anos ko, say panangarok, say panagsungdok.
11 Amtam met iray impamasegsegang ed siak, saray impanirap ko, saray agawa ed siak diad Antioquia, diad Iconio, diad Listra, saray panamasegsegang ya asagmak ko; ingen ta inliktar ak na Katawan ed sarayan amin.
12 Diad tua, napasegsegang met so amin a malabay a manbilay tekep na maridios a debosyon diad pikakasakey da ed si Kristo Jesus.
13 Balet saray mauges a totoo tan saray mankuankuanan et magmaliw a lalon mauges, a sikaray mamapalikdo tan napapalikdo.
14 Balet sika, mantultuloy ka ed sarayan bengatla a naaralan mo tan akatangguyor ed sikan manisia, lapud kabat mo no siopa iray totoon akaaralan mo ed saraya
15 tan manlapud inkaugaw mo et akabatan mo la iray masanton sulat, ya akatulong ed sikan magmaliw a marunong parad kilalaban diad panamegley na pananisia nipaakar ed si Kristo Jesus.
16 Say interon Kasulatan et impuyan na Dios tan mausa-usar ed panagbangat, pananimbawa, panangipetek ed saray bengatla, panagdisiplina unong ed inkatunong,
17 pian say too na Dios et sigpot a makayari tan akaparaan a maong parad amin a maabig a gawa.
