2 Pedro 2:1-22
2 Balet, wala met iray onlesan palson propeta diad limog na totoo, no panon a wala met iray palson managbangat diad limog yo. Saraya so agnaliklikas a mangiloob na makaderal iran sekta tan ipulisay da ni ingen so katawan ya analiw ed sikara, ya ipapaarap day inkasikara ed maples a kadederal.
2 Niarum ni, dakel so mangalig ed anggapoy-baing a kagagawa* ra, tan nisengeg ed saraya et napauges so dalan na katuaan.
3 Ontan met, lapud inkaagum da et anamoten da kayo ed panamegley na palso iran salita. Balet ta aliwan matantan so isabi na panangukom ed sikara a nigana la nensaman, tan agla manbayag so paneral ed sikara.
4 On, dinusa na Dios iray anghel a nankasalanan, tan imbasileng to ra ed Tartaro,* diad saray kaaralman ya ambilbilunget, pian manalagar ira na kaukom;
5 tan dinusa to so mundo nensaman, balet inliktar toy Noe, a managpulong na inkatunong, pati say pitora ni, sanen dinelap to so mundo na agmaridios a totoo;
6 tan inukom to iray syudad na Sodoma tan Gomorra, ya impagmaliw to iratan a dapol, ya onkanan pangaligan parad saray bengatlan onsabi ed agmaridios a totoo;
7 tan inliktar toy matunong a Lot, ya agonigon a maong lapud makapabaing a kabibilay na saray totoon mananumlang na ganggan—
8 ta sayan matunong a too et manlilikna na irap ed inagew-agew lapud saray anengneng tan nadngel to diad impakapilimog to ed sikara tan lapud saray mauges a gawa ra.
9 Amta nen Jehova no panon ton iliktar ed subok iray maridios a totoo, balet iyalagar to ed agew na panangukom so paneral to ed agmatunong a totoo,
10 nagkalalo la ed saramay manpipilalek ed laman na arum pian dutakan da itan tan saramay manmumudmora ed saray walad pakauley.
Anggapoy baing da, ipipilit day panlabayan da, tan agda tatakotan iray pinagalangan na Dios noagta pansasalitaan da ra na mauges,
11 balet saray anghel, a mas mabiskeg tan makapanyari, et ag-angakusa ed sikara diad panamegley na mauges iran salita; agda itan ginawa lapud respeto ra ed si Jehova.
12 Balet sarayan totoo et mansasalita na mauges nipaakar ed saray bengatlan agda amta. Naderal ira lapud mauges a gagawaen da, a singa ra andiay-kalakal ya ayayep a nianak pian erelen tan pateyen,
13 a papasakitan day inkasikara bilang dusa ed mauges a gagawaen da.
Ipapasen dan liket so pamepenek da ed saray pilalek na laman da diad kaagwan. Sikaray matik tan mantsa, a panliliketan dan palikdoen so arum diad panamegley na saray palson bangat da legan iran midudungo ed sikayo.
14 Pampilpilalekan da so mikalugoran* tan agda nayarian so ontundan mankasalanan, tan sasagyaten da iray makapuy. Say puso ra et nipasal ed panag-agum. Sikaray ananak a naayew.
15 Lapud inkaindan da so maptek a dalan, nibalang ira. Tinumbok da so dalan nen Balaam, ya anak nen Beor, a nampirawat a makaawat na tumang ed panggawa toy mauges,
16 balet sikatoy binaat lapud impanumlang to ed ganggan. Naamper so makulangkulang a getma na sayan propeta lapud sakey ya agmakasalitan asno a nansalitan singa too.
17 Singa ra subol a nakatan, tan kelpa ya insiplog na maksil a bagyo, tan nitarya ed sikara so sigpot a kabilungetan.
18 Ta sasalitaen da iray anggapoy kakanaan a panaglastog, tan diad panamegley na saray pilalek na laman tan anggapoy-baing iran ugali et iingganyoen da iramay ompapaliis la ed totoon manggagawa na mauges.
19 Isisipan da ed saratan so kawayangan balet ta sikaran mismo et ariripen na inkabulok. Ta say sakey a too et aripen na siopaman a walaay pakauley ed sikato.
20 No apaliisan da la iray karutakan ed mundo diad panamegley na suston pikakabat ed Katawan tan Manangilaban a si Jesu-Kristo, ingen ta gawaen da lamet iraya tan nadaeg ira, seguradon mas mauges so pansumpalan da nen say diad gapo.
21 Ta mas maong nin agda la akabatan so dalan na inkatunong nen say akabatan da itan insan agda lanlamang unoren so masanton ganggan ya impasabi ed sikara.
22 Agawa ed sikara so ibabaga na peteg ya uliran: “Pinawil na aso so uta to, tan say inames lan baboy et nantiblak lamet.”
