Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 OKSEKI TLAMACHTILMEJ

Tlen melauak itech toTajtsin, teKone uan espíritu santo

Tlen melauak itech toTajtsin, teKone uan espíritu santo

AKINMEJ tlaneltokaj itech Trinidad kijtoaj itech toTajtsin Dios katej eyi: toTajtsin, teKone uan Espíritu Santo. Uan kijtoaj ninmej eyi san sekan katej, nochi ueli kichiuaj uan amo ikaj okinchijchi. Ik non, akinmej tlaneltokaj itech Trinidad kijtoaj toTajtsin Dios, teKone Dios uan Espíritu Santo noijki Dios, maski ijkon, kijtoaj yejuan eyi mochiuaj san se Dios.

 Miakej akinmej tlaneltokaj itech Trinidad amo uelij kijtoaj tlen kijtosneki Trinidad. Yejuan kineltokaj itech iTlajtol toTajtsin Dios ijkuilitok. Maski ijkon, itech Biblia amo keman moijtoa non tlajtoli Trinidad. Maski ijkon, ¿onka se tlaxelol tlen kiteititia melauak onka Trinidad? Pampa tiknankiliskej nin tlajtlanilistli, ma tikitakan se tlaxelol tlen kitekitiltiaj akinmej kijtoaj itech Biblia melauak kajki tlajtoli Trinidad.

“TLÁJTOLI YE DIOS”

Juan 1:1 kijtoa: “Ijkuak ayamó opewaya n tlaltíkpaktli, yokatka n Tlájtoli, iwa non Tlájtoli okatka iwan Dios, iwa non Tlájtoli Ye Dios”. Satepan itech tlaxelol 14 itech nin tlakotonal, tlatitlanil Juan kiyekijtoa, “Tlájtoli” ye Jesús (Juan 1:14). Pampa itech Juan 1:1 kijtoa Tlajtoli ye Dios, miakej akinmej kitlajtoltiaj kajsikamatij toTajtsin uan teKone mochiuaj san se Dios.

Ma tikilnamikikan seki amochmej tlen katej itech Biblia achto omoijkuilojkej ika tlajtoli griego uan satepan okintlajtolkuepkej ika okseki tlatlamantli tlajtolmej. Maski sekimej tlaltikpaktlakamej tlen ixtlamatkej kijkuiloaj itech inBiblia “Tlájtoli Ye Dios”, oksekimej kitlajtolkuepaj okse tlamantli. ¿Tleka? Pampa yejuan momachtiaj tlajtoli griego tlen ika omoijkuilo Biblia, kajsikamatij ken pampa kuali kitlajtolkuepaskej non tlaxelol moneki kitekitiltiskej okseki tlajtolmej. Ma tikitakan tlen kijtoaj seki biblias: “se dios okatka Tlajtoli”, “Tlajtoli okatka ken dios” uan “dios okatka Tlajtoli” (Juan. Texto y Comentario, de J. Mateos y J. Barreto, lectura alternativa; Los escritos originales de la comunidad del discípulo “amigo” de Jesús, de Senén Vidal; Cuarto Evangelio. Cartas de Juan, de J. J. Bartolomé). Ijkon ken kijtoaj ninmej biblias, Tlajtoli amo toTajtsin Dios. * Nin tlaxelol kiteititia Tlajtoli okachi ueyi amo ken oksekimej ángeles tlen Jehová okinchijchi, ik non, moijtoa ye se “dios”. Itech Juan 1:1 tokayotl “dios” ijkuilitok ika minúscula, ijkon motekitiltia pampa tlajtoskej itech “akin chikauak” uan amo itech akin kipia sapanoa miak chikaualistli.

 MA TIMOMACHTIKAN OKSEKI TLAMANTLI

Miakej tlaltikpaktlakamej amo kimatij tlajtoli griego tlen ika omoijkuilo Biblia. ¿Ken uelis tikmatiskej tlen okinekiaya kijtos tlatitlanil Juan? Se neskayotl: ma tikijtokan akin tlamachtia kineki kinmachtis itlaj akinmej kinmachtia. Maski ijkon, satepan yejuan peuaj tlatlamantli mokuayejyekoaj itech tlen okinmachtijkej. ¿Ken uelis kuali kajsikamatiskej? Moneki kitlajtlaniskej akin kinmachtia. Ijkon uelis okachi kuali kajsikamatiskej tlen okinmachtijkej. Tejuan noijki, pampa kuali tikajsikamatiskej tlen kijtosneki Juan 1:1, moneki tikitaskej tlen kijtoa Evangelio tlen okijkuilo Juan. Ompa tiktemoskej okseki tlamantli tlen kiteititia tlen tekitl kipia Jesús. Ijkuak tikajsiskej okachi kuali tikajsikamatiskej tlen kijtosneki tlen okijkuilo tlatitlanil Juan.

Se neskayotl, ma tikitakan tlen okijkuilo Juan itech tlakotonal 1 tlaxelol 18: “Amaka tlakatl yokitak Totajtsi Dios [akin kipia sapanoa miak chikaualistli]”. Maski ijkon, sekimej tlaltikpaktlakamej kema okitakej Jesús, iKone toTajtsin Dios, pampa Juan okijto: “Non Tlájtoli [Jesús] omókopki Tlakatl, iwa towa ochanchiwako. Tejwah otiktakeh imawistilis” (Juan 1:14). Tla ijkon, ¿ken uelis tikijtoskej toTajtsin Dios akin kipia sapanoa miak chikaualistli iuan iKone mochiuaj san se? Juan noijki okijto “Tlajtoli okatka iuan Dios”. ¿Ken uelis ikaj yetos iuan okse, uan noijki mochiuaskej san se? Noijki itech Juan 17:3 Jesús kijtoa toTajtsin Dios uan ye tlatlamantli katej, pampa kijtoa toTajtsin Dios san ye “milajka Dios”. Uan kanin tlami Evangelio tlen okijkuilo Juan, kijtoa: “Pero nin tlajkuíloli omoijkuilo para xikneltokakah Jesús Ye n Cristo Ikone Dios” (Juan 20:31). Itech nin tlaxelol amo moijtoa Jesús se Dios, okachi kuali moijtoa iKone toTajtsin Dios. Nochi tlen okijkuilo Juan, techititia ken moneki tikajsikamatiskej Juan 1:1. Tlajtoli, noso Jesús, se “dios” pampa okachi ueyi amo ken oksekimej ángeles, maski ijkon, amo ken toTajtsin Dios akin kipia sapanoa miak chikaualistli.

MA TIKITAKAN IKA TLEN MELAUAK OMOIJTO

Ma tikitakan oksepa ineskayo akin tlamachtia. Ximokuayejyeko sekimej tlen momachtiaj ayamo kuali kajsikamatij maski akin kinmachtia oksepa okinmilui tlen kijtosneki. ¿Tlen uelis kichiuaskej? Uelis kitemoskej okse akin tlamachtia uan  kitlajtlaniskej ma kinmilui tlen kijtosneki. Tla ye noijki kinmiluia ijkon ken okinmilui okse akin tlamachtia, nochtin kuali kineltokaskej tlen achto okinmachtijkej. Noijki ijkon panoa tla amo kuali tikajsikamatij tlen okijto tlatitlanil Juan, itech Jesús uan toTajtsin Dios akin kipia sapanoa miak chikaualistli. Tla ijkon techpanoa, uelis tikitaskej tlen okachi techiluia Biblia. Ma tikitakan tlen okijkuilo Mateo. Ye okijkuilo tlen okijto Jesús: “Pero n tonati iwa n ora ijkuak ijkó tlamochiwas amaka kimati, nion ángelteh non kateh ilwikak, nion Ne, yej sanwel Notajtsi kimatok” (Mateo 24:36). ¿Ken kiteititiaj ninmej tlajtolmej Jesús amo toTajtsin Dios akin kipia sapanoa miak chikaualistli?

Jesús okijto iTajtsin okachi miak tlamantli kimati. Maski ijkon, tla Jesús uan toTajtsin Dios akin kipia sapanoa miak chikaualistli mochiuaj san se, Jesús noijki kimatiskia tlen iTajtsin kimatok. Nikan tikitaj toTajtsin Dios uan iKone amo san se. Maski ijkon, ikaj uelis kijtos: “Jesús okatka ken se dios uan noijki ken se tlakatl, uan ijkuak okijto ninmej tlajtolmej okatka ken se tlakatl”. Ma tikijtokan melauak tlen mokuayejyekoa. Maski ijkon, ¿tlen panoa ika espíritu santo? Tla melauak espíritu santo uan toTajtsin Dios mochiuaj san se, ¿tleka Jesús amo okijto espíritu santo okimatiaya keman tlamiskia nochi tlen amo kuali? Jesús okijto non tlamantli san kimatok iTajtsin.

Ijkuak okachi timomachtis Biblia, tejuatsin tikajsis okseki tlaxelolmej tlen techtlapouiaj itech nin tlamantli. Ninmej tlaxelolmej kiteititiaj toTajtsin Dios, teKone uan espíritu santo amo mochiuaj san se (Salmo 90:2; Hechos 7:55; Colosenses 1:15).

^ párr. 3 Tla tikneki tikmatis okachi itech Juan 1:1, ximomachti La Atalaya 1 de noviembre de 2008 itech tlamachtil ¿La Palabra era “Dios”, o “un dios”?, ika español, tlen kichijchiuaj iTlaixpantijkauan Jehová.