Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 TLAMACHTIL 8

¿Tlen iTekiuajkayo toTajtsin Dios?

¿Tlen iTekiuajkayo toTajtsin Dios?
  • ¿Tlen techmachtia Biblia itech iTekiuajkayo toTajtsin Dios?

  • ¿Tlen kichiuas non tekiuajkayotl?

  • ¿Keman kichiuas Tekiuajkayotl ma mochiua itlanekilis toTajtsin Dios ipan Tlaltikpak?

1. ¿Tlen tlatlaujtilistli timomachtiskej?

SAPANOA miakej tlaltikpaktlakamej kixmatij oración del padrenuestro. Nin tlatlaujtilistli san se neskayotl tlen Jesús otechtlalili uan tlen miak ipati. Ma timomachtikan achto eyi tlamantli tlen ompa moijtoaj, uan ijkon okachi kuali tikajsikamatis tlen melauak tlamachtia Biblia.

2. Xikijto eyi tlamantli tlen Jesús okinmachti imachtijkauan ma kitlajtlanikan ijkuak motlatlaujtiskiaj.

2 Kanin peua nin tlatlaujtilistli, Jesús okinmilui akinmej otlakaktokaj: “Yika, nomejwah ijkí moneki ximotiotsajtsilikah: Totajtsi Dios non timoitstika ilwikak, nochipa makiyektenewakah motoka. Xiwalmuika xitlanawatiki, mamochiwa tlan Tejwatsi tikmonekiltia itech nin tlaltíkpaktli, ijkó kemi mochiwa kan ilwikak” (Mateo 6:9-13). ¿Tlen kijtosnekij ninmej eyi tlamantli?

3. ¿Tlen tlamantli itech iTekiuajkayo toTajtsin Dios moneki ma tikmatikan?

3 Yotimomachtijkej miak itech itoka toTajtsin Dios, Jehová. Uan noijki yotimomachtijkej itech itlanekilis toTajtsin Dios, itech tlen yokichi uan tlen kichiuas satepan pampa kinpaleuis tlaltikpaktlakamej. Maski ijkon, ¿tlen okinekiaya kijtos Jesús ijkuak okijto “xiwalmuika xitlanawatiki”? ¿Tlen  iTekiuajkayo toTajtsin Dios? ¿Ken mochipauas itoka toTajtsin Dios ijkuak peuas ualtlanauatis? ¿Uan ken mochiuas itlanekilis toTajtsin Dios ijkuak peuas ualtlanauatis?

¿TLEN ITEKIUAJKAYO TOTAJTSIN DIOS?

4. ¿Tlen iTekiuajkayo toTajtsin Dios, uan akin iueyi Tekiua?

4 ITekiuajkayo toTajtsin Dios se tekiuajkayotl tlen Jehová yokitlali. Uan ye yokipejpenki se ueyi Tekiua pampa non tekiuajkayotl. ¿Akin nin ueyi Tekiua? Jesucristo. Ye okachi chikauak amo ken tekiuajkej tlen katej itech Tlaltikpak; ik non, moijtoa “Ye n Rey Akin kinnawatijtok nochteh n reyes iwa Tekowa de nochteh n tekowajkeh” (1 Timoteo 6:15). Jesús kipia miak chikaualistli pampa kichiuas miak tlamantli tlen kuali amo ken tekiuajkej itech Tlaltikpak.

5. ¿Kanin kajki iTekiuajkayo toTajtsin Dios, uan kanin tlanauatis?

5 ¿Kanin kajki iTekiuajkayo toTajtsin Dios? ¿Kanin kajki Jesús? Ijkon ken yotimomachtijkej, Jesús okimiktijkej itech se kuauitl, okiyolitijkej uan 40 tonalmej satepan oyajki iluikak (Hechos 2:33). Ik non, iTekiuajkayo toTajtsin Dios kajki itech iluikak (2 Timoteo 4:18). Maski kajki iluikak, ualtlanauatis ipan Tlaltikpak (xiktlajtolti Apocalipsis 11:15).

6, 7. ¿Tleka Jesús se kuali ueyi Tekiua?

6 Jesús melauak se kuali ueyi Tekiua. ¿Tleka ijkon tikijtoaj? Pampa ye amo keman mikis. Biblia kijtoa ye amo ken tekiuajkej itech Tlaltikpak, pampa Jesús “ayik oksepa mikkis. N mikílistli ayakmó kinawatia n Cristo” (Romanos 6:9). Ik non, nochi tlamantli kuali tlen kichiuas amo keman tlamis. Uan melauak kichiuas miak tlamantli tlen kuali.

7 Xikita tlen kijtoa Biblia itech Jesús: Uan iespíritu Jehová yetos ipan ye, espíritu pampa ixtlamatilistli uan tlamatilistli, espíritu pampa tlapaleuis uan chikaualistli, espíritu ika tlamatilistli uan itech imauilis Jehová. Uan ye kipias pakilistli itech imauilis Jehová. Amo tlaixkomakas san ika tlen kitas iixtololouan, nion tlayektlalis san ika tlen kikakis. Akinmej amo itlaj kipiaj kinmixkomakas ika melajkayotl, uan  ika melajkayotl kinyektlalis akinmej yolkualmej itech Tlaltikpak” (Isaías 11:2-4). Nikan kuali techyekiluia Jesús kuali kinnauatis nochtin tlaltikpaktlakamej uan kinmiknomatis. ¿Amo mitspaktiskia tikpias se tekiua ken ye?

8. ¿Akinmej tlanauatiskej iuan Jesús?

8 Ma tikitakan okseki tlamantli itech iTekiuajkayo toTajtsin Dios: Jesús amo ualtlanauatis san ye iselti, kipaleuiskej oksekimej ueyi tekiuajkej. Se neskayotl, Pablo okilui Timoteo: “Tla tikxikoah n tlaijyowílistli, noiwa titlanawatiskeh iwan Ye” (2 Timoteo 2:12). Kema, Pablo, Timoteo uan oksekimej tlaltikpaktlakamej tlen amo keman okikajkej Jehová yokinpejpenkej pampa ma ualtlanauatikan iuan Jesús itech iTekiuajkayo toTajtsin Dios. ¿Keski tlanauatiskej iuan Jesús?

9. ¿Keski tlaltikpaktlakamej tlanauatiskej iuan Jesús, uan keman opejki kinpejpena toTajtsin Dios?

9 Ken otimomachtijkej itech tlamachtil 7, tlatitlanil Juan okitak itech se kochtemikilistli “Ichkatsi [Jesucristo] omoketoka ipan Siontepetl [kanin tekiti ken ueyi Tekiua itech iluikak]. Ompa íwa okatkah se siento iwa ome póali iwa n nawi mil (144,000) tlakah non okipixtokah ijkuilitok Itoka n Ichkatsi iwa Itoka Itajtsi kan inmixkuak”. ¿Akinmej ninmej 144,000? Juan techiluia: “Yawih iwan Ichkatsi san kan ik Ye yawi. Yejwah non okinkojkeh itech nochteh n tlaltikpaktlakah para mayetokah non achto tlamana inawak Dios iwa n Ichkatsi” (Apocalipsis 14:1, 4). Kema, akinmej amo keman okikajkej Jesús okinpejpenkej pampa ma tlanauatikan iuan ye itech iluikak. Satepan mikiskej uan kinyolitiskej itech iluikak, yejuan “tlanawatijtoskeh ipan nochi n tlaltíkpaktli” iuan Jesús (Apocalipsis 5:10). Itech xiuitl 33 ik tlayekapan toTajtsin Dios opejki kinpejpena yolmelauakej akinmej melauak kichiuaj ken Cristo pampa ijkon moajxitiskiaj 144,000.

10. ¿Tleka tikijtoaj Jehová melauak techtlasojtla, ik non, okika Jesús uan 144,000 ma technauatikan?

10 Jehová sapanoa techtlasojtla, ik non, okipejpenki Jesús uan 144,000 pampa ma technauatikan. Jesús okatka se tlakatl, ik non, kimati ken tlaltikpaktlakamej sapanoa titlajyouiaj.  Pablo okijto itech Jesús: “Tikpiah se Toweyi Tiópixki non techiknomati, porke Ye inewia okiyejyekojkeh kemi tejwah techyejyekoah pero Ye amo otlajtlakolchi” (Hebreos 4:15; 5:8). Akinmej tlanauatiskej iuan Jesús noijki okixikojkej tlajyouilistli ijkon ken tlaltikpaktlakamej. Noijki yejuan tlajtlakolejkej uan noijki omokokoayaj. Melauak yejuan kuali kimatij nochi tlen kinyolkokoa tlaltikpaktlakamej.

¿TLEN KICHIUAS ITEKIUAJKAYO TOTAJTSIN DIOS?

11. ¿Tleka Jesús okinmilui imachtijkauan ma kitlajtlanilikan toTajtsin Dios ma mochiua itlanekilis itech iluikak?

11 Jesús amo san okinmilui imachtijkauan ma motlatlaujtikan pampa ma uiki iTekiuajkayo toTajtsin Dios; noijki okinmilui omonekiaya ma kitlajtlanilikan ma mochiua itlanekilis Jehová “ken itech iluikak, noijki itech Tlaltikpak”. Itech iluikak, kanin kajki toTajtsin Dios, ángeles tlen yolmelauakej nochipa kichiuaj itlanekilis toTajtsin Dios. Maski ijkon, itech tlamachtil 3 otimomachtijkej se ángel tlen amo yolkuali ayakmo okichi itlanekilis toTajtsin Dios uan okichi Adán uan Eva ma tlajtlakolchiuakan. Itech tlamachtil 10 okachi timomachtiskej tlen kijtoa Biblia itech nin ángel tlen itoka Satanás. ToTajtsin Dios okika Satanás uan amo kuali iejekauan, tlen intoka demonios, ma mokauakan ok tepitsin kauitl itech iluikak. Ik non, ijkuak Jesús okatka nikan Tlaltikpak, amo nochtin tlen okatkaj iluikak okichiuayaj itlanekilis toTajtsin Dios. Maski ijkon, nochi nin mopatlaskia ijkuak Jesucristo peuaskia tlanauatis itech iTekiuajkayo toTajtsin Dios uan moteuiskia iuan Satanás (xiktlajtolti Apocalipsis 12:7-9).

12. ¿Tlen ome tlamantli tlen miak ipati moijtoaj itech Apocalipsis 12:10?

12 Itech Biblia techiluia tlen panoskia: “Ijkuakó onikak kan ilwikak se tlájtoli chikawak non okijtoaya:—Yoajsiko n tonati ijkuak nochteh iaxkawah Dios kinmakixtiskeh, yoneski iweletilis n Totajtsi Dios iwa yopé tlanawatia. Iwa n Cristo noiwa yokiseli tlanawátili; ken yokiwalkixtijkeh akin tlajka iwa yuak  okinteiliaya tokniwah inawak Totajtsi Dios” (Apocalipsis 12:10). ¿Tikita itech nin tlaxelol ome tlamantli tlen miak ipati? Achto, Jesucristo peuaskia tlanauatis itech iTekiuajkayo toTajtsin Dios. Ome, Satanás okikixtijkej itech iluikak uan okiualtlamotlakej Tlaltikpak.

13. ¿Tlen opanok pampa okikixtijkej Satanás itech iluikak?

13 ¿Tlen opanok ijkuak omochijkej ninmej ome tlamantli? Ma tiktlajtoltikan tlen opanok itech iluikak: “¡Mayeto miak pakílistli ilwikak, iwa xiyolpakikah nomejwah akimeh ompa nonchantitokeh!” (Apocalipsis 12:12). Kema, ángeles yolmelauakej oyolpakej miak, pampa okikixtijkej itech iluikak Satanás uan amo kuali iejekauan, nochtin tlen ok katej iluikak amo keman kikauaj Jehová uan nochtin yejuan kuali mouikaj ika yolseuilistli. Ik non, itech iluikak yimochijtok itlanekilis toTajtsin Dios.

Ijkuak okikixtijkej Satanás uan amo kuali iejekauan itech iluikak opejki miak ouijkayotl itech Tlaltikpak. Maski ijkon, nin san niman tlamis

14. ¿Tlen panotok pampa okiualtlamotlakej Satanás ipan Tlaltikpak?

14 ¿Uan tlen panotok itech Tlaltikpak? Biblia techiluia: “¡Miálmasteh akimeh chantitokeh ipan tlaltíkpaktli iwa itech weyi atl! N diablo yotemok kan nomejwah iwa kualankamiki, ken kimatok mach ok wejkawitl nentinemis” (Apocalipsis 12:12). Satanás melauak kualantok pampa yokikixtijkej itech iluikak uan ayakmo miak kauitl yetos. Ken melauak kualantok, kintlajyouiltijtok nochtin tlaltikpaktlakamej. Itech tlamachtil 9 okachi timomachtiskej itech ouijkayotl tlen panotok. Maski ijkon, ika nochi tlen yotimomachtijkej, ma timotlajtlanikan: ¿ken uelis kichiuas iTekiuajkayo toTajtsin Dios ma mochiua itlanekilis ipan Tlaltikpak?

15. ¿Tlen kineki kichiuas toTajtsin Dios itech Tlaltikpak?

15 Xikilnamiki tlen itlanekilis toTajtsin Dios pampa nochi Tlaltikpak. Ijkon ken yotimomachti itech tlamachtil 3, Jehová okiteititi itech Edén ken kineki nochi Tlaltikpak ma mokuepa se kualtsin xochitlali kanin uelis chantiskej tlaltikpaktlakamej yolmelauakej akinmej amo keman mikiskej. Ijkuak Satanás okichi Adán uan Eva ma tlajtlakolchiuakan, ayakmo omochi itlanekilis toTajtsin Dios itech nochi Tlaltikpak,  maski ijkon, ye ok kineki kichiuas. Jehová ok kineki ma mochiua tlen kijtoa Biblia: “Yolmelajkej yetoskej itech Tlaltikpak, uan itech chantiskej nochipa” (Salmo 37:29). Uan iTekiuajkayo toTajtsin Dios kichiuas non. ¿Ken kichiuas?

16, 17. ¿Tlen techiluia Daniel 2:44 itech iTekiuajkayo toTajtsin Dios?

16 Itech Daniel 2:44 kijtoa: “Uan ijkuak tlanauatijtoskej nonmej ueyi tekiuajkej toTajtsin Dios tlen kajki iluikak kitlalis se tekiuajkayotl tlen amo keman kitlajtlamiskej. Uan nin tekiuajkayotl amo kiuikaskej itech okse altepetl. Kinxitinis uan kinpojpolos ninmej tekiuajkej, uan ye nochipa yetos”. ¿Tlen techiluia Daniel itech iTekiuajkayo toTajtsin Dios?

17 Achto, techiluia nin tekiuajkayotl peuaskia “ijkuak tlanauatijtoskej [...] ueyi tekiuajkej”, kijtosneki ijkuak okseki tekiuajkayomej ok yetoskej. Ome, techiluia nin tekiuajkayotl nochipa yetos, amo keman tlamis. Nion se tekiuajkayotl uelis kipatlas nion kitlanis. Eyi, kijtoa intekiuajkayo tlaltikpaktlakamej moteuiskej iuan iTekiuajkayo toTajtsin Dios, uan iTekiuajkayo toTajtsin Dios tlatlanis. Saiktlami, san nin tekiuajkayotl kinnauatis tlaltikpaktlakamej uan melauak kuali tlanauatis, amo ken okseki.

18. ¿Tlen itoka guerra kanin moteuiskej tekiuajkej iuan iTekiuajkayo toTajtsin Dios?

18 Biblia techiluia ok miak tlamantli itech saiktlami guerra tlen kipias iTekiuajkayo toTajtsin Dios iuan tekiuajkej tlen tlayekanaj itech nin Tlaltikpak. Se neskayotl, techiluia ijkuak yitlamis nochi, amo kuali ejekamej kinkajkayauaskej “wejweyi reyes non” tlanauatijtokej. ¿Tleka ijkon kichiuaskej? “Para mamotekilmakakah iwa n Dios nochi weletini itech neká weyi tonati non Ye yokitlali.” Tekiuajkej kinnechikoskej itech tlen ika “tlájtoli hebreo itoka Armagedón” (Apocalipsis 16:14, 16). Ninmej ome tlaxelolmej techiluiaj non guerra tlen kipiaskej tekiuajkej iuan iTekiuajkayo toTajtsin Dios, itoka Armagedón.

19, 20. ¿Tleka axkan amo mochijtok itlanekilis toTajtsin Dios ipan Tlaltikpak?

19 ¿Tlen kichiuas iTekiuajkayo toTajtsin Dios ijkuak tlamis  guerra Armagedón? Oksepa ma timokuayejyekokan itech itlanekilis Jehová pampa Tlaltikpak: ma mokuepa se xochitlali uan itech ma chantikan tlaltikpaktlakamej tlen amo kipiaskej tlajtlakoli uan tlen san Jehová kitekichiuiliskej. ¿Tleka axkan amo mochijtok itlanekilis? Achto, pampa tinochtin titlajtlakolejkej, ik non, timokokoaj uan timikij. Maski ijkon, itech tlamachtil 5 otimomachtijkej Jesús omikik topampa uan ijkon uelis tiyoltoskej nochipa. Uelis tikilnamiki tlen okijkuilo Juan: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:16).

20 Uan noijki miakej tlaltikpaktlakamej kichiuaj miak tlamantli tlen amo kuali. Tlakajkayauaj uan kichiuaj miak auilnemilistli. Amo kinekij kichiuaskej itlanekilis Jehová. Maski ijkon, nochtin akinmej kichiuaj tlen amo kuali kinmixpoloskej itech Armagedón, iguerra toTajtsin Dios (xiktlajtolti Salmo 37:10). Uan noijki amo mochijtok itlanekilis toTajtsin Dios pampa tekiuajkej kinmiluiaj tlaltikpaktlakamej amo ma kichiuakan. Miakej kichiuaj tlen amo kuali uan kintlajyouiltiaj oksekimej. Biblia techyekiluia: “Tlakatl kiyekana tlakatl pampa kitlajyouiltis” (Eclesiastés 8:9).

21. ¿Ken tlapaleuis Tekiuajkayotl ma mochiua itlanekilis toTajtsin Dios ipan nochi Tlaltikpak?

21 Maski ijkon, ijkuak tlamis Armagedón, iTekiuajkayo toTajtsin Dios kinyekanas nochtin tlaltikpaktlakamej. Non tekiuajkayotl kichiuas itlanekilis toTajtsin Dios uan kiualikas miakej tlateochiualismej. Se neskayotl, kixpolos Satanás uan amo kuali iejekauan (Apocalipsis 20:1-3). Kichiuas ma motekitilti yolilistli tlen okitemakak Jesús, uan ijkon nochtin tlaltikpaktlakamej yolmelauakej ayakmo mokokoskej nion mikiskej, yejuan yoltoskej nochipa (xiktlajtolti Apocalipsis 22:1-3). Noijki nochi Tlaltikpak kikuepas se kualtsin xochitlali. Ijkon, nin Tekiuajkayotl kichiuas ma mochiua itlanekilis toTajtsin Dios ipan Tlaltikpak uan noijki mochipauas  iToka toTajtsin Dios. ¿Tlen kijtosneki nin? Ika Tekiuajkayotl, nochtin tlaltikpaktlakamej kitlakaitaskej uan kiueyichiuaskej itoka toTajtsin Dios: Jehová.

¿KEMAN PEUAS TEKITIS ITEKIUAJKAYO TOTAJTSIN DIOS?

22. ¿Tleka tikijtoaj iTekiuajkayo toTajtsin Dios amo opejki tlanauatia ijkuak Jesús ouala Tlaltikpak nion satepan ijkuak okiyolitijkej?

22 Ijkuak Jesús okinmilui imachtijkauan ma kitlajtlanilikan toTajtsin Dios “Xiwalmuika xitlanawatiki”, nin kuali techmachtia itech nonmej tonalmej non Tekiuajkayotl ayamo otlanauatijtoka. ¿Opejki tlanauatia ijkuak Jesús oyajki iluikak? Amo, pampa Pedro uan Pablo okijtojkej satepan okiyolitijkej Jesús, itech omochi tlen kijtoa Salmo 110:1. Se neskayotl, Pedro okijto itech nin tlaxelol: “Notajtsi Dios [Jehová] okili Noteko [Jesús]: ‘Ximoyayanti noyekma, asta ijkuak [ni]kintlalis itlampa [mo]ikxiwah akimeh [mits]kokoliah’” (Hechos 2:32-35; Hebreos 10:12, 13). Kema, Jesucristo mochiaskia seki kauitl.

Nin Tekiuajkayotl kichiuas ma mochiua itlanekilis toTajtsin Dios ipan nochi Tlaltikpak, ijkon ken mochijtok itech iluikak

23. 1) ¿Keman opejki tlanauatia iTekiuajkayo toTajtsin Dios? 2) ¿Tlen timomachtiskej itech okse tlamachtil?

23 ¿Keski kauitl mochiaskia? Itech xiuitl 1875, sekimej tlakamej akinmej omomachtiayaj Biblia, okitakej peuas tlanauatiskia itech xiuitl 1914. (Tla tikneki tikmatis okachi itech nin xiuitl ximomachti tlamachtil “Itech xiuitl 1914 omochi miak tlamantli tlen kijtoa Biblia”.) Itech xiuitl 1914 ik tlayekapan tikitaj ken nochi tlen panotok ipan Tlaltikpak mochijtok ken okijtojkej akinmej omomachtiayaj Biblia.  Ken mochijtok nochi tlen omoijto itech Biblia, techmachtia itech xiuitl 1914 Jehová okitlali ken ueyi Tekiua Jesús, uan iTekiuajkayo toTajtsin Dios opejki tlanauatia itech iluikak. Ik non, axkan tikatej itech itlamian tonalmej tlen kipoloaj Satanás (Apocalipsis 12:12; Salmo 110:2). Noijki uelis tikijtoskej nin Tekiuajkayotl san niman peuas tekitis nikan pampa ma mochiua itlanekilis toTajtsin Dios ipan nochi Tlaltikpak. ¿Mitspaktia tikakis ninmej kuali tlajtolmej? ¿Tikneltoka melauak mochiuas? Itech tlamachtil 9 timomachtiskej tlen kijtoa Biblia mochiuas.