Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 TLAMACHTIL 15

Ueyichiualistli tlen kipaktia toTajtsin Dios

Ueyichiualistli tlen kipaktia toTajtsin Dios
  • ¿Kipaktia toTajtsin Dios nochi tlaneltokalismej?

  • ¿Ken uelis tikmatiskej katli tlaneltokalistli tlen melauak?

  • ¿Akinmej melauak kitekichiuiliaj toTajtsin Dios itech ninmej tonalmej?

1. ¿Tlen uelis tikseliskej tla tikueyichiuaj toTajtsin Dios ken ye kineki?

TOTAJTSIN JEHOVÁ techtlasojtla miak. Ik non, ye kineki techyekanas pampa kuali ma tiyetokan. Tla tikueyichiuaj ken ye kineki, tiyolpakiskej uan amo tikpiaskej miak ouijkayotl. Noijki techpaleuis uan techteochiuas miak (Isaías 48:17). Maski ijkon, onka miakej tlaneltokalismej. Maski nochtin kijtoaj tlamachtiaj tlen melauak itech toTajtsin Dios, amo kuali kijtoaj akin ye uan tlen kineki ma tikchiuakan.

2. ¿Ken uelis tikmatis ken moneki tikueyichiuaskej toTajtsin Dios, uan ken uelis tikneskayotiskej?

2 ¿Ken uelis tikmatis ken moneki tikueyichiuas toTajtsin Dios? Amo moneki timomachtis uan tikitas nochi tlen kichiuaj nochi tlaneltokalismej. San moneki timomachtis tlen melauak tlamachtia Biblia itech tlaneltokalistli tlen melauak. Ma tiktlalikan se neskayotl. Ken tikmati, tomin tlen amo itlaj ipati melauak se ueyi ouijkayotl itech nochi Tlaltikpak. Ximokuayejyeko mitsiluiaj moneki tikpejpenas tomin tlen melauak uan tlen amo. ¿Ken tikmatis katli tomin tlen melauak uan tlen amo? ¿Moneki tikixmatis sejse tomin tlen amo itlaj ipati? Amo, okachi kuali tla tikmatis ken moita tomin tlen melauak. Ijkuak kuali tikmatis ken moita, uelis tikmatis tlen tomin tlen melauak uan tlen amo. Noijki ijkon, amo oui tikmatiskej tlen tlaneltokalistli  tlen amo melauak ijkuak kuali tikmatij tlen moneki kichiuas tlaneltokalistli tlen melauak.

3. Ijkon ken okijto Jesús, ¿tlen moneki tikchiuaskej pampa toTajtsin Dios ma techseli?

3 Miak ipati ma tikueyichiuakan toTajtsin Dios ken ye kineki. Miakej tlaltikpaktlakamej kineltokaj nochi tlaneltokalismej kipaktiaj toTajtsin Dios, maski amo ijkon tlamachtia Biblia. Noijki amo san moneki tikijtoskej titlaneltokaj itech Jesús, pampa Jesús okijto: “Amo nochteh akimeh nechiliah: ‘¡Noteko, Noteko!’, kalakiskeh kan Dios tlanawatia. Sanwel akimeh kichiwah tlan kimonekiltia Notajtsi non kajki ilwikak”. Kema, toTajtsin Dios kuali techitas tla tikchiuaj tlen ye techiluia. Uan nochtin akinmej amo kichiuaj itlanekilis toTajtsin Dios, Jesús okintokayoti “tlajtlakolchijkeh”, kijtosneki akinmej kichiuaj tlen amo kuali (Mateo 7:21-23). Tlaneltokalistli tlen amo melauak noijki ijkon ken tomin tlen amo melauak: amo itlaj ipati. Uan noijki tetlajyouiltia miak.

4. ¿Tlen kijtosnekij ome ojtli tlen Jesús okijto, uan kanin techuikaj?

4 Jehová kineki kinmakas nochtin tlaltikpaktlakamej yolilistli tlen amo keman tlamis. Maski ijkon, pampa uelis tiyoltoskej nochipa itech Xochitlali, moneki tikueyichiuaskej uan tikchiuaskej tlen ye kineki. Maski ijkon, miakej amo kinekij kichiuaskej, ik non, Jesús okijto: “Xikalakikah kan ik kaltentli non tsopijtik, porke patlawak n kaltentli iwa kuyawak n ojtli non tewika kan moixpoloah, iwa miakeh ik ompa yajtokeh. Pero n kaltentli iwa n ojtli non tewika kan nochipa se yolitos, saikpanoa tsopijtik iwa san sikimeh kajsi non ojtli” (Mateo 7:13, 14). Ken tikitaj, tlaneltokalistli tlen melauak uelis techmakas yolilistli, uan tlaneltokalistli tlen amo melauak techixpolos. Axkan kuali, Jehová amo kineki nion se tlaltikpaktlakatl ma miki, ik non, kinkauilia nochtin tlaltikpaktlakamej ma kixmatikan (2 Pedro 3:9). Melauak, ken tikueyichiuaj toTajtsin Dios uelis kichiuas ma tikpiakan yolilistli noso uelis kichiuas ma timikikan.

¿KEN TIKIXMATIS TLANELTOKALISTLI TLEN MELAUAK?

5. ¿Ken uelis tikmatiskej akinmej kipiaj tlaneltokalistli tlen melauak?

5 ¿Ken uelis tikajsiskej “ojtli non tewika kan nochipa se  yolitos”? Jesús otechilui amo oui tikmatiskiaj akinmej kipiaj tlaneltokalistli tlen melauak pampa moitaskia itech innemilis. Okijto: “Weletis nonkinmixmatiskeh ika tlan kichiwah”, pampa “nochi kuali kuawitl, kitemaka kuali itlakilo” (Mateo 7:16, 17). Ye okijto akinmej kipiaj tlaneltokalistli tlen melauak moita itech tlen kineltokaj uan tlen kichiuaj. Maski tlajtlakolejkej uan ualeua kichiuaj itlaj tlen amo kuali, mochijchikauaj pampa kichiuaskej itlanekilis toTajtsin Dios. Ma tikitakan chikuase tlamantli tlen ika uelis tikixmatiskej tlaneltokalistli tlen melauak.

6, 7. ¿Tlen mokuayejyekoaj itekipanojkauan Jehová itech Biblia, uan tlen kuali neskayotl okitlali Jesús?

6 Itekipanojkauan toTajtsin Dios tlamachtiaj tlen kijtoa Biblia. ToTajtsin Dios techiluia: “Nochi tiotlajkuíloli Dios otlanawati makijkuilokah, kuali matechmachtikah, ika matechnonotsakah, ika matechmilawakah iwa matechititikah kenijki tinemiskeh inawak Dios. Ijkó nochi akin ya tekone inawak Dios, kuali mamoixtlamachti iwa makimati kenijki kichiwas nochi tlan kuali” (2 Timoteo 3:16, 17). Tlatitlanil Pablo okintlajkuilili ikniuan: “Ijkuak nomejwah ononkikakeh itlajtol Dios non tejwah otomechmatiltijkeh, nomejwah ononkiselijkeh kemi milák itlajtol Dios iwa amo san kemi intlajtol n tlakah” (1 Tesalonicenses 2:13). Ik non, nochi tlen tlamachtia uan kichiua tlaneltokalistli tlen melauak amo kisa itech tlen kijtoaj uan kineltokaj tlaltikpaktlakamej. Okachi kuali, nochi tlen tlamachtia kisa itech iTlajtol toTajtsin Dios, Biblia.

7 Jesús okitemakak se kuali neskayotl pampa nochi tlen otlamachtiaya okisaya itech iTlajtol toTajtsin Dios. Ijkuak omotlatlaujtijtoka ixpan iTajtsin okijto: “Motlajtol ye tlan milák” (Juan 17:17). Jesús otlaneltokaya itech iTlajtol toTajtsin Dios, uan nochi tlen otlamachtiaya okisaya itech. Pampa ye nochipa okijtoaya: “Itlajkuilol Dios noiwa kijtoa” uan san niman okijtoaya se tlaxelol bíblico (Mateo 4:4, 7, 10). Noijki ijkon, itekipanojkauan toTajtsin Dios amo titlamachtiaj tlen tejuan tikmatij. Okachi kuali, tikneltokaj Biblia iTlajtol toTajtsin Dios uan nochi tlen titlamachtiaj kisa itech.

8. ¿Tlen kijtosneki tikueyichiuaskej Jehová?

 8 Akinmej kipiaj tlaneltokalistli tlen melauak san kiueyichiuaj Jehová uan kitematiltiaj itoka. Jesús otlamachti: “Xikweyijkachiwa Moteko Dios [Jehová], iwa sanwel Ye [x]iktekichiwili” (Mateo 4:10). Ik non, itekipanojkauan toTajtsin Dios san kiueyichiuaj Jehová uan amo ikaj okse. Noijki kiueyichiuaj akin melauak toTajtsin Dios ijkuak kitematiltiaj itoka uan iyelis. Itech Salmo 83:18 kijtoa: “Te, akin motoka Jehová, san te okachi tiUeyititok ipan nochi Tlaltikpak”. Jesús okinmakak se kuali neskayotl pampa yejuan ma kinpaleuikan oksekimej ma kixmatikan toTajtsin Dios. Ineuian ye okilui iTajtsin: “Ne onikinmatilti motoka, iwa ok nikinmatiltijtos” (Juan 17:26). Noijki ijkon, axkan akinmej melauak itekipanojkauan toTajtsin Dios kinmachtiaj tlaltikpaktlakamej itoka, itlanekilis uan iyelis Jehová.

9, 10. ¿Ken kiteititiaj melauak motlasojtlaj akinmej melauak kichiuaj ken Cristo?

9 Itekipanojkauan toTajtsin Dios melauak motlasojtlaj, uan amo mochikoitaj. Jesús okijto: “Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah” (Juan 13:35). Achto imachtijkauan Jesús ijkon omotlasojtlayaj. Itekipanojkauan toTajtsin Dios melauak motlasojtlaj maski uitsej itech tlatlamantli uejueyij altepemej, maski sekimej ixchipajkej uan oksekimej amo, uan maski sekimej kipiaj miak tlamantli uan oksekimej amo, nochtin melauak motlasojtlaj ken iknimej (xiktlajtolti Colosenses 3:14). Akinmej katej itech tlaneltokalistli tlen amo melauak amo motlasojtlaj. Tla motlasojtlaskiaj, amo momiktiskiaj san pampa ikaj uits itech okse altepetl. Akinmej melauak kichiuaj ken Cristo amo kinmiktiaj inmikniuan nion oksekimej tlaltikpaktlakamej. Biblia kijtoa: “Weletis tikitas akin ikone n Totajtsi Dios, iwa akin ikone n diablo. Akin amo kichiwa tlan kuali, nion kitlasojtla ikni, amo ikone Dios. [...] matimosepantlasojtlakah. Amo matikchiwakah kemi Caín, ikone n diablo, non okimikti ikni” (1 Juan 3:10-12; 4:20, 21).

10 Melauak nin tlasojtlalistli kichiua amo ma tikinmiktikan oksekimej, maski ijkon, noijki kijtosneki okseki tlamantli. Akinmej  melauak kichiuaj ken Cristo mochijchikauaj, kixeloaj kauitl uan inchikaualis pampa kinpaleuiskej uan kinyolchikauaskej oksekimej (Hebreos 10:24, 25). Mopaleuiaj ijkuak tlajyouiaj uan amo keman tlakajkayauaj nion tlachtekij. Noijki kitlakamatij tlanauatil tlen Biblia kijtoa “[ma] tikinpalewik[an] tokniwah tlaneltokakeh” (Gálatas 6:10).

11. ¿Tleka miak ipati ma tikmatikan toTajtsin Dios techmakixtia ika Jesús?

11 Akinmej melauak kichiuaj ken Cristo kimatij toTajtsin Dios uelis techmakixtis san ika Jesús. Biblia kijtoa: “Mach onka ok se tlakatl akin weletis techmakixtis, porke Dios mach otechmák ok se tlakatl itech nin tlaltíkpaktli para inawak matimomakixtikah” (Hechos 4:12). Ken otimomachtijkej itech tlamachtil 5, Jesús okitemakak iyolilis pampa kinmakixtis nochtin tlaltikpaktlakamej akinmej tetlakamatij (Mateo 20:28). Noijki, Jehová yokitlali Jesús ken ueyi Tekiua itech iTekiuajkayo tlen kajki iluikak uan tlen ualtlanauatis ipan Tlaltikpak. Ik non, toTajtsin Dios kineki ma tiktlakamatikan Jesús uan ma tikchiuakan ken ye otechmachti. San ijkon uelis tikpiaskej yolilistli tlen amo keman tlamis. Ik non, Biblia kijtoa: “Akin kineltoka Ikone Dios, yolitos nochipa [...]. Pero akin amo kineki kitlakitas Ikone Dios, amo yolitos” (Juan 3:36).

12. ¿Tlen kijtosneki amo tikchiuaskej ken tlaltikpaktlakamej?

12 Akinmej melauak itekipanojkauan toTajtsin Dios amo kichiuaj tlen kichiuaj tlaltikpaktlakamej. Ijkuak Jesús okatka ixpan tekiua romano Pilato, akin okixnamiktoka, okilui: “Notekiwajyo amo kajki itech nin tlaltíkpaktli” (Juan 18:36). Itech nochi uejueyij altepemej, akinmej melauak imachtijkauan Jesús kikauaj ma kinyekana iTekiuajkayo tlen kajki iluikak. Ik non, amo mokajkalakiaj itech política nion itech nochi ouijkayotl tlen onka. Maski ijkon, tla oksekimej tlaltikpaktlakamej kinekij mokajkalakiskej itech política, noso kinekij yetoskej tekiuajkej, akinmej melauak kichiuaj ken Cristo amo itlaj kinmiluiaj. Uan maski amo mokajkalakiaj itech política, kema kintlakamatij nochi tlanauatilmej. ¿Tleka? Pampa iTlajtol toTajtsin Dios kinnauatia “makintlakitakah n tekiwajkeh” (Romanos 13:1). Maski ijkon, ijkuak sekimej tekiuajkej kijtoaj ma  tikchiuakan itlaj tlen toTajtsin Dios techiluia amo ma tikchiuakan, akinmej melauak itekipanojkauan tikchiuaj ken tlatitlanilmej, akinmej okijtojkej: “Tejwah tikpiah tiktlakitaskeh tlan Dios kijtoa iwa amo tlan kijtoah n tlakah” (Hechos 5:29; Marcos 12:17).

13. Akinmej melauak kichiuaj ken Cristo, ¿tlen kineltokaj itech iTekiuajkayo toTajtsin Dios, uan tlen kichiuaj?

13 Akinmej melauak imachtijkauan Jesús tetlapouiaj san iTekiuajkayo  toTajtsin Dios uelis kinmakas tlen kuali nochtin tlaltikpaktlakamej. Jesús okijto: “Iwa ijkuak nin kualitlájtoli non techilia kenomi Dios tlanawatia, motetlapowis itech nochi n tlaltíkpaktli para nochteh makimatikah. Iwa ijkuakó, tlamis [nochi tlen amo kuali, TNM]” (Mateo 24:14). Akinmej melauak kichiuaj ken Cristo amo kinmiluiaj oksekimej ma kineltokakan tekiuajkej uelis kitlajtlamiskej nochi ouijkayotl. Okachi kuali tetlapouiaj san iTekiuajkayo toTajtsin Dios uelis kinmakas tlen kuali nochtin tlaltikpaktlakamej (Salmo 146:3). Noijki, Jesús otechmachti ijkuak timotlatlaujtiskej uelis tiktlajtlaniliskej ma uiki non tlanauatijkayotl, pampa okijto: “Xiwalmuika xitlanawatiki, mamochiwa tlan Tejwatsi tikmonekiltia itech nin tlaltíkpaktli, ijkó kemi mochiwa kan ilwikak” (Mateo 6:10). ITlajtol toTajtsin Dios techiluia iTekiuajkayo toTajtsin Dios “kinpojpolos ninmej tekiuajkej [tlen axkan katej], uan ye nochipa yetos” (Daniel 2:44; Apocalipsis 16:14; 19:19-21).

14. ¿Tlen tlaneltokalistli tikijtoa tejuatsin kichiua nochi tlen ika moixmati tlaneltokalistli tlen melauak?

14 Ika nochi tlen yotimomachtijkej, ximotlajtlani: “¿Tlen tlaneltokalistli tlamachtia nochi tlen kijtoa Biblia uan kitematiltia toTajtsin Dios itoka Jehová? Kema, ¿tlen tlaneltokalistli kiteititia tlasojtlalistli, tlaneltoka itech Jesús, amo mokajkalakia itech tlen kichiuaj tlaltikpaktlakamej, uan tetlapouia san iTekiuajkayo toTajtsin uelis kinmakas tlen kuali nochtin tlaltikpaktlakamej? Itech nochi tlaneltokalismej tlen katej itech Tlaltikpak, ¿tlen tlaneltokalistli kichiua nochi nin tlamantli?”. San iTlaixpantijkauan Jehová ijkon kichiuaj (xiktlajtolti Isaías 43:10-12).

¿TLEN TIKCHIUAS?

15. Maski tikneltokaj onka toTajtsin Dios, ¿tlen okse tlamantli kichia ma tikchiuakan?

15 Pampa tikyolpaktis toTajtsin Dios amo san moneki tikijtos titlaneltoka itech. Pampa itech Biblia moijtoa amo kuali ejekamej noso demonios noijki kineltokaj onka san se Dios (Santiago 2:19). Maski ijkon, kuali tikmatij amo kichiuaj itlanekilis Jehová uan ye amo kinselia. Pampa tikyolpaktiskej toTajtsin Dios amo san moneki tikneltokaskej onka, noijki moneki  tikchiuaskej itlanekilis. Noijki, moneki tikisaskej itech tlaneltokalistli tlen amo melauak uan tikseliskej tlaneltokalistli tlen melauak.

16. ¿Tlen moneki tikchiuaskej pampa amo timoneloskej iuan tlaneltokalistli tlen amo melauak?

16 Tlatitlanil Pablo okijto amo ma timokajkalakikan itech tlaneltokalistli tlen amo melauak. Okijkuilo: “Xikinkakajtewakah, iwa ayakmó inwah ximonelokah; amo xiktelkokah tlan teyolijtlakoa. Ijkuakó Ne nomechselis” (2 Corintios 6:17; Isaías 52:11). Ik non, akinmej melauak kichiuaj ken Cristo amo kitemoaj moneloskej iuan tlaneltokalistli tlen amo melauak.

17, 18. ¿Tlen kijtosneki “weyi Babilonia”, uan tleka moneki totoka ma tikisakan itech?

17 Biblia tlamachtia nochi tlaneltokalismej tlen amo melauak pouij itech “weyi Babilonia” (Apocalipsis 17:5). * Nin tokayotl techilnamiktia altepetl tlen yiuejkika okatka, Babilonia, kanin opejki tlaneltokalistli tlen amo melauak satepan ijkuak opanok Apachiuilistli. Miakej tlaneltokalismej uan tlamachtilmej tlen axkan kichiuaj tlaneltokalismej tlen amo melauak opejkej itech ueyi altepetl Babilonia. Se neskayotl, akinmej ompa ochantiayaj okinueyichiuayaj teotsitsintin tlen okiyektlaliayaj eyi teotsitsintin, uan axkan miakej tlaneltokalismej kiueyichiuaj Trinidad. Maski ijkon, Biblia kuali techmachtia onka san se akin melauak toTajtsin Dios, Jehová, uan iKone ye Jesucristo (Juan 17:3). Babilonios noijki okineltokayaj ijkuak ikaj miki kipia itlaj tlen yoltok uan tlen uelis tlajyouis. Axkan miakej tlaneltokalismej tlamachtiaj tikpiaj se alma noso espíritu tlen amo miki uan tlen uelis tlajyouis ijtik tlitl.

18 Tlaneltokalistli tlen okatka itech Babilonia omoxitini itech nochi Tlaltikpak. Ik non, tikijtoaj Ueyi Babilonia kuali kineskayotia tlaneltokalistli tlen amo melauak. ToTajtsin Dios yokijto ninmej tlaneltokalismej san niman tlamiskej. ¿Tikajsikamati tejuatsin tleka miak ipati tikisaskej itech Ueyi Babilonia? ToTajtsin Jehová kineki tejuatsin totoka ‘xikisa itech’,  pampa ayakmo miak kauitl poliui (xiktlajtolti Apocalipsis 18:4, 8).

Ijkuak tiktekichiuilis Jehová iuan ialtepe, tikselis okachi miak tlamantli

19. ¿Tlen tikselis pampa tiktekichiuilia Jehová?

19 Ijkuak tikpejpenas tikisas itech tlaneltokalistli tlen amo melauak, uelis sekimej tlaltikpaktlakamej ayakmo mouikaskej mouan. Maski ijkon, ijkuak tiktekichiuilis Jehová uan Ialtepe, tikselis okachi miak tlamantli. Mitspanos noijki ken achto imachtijkauan Jesús, akinmej okikajtejkej miak tlamantli pampa iuan yaskiaj: tikinpias miakej mokniuan tlen kiueyichiuaj toTajtsin Dios. Noijki tiyetos itech se ueyi kalchanejke tlen kajki itech nochi Tlaltikpak, tikinpias miakej mokniuan akinmej melauak kichiuaj ken Cristo tlen mitstlasojtlaskej miak. Uan noijki tikpias se kualtsin chialistli “itech ok se tlaltíkpaktli” (xiktlajtolti Marcos 10:28-30). Noijki akinmej axkan ayakmo kinekij mouikaskej mouan pampa okse tlamantli tikneltoka, uelis satepan noijki kinekiskej momachtiskej itech Biblia uan mochiuaskej itekipanojkauan Jehová.

20. ¿Tlen kiseliskej akinmej katej itech tlaneltokalistli tlen melauak?

20 Biblia techiluia ayakmo miak kauitl poliui pampa toTajtsin Dios kitlajtlamis nochi tlamantli tlen amo kuali uan kipatlas ika se yankuik tlali kanin tlanauatis iTekiuajkayo toTajtsin Dios (2 Pedro 3:9, 13). ¡Melauak kualtsin yetos yankuik tlali! Ompa yetos san se tlaneltokalistli, ueyichiualistli tlen melauak. ¿Amo tikneltoka moneki tikchiuas tlen moneki pampa axkan timonechikos iuan itekipanojkauan toTajtsin Dios?

^ párr. 17 Itech tlamachtil ¿Tlen “weyi Babilonia”? moijtoa tleka Ueyi Babilonia kineskayotia tlaneltokalismej tlen amo melauak.