Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 OKSEKI TLAMACHTILMEJ

¿Tlen kijtosneki Tonal keman ye Tlaixkomakas?

¿Tlen kijtosneki Tonal keman ye Tlaixkomakas?

¿KEN timokuayejyekoa yetos Tonal keman ye Tlaixkomakaki? Miakej kineltokaj itech non tonal sapanoa miakej yetoskej ixpan itrono toTajtsin Dios pampa ma kinmixkomakakan. Noijki kineltokaj miakej kinmakaskej se kualtsin yolilistli itech iluikak, uan oksekimej nochipa kintlajyouiltiskej ijtik tlitl. Maski ijkon, Biblia techiluia Tonal keman ye Tlaixkomakaki okse tlamantli mochiuas: amo timomojtiskej, itech non tonal tikchiuaskej itlaj tlen kuali, uan Tlaltikpak yetos ken achto.

Itech Apocalipsis 20:11, 12, tlatitlanil Juan okijto tlen panoskia itech Tonal keman ye Tlaixkomakaki: “Ijkuakó onikitak se weyi yáyantli istak, iwa Akin ompa oewatoka, ixpa opoliwik n tlaltíkpaktli iwa n ilwikak, iwa ayakmakah oksepa okinmitak. Iwa onikinmitak nochteh non yomikkeh, non tominyojkeh iwa non próbesteh, omoketokah iyakapan n yáyantli. Ijkuakó okintlapojkeh n amatlajkuílolteh kan ijkuilitok nochi tlan se okichi. Noiwa omotlapo n amatlajkuíloli kan machotitokeh nochteh akimeh yolitoskeh [...]. Non yomikkeh okinmixkomakakeh ika tlan okichijkeh ijkó kemi machotitok itech amatlajkuílolteh”. ¿Akin kinmixkomakas?

ToTajtsin Jehová ye Juez tlen okachi ueyi itech nochi Tlaltikpak. Maski ijkon, ye kikaua okse ma kichiua nin tekitl. Itech  Hechos 17:31 tlatitlanil Pablo okijto toTajtsin “Dios yokitlali se tonati ijkuak tlaixkomakas. Ye kichiwas porke Ye yolmilajka iwa kitlalis n Cristo Jesús makichiwa nin tekitl”. Ken tikita, Jehová okipejpenki Jesús pampa kinmixkomakas nochtin (Juan 5:22). Maski ijkon, ¿keman peuas Tonal keman ye Tlaixkomakaki uan keski uejkauas?

Itech Apocalipsis moijtoa nin tonal peuas ijkuak tlamis Armagedón, ijkuakon kitlajtlamiskej nochi tlen kiyekantok Satanás (Apocalipsis 16:14, 16; 19:19–20:3). * Uan kitsakuaskej Satanás uan amo kuali iejekauan itech mil xiuitl. Itech nochi nin kauitl 144,000 tlen yetoskej iuan Jesús kinmixkomakaskej tlaltikpaktlakamej uan ‘tlanauastiskej iuan Cristo mil xiuitl’ (Apocalipsis 14:1-3; 20:1-4; Romanos 8:17). Ken tikitaj nin Tonal keman ye Tlaixkomakaki amo totoka mochiuas pampa amo san uejkauas 24 horas, nin tonal uejkauas mil xiuitl.

Itech ninmej mil xiuitl, Jesucristo kinmixkomakas “non yolitoskeh iwa non yomikkeh” (2 Timoteo 4:1). Tlajtoli “non yolitoskeh” kijtosneki “senmiaktikeh tlaltikpaktlakah” akinmej panoskej itech xochitlali, akinmej kinmakixtiskej itech Armagedón (Apocalipsis 7:9-17). Tlatitlanil Juan noijki okinmitak “nochteh non yomikkeh, [...] omoketokah iyakapan” trono kan kinmixkomakaskej. Ken okijto Jesús, “nochteh non yomikkeh [...] kikakiskeh itlajtol. Iwa kisaskeh” (Juan 5:28, 29; Hechos 24:15). ¿Tlen ika kinmixkomakaskej tlaltikpaktlakamej?

Itech ikochtemikilis Juan okitak omotlapojkej seki amochmej uan “Dios okinmixkomakakeh ika tlan [...] machotitok itech amatlajkuílolteh”. ¿Itech ninmej amochmej moijtoa nochi tlen okichijkej tlaltikpaktlakamej? (Apocalipsis 20:12.) Amo. Amo kinmixkomakaskej ika tlen okichijkej achto mikiskiaj. ¿Ken tikmatij? Pampa itech Biblia kijtoa “akin yomikki, ayakmó kichijtinemi tlajtlákoli” (Romanos 6:7). Akinmej kinyolitiskej amo kinmiluiskej tlen achto okichijkej pampa kipeualtiskej se yankuik nemilistli. Ninmej amochmej kipiaj yankuik tlanauatilmej tlen toTajtsin Dios kinmakas. Pampa  uelis yoltoskej nochipa, akinmej kinyolitiskej uan akinmej kinmakixtiskej itech Armagedón moneki kitlakamatiskej itlanauatiluan toTajtsin Dios. Uan noijki moneki kintlakamatiskej nochi tlanauatilmej tlen toTajtsin Dios kijtos itech non mil xiuitl. Ijkon, nochtin kinmixkomakaskej ika tlen kichiuaskej itech Tonal keman ye Tlaixkomakaki.

Itech non tonal, sapanoa miakej yikin kimatiskej tlen itlanekilis toTajtsin Dios uan satepan kichiuaskej. Nin kijtosneki moneki kinmachtiskej nochtin akinmej kinyolitiskej. Melauak ‘tlaltikpaktlakamej momachtiskej melajkayotl’ (Isaías 26:9). Maski ijkon, amo nochtin kinekiskej kichiuaskej itlanekilis toTajtsin Dios. Isaías 26:10 kijtoa: “Maski ma kipaleuikan akin amo yolkuali, ye amo momachtis melajkayotl. Maski yetos itech Tlaltikpak kanin onka melajkayotl ye kichiuas tlen amo kuali, uan amo kitas iueyitilis Jehová”. Nochtin akinmej amo yolkualmej kinmixpoloskej pampa nochipa itech Tonal keman ye Tlaixkomakaki (Isaías 65:20).

Ijkuak tlamis Tonal keman ye Tlaixkomakaki, akinmej ok yoltoskej, melauak yoltoskej pampa ayakmo kipiaskej tlajtlakoli (Apocalipsis 20:5). Ik non, itech Tonal keman ye Tlaixkomakaki, tlaltikpaktlakamej oksepa yetoskej ken achto ijkuak amo okatka tlajtlakoli (1 Corintios 15:24-28). Ijkuakon, saiktlami kiyejyekoskej intlaneltokilis. Ijkuakon kikixtiskej Satanás uan kikauiliskej ma mochijchikaua pampa kinkajkayauas sekimej tlaltikpaktlakamej (Apocalipsis 20:3, 7-10). Akinmej kixtopeuaskej Diablo kitaskej ken melauak mochiua tlen kijtoa Biblia: “Akinmej yolmelauakej mokauaskej ipan Tlaltikpak uan ipan nemiskej nochipa” (Salmo 37:29). Melauak, Tonal keman ye Tlaixkomakaki yetos se ueyi tlateochiualistli pampa nochtin akinmej amo keman kikauaskej Jehová.

^ párr. 1 Uelis okachi timomachtis itech Armagedón itech Perspicacia para comprender las Escritutras, volumen 1, páginas 680, 681, 1086, 1087, uan itech amochtli Adoremos al único Dios verdadero itech capítulo 20, ninmej amochmej kinchijchiuaj iTlaixpantijkauan Jehová.