Xikita nochi

Tlen kiualika

 TLAMACHTIL 4

¿Akin Jesucristo?

¿Akin Jesucristo?
  • ¿Tlen ueyi tekitl kichiua Jesús?

  • ¿Kanin ouala?

  • ¿Ken okatka iyelis?

1, 2. 1) Maski tikakiskej tlajtoaj itech ikaj, ¿tleka amo uelis tikijtoskej kuali tikixmatij? 2) ¿Akin kijtoaj okatka Jesús?

ITECH Tlaltikpak katej miakej tlaltikpaktlakamej tlen sapanoa kinmixmatij. Sekimej kinmixmatij kanin yejuan chantij, itech inueyi altepetl noso itech nochi Tlaltikpak. Maski ijkon, tla tejuatsin tikmati ken itoka ikaj tlen miakej kixmatij, amo kijtosneki kuali tikixmati, nion tikmati tlen okichi itech inemilis noso ken iyelis.

2 Maski yopanok kanaj 2,000 xiuitl ijkuak Jesucristo okatka nikan Tlaltikpak, axkan miakej tlajtoaj itech. Maski ijkon, miakej amo kimatij akin okatka ye. Sekimej kijtoaj ye san okatka se tlakatl yolkuali. Oksekimej kijtoaj okatka se teotlajtojki. Uan oksekimej kijtoaj Jesús ye Dios uan moneki ma tikueyichiuakan. ¿Kox melauak non?

3. ¿Tleka moneki tikinmixmatis Jehová uan Jesús?

3 Miak ipati xikmati tlen melauak itech Jesús. ¿Tleka? Pampa Biblia kijtoa: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3). Kema, tla tejuatsin melauak tikinmixmatis Jehová uan Jesucristo, uelis tikpias yolilistli tlen amo keman tlamis ijkuak Tlaltikpak yetos se xochitlali (Juan 14:6). Jesús ika ineskayo, okiteititi ken moneki tikpiaskej tonemilis uan ken moneki ma timouikakan  iuan oksekimej (Juan 13:34, 35). Itech tlamachtil 1, yotimomachtijkej tlen melauak itech toTajtsin Dios. Axkan ma tikitakan tlen techmachtia Biblia itech Jesucristo.

MESÍAS TLEN OMOIJTO UALASKIA

4. ¿Tlen kijtosnekij tlajtolmej Mesías uan Cristo?

4 Miak xiuitl achto nesiskia Jesús, Biblia okijto ualaskia akin toTajtsin Dios kiualtitlaniskia, Mesías noso Cristo. Tlajtolmej Mesías (tlen kisa itech se tlajtoli hebreo) uan Cristo (tlen kisa itech se tlajtoli griego) kijtosnekij “Tlapejpenali”. Ik non, toTajtsin Dios kipejpenaskia akin ualaskia, kijtosneki, kimakaskia  se ueyi tekitl. Itech okseki tlamachtilmej okachi tikmatiskej tlen ueyi tekitl kichiuas Mesías pampa ma mochiua itlanekilis toTajtsin Dios. Noijki tikitaskej ken Jesús uelis techteochiuas noijki axkan. Uelis ijkuak ayamo onesiaya Jesús, miakej yomotlajtlaniayaj: “¿Akin yetos Mesías?”.

5. ¿Tlen tlamantli melauak okineltokayaj imachtijkauan Jesús?

5 Itech achto siglo, imachtijkauan Jesús akin ochantiaya Nazaret, kuali okimatiayaj ye Mesías akin omoijto ualaskia (Juan 1:41). Se imachtijka tlen omotokayotiaya Simón Pedro, okijto: “Tejwatsi Ti Cristo” (Mateo 16:16). ¿Tleka imachtijkauan okimatiayaj Jesús ye Mesías tlen omoijto ualaskia? ¿Uan tleka tejuan noijki uelis tikneltokaskej?

6. ¿Tlen neskayotl techpaleuia ma tikajsikamatikan ken okinpaleui Jehová akinmej yolkualmej pampa ma kimatikan akin Mesías?

6 Iteotlajtojkej toTajtsin Dios tlen okatkaj ijkuak ayamo oualaya Jesús, okijtojkej miak tlamantli tlen ika kimatiskiaj akin yetoskia Mesías. Ma tiktlalikan se neskayotl: ma tikijtokan tejuatsin moneki tiktemoti ikaj itech tiankistli uan ompa katej sapanoa miakej tlaltikpaktlakamej. ¿Amo melauak mitspaleuis tla mitsiluiskej ken tlakentok akin tiktemoti? Noijki ijkon, Jehová ika iteotlajtojkej tlen okijkuilojkej Biblia kuali okiteititi tlen kichiuaskia Mesías uan tlen kipanoskia. Ijkon, tlaltikpaktlakamej tlen yolkualmej kuali kixmatiskiaj Jesús ijkuak itech mochiuaskia nochi tlen omoijto.

7. Xikijto ome tlamantli tlen omoijto mochiuaskiaj itech Jesús.

7 Ma tikitakan ome neskayomej. Achto neskayotl ye nin: kanaj 700 xiuitl achto nesiskia Jesús, teotlajtojki Miqueas okijto nesiskia itech altepetl Belén, se altepetsintli tlen okatka itech Judá (Miqueas 5:2). ¿Kanin oneski Jesús? Ompa oneski (Mateo 2:1, 3-9). Okse neskayotl tikitaj itech Daniel 9:25, kanin miak xiuitl achto Daniel okijto  ken uelis momatiskia itech tlen xiuitl ualaskia Mesías: itech xiuitl 29. * Ninmej tlajtolmej uan okseki tlen omoijto panoskiaj, kiteititiaj Jesús ye Mesías tlen omoijto ualaskia.

Ijkuak Jesús omoapolakti, omochi Mesías noso Cristo

8, 9. Ijkuak Jesús omoapolakti, ¿ken okachi kuali omoteititi ye Mesías?

8 Itech itlamian xiuitl 29 okachi kuali omoteititi Jesús ye Mesías. Itech non xiuitl Jesús okilui Juan akin oTeapolaktiaya ma kiapolakti itech aueyatl Jordán. Jehová okilui Juan ken kixmatiskia Mesías, uan okititi ijkuak Jesús omoapolakti. Biblia kijtoa: “Ijkuak Jesús okiski de ijtik atl, okitak owalmotlapo n ilwikak iwa Iespíritu n Dios owaltemok ipan Jesús kemi se palomatsi. Iwa itech ilwikak omokak se tlájtoli non okijtoaya:—Ye nin Nokone non saikpanoa niktlasojtla, iwa satlawel nechyolpaktia” (Mateo 3:16, 17). Ijkuak Juan okitak uan okikak non, kuali okimatki ye toTajtsin Dios akin okiualtitlanki Jesús (Juan 1:32-34). Non tonal, ijkuak toTajtsin Dios okititlanili Jesús espíritu santo —ichikaualis toTajtsin Dios tlen ika kichiua itlanekilis— omochi Mesías noso Cristo, akin toTajtsin Dios okipejpenki pampa ma yeto Tlayekanki uan ueyi Tekiua (Isaías 55:4).

9 Tlen itech Biblia omoijkuilo uan yomochi uan tlen Jehová okijto, melauak kiteititia Jesús ye Mesías tlen omoijto ualaskia. Maski ijkon, Biblia kinankilia ok ome tlajtlanilmej itech Jesucristo: kanin ouala uan ken okatka iyelis.

¿KANIN OUALA JESÚS?

10. ¿Tlen techmachtia Biblia itech iyolilis Jesús ijkuak ayamo oualaya nikan Tlaltikpak?

10 Biblia techmachtia Jesús yokatka iluikak ijkuak ayamo  oualaya nikan Tlaltikpak. Se neskayotl, Miqueas amo san okijto Mesías nesiskia itech Belén, noijki okijto Jesús “yokatka yiuejkika” (Miqueas 5:2). Uan Jesús miak uelta okijto yokatka iluikak ijkuak ayamo oualaya nikan Tlaltikpak ken se tlakatl (xiktlajtolti Juan 3:13; 6:38, 62; 17:4, 5). Ijkuak ye okatka iluikak melauak kuali omouikaya iuan Jehová.

11. ¿Ken kiteititia Biblia Jesús ye iKone Jehová akin okachi kitlasojtla?

11 Jehová okachi kitlasojtla Jesús, uan onka miak tlamantli tlen kiteititia tleka kitlasojtla. Biblia kijtoa Jesús “teteachka de nochi tlan Dios okichijchi” pampa toTajtsin Dios achto okichijchi (Colosenses 1:15). * Uan okse tlamantli pampa san “Ye se Ikone” (Juan 3:16). Nin kijtosneki toTajtsin Dios ineuia okichijchi. Noijki san Jesús okipaleui Jehová ijkuak okichijchijkej nochi okseki tlamantli (Colosenses 1:16). Noijki kitokayotiaj “Tlájtoli” (Juan 1:14). Nin kiteititia otlajtoaya ipatka iTajtsin. Uelis ye okinmiluiaya tlajtolmej uan tlanauatilmej oksekimej ikoneuan toTajtsin Dios, ángeles uan noijki tlaltikpaktlakamej.

12. ¿Ken tikmatij Jesús amo ken toTajtsin Dios?

12 ToTajtsin Dios uan iKone tlen achto okichijchi, ¿katej san se ijkon ken miakej kineltokaj? Biblia amo ijkon tlamachtia. Ken yotimomachtijkej itech párrafo 11, toTajtsin Dios okichijchi iKone. Ik non, uelis tikijtoskej Jesús opejki iyolilis, maski ijkon, Jehová ye amo opejki iyolilis uan amo keman tlamis (Salmo 90:2). Jesús amo keman omokuayejyeko yetos ken iTajtsin. Biblia techyekiluia san toTajtsin Dios akin okachi ueyititok (xiktlajtolti  Juan 14:28; 1 Corintios 11:3). San ye Jehová “toTajtsin Dios akin kipia sapanoa miak chikaualistli” (Génesis 17:1). Amo onka okse ken ye. *

13. ¿Tlen kijtosneki ijkuak Biblia kijtoa toTajtsin Dios “omoteititiko itech iKone”?

13 Jehová uan iKone sapanoa miak xiuitl kuali omouikakej, ijkuak ayamo okinchijchiuayaj sitlalimej uan Tlaltikpak. ¡Melauak omotlasojtlayaj! (Juan 3:35; 14:31). Jesús okimokixti toTajtsin Dios. Ik non, Biblia kijtoa ye “omoteititiko itech Ikone” (Colosenses 1:15). Kema, ijkon ken konemej kinmokixtiaj intatajuan itech miak tlamantli, Jesús okimokixti iTajtsin pampa okipiaya kuali iyelis ken ye.

14. ¿Tlen okichi Jehová pampa iKone oneski ken se konetl?

14 San ye se iKone Jehová okinek kikauas iluikak uan ouala Tlaltikpak ken se tlakatl. Uelis tejuatsin timotlajtlania: “¿Ken uelis se espíritu nesiskia ken se tlaltikpaktlakatl?”. Jehová okichi se milagro. Okitlali iyolilis iKone ijtik se ichpochtli judía tlen omotokayotiaya María. Itajtsin Jesús amo okatka se tlakatl, ik non, konetl tlen María okipixki amo oneski ika tlajtlakoli, uan okitokayoti Jesús (Lucas 1:30-35).

¿KEN OKATKA IYELIS JESÚS?

15. ¿Tleka tikijtoaj ika Jesús okachi kuali tikixmatij Jehová?

15 Nochi tlen Jesús okichi uan okijto ijkuak okatka nikan Tlaltikpak techpaleuia kuali ma tikixmatikan. Uan noijki ika ye okachi uelis tikixmatiskej Jehová. ¿Tleka? Pampa xikilnamiki, Jesús melauak okimokixti iTajtsin. Ik non, okilui se imachtijka: “Akin yonechitak kijtosneki yokitak Notajtsi” (Juan 14:9). Itech naui amochmej tlen moixmatij ken Evangelios —Mateo, Marcos, Lucas uan  Juan—, ompa uelis tiktlajtoltiskej miak tlamantli itech inemilis, iyelis uan tlen okichi Jesucristo.

16. ¿Tlen otlamachtiaya Jesús, uan akin itech oualaya tlen otlamachtiaya?

16 Jesús okitokayotiayaj “Tlamachti” (Juan 1:38; 13:13). ¿Tlen otlamachtiaya? Ye okachi “okinmatiltiaya n kualitlájtoli de Dios”, kijtosneki, kuali tlajtolmej itech iTekiuajkayo toTajtsin Dios. Nin tekiuajkayotl tlen kajki iluikak ualtlanauatis nikan Tlaltikpak uan kinmakas sapanoa miakej tlateochiualismej akinmej amo kikauaj toTajtsin Dios (Mateo 4:23). ¿Akin itech oualaya tlen otlamachtiaya Jesús? Ye okijto: “Notemachtilis amo Ne noaxka, yej de Akin onechaltítlanki”, kijtosneki itlamachtil Jehová (Juan 7:16). Jesús okimatiaya iTajtsin okinekiaya tlaltikpaktlakamej ma kimatikan kuali tlajtolmej itech iTekiuajkayo toTajtsin Dios. Itech tlamachtil 8 timomachtiskej okachi itech nin Tekiuajkayotl uan tlen kichiuas.

17. ¿Kanin otlamachtiaya Jesús, uan tleka omochijchika miak pampa kichiuaskia?

17 ¿Kanin otlamachtiaya Jesús? San kanin okatkaj tlaltikpaktlakamej: itech altepemej uan uejueyij altepemej, itech tiankistli uan tekalijtik. Jesús amo san omotlaliaya uan okinchiaya tlaltikpaktlakamej, ye oyaya kintemoti (Marcos 6:56; Lucas 19:5, 6). ¿Tleka sapanoa omochijchika pampa otetlapoui uan otlamachti? Pampa ijkon okinekiaya iTajtsin, uan Jesús nochipa omochijchika miak pampa kichiuaskia (Juan 8:28, 29). Noijki otetlapouiaya pampa okinmiknomatiaya nochtin tlaltikpaktlakamej tlen oyayaj kanin okatka (xiktlajtolti Mateo 9:35, 36). Omonekiaya tlayekankej teopixkamej ma kinmachtikan nonmej tlaltikpaktlakamej tlen melauak itech toTajtsin Dios uan itlanekilis, maski ijkon, amo okinmachtiayaj. Jesús okimatiaya tlaltikpaktlakamej omonekiayaj ma kimatikan itech iTekiuajkayo toTajtsin Dios.

18. ¿Tlen iyelis Jesús okachi mitspaktia?

 18 Jesús okatka yolkuali uan otetlasojtlaya. Ye amo omoueyimatiaya, nochtin kualtsin okinseliaya uan konemej omomatiayaj inauak (Marcos 10:13-16). Nochtin okinseliaya noso amo okinchikoitaya. Okikokoliaya ikaj ma tlachteki uan tla itlaj amo omochiuaya ika melajkayotl (Mateo 21:12, 13). Itech non tonalmej ijkuak amo okintlakaitayaj siuamej, ye okintlakaitaya (Juan 4:9, 27). Jesús melauak okatka yolyamanki. Se tonal, okinmikxipajpakak itlatitlaniluan, nin tekitl san okichiuayaj tlakeualtin tlen amo okachi inpati.

Jesús otetlapouiaya san kanin okatkaj tlaltikpaktlakamej

19. ¿Tlen neskayotl kiteititia Jesús okinmiknomatiaya tlaltikpaktlakamej tlen otlajyouiayaj?

19 Jesús okinmiknomatiaya tlaltikpaktlakamej tlen otlajyouiayaj, ik non, ika iespíritu santo toTajtsin Dios okichi milagros uan ijkon okinpajti (Mateo 14:14). Se neskayotl, se leproso okitemoto uan okilui: “Tla tikmonekiltia weletis techchipawas de nokokolis”. Jesús okimachili  itech iyolo ken otlajyouiaya non tlakatl. Okiknomatki, okikitski uan okilui: “Ne nikmonekiltia. ¡Ximochipawa!”. ¡Uan kokoxki opajtik! (Marcos 1:40-42.) ¿Timokuayejyekoa tejuatsin ken omomachili non tlakatl?

MASKI OMIKIK AMO OKIKA TOTAJTSIN DIOS

20, 21. ¿Tleka uelis tikijtoskej Jesús otechmakak se kuali neskayotl itech ken moneki tiktlakamatiskej uan amo tikauaskej toTajtsin Dios?

20 Jesús otechmakak se kuali neskayotl pampa ma tiktlakamatikan uan amo keman ma tikauakan toTajtsin Dios. Ye amo keman okika iTajtsin, maski otlajyoui miak uan amo okiselijkej. Amo keman okichi tlen Satanás okinekiaya ma kichiua (Mateo 4:1-11). Itech seki kauitl ikalchanejkauan amo otlaneltokakej itech. Uan okijtoayaj: “Chamo yokuatlapolo” (Marcos 3:21). Maski ijkon, amo omosotla uan okichi iteki toTajtsin Dios. Ijkuak akinmej amo okitlasojtlayaj okiluijkej tlen amo kuali uan okiuijuikaltijkej, okixiko uan amo omomakuepki (1 Pedro 2:21-23).

 21 Jesús amo okika toTajtsin Dios maski akinmej amo okitlasojtlayaj sapanoa okitlajyouiltijkej uan okimiktijkej (xiktlajtolti Filipenses 2:8). Ximokuayejyeko tlen okipanok saiktlami tonal tlen okatka ken tlakatl. Otlaxiko ijkuak tekiuajkej okikitskijkej, jueces amo yolkualmej okitlajtlakoltijkej, okijtojkej tlen amo melauak itech ye, okipijpinatijkej uan ijkuak soldados sapanoa okitlajyouiltijkej. Ijkuak okipilojkej itech kuauitl, saiktlami omijyoti uan okijto: “¡Nochi yomochi!” (Juan 19:30). Eyi tonal satepan, iTajtsin okiyoliti ken se espíritu (1 Pedro 3:18). Seki semanas satepan, omokuepki iluikak kanin omotlali “iyekma Totajtsi Dios” uan omochixki pampa kiselis chikaualistli pampa tlanauatis (Hebreos 10:12, 13).

22. ¿Tlen okichi Jesús pampa amo okika Jehová maski omikik?

22 ¿Tlen okichi Jesús pampa amo okika Jehová maski omikik? Ika imikilis uelis tikpiaskej yolilistli tlen amo keman tlamis itech xochitlali nikan Tlaltikpak, ijkon ken Jehová okijto kichiuas. Itech tlamachtil 5 tikitaskej ken ika imikilis Jesús uelis tikseliskej nin tlateochiualistli.

^ párr. 7 Itech tlamachtil “Teotlajtojki Daniel okijto keman ualaskia Mesías” moijtoa ken omochi itech Jesús tlen okijto Daniel

^ párr. 11 Jehová tiknotsaj toTajtsin pampa ye oKichijchi nochi (Isaías 64:8). Ken toTajtsin Dios okichijchi Jesús, ik non, tikiluiaj iKone toTajtsin Dios. Ik non, oksekimej ángeles uan noijki Adán kinmiluiaj yejuan ikoneuan toTajtsin Dios (Job 1:6; Lucas 3:38).

^ párr. 12 Itech tlamachtil “Tlen melauak itech toTajtsin, teKone uan espíritu santo”, tikitas okseki tlamantli tlen kiteititia Jesús amo ken toTajtsin Dios