Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 TLAMACHTIL 12

Nemilistli tlen kipaktia toTajtsin Dios

Nemilistli tlen kipaktia toTajtsin Dios
  • ¿Ken uelis timochiuas iyolikni toTajtsin Dios?

  • ¿Tlen kipia kitas mouan itlaixnamikilis Satanás?

  • ¿Tlen nemilistli amo kipaktia toTajtsin Dios?

  • ¿Ken uelis tinemis ken toTajtsin Dios kipaktia?

1, 2. ¿Akinmej omochijkej iyolikniuan toTajtsin Dios?

¿AKIN tikpejpenas ken moyolikni? Uelis tiknekis timouikas iuan akin mokuayejyekoa, motekipachoa uan kipia inemilis ken tejuatsin. Uan uelis tikpejpenas se akin kipia kuali iyelis; ken ma tetlakaita uan ma yeto yolkuali.

2 Nochi xiuitl tlen yopanokej, toTajtsin Dios yokinpejpenki miakej tlaltikpaktlakamej pampa ma mochiuakan iyolikniuan. Se neskayotl, Abrahán okitokayoti iyolikni (xiktlajtolti Isaías 41:8; Santiago 2:23). Jehová okijto itech David “se tlakatl akin nechpaktia”, pampa Jehová kintlasojtla tlaltikpaktlakamej tlen ijkon inyelis (Hechos 13:22). Uan teotlajtojki Daniel okitaya ken ikaj akin “miak ipati” (Daniel 9:23).

3. ¿Tleka Jehová kinpejpena san sekimej tlaltikpaktlakamej ken iyolikniuan?

3 ¿Tleka Jehová okinpejpenki Abrahán, David uan Daniel ken iyolikniuan? Jehová okilui Abrahán: “Otikak notlajtol” (Génesis 22:18). Nin kiteititia Jehová motokia intech akinmej ika yolyamanilistli kichiuaj tlen ye kinmiluia. Israelitas okinmilui: “Xiktlakamatikan notlajtol uan ne niyetos namoTajtsin Dios, uan namejuan nanyetoskej noaltepe” (Jeremías 7:23). Tla tejuatsin tiktlakamatis Jehová noijki uelis timouikas iuan.

 JEHOVÁ KINYOLCHIKAUA IYOLIKNIUAN

4, 5. ¿Ken kinyolchikaua Jehová itekipanojkauan?

4 Ximokuayejyeko tlen kijtosneki timouikas iuan toTajtsin Dios. Biblia kijtoa Jehová kitemoa ken “uelis kinpaleuis ika ichikaualis akinmej kineltokaj ika nochi inyolo” (2 Crónicas 16:9). ¿Ken uelis mitspaleuis toTajtsin Dios ika ichikaualis? Itech Salmo 32:8 kijtoa ken kichiua: “Nimitsmakas ixtlamatilistli, uan nimitsmachtis itech tlen ojtli moneki tias. Ne nimitsnojnotsas ika noixtololouan”.

5 ¡Sapanoa kualtsin ken kijtoa Jehová mitsmaluis! Ye mitsnojnotsas ijkuak okachi tiknekis, uan tla tikchiuas tlen mitsiluia, ye mitsmaluis pampa kuali xiyeto. ToTajtsin Dios kineki mitspaleuis pampa xikxiko ouijkayotl tlen mitspanos (xiktlajtolti Salmo 55:22). Tla tiktekichiuilis toTajtsin Dios ika nochi moyolo, uelis tikijtos: “Nochipa onikitaya n Toteko [Jehová] noyakapa; amitla welitis nechmojtis, porke ye kajki nomayekma” (Hechos 2:25; Salmo 63:8). Kema, Jehová kineki mitspaleuis kuali xikpia monemilis ken ye kipaktia. Maski ijkon, ken yitikmati, onka ikaj akin kikokolia toTajtsin Dios uan amo kineki xinemi ken ye kineki.

ITLAIXNAMIKILIS SATANÁS

6. ¿Tlen okijto Satanás itech tlaltikpaktlakamej?

6 Ken otimomachtijkej itech tlamachtil 11, Satanás okixnamik itlanauatilis Jehová. Okijto Jehová tekajkayaua uan amo kuali tlanauatia, pampa amo okinkauiliaya Adán uan Eva ma kipejpenakan tlen kuali uan tlen amo kuali. Satepan ijkuak otlajtlakolchijkej achto totatajuan, inkoneuan opejkej momiaktiliaj itech nochi Tlaltikpak. Ijkon Satanás okijto tlaltikpaktlakamej amo kiueyichiuaj toTajtsin Dios pampa kitlasojtlaj. Ken kijtoskia: ‘Tlaltikpaktlakamej amo kiueyichiuaj toTajtsin Dios pampa kitlasojtlaj. Tla nechkauiliaj, ne uelis nikchiuas nochtin tlaltikpaktlakamej ma kixnamikikan toTajtsin Dios’. Tlen moijtoa itech Job techmachtia  ijkon okineltokaya Diablo. Maski ijkon, ¿akin okatka Job, uan tlen okipiaya kitas itech itlaixnamikilis Satanás?

7, 8. 1) ¿Tleka Job okatka se kuali neskayotl pampa nochtin tlaltikpaktlakamej? 2) ¿Tleka Diablo okijto Job amo okitekichiuiliaya toTajtsin Dios ika nochi iyolo?

7 Yikipia kanaj 3,600 xiuitl okatka Job. Ye okatka se tlakatl sapanoa yolkuali, ik non, Jehová okijto: “Amo onka nion se ken ye itech Tlaltikpak. Ye se tlakatl tlen kipia iyolo ajsitok, tlen kimauilia iDios uan kiixtopeua tlen amo kuali” (Job 1:8). Melauak, Jehová omoyolpaktiaya itech Job.

8 Diablo okijto Job okitekichiuiliaya toTajtsin Dios pampa okiteochiuaya. Diablo okilui Jehová: “¿Amo tikmaluijtok nochi ikalijtik [Job] uan nochi tlen kiyaualoa [...]? Nochi tlen kichiua yotikteochi, uan yomomiaktilijkej iyolkauan ipan Tlaltikpak. Uan axkan xikixtili nochi tlen kipia, uan xikita kox amo mitsuijuikaltis itech moixko” (Job 1:10, 11).

9. ¿Ken okinankili Jehová itlaixnamikilis Satanás, uan tleka?

9 Satanás okijto Job okitekichiuiliaya toTajtsin Dios pampa nochi okimakaya. Uan noijki okijto tla kiyejyekoskia Job, kixnamikiskia toTajtsin Dios. ¿Ken okinankili Jehová itlaixnamikilis Satanás? Jehová okikauili Satanás ma kiyejyeko Job, pampa Satanás okijto Job amo okitekichiuiliaya Jehová ika nochi iyolo. Uan ijkon Job kiteititiskia kox okitlasojtlaya toTajtsin Dios noso amo.

KIYEJYEKOAJ JOB

10. ¿Tlen okipanok Job, uan tlen okichi?

10 Satanás san niman opejki kitlajyouiltia Job. Okichi ma kichtekilikan sekimej iyolkauan uan oksekimej okinmiktilijkej, uan noijki okinmiktilijkej miakej itekipanojkauan. Ijkon okipolo nochi tlen okipiaya. Satepan Diablo oksepa okitlajyouilti, pampa ika se ueyi ejekatl majtlaktli ikoneuan omikej. Maski otlajyoui miak, “Job amo otlajtlakolchi, nion okitlajtlakolti toTajtsin Dios itech tlen amo kuali” (Job 1:22).

11. 1) ¿Tlen okinekiaya kiteititis Satanás itech Job, uan ken otlanankili Jehová? 2) ¿Tlen okichi Job ijkuak chikauak omokoko?

 11 Satanás amo omosotla. Uelis omokuayejyeko, maski Job okixiko pampa okipolo nochi tlen okipiaya, itekipanojkauan uan ikoneuan, kixnamikiskia toTajtsin Dios tla mokokoskia. Uan ijkon, Jehová okikauili Diablo ma kikoko ika sauakokolistli tlen sapanoa tekoko. Maski ijkon, Job amo okipolo itlaneltokilis itech toTajtsin Dios. Okachi kuali okijto: “¡Noyolo ajsitok yetos inauak Jehová nochi tonalmej tlen niyoltos!” (Job 27:5).

Job okiteochijkej pampa amo okika toTajtsin Dios

12. ¿Ken otlanankili Job itlaixnamikilis Diablo?

12 Job amo okimatiaya kox Satanás okitlajyouiltijtoka. Pampa Job amo okimatiaya nochi tlamantli itech tlaixnamikilistli tlen Satanás okijto itech itlanauatilis Jehová, omomojtiaya ye toTajtsin Dios okitlajyouiltijtoka (Job 6:4; 16:11-14). Maski ijkon, Job nochipa okatka yolmelauak inauak Jehová. Uan noijki, ika tlen okichiuaya itech inemilis okiteititi Satanás tlakajkayaua ijkuak okijto san okitekichiuiliaya toTajtsin Dios pampa okimakaya miak tlamantli.

13. ¿Tlen okiseli Job pampa amo keman okika toTajtsin Dios?

13 Pampa Job amo keman okika Jehová, ijkon Jehová okinankili itlaixnamikilis Satanás. Job melauak okatka iyolikni Jehová, ik non, Jehová okiteochi (Job 42:12-17).

¿TLEN KIPIA KITAS MOUAN ITLAIXNAMIKILIS SATANÁS?

14, 15. ¿Tleka tikijtoaj Satanás noijki kinteluijtok nochtin tlaltikpaktlakamej uan amo san Job?

14 Ijkuak Satanás okijto Job okitekichiuiliaya Jehová san pampa okiteochiuaya, amo san ye okitelui, noijki sejse tejuan. ITlajtol toTajtsin Dios kuali techyekiluia itech Proverbios 27:11: “Xiixtlamati, nokone, uan xinechyolpakti, uan ijkon uelis niknankilis akin nechuejuetskilia”. Ninmej tlajtolmej tlen omoijkuilojkej miak xiuitl satepan ijkuak omikik Job, kiteititiaj Satanás ok kixnamiktok toTajtsin Dios uan akinmej kitekichiuiliaj. Ijkuak tikpiaj tonemilis ken toTajtsin Dios  kipaktia, tikteititiaj amo melauak tlen kijtoa Satanás, uan ijkon tikyolpaktiaj toTajtsin Dios. ¿Tlen timokuayejyekoa tejuatsin? Maski moneki tikpatlas monemilis, ¿amo melauak kualtsin yetoskia tla tejuatsin noijki tikteititis Satanás tlakajkayaua?

15 Ximokuayejyeko itech tlen okijto Satanás: “Tla se tlaltikpaktlakatl kimachilia kipolojtok iyolilis, kitemos ken momakixtis” (Job 2:4). Ijkuak okijto “tlakatl”, Satanás amo san okiteluijtoka Job, noijki nochtin tlaltikpaktlakamej. Nin tlamantli miak ipati. Pampa Diablo okijto tejuatsin uelis tikauas Jehová. Satanás kipaktis tla ijkuak titlajyouis amo tiktlakamatis uan amo tikchiuas ken toTajtsin Dios kineki. ¿Tlen uelis kitekitiltis Satanás pampa kichiuas tlen ye kineki?

16. 1) ¿Tlen kitekitiltia Satanás pampa kinxelos tlaltikpaktlakamej itech toTajtsin Dios? 2) ¿Uan ken uelis Diablo kintekitiltis ninmej tlamantli pampa mitskajkayauas?

16 Ken otimomachtijkej itech tlamachtil 10, Satanás kitekitiltia miak tlamantli pampa kinxelos tlaltikpaktlakamej itech toTajtsin Dios. Achto ye nemi “kemi yaskia se lío non kitemojtinemi akin kitlankokototsas iwa kikuas” (1 Pedro 5:8). Uan nin tikitas tla moyolikniuan, mokalchanejkauan uan oksekimej tlaltikpaktlakamej amo kinekiskej ximomachti uan xikchiua tlen timomachtia (Juan 15:19, 20). * Uan noijki, “n satanás kimati moixpatla kemi se ángel non tsotlani” (2 Corintios 11:14). Ijkon, Satanás uelis kitekitiltis miak tlamantli pampa mitskajkayauas uan amo xikchiua tlen toTajtsin Dios kipaktia. Noijki uelis kichiuas ximosotlaua. Uelis kichiuas ximokuayejyeko amo keman tikyolpaktis toTajtsin Dios (Proverbios 24:10). Maski Satanás yetos “kemi [...] se lío non kitemojtinemi akin kitlankokotosas iwa kikuas” noso “kemi  se ángel non tsotlani”, ye ok kixnamiki toTajtsin Dios: pampa kijtoa ijkuak titlajyouis ayakmo tiktekichiuilis toTajtsin Dios. ¿Ken uelis tikixnamikis tlen kijtoa Satanás, uan tikteititis amo tikauas toTajtsin Dios ijkon ken Job?

MA TIKINTLAKAMATIKAN ITLANAUATILUAN JEHOVÁ

17. ¿Tlen tlamantli techyolinia ma tikintlakamatikan itlanauatiluan Jehová?

17 Uelis titlapaleuis ma moixnamiki tlen Satanás kijtoa tla tejuatsin tikchiuas tlen toTajtsin Dios kipaktia. ¿Tlen kijtosneki nin? Biblia kijtoa: “Xiktlasojtla Motajtsi Dios ika nochi moyolo, ika nochi moalma, ika nochi mochikawalis iwa ika nochi motlalnamikilis” (Lucas 10:27). Ijkuak okachi tiktlasojtlas toTajtsin Dios, okachi tiknekis tikchiuas tlen ye mitsiluia. Tlatitlanil Juan okijkuilo: “Tiktlasojtla[j] Dios keman tikintlakitah itlanawatilwan”. Tla tiktlasojtla Jehová ika nochi moyolo, “amo oui se kintlakita” itlanauatiluan, kijtosneki amo oui tikintlakamatis (1 Juan 5:3).

18, 19. 1) Xikijto seki itlanauatiluan Jehová ( xikita página 122). 2) ¿Ken tikmatij toTajtsin Dios amo keman techtlajtlanilia tlen amo uelis tikchiuaskej?

18 ¿Tlen itlanauatiluan Jehová? Seki tlanauatilmej techiluiaj tlen amo moneki tikchiuaskej itech tonemilis. Ken tlanauatilmej tlen tikajsij itech tlamachtil, tlen itoka “ Amo ma tikchiuakan tlen Jehová kikokolia”. Ompa moijtoa seki tlamantli tlen Biblia kijtoa amo ma tikchiuakan. Uelis tejuatsin timokuayejyekos nonmej tlamantli amo okachi tlajtlakoli. Maski ijkon, ijkuak timokuayejyekos itech tlaxelolmej, tikitas tleka okachi kuali tikintlakamatiskej itlanauatiluan toTajtsin Dios. Tikpatlas monemilis uelis yetos sapanoa oui pampa amo keman ijkon otikchiuaya. Maski ijkon, akinmej kipia se nemilistli tlen kipaktia toTajtsin Dios sapanoa kuali katej uan yolpakij (Isaías 48:17, 18). Tejuatsin uelis ijkon tikchiuas. ¿Tleka ijkon tikijtoaj?

19 Jehová amo keman techtlajtlanilia itlaj tlen amo uelis  tikchiuaskej (xiktlajtolti Deuteronomio 30:11-14). Ye techixmati uan kuali kimati tlen uelis tikchiuaskej uan tlen amo (Salmo 103:14). Noijki, uelis techmakas chikaualistli pampa ma tiktlakamatikan. Tlatitlanil Pablo okijkuilo: “Pero kemi Dios nochipa kiyekchiwa tlan kijtoa, Ye amo kitekawilis manomechyoltilana okachi tla ayakmó nontlaxikoah. Ye nomechilis kenomi nonmakisaskeh, iwa ijkó nontlaxikoskeh” (1 Corintios 10:13). Pampa tikxikoskej, Jehová techmaka chikaualistli (2 Corintios 4:7). Ijkon okipanok Pablo akin okipixki miak ouijkayotl, okijto: “Nochi weleti nikchiwa, ken Cristo nechmaka chikawálistli” (Filipenses 4:13).

 MA TIKPIAKAN TOYELIS KEN KIPAKTIA TOTAJTSIN DIOS

20. ¿Ken moneki yetos moyelis pampa tikyolpaktis toTajtsin Dios? ¿Uan tleka miak ipati?

20 Pampa tikyolpaktiskej Jehová amo san moneki tikixtopeuaskej tlen ye kikokolia. Noijki moneki tiktlasojtlaskej tlen ye kitlasojtla (Romanos 12:9). ¿Amo melauak kuali timomachilia timouikas iuan akinmej mokuayejyekoaj ijkon ken te, kinpaktia tlen mitspaktia uan kintekipachoa tlen mitstekipachoa? Jehová noijki. Okachi kuali xiktlasojtla tlen Jehová  kitlasojtla. Itech Salmo 15, moijtoa seki tlamantli itech akinmej toTajtsin Dios kinmita ken iyolikniuan (xiktlajtolti Salmo 15:1-5). Iyolikniuan Jehová “ijkuak n Espíritu kiyakana [...], ye ni tlan kichiwah: tetlasojtla, kipia pakílistli, kipia yolsewílistli, nochi kixikoa, kuali tlakatl, teiknomati, tlaneltokak, yolyamanki [uan] kuali monawatia” (Gálatas 5:22, 23).

21. ¿Tlen mitspaleuis pampa tikpias moyelis ken kipaktia toTajtsin Dios?

21 Pampa tikpias moyelis ken kipaktia toTajtsin Dios, moneki tiktlajtoltis uan timomachtis Biblia mojmostla. Noijki, ijkuak timomachtijtias tlen kineki xikchiua, timokuayejyekos ijkon ken ye mokuayejyekoa (Isaías 30:20, 21). Ijkuak okachi tiktlasojtlas Jehová, okachi tiknekis tikchiuas tlen ye kipaktia.

22. ¿Tlen tikselis tla tikpias monemilis ken toTajtsin Dios kipaktia?

22 Moneki timochijchikauas pampa tikpias monemilis ken Jehová kipaktia. Biblia kijtoa ijkuak tikpatlaj tonemilis, ken timoyankuiliskiaj (Colosenses 3:9, 10). Maski ijkon, salmista okijto itech itlanauatiluan toTajtsin Dios: “Tla nikintlakamati nikselis tlateochiualistli” (Salmo 19:11). Tla tejuatsin tikpias se nemilistli tlen kipaktia toTajtsin Dios, tikselis miakej tlateochiualismej. Noijki tikixnamikis tlen okijto Satanás uan ijkon tikyolpaktis Jehová.

^ párr. 16 Nin amo kijtosneki Satanás kinnauatia tlaltikpaktlakamej ma mitsixnamikikan pampa amo xiktekichiuili toTajtsin Dios. Maski ijkon, Satanás tlanauatijtok nikan itech Tlaltikpak uan ye nochi kiyekantok (2 Corintios 4:4; 1 Juan 5:19). Ijkon, nemilistli tlen kipaktia toTajtsin Dios miakej amo kinpaktis uan mitsiluiskej amo xikchiua.