Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 OKSEKI TLAMACHTILMEJ

Itoka toTajtsin Dios: ken motekitiltia uan tlen kijtosneki

Itoka toTajtsin Dios: ken motekitiltia uan tlen kijtosneki

TLA uelis xiktlapo moBiblia itech Salmo 83:18 (82:19 itech okseki Biblias). ¿Tlen kijtoa nin tlaxelol? Traducción del Nuevo Mundo de las Santas Escrituras kijtoa: “Tlaltikpaktlakamej ma kimatikan te, akin motoka Jehová, san te okachi tiUeyititok ipan nochi Tlaltikpak”. Okseki Biblias ualeua noijki ijkon kitlajtolkuepaj. Maski ijkon, miakej ayakmo kijkuiloaj tokayotl Jehová, yejuan kipatlaj ika “Toteko”, “toTajtsin” noso “Dios”. ¿Tlen moneki ijkuilitos itech nin tlaxelol? ¿Se tlajtoli tlen ika kixmatij toTajtsin Dios, noso tokayotl Jehová?

Tokayotl Jehová ika hebreo

Ompa ijkuilitok se tokayotl. Itech nin tlaxelol tlen achto omoijkuilo ika tlajtoli hebreo —ijkon ken miakej amochmej tlen kipia Biblia— ijkuilitok itoka toTajtsin Dios tlen san ye kinamiki. Nin tokayotl ijkuilitok ika hebreo יהוה (YHWH). Ika náhuatl tikijtoaj Jehová noso Yavé. ¿San itech se tlaxelol moijtoa itoka toTajtsin Dios? Amo. Ijkuak okijkuilojkej Escrituras Hebreas tokayotl Jehová oijkuilitoka kanaj 7,000 veces.

¿Moneki tiktekitiltiskej itoka toTajtsin Dios? Ma timokuayejyekokan itech padrenuestro, tlatlaujtilistli tlen okichi Jesucristo. Nin tlatlaujtilistli kijtoa: “Totajtsi Dios non timoitstika ilwikak, nochipa makiyektenewakah [noso, ma kiueyichiuakan] motoka” (Mateo 6:9). Seki kauitl satepan okijto nin tlatlaujtilistli, Jesús omotlatlaujti itech toTajtsin Dios: “Notajtsi, maweyijkachito Motoka”. Uan akin oKichijchi nochi okinankili: “Yonikweyijkachi iwa oksepa nikweyijkachiwas” (Juan 12:28). Axkan yitikmatij itoka toTajtsin Dios melauak miak ipati. Maski ijkon, ¿tleka akinmej kitlajtolkuepaj Biblia amo kijkuiloaj itoka uan kipatlaj ika tlajtolmej tlen ika kixmatij?

Onka ome tlamantli pampa amo kijkuiloaj. Achto, miakej kijtoaj amo ma tikijtokan itoka toTajtsin Dios pampa amo tikmatij ken omoijtoaya. Pampa tlajtoli hebreo tlen achto omotekitiltiaya amo okipiaya vocales, axkan amo ikaj kimati ken omoijtoayaj  ninmej letras YHWH ijkuak omoijkuilo Biblia. Pampa amo tikmatij ken omoijtoaya itoka toTajtsin Dios, ¿kijtosneki amo tiktekitiltiskej? Yiuejkika, Jesús uelis omoijtoaya Yeshúa noso Yehoshúa; amo ikaj uelis techyekiluis ken omoijtoaya. Maski ijkon, itech nochi Tlaltikpak tlatlamantli moijtoa tokayotl Jesús, moijtoa ijkon ken tlajtoaj. Maski tlaltikpaktlakamej amo kimatij ken omoijtoaya non tokayotl itech achto siglo, yejuan kitekitiltiaj nin tokayotl. Tla tejuatsin tias itech okseki uejueyij altepemej, tikakis motoka tlatlamantli kijtoaj. Ik non, maski amo tikmatij ken omoijtoaya itoka toTajtsin Dios, non amo kijtosneki amo tiktekitiltiskej.

Ome, oksekimej amo kijkuiloaj itoka toTajtsin Dios itech Biblia pampa tlen kineltokaj judíos. Miakej judíos kineltokaj amo moneki tiktekitiltiskej nin tokayotl. Ijkon kineltokaj pampa amo kuali kajsikamatij tlanauatil tlen toTajtsin Dios okinmakak israelitas: “Amo san xikajauilmati itoka Jehová moDios, pampa Jehová amo kintlapojpoluis akinmej amo kitlakaitaj itoka” (Éxodo 20:7).

Kema, nin tlanauatil kijtoa amo ma tikajauilmatikan tokayotl Jehová. Maski ijkon, ¿kijtosneki amo uelis tiktekitiltiskej ika tlakaitalistli? Amo. Akinmej okijkuilojkej Biblia ika tlajtoli hebreo (“Antiguo Testamento”) okitlakamatiayaj tlanauatilmej tlen toTajtsin Dios okinmakak israelitas. ¿Tlen okichijkej ninmej tlakamej yolmelauakej ika nin tokayotl? Nochipa okitekitiltijkej. Se neskayotl, nin tokayotl okatka itech miakej salmos tlen miakej tlaltikpaktlakamej chikauak okitlakuikiliayaj Jehová ijkuak okiueyichiuayaj. Jehová okinnauati itekipanojkauan ma kitekitiltikan itoka, uan akinmej yolmelauakej okitlakamatkej (Joel 2:32; Hechos 2:21). Ik non, nochtin akinmej tikchiuaj ken Cristo tiktekitiltiaj itoka toTajtsin Dios ika tlakaitalistli, ijkon ken okichi Jesús (Juan 17:26).

Akinmej kitlajtolkuepaj Biblia kichiuaj se ueyi tlajtlakoli ijkuak kipatlaj tokayotl Jehová ika tlajtolmej tlen ika kixmatij. Kichiuaj ma tikneltokakan amo onka Dios noso uejka kajki. Maski ijkon, Biblia kijtoa “Jehová kuali mouika iuan akinmej kimauiliaj” (Salmo 25:14). Ximokuayejyeko itech se moyolikni. Tla amo tikmatiskia tlen itoka, ¿tikijtoskia moyolikni? Ijkon panoa iuan toTajtsin Dios, tla tlaltikpaktlakamej amo kimatij toTajtsin Dios itoka Jehová, ¿ken uelis kuali mouikaskej iuan? Uan  noijki, akinmej amo kitekitiltiaj itoka toTajtsin Dios amo kimatij tlen kijtosneki. ¿Tlen kijtosneki?

ToTajtsin Dios okiyekilui itekipanojka Moisés tlen kijtosneki itoka. Ijkuak Moisés okitlajtlani tlen itoka, Jehová okinankili: “Ne nimochiuas tlen ne niknekis nimochiuas” (Éxodo 3:14). Noso ken kijtoa Biblia tlen okitlajtolkuepki Rotherham: “Ne nimochiuas san tlen ne niknekis”. Jehová uelis mochiuas nochi tlen monekis pampa ma mochiua itlanekilis.

Ma tikijtokan tejuatsin uelis timochiuas san tlen tiknekis. ¿Ken tikinpaleuiskia moyolikniuan? Tla ikaj mokokoa, tejuatsin uelis timokuepas se kuali tepajti. Uan tla ikaj kipoloskia miak tomin, tejuatsin uelis timokuepas se tlakatl tlen kipia miak tomin uan tikpaleuiskia. Maski ijkon, nochtin tejuan amo uelis tikchiuaskej tlen tiknekij. Maski ijkon, ijkuak okachi timomachtis Biblia, mitstlajtlachialtis tikitas ken Jehová mochiua nochi tlen moneki pampa ma mochiua itlanekilis, uan ye ueli kichiua tlen moneki pampa tlen okichijchi uan pampa ma mochiua itlanekilis. Uan kiyolpaktia kitekitiltis ichikaualis pampa kinpaleuis akinmej kitlasojtlaj (2 Crónicas 16:9). Akinmej amo kimatij tlen itoka toTajtsin Dios amo kixmatij tlen kuajkualtsitsintin iyelis kipia Jehová.

Tikmatokej itoka toTajtsin Dios moneki ijkuilitos itech Biblia. Ijkuak tikmatij tlen kijtosneki tokayotl Jehová uan tiktekitiltiaj pampa tikueyichiuaskej toTajtsin Dios, okachi amo oui timotokiskej itech. *

^ párr. 3 Tla tikneki tikmatis okachi itech itoka toTajtsin Dios, tlen kijtosneki uan tleka moneki tiktekitiltiskej ijkuak tikueyichiuaj, xikita amatlajkuilol El nombre divino que durará para siempre, tlen kichijchiuaj iTlaixpantijkauan Jehová.