Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 TLAMACHTIL 17

Tlatlaujtilistli techtokia itech toTajtsin Dios

Tlatlaujtilistli techtokia itech toTajtsin Dios
  • ¿Tleka moneki ma timotlatlaujtikan?

  • ¿Tlen moneki tikchiuaskej pampa ma techkaki toTajtsin Dios?

  • ¿Ken kinankilia toTajtsin Dios totlatlaujtiluan?

“Akin oKichijchi iluikak uan Tlaltikpak“ kinektok techkakis

1, 2. ¿Tleka tlatlaujtilistli se ueyi tlateochiualistli? ¿Uan tleka miak ipati tikmatiskej tlen tlamachtia Biblia itech tlatlaujtilistli?

TLA tikitaj nochi semanauak, tikitaj Tlaltikpak tsikitsin. Uan pampa Jehová “akin okichijchi n ilwikak iwa n tlaltíkpaktli”, nochtin uejueyij altepemej san ken tlachipinili tlen kajki itech se cubeta (Apocalipsis 14:7; Isaías 40:15). Maski ijkon, Biblia kijtoa: “Jehová amo uejka kajki itech sejse akinmej motlatlaujtiaj, nochtin akinmej motlatlaujtiaj ika melajkayotl”, uan ye kinchiuilis “tlen kinekij nochtin akinmej kitlakaitaj, uan kikakis intlatlaujtilis” (Salmo 145:18, 19). Ximokuayejyeko tlen kijtosnekij ninmej tlajtolmej. Akin oKichijchi nochi uan kipia miak chikaualistli amo uejka kajki itech sejse tejuan uan ye techkakis tla ‘timotlatlaujtiaj ika melajkayotl’, kijtosneki ika nochi toyolo. ¡Melauak se ueyi tlateochiualistli tikpiaj!

2 Maski ijkon, tla tiknekij ma techkaki Jehová ijkuak timotlatlaujtiaj, moneki timotlatlaujtiskej ken ye kineki. Maski ijkon, ¿ken uelis tikchiuaskej tla amo tikmatij tlen tlamachtia Biblia itech tlatlaujtilistli? Miak ipati ma tikmatikan tlatlaujtilistli techtokia itech toTajtsin Dios.

 ¿TLEKA MONEKI MA TIMOTLATLAUJTIKAN ITECH JEHOVÁ?

3. ¿Tleka miak ipati ma timotlatlaujtikan itech Jehová?

3 Moneki ma timotlatlaujtikan itech Jehová pampa techyoleua ma tikchiuakan. Itech iTlajtol techiluia: “Amitla manomechtekipacho, yej nochipa xikilikah n Toteko tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah. Iyolsewilis Dios, non amaka weleti kajsikamati, kim[al]wis nomoyolo iwa nomotlayejyekolis por Cristo Jesús” (Filipenses 4:6, 7). Melauak, amo ikaj kineki kixtopeuas nin yoleualistli tlen techchiuilia toTajtsin Dios akin oKichijchi nochi.

4. ¿Tleka ijkuak nochipa timotlatlaujtiaj okachi kuali timouikaj iuan Jehová?

4 Noijki moneki nochipa ma timotlatlaujtikan pampa ijkon okachi kuali timouikaskej iuan Jehová. Akinmej yoliknimej amo motlapouiaj san ijkuak itlaj kinekij, yejuan nochipa motlapouiaj pampa motekipachoaj itech sejse yejuan. Okachi kuali mouikaj ijkuak okachi motlapouiaj uan kijtoaj tlen mokuayejyekoaj, tlen kintekipachoa uan tlen kimachiliaj. Noijki ijkon panoa ika ken timouikaj  iuan Jehová. Ika nin amochtli okachi yotimomachti tlen tlamachtia Biblia itech Jehová, iyelis uan itlanekilis. Axkan tikita Jehová ken ikaj akin melauak yoltok. Uan tlatlaujtilistli mitspaleuia pampa tikiluis moTajtsin Jehová tlen timokuayejyekoa uan tlen tikmachilia. Ijkon okachi uelis timotokis itech (Santiago 4:8).

¿TLEN MONEKI TIKCHIUASKEJ PAMPA MA TECHKAKI JEHOVÁ?

5. ¿Tleka tikijtoaj Jehová amo kinkaki nochtin akinmej motlatlaujtiaj?

5 ¿Kinkaki Jehová nochtin akinmej motlatlaujtiaj? Ika teotlajtojki Isaías, Jehová okinmilui israelitas akinmej amo otetlakamatkej: “Maski namotlatlaujtiskej miak, ne amo namechkaki; pampa namomauan kipiaj miak estli” (Isaías 1:15). Ik non, tla tikchiuaj itlaj tlen amo kipaktia toTajtsin Dios, ye amo kikakis totlatlaujtiluan. Ik non, pampa techkakis moneki tikchiuaskej itlaj tlen miak ipati.

6. Pampa toTajtsin Dios ma techkaki ijkuak timotlatlaujtiaj, ¿tlen moneki tikpiaskej, uan ken moitas tla melauak tikpiaj?

6 Se tlamantli tlen moneki, ma tikpiakan tlaneltokilistli (xiktlajtolti Marcos 11:24). Tlatitlanil Pablo okijkuilo: “Pero tla se amo kipia tlaneltokálistli, mach weletis tikpaktis Dios, porke akin mijkuania [noso motokia] inawak Dios, moneki makineltoka Ye onka, iwa Ye kinmakas intlatliokolil akimeh kitemoah” (Hebreos 11:6). Maski ijkon, pampa melauak titlaneltokaskej amo san moneki tikmatiskej onka toTajtsin Dios uan techkaki uan technankilia. Moneki tikteititiskej totlaneltokilis ika tlen tikchiuaj. Itech tonemilis moneki moitas titlaneltokaj (Santiago 2:26).

7. 1) ¿Tleka moneki timotlapouiskej iuan Jehová ika tlakaitalistli? 2) ¿Ken tikteititiaj yolyamanilistli ijkuak timotlatlaujtiaj ika nochi toyolo?

7 Noijki Jehová techiluia pampa techkakis moneki timotlatlaujtiskej ika yolyamanilistli uan ika nochi toyolo.  ¿Uan amo melauak miak ipati ma tikteititikan yolyamanilistli ijkuak timotlatlaujtiaj? Ijkuak tlaltikpaktlakamej motlapouiaj iuan se ueyi tekiua, kiteititiaj kitlakaitaj, pampa yejuan kajsikamatij kipia se ueyi tekitl. Uan ijkuak timotlapouiskej iuan Jehová okachi moneki ma tiktlakaitakan (Salmo 138:6). Uan okachi pampa ye toTajtsin Dios akin kipia miak chikaualistli (Génesis 17:1). Uan ijkuak tiktlapouiaj tikteititiaj tikajsikamatij ika miak yolyamanilistli ye okachi ueyi. Uan yolyamanilistli noijki kichiuas ma tiktlapouikan ika nochi toyolo uan amo san ma tikueptokan tlajtolmej (Mateo 6:7, 8).

8. ¿Tlen tlamantli moneki tikchiuaskej pampa toTajtsin Dios ma techkaki?

8 Pampa toTajtsin Dios ma techkaki ijkuak timotlatlaujtiaj moneki timochijchikauaskej pampa tikchiuaskej ijkon ken tikijtoaj. Se neskayotl, tla tiktlajtlaniliaj Jehová ma “techmaka [...] tlan tikmomajsewiskeh”, moneki titekitiskej chikauak, tla tiuelij (Mateo 6:11; 2 Tesalonicenses 3:10). Noijki tla tiktlajtlaniliaj ma techpaleui pampa amo ma tikchiuakan itlaj tlen amo kuali, moneki timochijchikauaskej pampa tikixtopeuaskej nochi tlamantli tlen uelis kichiuas ma titlajtlakolchiuakan (Colosenses 3:5). Maski ijkon, amo san moneki tikmatiskej ninmej tlamantli pampa timotlatlaujtiskej itech toTajtsin Dios, noijki moneki tikmatiskej okseki tlamantli itech tlatlaujtilistli.

TLAJTLANILMEJ ITECH TLATLAUJTILISTLI

9. ¿Itech akin moneki timotlatlaujtiskej, uan ika akin?

9 ¿Akin itech moneki timotlatlaujtiskej? Jesús okinmilui imachtijkauan ken moneki motlatlaujtiskej: “Totajtsi Dios non timoitstika ilwikak” (Mateo 6:9). Nikan kuali techyekiluia san itech Jehová moneki timotlatlaujtiskej. Maski ijkon, ye kineki ma tiktlakaitakan tekitl tlen kipia san ye se iKone, Jesucristo. Ken otimomachtijkej itech tlamachtil 5,  Jehová okiualtitlanki Jesús pampa ma techmakixti itech tlajtlakoli uan mikilistli (Juan 3:16; Romanos 5:12). Noijki okitlali ken Ueyi Teopixki uan Juez (Juan 5:22; Hebreos 6:20). Ik non, itech Biblia techiluia moneki timotlatlaujtiskej ika Jesús. Ineuia ye okijto: “Ne Ni ojtli [...], Ne nomechnonotsa ika milák tlájtoli, iwa Ne Akin kichiwa xiyolitokah. Sanwel akin nechtlakita weletis kalakiti inawak Notajtsi” (Juan 14:6). Pampa Jehová ma techkaki ijkuak timotlatlaujtiaj, moneki tiktlatlaujtiskej san ye ika iKone Jesús.

10. ¿Tleka maski san ken tiyetoskej uelis timotlatlaujtiskej?

10 ¿Moneki timotlankuaketsaskej ijkuak timotlatlaujtiaj? Amo. Jehová amo kijtoa ken moneki tiyetoskej ijkuak timotlatlaujtiaj. Biblia techiluia uelis tlatlamantli tiyetoskej ijkuak timotlatlaujtiaj. Se neskayotl, tlaltikpaktlakatl uelis euatos, mokuatolos, motlankuaketsas noso moketos (1 Crónicas 17:16; Nehemías 8:6; Daniel 6:10; Marcos 11:25). Tlen okachi ipati amo ken tiyetoskej pampa ma techitakan, okachi kuali ma tikchiuakan ika nochi toyolo. Noijki, uelis timotlatlaujtiskej san tejuan uan san kanin tiknekiskej, tla titekititokej noso tla itlaj amo kuali panoa. Uelis amo ikaj kimatis kox timotlatlaujtiaj, maski ijkon, Jehová kema techkaki (Nehemías 2:1-6).

11. ¿Tlen uelis tiktlajtlaniliskej Jehová ijkuak itech timotlatlaujtiaj?

11 ¿Tlen uelis tikijtoskej ijkuak timotlatlaujtiaj? Biblia kijtoa: “Dios, [...] Ye techkaki tla itla tiktlajtlaniliah non Ye kipaktia” (1 Juan 5:14). Uelis tiktlajtlaniliskej tlen tiknekiskej, tla mouika ika itlanekilis. Se neskayotl, ¿kineki ma tiktlapouikan tlen techtekipachoa? ¡Kema! Ijkuak timotlatlaujtiaj itech Jehová ken timotlapouijtoskiaj iuan se toyolikni. Uelis tikiluis nochi tlen tikmachiliaj, kijtosneki nochi tlen timokuayejyekoaj (Salmo 62:8). Noijki moneki ma tiktlajtlanilikan ma techpaleui ika iespíritu santo pampa tikchiuaskej tlen kuali (Lucas 11:13). Noijki tiktlatlaujtiaj  ma techpaleui pampa kuali tikpejpenaskej tlen tikchiuaskej uan ma techpaleui pampa tikixtopeuaskej nochi tlen amo kuali (Santiago 1:5). Ijkuak titlajtlakolchiuaj, moneki tiktlajtlaniliskej ma techtlapojpolui uan ma tikteititikan melauak titlaneltokaj itech tlaxtlauili tlen okitemakak ika imikilis Jesús (Efesios 1:3, 7). Maski ijkon, amo ma timotlatlaujtikan san pampa tejuan, noijki pampa oksekimej, ken tokalchanejkauan uan oksekimej tokniuan (Hechos 12:5; Colosenses 4:12).

12. Ijkuak timotlatlaujtiaj, ¿ken uelis tikteititiskej okachi timotekipachoaj itech toTajtsin Dios?

12 Ijkuak timotlatlaujtiaj moneki okachi tikpatioitaskej tlen mouika iuan Jehová. Onka miak tlamantli itech tlen uelis tiktlasojkamatiliskej uan tikueyichiuaskej Jehová (1 Crónicas 29:10-13). Itech Mateo 6:9-13, kajki tlatlaujtilistli tlen Jesús otechtlalili ken neskayotl. Ompa techiluia moneki tiktlajtlaniliskej ma mochipaua iToka toTajtsin Dios, kijtosneki ma kitakan ken itlaj chipauak noso santo (xiktlajtolti). Satepan moijtoa ma tiktlajtlanilikan ma uiki iTekiuajkayo toTajtsin Dios, uan ma mochiua itlanekilis ipan Tlaltikpak ken mochijtok itech iluikak. Satepan Jesús kitlajtlanilia tlamantli tlen techtekipachoa tejuan. Tla ijkuak timotlatlaujtiaj tikteititiaj okachi miak ipati toTajtsin Dios, tikteititiaj amo san totech timotekipachoaj.

13. ¿Tlen kijtoa Biblia itech keski moneki uejkauas totlatlaujtiluan?

13 ¿Keski kauitl moneki uejkauas totlatlaujtiluan? Biblia amo techiluia keski kauitl moneki uejkauas totlatlaujtiluan tlen tikchiuaj san tejuan noso ixpan oksekimej. Uelis amo uejkauas miak, ken ijkuak timotlatlaujtiaj pampa titlakuaskej, noso uejkauas miak ken ijkuak tikiluiaj Jehová nochi tlen techtekipachoa (1 Samuel 1:12-15). Maski ijkon, Jesús okijto amo kuali okichiuayaj akinmej ouejkauayaj miak san pampa ma kinmitakan (Lucas 20:46, 47). Non amo kitlajtlachialtia Jehová. Ye okachi kipatioita ma  timotlatlaujtikan ika nochi toyolo. Ik non, totlatlaujtiluan uejkauaskej noso amo tla tejuan tikpiaj itlaj noso itlaj tiknekij tikiluiskej.

ToTajtsin Dios techkaki maski san kanin tiyetoskej

14. Xikijto tlen kijtosneki tlajtoli “nochipa ximotiotsajtsilijtokah” uan tlen tlateochiualistli tikpiaj.

14 ¿Keman moneki timotlatlaujtiskej? Biblia techiluia: “Ximotiotsajtsilikah”, “nochipa ximotiotsajtsilijtokah” uan “ixmostla ximotiotsajtsilijtokah” (Mateo 26:41; Romanos 12:12; 1 Tesalonicenses 5:17). Nin amo kijtosneki nochi se tonal timotlatlaujtijtoskej. Kijtosneki mojmostla moneki ma timotlatlaujtikan itech Jehová, uan ijkon tiktlasojkamatiliskej pampa techtlasojtla, tiktlajtlaniliskej ma techyekana uan ma techyolchikaua. ¡Se ueyi tlateochiualistli! Jehová techkauilia ma timotlatlaujtikan itech, ijkuak tiknekiskej uan keski kauitl tiknekiskej. Tla tikpatioitaj nin ueyi tlateochiualistli tiktemoskej kauitl pampa iuan timotlapouiskej.

15. ¿Tleka moneki tikijtoskej “ijkon ma mochiua” ijkuak tlamis timotlatlaujtiskej?

15 ¿Tleka ijkuak tlamis timotlatlaujtiskej moneki tikijtoskej “ijkon ma mochiua”? Itech Biblia tikajsij miakej neskayomej tlen techmachtiaj ijkuak titlamiskej timotlatlaujtiskej, san tejuan noso inmixpan oksekimej, miak ipati ma tikijtokan “ijkon ma mochiua” (1 Crónicas 16:36; Salmo 41:13). Ijkuak san toselti tikijtoaj “ijkon ma mochiua”, tikijtojtokej tlen tejuan otikijtojkej okiski itech toyolo. Ijkuak tikchiuaj inmixpan oksekimej (san ichtaka noso chikauak), tikteititiaj otechpakti tlen omotlajtlanki itech tlatlaujtilistli (1 Corintios 14:16).

¿KEN KINNANKILIA TOTAJTSIN DIOS TOTLATLAUJTILUAN?

16. ¿Tlen uelis tikneltokaskej ijkuak timotlatlaujtiaj?

16 ¿Melauak technankilia Jehová? ¡Kema! Melauak uelis titlaneltokaskej itech akin kikaki tlatlaujtilmej pampa ye  kinnankilia nochtin akinmej kitlatlaujtiaj ika nochi iyolo (Salmo 65:2). Uan tlatlamantli uelis technankilis.

17. ¿Tleka uelis tikijtoskej toTajtsin Dios kintekitiltia ángeles uan itekipanojkauan pampa technankilis?

17 Jehová kintekitiltia iángeles uan tlaltikpaktlakamej akinmej kitekichiuiliaj pampa technankilis (Hebreos 1:13, 14). Miakej tlaltikpaktlakamej tlen motlatlaujtiaj uan kitlajtlaniliaj ikaj ma kinpaleui pampa ma momachtikan Biblia, san niman kintlajpaloa se itekipanojka Jehová. Nin neskayotl techmachtia ángeles kiyekanaj tetlapouilistli  (Apocalipsis 14:6). Noijki, ijkuak itlaj melauak techtekipachoa, Jehová uelis technankilis ika se tokni pampa ma techyolchikaua (Proverbios 12:25; Santiago 2:16).

Jehová uelis technankilis ika se tokni pampa ma techpaleui

18. ¿Ken technankilia Jehová ika iespíritu santo uan iTlajtol?

18 Jehová noijki kinnakilia itekipanojkauan ika iespíritu santo uan iTlajtol, Biblia. Ijkuak tiktlajtlaniliaj ma techpaleui pampa tikxikoskej se ouijkayotl, ye uelis techyekanas uan techyolchikauas ika iespíritu santo (2 Corintios 4:7). Uan ijkuak tiktlatlaujtiaj pampa itlaj kuali tikchiuaskej, noijki technankilia ika Biblia. Uelis tikajsiskej se tlaxelol ijkuak timomachtijtoskej Biblia noso ijkuak tikintlajtoltiaj amatlajkuilolmej, ken itech nin amochtli. Uan noijki uelis techilnamiktis tlanauatilmej tlen moneki tikinmilnamikiskej. Nin uelis mochiuas ken ijkuak tiauij itech nechikolmej tlen kichiuaj iTlaixpantijkauan Jehová noso ijkuak se tlayekanki tlen motekipachoa totech technojnotsa (Gálatas 6:1).

19. ¿Tlen moneki tikilnamikiskej tla tikitaj ualeua toTajtsin Dios amo technankilia?

19 Ualeua uelis tikitaskej Jehová amo san niman technankilia, maski ijkon, non amo kijtosneki amo technankilis. Ma tikilnamikikan Jehová technankilia ijkuak okachi moneki. Ye kuali kimati tlen tiknekij uan kimati tlen kichiuas  pampa kuali tiyetoskej. Miak uelta kikaua ma “[t]iktlajtlanilikah”, ma “[t]iktemokah” uan ma “[t]itlakakalatsakah” (Lucas 11:5-10). Tla ijkon tikchiuaj, tikteititiskej melauak ijkon tiknekij uan titlaneltokaj itech. Noijki, ualeua Jehová technankilis uan tejuan amo tikitaskej. Se neskayotl, tla tiktlatlaujtiaj pampa otipanokej se ouijkayotl, uelis amo kitlajtlamis non tlajyouilistli, maski ijkon, kema techpaleuis pampa ma tikxikokan (xiktlajtolti Filipenses 4:13).

20. ¿Tleka moneki kuali tiktekitiltiskej tlatlaujtilistli?

20 Melauak tiktlasojkamatiliaj akin oKichijchi semanauak, pampa amo uejka kajki tla itech timotlatlaujtiaj ken ye kineki (xiktlajtolti Salmo 145:18). Kuali ma tiktekitiltikan nin tetliokolil, tlatlaujtilistli. Tla tikchiuaj uelis tikneltokaskej okachi uelis timotokiskej itech Jehová, akin Kikaki tlatlaujtilistli.