AKINMEJ kichiuaj ken Cristo okinnauatijkej ma kilnamikikan imikilis Cristo, tlen noijki itoka ‘icena Toteko’ (1 Corintios 11:20). ¿Tleka miak ipati nin iluitl? ¿Keman uan ken moneki mochiuas?

Jesucristo okipeualti nin iluitl itech yoak ijkuak judíos okilnamikiayaj Pascua, itech xiuitl 33. Pascua omochiuaya se tonal sejse xiuitl, itech tonal 14 itech metstli judío nisán. Nin metstli opeuaya ijkuak omoitaya metstli ok selik, ijkuak opanoaya achto semana marzo. Judíos san okipoayaj 14 tonalmej uan ijkuakon opeuaya Pascua tlen omochiuaya ijkuak okalakiaya Tonaltsin.

Itech non yoak Jesús uan itlatitlaniluan okilnamikej Pascua, satepan Jesús okikixti Judas Iscariote uan ijkuak okiski okipeualti  iCena toTeko. Nin iluitl okipatlak Pascua judía, ik non, se tonal sejse xiuitl moneki tikilnamikiskej.

Mateo okijto tlen opanok: “Jesús okónanki paj iwa omotlasojkama inawak Dios, iwa ijkuak yokitlajtlápanki, okinmák itlamachtijkawah iwa okinmili:—Xikmomajsewikah, ye nin [kijtosneki, TNM] nokuerpo. Ijkuakó okónanki n kopa, iwa omotlasojkama in awak Dios. Okimpanoltili itlamachtijkawah iwa okinmili:—Nonnochteh xikonikah, ye nin [kijtosneki, TNM] noesso non ika nimotlajtolsenkawa nomowah, nin noesso motoyawas para miakeh makintlapojpolwilikah intlajtlakolwah” (Mateo 26:26-28).

Sekimej kineltokaj Jesús melauak okichi pan ma mokuepa itlalnakayo uan vino ma mokuepa ieso. ¿Uelis tikijtoskej itlatitlaniluan melauak okikuajkej itlalnakayo uan okonikej ieso Jesús? Amo, amo uelis kikuaskiaj pampa toTajtsin Dios otlanauati amo ma kikuakan itlalnakayo se tlaltikpaktlakatl (Génesis 9:3, 4; Levítico 17:10). Jesús okijto: “Nin kopa [kijtosneki, TNM] noesso non ika timotlajtolsenkawa, iwa motoyawas por nomejwah” (Lucas 22:20). Ijkuak Jesús okipeualti iCena toTeko ayamo okinokiaya ieso. Pampa ye amo okijto: Noeso tlen yoniktoya, ye okijto “motoyawas”. Uan tla ika se milagro Jesús kichiuaskia vino ma mochiua ieso, ye ompa kinokiskia seki ieso pampa itlatitlaniluan. Maski ijkon, amo ijkon omochi pampa itlalnakayo Jesús ayamo itlaj okipanoaya, okitekitilti pan uan vino san ken se neskayotl.

Pan uan vino san neskayotl. Pan kineskayotia itlalnakayo Cristo tlen amo okipiaya tlajtlakoli. Jesús okitekitilti pan tlen ok omoka itech Pascua, nin pan amo okipiaya levadura noso tlen tlaxokolia (Éxodo 12:8). Biblia kitekitiltia levadura pampa kineskayotis tlajtlakoli uan tlen amo kuali. Ik non, pan okineskayoti itlalnakayo Jesús tlen amo kipia tlajtlakoli (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vino chichiltik kineskayotia ieso Jesús, tlen ika mochiua yankuik tlajtolsenkaualistli. Jesús okijto kinokiskia ieso “para Dios makintlapojpolwi de intlajtlakolwah”. Ika non, toTajtsin Dios kinmita chipauakej sekimej tlaltikpaktlakamej, uan noijki pouij itech yankuik tlajtolsenkaualistli (Hebreos 9:14; 10:16, 17). Nin tlajtolsenkaualistli kichiua 144,000  tlaltikpaktlakamej tlen yolmelauakej akinmej melauak kichiuaj ken Cristo ma yakan iluikak. Ompa yetoskej ken ueyi tekiuajkej uan teopixkamej tlen kinpaleuiskej tlaltikpaktlakamej (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Akinmej uelis kikuaskej pan uan koniskej vino tlen motekitiltiaj ken neskayomej ijkuak tikilnamikij imikilis Jesús? Ken yotimomachtijkej san uelis kikuaskej uan koniskej akinmej katej itech yankuik tlajtolsenkaualistli, kijtosneki, akinmej yaskej iluikak. Iespíritu santo toTajtsin Dios kinmatiltia yejuan yokinpejpenkej ken ueyi tekiuajkej pampa tlanauatiskej itech iluikak (Romanos 8:16). Ninmej tlaltikpaktlakamej noijki tlanauatiskej iuan Jesús (Lucas 22:29).

¿Tlen kichiuaj akinmej kipiaskej yolilistli tlen amo keman tlamis nikan ipan Tlaltikpak tlen mokuepas se xochitlali? Ijkon ken Jesús otlanauati, yejuan monechikoaj pampa kilnamikiskej iCena toTeko, ijkon kiteititiaj kitlasojkamatij tlen okichi Jesús maski amo kikuaj pan nion konij vino. ITlaixpantijkauan Jehová tikilnamikij iCena toTeko se tonal sejse xiuitl, uan tikchiuaj ijkuak yokalak Tonaltsin uan ijkuakon peua tonal 14 metstli nisán. Maski itech nochi Tlaltikpak san sekimej yaskej iluikak, nin iluitl melauak miak ipati pampa nochtin akinmej tikchiuaj ken Cristo. Itech non tonal uelis timokuayejyekoskej ken Jehová uan Jesucristo melauak techtlasojtlaj (Juan 3:16).