Xikita nochi

Tlen kiualika

 TLAMACHTIL 18

Apolaktilistli kichiua kuali ma timouikakan iuan Jehová

Apolaktilistli kichiua kuali ma timouikakan iuan Jehová
  • ¿Ken kinapolaktiaj akinmej melauak kichiuaj ken Cristo?

  • ¿Tlen moneki tikchiuas pampa timoapolaktis?

  • ¿Ken uelis ikaj motemakas ixpan toTajtsin Dios?

  • ¿Tleka tikneki timoapolaktis?

1. ¿Tleka se tekiua etíope okinek ma kiapolaktikan?

ITECH achto siglo se tekiua itech altepetl Etiopía okijto: “Nika onka atl, amaka nechtsakuilia manimokuaateki [ma nimoapolakti, TNM]”. Felipe akin okichiuaya ken Cristo  yikin okimachti ika Biblia ken Jesús ye Mesías tlen omoijto ualaskia. Nin tekiua sapanoa okipakti tlen omomachti uan san niman okitlajtlanili ma kiapolakti (Hechos 8:26-36).

2. ¿Tleka moneki timoapolaktis?

2 Tla kuali yotimomachti iuan se iTlaixpantijka Jehová nochi tlamachtilmej tlen kipia nin amochtli, uelis tejuatsin noijki tikijtoa: “Amaka nechtsakuilia [ma nimoapolakti, TNM]”. Yotimomachti itech Biblia nochtin tlaltikpaktlakamej uelis yoltoskej nochipa itech Xochitlali (Lucas 23:43, TNM; Apocalipsis 21:3, 4). Noijki axkan yitikmatij ken katej akinmej yomikej uan chialistli itech yolitilistli (Eclesiastés 9:5; Juan 5:28, 29). Uelis yitimonechikoa iuan iTlaixpantijkauan Jehová uan yotikitak yejuan kipiaj tlaneltokalistli tlen melauak (Juan 13:35). Uan tlen okachi ipati uelis yopejki timouika iuan Jehová.

3. 1) ¿Tlen okinnauati Jesús imachtijkauan? 2) ¿Ken tikinapolaktiaj?

3 ¿Ken uelis tikteititis melauak tikneki tiktekichiuilis toTajtsin Dios? Jesús okinnauati imachtijkauan: “Xiakan, uan [...] xikinchiuakan nomachtijkauan itech nochi altepemej, xikinapolaktikan” (Mateo 28:19, TNM). Uan Jesús otechmakak se kuali neskayotl, pampa ye noijki omoapolakti. Maski ijkon, amo san okikuatekijkej nion okikopilijkej atl ipan itsonteko (Mateo 3:16). Tlajtoli griego tlen motlajtolkuepa apolaktilistli kijtosneki “apolakis”. Ik non, akinmej melauak kichiuaj ken Cristo ijkuak ikaj kiapolaktiaj, kiapolaktiaj nochi itlalnakayo.

4. ¿Tlen tikteititiaj ijkuak timoapolaktiaj?

4 Nochtin akinmej kinekij kuali mouikaskej iuan Jehová moneki moapolaktiskej. Ijkuak timoapolaktiaj, tikteititiaj ixpan nochtin tiknekij tiktekichiuiliskej toTajtsin Dios uan tiknekij tikchiuaskej itlanekilis (Salmo 40:7, 8). Maski ijkon, pampa timoapolaktiskej moneki tikchiuaskej seki tlamantli.

 MONEKI TIKPIASKEJ TLAMATILISTLI UAN TLANELTOKILISTLI

5. 1) ¿Tlen achto moneki tikchiuas pampa timoapolaktis? 2) ¿Tleka miak ipati nochipa ximonechiko iuan iTlaixpantijkauan Jehová?

5 Tejuatsin yotikchi tlen achto moneki. ¿Tlen? Axkan yitikinmixmati Jehová uan Jesucristo, uan nin otikchi ijkuak otimomachti Biblia (xiktlajtolti Juan 17:3). Maski ijkon, uelis okachi timomachtis. Akinmej melauak kichiuaj ken Cristo kinekij toTajtsin Dios ma kinmaka tlamatilistli itech itlanekilis (Colosenses 1:9, TNM). Itech innechikoluan iTlaixpantijkauan Jehová uelis okachi tikmatis. Ik non, miak ipati nochipa inmiuan ximonechiko (Hebreos 10:24, 25). Tla nochipa timonechikoa, uelis okachi tikixmatis toTajtsin Dios.

Pampa uelis timoapolaktis achto moneki kuali timomachtis tlen melauak itech iTlajtol toTajtsin Dios

6. ¿Tlen moneki tikmatis itech Biblia pampa timoapolaktis?

6 Pampa timoapolaktis amo moneki tikmatis nochi tlen kijtoa Biblia. Maski ijkon, xikilnamiki ken maski tekiua etíope okimatiaya seki tlamantli, okinek ma kimachtikan pampa okachi kuali kajsikamatiskia tlen kijtoa Biblia (Hechos 8:30, 31). Noijki tejuatsin ok uelis timomachtis miak tlamantli. Amo keman tlamis timomachtis itech toTajtsin Dios (Eclesiastés 3:11). Maski ijkon, pampa uelis timoapolaktis moneki tikmatis uan tikinselis tlamachtilmej bíblicos tlen okachi moneki (Hebreos 5:12). Moneki tikmatis ken katej akinmej yomikej, tleka miak ipati itoka toTajtsin Dios uan noijki iTekiuajkayo.

7. Ijkuak okachi timomachtijtias Biblia, ¿tlen moneki tikpias?

7 Maski ijkon, amo san moneki tikmatis, pampa “tla se amo kipia tlaneltokálistli, mach weletis tikpaktis Dios” (Hebreos 11:6). Biblia techiluia tlen okichijkej sekimej akinmej ochantiayaj itech altepetl Corinto: ijkuak okikakej tlen okinmachtijkej akinmej okichiuayaj ken Cristo, ‘okineltokakeh iwa omoapolaktijkej’ (Hechos 18:8). Noijki tikchiaj ijkon xikchiua. Ijkuak timomachtijtias Biblia, moneki  melauak tikneltokas Biblia iTlajtol toTajtsin Dios. Noijki moneki tikneltokas toTajtsin Dios kichiuas nochi tlen yokijto uan uelis mitsmakixtis pampa okitemakak tlaxtlauili ika imikilis iKone (Josué 23:14; Hechos 4:12; 2 Timoteo 3:16, 17).

XIKINTLAPOUI OKSEKIMEJ TLEN TIMOMACHTIA ITECH BIBLIA

8. ¿Tlen mitspaleuis okachi xitetlapoui itech tlen timomachtijtok?

8 Ijkuak okachi titlaneltokas tikitas ken okachi amo oui tikintlapouis oksekimej tlen timomachtijtok (Jeremías 20:9). Okachi tiknekis titetlapouis itech toTajtsin Dios uan itlanekilis (xiktlajtolti 2 Corintios 4:13).

Tlaneltokilistli mitsyolchikauas xikintlapoui oksekimej

9, 10. 1) ¿Akin achto uelis tikintlapouis itech tlen timomachtijtok? 2) ¿Tlen moneki tikchiuas tla tikneki titetlapouis iuan iTlaixpantijkauan Jehová?

9 Achto uelis tikintlapouis mokalchanejkauan, moyolikniuan uan oksekimej itech tlen timomachtijtok, maski ijkon, moneki tikintlakaitas. Satepan uelis tiknekis titetlapouis ken kichiuaj iTlaixpantijkauan Jehová. Ijkuak tiknekis titetlapouis xikilui iTlaixpantijka Jehová tlen mitsmachtijtok. Tla ye kita kuali yitikmati tlen moneki pampa titetlapouis, namejuan ome nanmonechikoskej iuan ome tokniuan tlayekankej.

10 Ijkon okachi kuali tikinmixmatis sekimej tokniuan tlayekankej, tlen kimaluiaj ialtepe toTajtsin Dios (Hechos 20:28; 1 Pedro 5:2, 3). Yejuan kitaskej kox kuali tikmati tlen tlamachtia Biblia uan tla tikneltoka, kox tikchijtok ken kijtoa Jehová uan tla melauak tikneki timochiuas tiiTlaixpantijka Jehová. Tla ijkon, mitsiluiskej yiuelis titetlapouis maski ayamo timoapolaktia, uan uelis titetlapouis iuan iTlaixpantijkauan Jehová.

11. ¿Tlen moneki kichiuaskej akinmej kinekij tetlapouiskej?

11 Ualeua tlayekankej kitaj akin kineki tetlapouis moneki kipatlas seki tlamantli itech inemilis pampa uelis  tetlapouis iuan yejuan. Se neskayotl, uelis moneki kikauas seki tlamantli tlen achto okichiuaya san ichtaka. Ik non, achto mitsiluiskej uelis titetlapouis, moneki ayakmo tikchiuas nion se tlamantli tlen amo kuali, amo tiauilnemis, amo titlauanas nion tiktekitiltis drogas (xiktlajtolti 1 Corintios 6:9, 10; Gálatas 5:19-21).

TIMOYOLKUEPAS UAN AYAKMO TIKCHIUAS

12. ¿Tleka moneki ma timoyolkuepakan?

12 Pampa uelis timoapolaktis moneki tikchiuas okse tlamantli. Tlatitlanil Pedro okijto: “Ayakmó xikchiwakah tlajtlákoli [...]. Ijkó Ye kilkawas nochi tlan amo kuali ononkichijkeh” (Hechos 3:19). Ijkuak ikaj melauak moyolkuepa, melauak moyolkokoa pampa nochi tlen okichi. Maski ijkon, amo san akinmej okichiuayaj tlen amo kuali moneki moyolkuepaskej, noijki akinmej amo okachi okichiuayaj tlen amo kuali. ¿Tleka? Pampa tinochtin titlajtlakolejkej uan tiknekij toTajtsin Dios ma techtlapojpolui (Romanos 3:23; 5:12). Ijkuak ayamo otimomachtiaya Biblia, tejuatsin amo otikmatiaya tlen itlanekilis toTajtsin Dios. Ik non, itech monemilis amo otikchiuaya tlen ye okinekiaya, ¿amo melauak? Ken tikita moneki timoyolkuepas.

13. ¿Tlen kijtosneki ayakmo tikchiuas?

13 Ijkuak timoyolkuepas moneki ayakmo tikchiuas tlen amo kuali. Ijkuak timoyolkuepa, ayakmo tikchiua tlen achto otikchiuaya. Nin kijtosneki amo san timoyolkokoa pampa tlen achto otikchiuaya, noijki tikpatla nochi monemilis uan ayakmo tikchiua. Moneki melauak tikchiuas tlen kuali. Achto timoapolaktis moneki timoyolkuepas uan ayakmo tikchiuas tlen amo kuali.

TIMOTEMAKAS IXPAN TOTAJTSIN DIOS

14. ¿Tlen moneki tikchiuas achto timoapolaktis?

14 Achto timoapolaktis moneki tikchiuas okse tlamantli: timotemakas ixpan toTajtsin Jehová.

¿Yotimotlatlaujti ixpan toTajtsin Dios pampa timotemakas?

15, 16. ¿Tlen kijtosneki timotemakaskej ixpan Jehová? ¿Uan tlen techyolchikauas pampa ma tikchiuakan?

 15 Timotemakas ixpan Jehová kijtosneki timotlatlaujtis itech uan tikiluis san ye tikueyichiuas (Deuteronomio 6:15). Maski ijkon, ¿tleka ikaj kinekiskia kichiuas ijkon? Ma timokuayejyekokan se tlakatl kiluia se siuatl kineki okachi kuali kixmatis. Ijkuak okachi mouika iuan uan kita kuali iyelis kipia, okachi kitlasojtla. Uan ajsis tonal ijkuak kiluis kineki monamiktis iuan. Maski ijkon, ye kimati ijkuak monamiktis kipias okachi tekitl. Maski ijkon, ken melauak kitlasojtla kichiua nochi nin.

16 Ijkuak tejuan okachi kuali tikixmatij uan tiktlasojtlaj Jehová, okachi tiknekij tiktekichiuiliskej ika nochi toyolo maski itlaj uelis techtsakuilis. Akin kineki kichiuas ken iKone toTajtsin Dios, Jesucristo, moneki “ayakmó makichiwa san tlan ye kineki” (Marcos 8:34). Nin kijtosneki tiktlakamatiskej toTajtsin Dios uan amo tikchiuaskej san tlen tejuan tiknekij. Ijkon, achto timoapolaktis moneki tejuatsin tikpejpenas tikchiuas itlanekilis Jehová itech nochi moyolilis (xiktlajtolti 1 Pedro 4:2).

TLEN UELIS TECHPALEUIS PAMPA AMO MA TIMOMOJTIKAN

17. ¿Tleka sekimej amo motemakaj ixpan Jehová?

17 Sekimej tlaltikpaktlakamej amo kinekij motemakaskej ixpan Jehová pampa momojtiaj kichiuaskej itlaj tlen miak ipati. Uelis momojtiaj pampa kimatij axkan toTajtsin Dios kintlajtlanis tlen okichijkej pampa yomotemakakej ixpan. Mokuayejyekoaj uelis kichiuaskej itlaj tlen amo kuali tlen uelis kiyolkokos Jehová, ik non, amo motemakaj ixpan.

18. ¿Tlen mitspaleuis ximotemaka ixpan Jehová?

18 Ijkuak okachi tiktlasojtlas Jehová, okachi tiknekis timotemakas ixpan uan timochijchikauas pampa tikchiuas tlen otikilui (Eclesiastés 5:4). Ijkuak timotemakas ixpan, melauak tiknekis ‘tinemis kemi kipiah de tinemiskeh  akimeh milák iaxkawah n Toteko Jehová’ ijkon ken “kipaktia” (Colosenses 1:10). Tla melauak tiktlasojtla toTajtsin Dios amo oui tikitas tikchiuas itlanekilis. Uelis tikijtoa ken tlatitlanil Juan: “Tejwah tiktenextiah tiktlasojtla Dios keman tikintlakitah itlanawatilwah, iwa amo owi se kintlakita” (1 Juan 5:3).

19. ¿Tleka amo moneki timomojtis timotemakas ixpan Jehová?

19 ToTajtsin Dios kimati nochtin akinmej motemakaj tlajtlakolejkej. Jehová kimati tlen amo uelis tikchiuaskej uan amo keman kichia ma tikchiuakan itlaj tlen kimati amo uelis tikchiuaskej (Salmo 103:14). Ye melauak mitspaleuis, pampa ye kineki kuali xikpia moyolilis (xiktlajtolti Isaías  41:10). Tla titlaneltoka itech Jehová ika nochi moyolo ye uelis “kichiuas kuali xikpia monemilis” (Proverbios 3:5, 6).

XIMOAPOLAKTI

20. Ijkuak timotemakas ixpan Jehová, ¿tleka moneki tikteititis ixpan miakej?

20 Ika nochi tlen yotimomachtijkej, uelis tikneki timotemakas ixpan Jehová ika se tlatlaujtilistli san moselti. Maski ijkon, nochtin akinmej melauak kitekichiuiliaj toTajtsin Dios moneki kichiuaskej okse tlamantli: kiteititiskej  “inmixpa n miakeh tokniwah otikijto[kej] titlaneltoka[j]” (1 Timoteo 6:12). ¿Ken uelis tikchiuas?

Ijkuak timoapolaktiaj yetos ken “timikij“ itech nochi tlamantli tlen achto otikchiuayaj, uan peuaj tikchiuaj itlanekilis toTajtsin Dios

21, 22. ¿Ken uelis tikteititis inmixpan miakej motlaneltokilis?

21 Xikilui tokni akin kinyekana tlayekankej itech tlanechikol tikneki timoapolaktis. Ye kiyektlalis nochi pampa tlayekankej ma momachtikan mouan tlajtlanilmej itech tlen tlamachtia Biblia. Tla tlayekankej kitaj tejuatsin uelis timoapolaktis, mitsiluiskej uelis tikchiuas itech ueyi nechikol. * Ijkuak moapolaktiaj, motemaka se tlanojnotsalistli kanin moijtoa tlen kijtosneki se moapolaktis. Ijkuak tlami nin tlanojnotsalistli, tokni akin tlanojnotsa kinchiuilia ome tlajtlanilmej akinmej kinekij moapolaktiskej uan yejuan moneki chikauak tlanankiliskej. Ijkon kiteititiskej intlaneltokilis inmixpan nochtin.

22 Ijkuak timoapolaktia tikteititia inmixpan nochtin yotimotemakak ixpan toTajtsin Dios uan axkan tiiTlaixpantijka Jehová. Akin moapolaktia, kiapolaktiaj pampa kiteititis yomotemakak ixpan Jehová.

TLEN KIJTOSNEKI MOAPOLAKTILIS

23. ¿Tlen kijtosneki timoapolaktis “itech itoka Totajtsi, itech itoka Ikone, iwa itech itoka n Espíritu Santo”?

23 Jesús okijto imachtijkauan moapolaktiskiaj “itech itoka Totajtsi, itech itoka Ikone, iwa itech itoka n Espíritu Santo” (Mateo 28:19). Nin kijtosneki akinmej moapolaktiskej kimatij Jehová uan Jesucristo kipiaj tlanauatilistli (Salmo 83:18; Mateo 28:18). Noijki kimatij ken miak ipati iespíritu santo toTajtsin Dios, kijtosneki chikaualistli tlen ika kichiua nochi (Gálatas 5:22, 23; 2 Pedro 1:21).

24, 25. 1) ¿Tlen kijtosneki timoapolaktis? 2) ¿Tlen tlajtlanilistli moneki tiknankiliskej?

24 Timoapolaktis amo san kijtosneki tiapolakis. Nin se  tlamantli tlen miak ipati. Ijkuak tiapolakis yetos ken “timiki”, kijtosneki, tikauas nochi tlamantli tlen achto otikchiuaya. Uan ijkuak tikisas ijtik atl kijtosneki tipeuas se yankuik yolilistli pampa tikchiuas itlanekilis toTajtsin Dios. Amo keman xikilkaua otimotemakak ixpan Jehová, uan amo otimotemakak itech se tekitl noso itech se tlakatl. Pampa yotimotemakak uan yotimoapolakti, nin kijtosneki peua kuali timouika iuan toTajtsin Dios (Salmo 25:14).

25 Maski ijkon, xikilnamiki pampa yotimoapolakti amo kijtosneki timomakixtis. Jesucristo okijto: “Pero akin nochi kixikos, momakixtis” (Mateo 24:13). Ijkuak timoapolaktis yikin peuas nochi. Axkan ma timotlajtlanikan: ¿ken uelis tiyetoskej itech itlasojtlalis toTajtsin Dios? Itech saiktlami tlamachtil tiknankiliskej nin tlajtlanilistli.

^ párr. 21 Itech uejueyij nechikolmej tlen kichiuaj iTlaixpantijkauan Jehová sejse xiuitl ompa moapolaktiaj.