Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 TLAMACHTIL 2

ToTajtsin Dios otechmakak Biblia

ToTajtsin Dios otechmakak Biblia
  • ¿Tleka Biblia amo ken okseki amochmej?

  • ¿Ken techpaleuia Biblia pampa ma tikxikokan ouijkayotl?

  • ¿Tleka uelis tikneltokaskej tlen Biblia kijtoa panos?

1, 2. ¿Tleka tikijtoaj Biblia se tetliokolil tlen miak ipati tlen toTajtsin Dios otechmakak?

¿TIKILNAMIKI ijkuak se moyolikni omitstliokoli itlaj ika nochi iyolo? Uelis omitsyolpakti miak uan omitsyolini. Ika non, moyolikni okiteititi kipatioita mouikas mouan, uan melauak otiktlasojkamatili.

2 Biblia se tetliokolil tlen techmaka toTajtsin Dios tlen moneki tiktlasojkamatiliskej. Nin amochtli techiluia miak tlamantli tlen tejuan amo keman uelis tikmatiskiaj. Se neskayotl, techiluia ken toTajtsin Dios okichijchi iluikak uan sitlalimej, Tlaltikpak uan achto tlakatl uan achto siuatl. Noijki techmaka tlanauatilmej tlen tikmatij kema techpaleuiskej pampa ma tikxikokan ouijkayotl uan tlen techtekipachoa. Biblia noijki kijtoa toTajtsin Dios kichiuas kuali ma tiyetokan nikan Tlaltikpak. ¡Biblia se tetliokolil tlen sapanoa miak ipati!

3. ¿Tlen okiteititi Jehová pampa otechmakak Biblia, uan tleka techyolchikaua nin tetliokolil?

3 Biblia techyolchikaua pampa techmachtia itech Jehová akin otechmakak nin tetliokolil. Ken otechmakak nin amochtli, toTajtsin Dios okiteititi kineki kuali ma tikixmatikan.  Kema, Biblia techpaleuia ma timotokikan itech toTajtsin Dios.

4. ¿Tlen okachi mitstlajtlachialtia itech ken moxexeloa Biblia?

4 Tla tejuatsin tikpia se Biblia, amo san tejuatsin tikpia. Nin amochtli omochijchi san tlajko noso ajsitok itech kanaj 2,600 tlatlamantli tlajtolmej, ik non, miakej tlaltikpaktlakamej kipiaj Biblia. Sejse semana motemakaj kanaj se millón, uan yomochijchijkej sapanoa miakej Biblias uan seki san tlajko. Melauak amo onka okse amochtli ken Biblia.

Traducción del Nuevo Mundo de las Santas Escrituras yomotlajtolkuepki ika miakej tlatlamantli tlajtolmej

5. ¿Tlen kijtosneki “Dios otlanawati makijkuilokah” Biblia?

5 “Dios otlanawati makijkuilokah” Biblia (xiktlajtolti 2 Timoteo 3:16). ¿Tlen kijtosneki nin? Biblia techyekiluia: “Profetas [...] ika iweletilis n Espíritu Santo nochipa okitenkixtijkeh tlan Dios okinekia makitematiltikah” (2 Pedro 1:21). Nin ken ijkuak se tlakatl kiluia ikone ma kijkuilo se amatlajkuilol. Ken ye kijtoa tlen moijkuilos, amatlajkuilol iaxka, amo iaxka ikone. Noijki ijkon, Biblia kipia itlajtol toTajtsin Dios, amo kipia intlajtol akinmej okijkuilojkej. Ik non, nochi Biblia melauak “itlajtol Dios” (1 Tesalonicenses 2:13).

 SE AMOCHTLI TLEN MELAUAK UAN TLEN AMO MOTLAJTOLNAMIKI

6, 7. ¿Tleka tetlajtlachialtia pampa Biblia san se tlamantli tlamachtia?

6 Biblia okijkuilojkej itech kanaj 1,600 xiuitl uan okijkuilojkej tlakamej tlen okatkaj itech tlatlamantli xiuitl uan tlatlamantli tekitl okipiayaj: sekimej otokayaj, omichkitskiayaj, otlajpiayaj, sekimej okatkaj teotlajtojkej, jueces uan uejueyij tekiuajkej. Lucas akin okijkuilo se Evangelio, otlapajtiaya. Uan maski ninmej tlakamej tlatlamantli okatkaj, kanin peua uan kanin tlami Biblia san se tlamantli tlamachtia. *

7 Itech Génesis kijtoa ken opejki kipiaj ouijkayotl tlaltikpaktlakamej, uan Apocalipsis kijtoa nochi Tlaltikpak yetos se xochitlali. Biblia kijtoa tlen yiuejkika opanok, uan tlen kijtoa nochipa kiteititia ken mochiuas itlanekilis toTajtsin Dios. Melauak tetlajtlachialtia ken Biblia san se tlamantli tlamachtia, pampa Biblia iaxka toTajtsin Dios.

8. Xikijto seki neskayomej tlen kiteititia tlen Biblia kijtoa mouika ika tlen ixtlamatkej kimatij.

8 Tlen Biblia kijtoa noijki mouika ika tlen kijtoaj ixtlamatkej. Biblia achto okijto tlen ixtlamatkej satepan okajsikamatkej. Se neskayotl, amochtli Levítico okipiaya tlanauatilmej tlen yiuejkika omonekiayaj kichiuaskej israelitas, ijkuak ikaj omokokoaya uan ken omonekiaya momaluis, ninmej tlamantli amo okimatiayaj okseki uejueyij altepemej. Uan ijkuak sekimej tlaltikpaktlakamej tlatlamantli okajsikamatiayaj ken kajki Tlaltikpak, itech Biblia yokijtoaya Tlaltikpak tolontik (Isaías 40:22). Noijki okijto Tlaltikpak amo itlaj itech mokitskijtok (Job 26:7). Biblia amo okijkuilojkej ixtlamatkej, maski ijkon, tlen Biblia kijtoa itech tlamantli tlen momachtiaj ixtlamatkej, melauak. ¿Amo moneki ijkon ma yeto se amochtli tlen iaxka toTajtsin Dios?

9. 1) ¿Tleka uelis titlaneltokaskej itech Biblia ijkuak techtlapouia itech tlen yiuejkika opanok? 2) ¿Tleka akinmej okijkuilojkej Biblia okijkuilojkej nochi tlen opanok?

 9 Tlen kijtoa Biblia melauak uan uelis tikneltokaskej tlen kijtoa yiuejkika opanok. Kijtoa nochi tlen opanok uan amo san moijkuiloaj intoka tlaltikpaktlakamej, noijki moijtoa akinmej okatkaj inkojkoluan. * Miakej akinmej tlajkuiloaj amo okijkuilojkej ken okintlanilijkej inaltepe, maski ijkon, akinmej okijkuilojkej Biblia kema okitlalijkej tlen tlajtlakoli okichijkej yejuan uan inaltepe. Se neskayotl, ijkuak Moisés okichi se tlamantli tlen amo kuali uan ik non okajuakej, okijkuilo itech amochtli Números (Números 20:2-12). Amo nochtin kijkuiloaj tlen amo kuali okichijkej, maski ijkon, akinmej okijkuilojkej Biblia kema okijkuilojkej pampa nin amochtli iaxka toTajtsin Dios.

SE AMOCHTLI TLEN KIPIA TLANOJNOTSALMEJ TLEN TECHPALEUIAJ

10. ¿Tleka amo techtlajtlachialtia tikmatiskej Biblia melauak techpaleuia?

10 Ken toTajtsin Dios okichi ma kijkuilokan Biblia, ik non, ika uelis “kuali matechmachtikah, ika matechnonotsakah, ika matechmilawakah” (2 Timoteo 3:16). Nin amochtli techpaleuia. Ika tlen ijkuilitok itech Biblia, moita akin oKichijchi melauak techajsikamati. Uan ijkon, pampa akin otlanauati ma kijkuilokan Biblia, ye Jehová, akin oKichijchi nochi. Ye okachi kuali kajsikamati tlen timokuayejyekoaj uan tlen tikmachiliaj, amo ken tejuan. Noijki ye kimati tlen moneki pampa tiyolpakiskej, uan tlen amo moneki tikchiuaskej.

11, 12. 1) ¿Tlen okijto Jesús ijkuak otlamachti itech tepetl? 2) ¿Tlen okseki tlamantli kijtoa Biblia, uan tleka nochipa techpaleuiaj itlanauatiluan?

11 Ximokuayejyeko ijkuak Jesús otlamachti itech tepetl,  nin tlamachtil kajki itech Mateo 5 a 7. Itech nin kuali tlamachtil, Jesús otlajto itech miak tlamantli: ken uelis tiyolpakiskej, ken tikyektlaliskej ouijkayotl, ken timotlatlaujtiskej uan ken moneki tikitaskej tomin uan okseki tlamantli. Kema, tlen Jesús yiuejkika okijto, axkan noijki techpaleuia.

12 Seki tlanauatilmej tlen katej itech Biblia techtlapouiaj itech kalchanejkej, itech tekitl uan ken uelis kuali timouikaskej  iuan oksekimej. Itlanauatiluan Biblia nochipa kinpaleuiaj nochtin tlaltikpaktlakamej. Ixtlamatilistli tlen kipia Biblia tikitaj itech tlen toTajtsin Dios okijto ika teotlajtojki Isaías: “Ne Jehová nimoDios, Ne nimitsmachtia pampa kuali xiyeto” (Isaías 48:17).

SE AMOCHTLI KIJTOA TLEN PANOS SATEPAN

Teotlajtojki Isaías okijto kixpoloskiaj Babilonia

13. ¿Tlen okilui Jehová ma kijkuilo teotlajtojki Isaías itech Babilonia?

13 Biblia kijtoa miak tlamantli tlen panos satepan, uan miakej yomochijkej. Ma tikitakan se neskayotl. Ika teotlajtojki Isaías —akin okatka kanaj 700 xiuitl achto itech xiuitl 1 (a.i.x. 1)—, Jehová okijto tlen kipanoskia Babilonia: kixpoloskiaj (Isaías 13:19; 14:22, 23). Uan noijki okijto ken kixpoloskiaj. Soldados tlen kixpoloskiaj kiuatsaskiaj aueyatl tlen opanoaya itech ueyi altepetl Babilonia, uan san ijkon kalakiskiaj, amo itlaj ouijkayotl kipiaskiaj. Uan amo san non. Jehová noijki okijto itoka ueyi tekiua tlen kimoaxkatiskia Babilonia: Ciro (xiktlajtolti Isaías 44:27–45:2).

14, 15. ¿Ken omochijkej seki tlamantli tlen okijto Isaías kipanoskia Babilonia?

14 Kanaj 200 xiuitl satepan, itech yoak 5, metstli octubre, itech xiuitl 539 a.i.x 1, sekimej soldados okatkaj ik Babilonia. ¿Akin okinyekanaya soldados? Se ueyi tekiua persa tlen omotokayotiaya Ciro. Kema, nochi yokatka pampa mochiuaskia nochi tlen yomoijtojka. Maski ijkon, ¿uelis kimoaxkatiskia isoldados Ciro ueyi altepetl uan amo itlaj ouijkayotl kipiaskiaj ken achto omoijto?

15 Itech non yoak Babilonios oiluichiuayaj uan amo itlaj okinmomojtiaya pampa inaltepe okipiaya ueyi tepamitl tlen okiyaualoaya. Ijkuakon, Ciro okixelo aueyatl tlen opanoaya itech Babilonia, ik non, atl otemok uan ijkon soldados ik ompa oyajkej uan oajsitoj itech tepamitl. ¿Uan ken okipanauijkej tepamitl? ¡Ikaltlatsakuil ueyi altepetl otlapotoka pampa okilkajkej kitsakuaskej!

16. 1) ¿Tlen okijto Isaías kipanoskia Babilonia? 2) ¿Ken omochi tlen okijto Isaías itech Babilonia?

 16 Jehová okijto tlen kipanoskia Babilonia: “Amo keman ikaj ompa chantis, nion ikaj yetos itech nochi xiuitl tlen uitsej. Uan ompa árabe amo kichijchiuas imantajkali, uan amo yetoskej tlajpixkej tlen kinuikaskej ompa inyolkauan” (Isaías 13:20). Amo san omoijto altepetl kixpoloskiaj, noijki omoijto amo keman ikaj ompa chantiskia. Tejuatsin uelis tikitas ijkon opanok. Kanaj 80 kilómetros itech Bagdad, ik sur, icapital Irak, ompa moita ken omoka Babilonia. Amo ikaj ompa chanti, non kiteititia melauak omochi tlen Jehová okijto ika teotlajtojki Isaías: “Nikinmichpanas ika tlachpano tlen teixpoloa” (Isaías 14:22, 23). *

Kanin okatka Babilonia

17. ¿Tleka okachi mochikaua totlaneltokilis ijkuak tikitaj ken omochi tlen kijtoa Biblia?

17 Ijkuak tikitaj ken mochiua nochi tlen kijtoa Biblia, totlaneltokilis okachi mochikaua, ¿amo melauak? Kema, pampa Jehová okichi nochi tlen yiuejkika okijto kichiuas,  non kichiua ma tikneltokakan noijki kichiuas Tlaltikpak ma yeto se xochitlali (xiktlajtolti Números 23:19). Kema, tejuan “tikchiah nin yankuik nemílistli non Dios non amo tlakajkayawa yotechilih techmakas desde [yiuejkika, TNM]” (Tito 1:2). *

“ITLAJTOL DIOS YOLITOK”

18. ¿Tlen tlajtolmej tlen techtlajtlachialtiaj okijto tlatitlanil Pablo itech “itlajtol Dios”?

18 Nochi tlen yotikitakej itech nin tlamachtil techititia amo onka okse amochtli ken Biblia. Maski ijkon, amo ipati san pampa nochi tlen kijtoa san se tlamantli kijtosneki, kijtoa tlen yiuejkika opanok, mouika ika tlen kimatij ixtlamatkej, kipia tlanojnotsalmej tlen techpaleuiaj noso pampa  ijkuak kijtoa itlaj panos melauak mochiua. Techiluia ok miak tlamantli. Tlatitlanil Pablo okijkuilo: “Porke itlajtol Dios yolitok iwa kipia weletílistli. Nin tlájtoli okachi yakawitstik ke se espada non ojka tlateki, keman kalaki tlaxelojti ijtik toyolo iwa toespíritu, iwa techajsikamatiltia tlan kuali iwa tlan amo kuali” (Hebreos 4:12).

19, 20. 1) ¿Ken techpaleuia Biblia pampa kuali ma tikitakan tlen tikchiuaj? 2) Pampa Biblia se tetliokolil tlen toTajtsin Dios otechmakak, ¿ken uelis tiktlasojkamatiliskej?

19 Tla tiktlajtoltiaj “itlajtol” noso tlen techiluia toTajtsin Dios itech Biblia, non uelis kipatlas tonemilis. Techpaleuia kuali ma tikitakan tlen tikchiuaj. Amo san moneki ma tikijtokan tiktlasojtlaj toTajtsin Dios. Melauak moitas tlen timokuayejyekoaj uan tlen tiknekij tikchiuaskej, itech ken tikseliaj iTlajtol toTajtsin Dios.

20 Biblia melauak iaxka toTajtsin Dios. Moneki ma tiktlajtoltikan, ma timomachtikan uan ma tikpatioitakan. Ximomachtijto tlen kijtoa Biblia uan ijkon tikteititis tiktlasojkamati nin tetliokolil tlen toTajtsin Dios otechmakak. Noijki tikpatioitas tlen kineki kichiuas toTajtsin Dios pampa tlaltikpaktlakamej. Itech tlamachtil 3 tikitaskej tlen kineki kichiuas uan ken mochiuas.

^ párr. 6 Sekimej kijtoaj seki itlaxeloluan Biblia amo san se tlamantli kijtoa, maski amo uelij kiteititiaj tleka ijkon kijtoaj. Xikita tlamachtil 7 itech amochtli La Biblia... ¿la Palabra de Dios, o palabra del hombre?, tlen kichijchiuaj iTlaixpantijkauan Jehová.

^ párr. 9 Se neskayotl, xikita itech Lucas 3:23-38 kanin kijtoa akinmej okatkaj ikojkoluan Jesús.

^ párr. 16 Okachi tikmatis tlen Biblia okijto panoskia, itech páginas 27 a 29 itech amatlajkuilol Un libro para todo el mundo, tlen kichijchiuaj iTlaixpantijkauan Jehová.

^ párr. 17 Tlen okipanok Babilonia san se neskayotl tlen kiteititia yomochi miak tlamantli tlen ijkuilitok itech Biblia. Okseki neskayomej tikitaj ijkuak okinmixpolojkej altepemej Tiro uan Nínive (Ezequiel 26:1-5; Sofonías 2:13-15). Teotlajtojki Daniel okijto tlen uejueyij altepemej yetoskiaj satepan kixpoloskiaj Babilonia, yetoskiaj Medopersia uan Grecia (Daniel 8:5-7, 20-22). Itech tlamachtil “Jesucristo, Mesías tlen omoijto ualaskia”, uelis tikitas okseki tlamantli tlen omoijto itech Mesías, tlen omochi itech Jesucristo.