Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 TLAMACHTIL 5

Tlaxtlauili, ueyi tetliokolil tlen techmaka toTajtsin Dios

Tlaxtlauili, ueyi tetliokolil tlen techmaka toTajtsin Dios
  • ¿Tlen kijtosneki tlaxtlauili?

  • ¿Ken okitemakak toTajtsin Dios non tlaxtlauili?

  • ¿Ken mitspaleuia tejuatsin?

  • ¿Ken uelis tiktlasojkamatis nin tetliokolil?

1, 2. 1) ¿Tleka tikpatioita se tetliokolil? 2) ¿Tleka tikijtoaj tlaxtlauili se tetliokolil tlen okachi ipati otikselijkej?

¿TLEN tetliokolil tlen omitsmakakej okachi omitsyolpakti? Se tetliokolil amo moneki yetos patio pampa melauak mitsyolpaktis. Uelis se tetliokolil melauak mitsyolpaktis maski amo miak ipati. Se tetliokolil tikita miak ipati pampa mitsyolpaktia noso pampa otiknekiaya.

2 Maski miak tlamantli uelis mitstliokoliskej, onka se tetliokolil tlen okachi ipati. Nin tlen otechmakak toTajtsin Dios. Maski Jehová yotechmakak miak tlamantli tlen kuali, onka itlaj tlen okachi ipati: tlaxtlauili tlen okitemakak ika iyolilis iKone, Jesucristo (xiktlajtolti Mateo 20:28). Itech nin tlamachtil timomachtiskej, tlaxtlauili se tetliokolil tlen okachi ipati yotikselijkej, pampa kichiua ma tiyolpakikan uan ma tikpiakan tlen melauak techpoloa. Ken tikitaj Jehová melauak techtlasojtla.

¿TLEN KIJTOSNEKI TLAXTLAUILI?

3. ¿Tlen kijtosneki tlaxtlauili? ¿Tlen moneki tikajsikamatiskej pampa tikmatiskej tleka miak ipati nin tetliokolil?

3 Jehová kitekitiltia tlaxtlauili pampa kinmakixtis nochtin tlaltikpaktlakamej itech tlajtlakoli uan mikilistli  (Efesios 1:7). Pampa tikajsikamatiskej nin tlamachtil tlen kajki itech Biblia moneki ma tikitakan tlen opanok itech xochitlali Edén. Ijkuak tikajsikamatiskej tlen okipolo Adán ijkuak otlajtlakolchi, tikmatiskej tleka miak ipati tlaxtlauili tlen okitemakak toTajtsin Dios.

4. ¿Ken okipiaya iyolilis Adán ijkuak amo okipiaya tlajtlakoli?

4 Ijkuak Jehová okichijchi Adán okimakak itlaj tlen miak ipati: yolilistli tlen amo okipiaya tlajtlakoli. Ximokuayejyeko ken yetoskia Adán. Ye amo keman mokokoskia, ueuejtiskia noso kokoxkatiskia nion mikiskia, pampa itlalnakayo uan ikuayejyekolis amo okipiaya tlajtlakoli. Noijki, melauak kuali omouikaya iuan Jehová. Biblia kijtoa Adán okatka “ikone Dios” (Lucas 3:38). ToTajtsin Dios iuan Adán melauak kuali omouikayaj, ijkon ken se teta tlen tetlasojtla mouika iuan ikone. Akin oKichijchi nochi omotlapouiaya iuan ikone tlen okatka nikan Tlaltikpak, okimakaya tekitl tlen kiyolpaktiskia uan okiluiaya tlen omonekiaya kichiuas (Génesis 1:28-30; 2:16, 17).

5. ¿Tlen kijtosneki ijkuak Biblia kijtoa Adán “tlachixtok ken toTajtsin Dios”?

5 Adán okichijchijkej “ijkon ken toTajtsin Dios tlachixtok” (Génesis 1:27). Nin amo kijtosneki okatka ken toTajtsin Dios. Ken otimomachtijkej itech tlamachtil 1, Jehová se Espíritu tlen amo uelij tikitaj (Juan 4:24). Ik non, toTajtsin Dios amo kipia itlalnakayo nion iomio ken tejuan. Ik non, ijkuak moijtoa Adán otlachixtoka ken toTajtsin Dios kijtosneki okichijchijkej ika iyelis toTajtsin Dios: tlasojtlalistli, ixtlamatilistli, melajkayotl uan chikaualistli. Noijki okatka ken iTata pampa ye ueliskia kipejpenaskia tlen kichiuaskia. Amo okatka ken se tepostli tlen kichiua san tlen kinauatiaj. Ye ueliskia kipejpenaskia tla kichiuaskia tlen kuali noso tlen amo kuali. Tla kipejpenaskia kitlakamatis toTajtsin Dios, yoltoskia nochipa itech Xochitlali nikan Tlaltikpak.

6. ¿Tlen okipolo Adán ijkuak amo okitlakamatki toTajtsin Dios, uan tlen kinpanoskia nochtin ixuiuan?

 6 Adán mikiskia pampa amo okitlakamatki toTajtsin Dios. Pampa otlajtlakolchi okipolo iyolilis tlen amo okipiaya tlajtlakoli uan miakej tlateochiualismej (Génesis 3:17-19). Maski ijkon, amo san Adán okipolo iyolilis tlen amo okipiaya tlajtlakoli, noijki ixuiuan. ITlajtol toTajtsin Dios kijtoa: “Por itlajtlakol se tlakatl [Adán] n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (Romanos 5:12). Melauak, axkan tinochtin titlajtlakolejkej pampa Adán otechkajteuili tlajtlakoli. Ik non, Biblia kijtoa Adán ‘otechnemakak’ iuan ye, ik non, titlajtlakolejkej uan timikij (Romanos 7:14). Pampa Adán uan Eva amo okitlakamatkej toTajtsin Dios yejuan ayakmo kipiaj nion se chialistli. Maski ijkon, ¿tlen techpanoskia nochtin tejuan ken tiixuiuan?

7, 8. ¿Tlen ome tlamantli kijtosneki tlaxtlauili?

7 Jehová kinmakixtiskia nochtin tlaltikpaktlakamej ika se tlaxtlauili. ¿Tlen kijtosneki se tlaxtlauili? Kijtosneki ome tlamantli. Achto, kijtosneki tomin tlen motemaka pampa itlaj oksepa tikpiaskej, ken ijkuak ikaj kichtekij uan kitlajtlanij tomin pampa kikajkauaskej. Ome, itech Biblia se tlaxtlauili kijtosneki itlaj tlen motemaka pampa motlaxtlauas itlaj tlamantli tlen amo kuali otlapanok. Se neskayotl, tla se yolkatl okalakiaya tetlala uan tla itlaj amo kuali okichiuaya, akin iaxka yolkatl omonekiaya kitlaxtlauas nochi tlen okijtlako.

8 Ken yotimomachtijkej, Adán okichij ma tikpolokan itlaj tlen miak ipati. ¿Ken uelis motlaxtlauaskia tlen otikpolojkej uan ken uelis timomakixtiskiaj itech tlajtlakoli uan mikilistli? Ma tikitakan tlen tlaxtlauili okitemakak Jehová uan ken mitspaleuia.

 ¿KEN OKITEMAKAK JEHOVÁ TLAXTLAUILI?

9. ¿Tlen tlaxtlauili omonekiaya?

9 Opoliuik se yolilistli tlen amo okipiaya tlajtlakoli. Ik non, pampa oksepa tikpiaskiaj tlen opoliuik amo san omonekiaya motemakas iyolilis se tlaltikpaktlakatl tlen kipia tlajtlakoli (Salmo 49:7, 8). Tlaxtlauili tlen motemakaskia omonekiaya yetos se yolilistli tlen amo okipiaya tlajtlakoli ijkon ken non opoliuik. Pampa itech iTlajtol toTajtsin Dios okatka se kuali tlanauatil tlen omonekiaya mochiuas. Nin tlanauatil okijtoaya motemakaskia se “yolilistli [...] pampa okse yolilistli” (Deuteronomio 19:21). Ik non, ¿tlen ika motlaxtlauaskia yolilistli tlen amo okipiaya tlajtlakoli tlen Adán okipolo? “Tlaxtlauili tlen omonekiaya” okatka okse yolilistli tlen amo okipiaya tlajtlakoli (1 Timoteo 2:6).

10. ¿Ken okitemakak Jehová tlaxtlauili?

10 ¿Ken okitemakak Jehová tlaxtlauili? Okiualtitlanki nikan Tlaltikpak se ikone espiritual tlen amo okipiaya tlajtlakoli. Maski ijkon, amo okiualtitlanki san akin, okiualtitlanki akin okachi okitlasojtlaya: san ye se iKone (xiktlajtolti 1 Juan 4:9, 10). Ye ika nochi iyolo ouala nikan Tlaltikpak (Filipenses 2:7). Ijkon ken yotimomachtijkej, Jehová okichi se milagro ijkuak okitlali iyolilis iKone ijtik María. Ika iespíritu santo toTajtsin Dios, Jesús oneski ken se tlaltikpaktlakatl tlen amo okipiaya tlajtlakoli (Lucas 1:35).

Jehová topampa okitemakak san ye se iKone ken tlaxtlauili

11. ¿Ken uelis san se tlakatl kinmakixtis sapanoa miakej tlaltikpaktlakamej?

11 ¿Ken uelis san se tlakatl kinmakixtis sapanoa miakej tlaltikpaktlakamej? ¿Tleka nochtin tlaltikpaktlakamej tlajtlakolejkej? Xikilnamiki, Adán otlajtlakolchi, ik non, okipolo itlaj tlen miak ipati: yolilistli tlen amo okipiaya tlajtlakoli, ik non, tejuan titlajtlakolejkej. San otechkajteuili tlajtlakoli uan mikilistli. Biblia kitokayotia Jesús “sa iksemi Adán”, pampa ye amo okipiaya tlajtlakoli  uan amo keman otlajtlakolchi (1 Corintios 15:45). Uelis tikijtoskej Jesús okipatkayoti Adán pampa techmakixtis. Jesús okitlakamatki iTajtsin uan okitemakak iyolilis tlen amo okipiaya tlajtlakoli. Ijkon Jesús okitlaxtla tlen omonekiaya pampa tlajtlakoli tlen Adán okichi uan ijkon axkan tinochtin tikpiaj se chialistli (Romanos 5:19; 1 Corintios 15:21, 22).

12. ¿Tlen okiteititi Jesús pampa okixiko ouijkayotl?

12 Biblia techyekiluia Jesús sapanoa otlajyoui achto mikiskia. Melauak okitlajyouiltijkej, okiuitekej uan okitsoponilijkej clavos itech se kuauitl pampa ma tlajyoui, melauak temomojti ken okimiktijkej (Juan 19:1, 16-18, 30; xikita tlen kijtoa tlamachtil “Akinmej kichiuaj ken Cristo, ¿moneki kitekitiltiskej cruz?”). ¿Tleka omonekiaya ma tlajyoui miak? Ken tikitaskej itech okse tlamachtil, Satanás okijto nion se tlakatl amo kitlakamatis Jehová tla kiyejyekoskej. Pampa Jesús okixiko nochi temomojti ouijkayotl tlen okipanok, okinankili tlen okijto Satanás. Okiteititi se tlakatl tlen amo kipia tlajtlakoli uan tlen kipejpena tlen kineki kichiuas, uelis kitlakamatis Jehová, maski Diablo kitlajyouiltis. ¡Melauak toTajtsin Dios oyolpakik ijkuak okitak iKone tlen melauak kitlasojtla okixiko nochi ouijkayotl! (Proverbios 27:11.)

13. ¿Ken omotemakak tlaxtlauili?

13 ¿Ken omotemakak tlaxtlauili? Itech tonal 14, metstli judío Nisán itech xiuitl 33, toTajtsin Dios okitekauili ma kimiktikan iKone tlen amo okipiaya tlajtlakoli. Ijkon, Jesús okitemakak “san se welta iwa nochipa” iyolilis tlen amo okipiaya tlajtlakoli (Hebreos 10:10). Eyi tonal satepan ijkuak okimiktijkej, Jehová okiyoliti Jesús ken se espíritu. Itech iluikak, Jesús okitemakak iyolilis tlen amo okipiaya tlajtlakoli ixpan Jehová, pampa ika imikilis kinmakixtia ixuiuan Adán (Hebreos 9:24). Jehová okiseli imikilis Jesús uan ijkon ika imikilis okinmakixti  itech mikilistli uan tlajtlakoli nochtin tlaltikpaktlakamej (xiktlajtolti Romanos 3:23, 24).

¿KEN MITSPALEUIA TEJUATSIN TLAXTLAUILI?

14, 15. ¿Tlen moneki tikchiuaskej pampa toTajtsin Dios ma techtlapojpolui?

14 Pampa Jesús omotemakak topampa axkan tikpiaj miakej tlateochiualismej maski titlajtlakolejkej. Ma tikitakan tlen tlateochiualismej tikpiaj axkan uan satepan pampa toTajtsin Dios otechmakak se ueyi tetliokolil.

15 Techtlapojpoluiaj totlajtlakoluan. Pampa titlajtlakolejkej, melauak oui tikchiuaskej tlen kuali. Nochtin titlajtlakolchiuaj, ika tlen tikijtoaj noso ika tlen tikchiuaj. Ika imikilis Jesús, toTajtsin Dios ‘techtlapojpolwia de totlajtlakolwanʼ (Colosenses 1:13, 14). Ik non, moneki melauak ma timoyolkuepakan. Noijki moneki ika yolyamanilistli ma tiktlajtlanilikan Jehová ma techtlapojpolui, uan noijki ma titlaneltokakan itech imikilis Jesús (xiktlajtolti 1 Juan 1:8, 9).

16. ¿Tleka uelis tiktekichiuiliskej toTajtsin Dios ika totlalnamikilis chipauak, uan ken techpaleuia tikpiaskej chipauak totlalnamikilis?

16 Tikpiaj chipauak totlalnamikilis ixpan toTajtsin Dios. Tla itlaj amo kuali otikchijkej totlalnamikilis amo kuali kajki uan tikmachiliaj amo itlaj topati. Maski ijkon, ika imikilis Jesús axkan Jehová techtlapojpoluia, uan ika miak tlasojtlalistli techkauilia ma tikueyichiuakan uan amo itlaj ma techyolkoko maski titlajtlakolejkej (Hebreos 9:13, 14). Ik non, kuali tiktlapouiaj Jehová itech tlatlaujtilistli pampa amo itlaj techtsakuilia (Hebreos 4:14-16). Noijki, pampa tikpiaj chipauak totlalnamikilis amo itlaj techtekipachoa, kuali timomachiliaj uan tiyolpakij.

17. ¿Tlen tlateochiualismej tikseliskej pampa Jesús omikik topampa?

17 Yolilistli tlen amo keman tlamis itech xochitlali.  Romanos 6:23 kijtoa: “Porke n tlajtlákoli tetlaxtlawia ika mikílistli”. Non tlaxelol noijki kijtoa “pero tlan Dios kitetliokolia ye n nemílistli non ayik tlami keman tiseititokeh iwan Toteko Cristo Jesús”. Itech tlamachtil 3 otimomachtijkej tlen tlateochiualismej mochiuaskej itech Xochitlali (Apocalipsis 21:3, 4). Pampa Jesús okitemakak iyolilis topampa, mochiuaskej nochi ninmej tlateochiualismej uan yolilistli tlen amo keman tlamis nikan Tlaltikpak kanin amo ikaj mokokos. Pampa tikseliskej nochi ninmej tlateochiualismej moneki tikpatioitaskej tlaxtlauili.

¿KEN UELIS TIKTLASOJKAMATIS NIN TETLIOKOLIL?

18. ¿Tleka moneki tiktlasojkamatiliskej Jehová pampa okitemakak nin tlaxtlauili?

18 ¿Tleka moneki tiktlasojkamatiliskej Jehová pampa okitemakak nin tlaxtlauili? Se tetliokolil melauak tikpatioitaj pampa akin otechmakak okixelo kauitl, tomin noso omochijchika pampa techmakas. Uan noijki techyolinia pampa tikmatij akin otechmakak non tetliokolil melauak techtlasojtla. Ik non, tlaxtlauili tlen okitemakak toTajtsin Dios se tetliokolil tlen melauak miak ipati,  pampa okitemakak iKone. Juan 3:16 kijtoa: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone”. Tlaxtlauili tlen okitemakak Jehová kiteititia melauak techtlasojtla. Noijki Jesús techititia techtlasojtla miak, pampa okitemakak iyolilis topampa (xiktlajtolti Juan 15:13). Melauak, nin tetliokolil kichiua ma tikneltokakan Jehová uan iKone melauak techtlasojtlaj sejse tejuan (Gálatas 2:20).

Uelis tiktlasojkamatis tetliokolil tla timochijchikaua pampa tikixmatis Jehová

19, 20. ¿Ken tikteititis tikpatioita nin tetliokolil tlen toTajtsin Dios otechmakak?

19 ¿Ken tikteititis tikpatioita nin tetliokolil tlen toTajtsin Dios otechmakak? Achto, moneki kuali xikixmati akin okitemakak nin tlaxtlauili, Jehová (Juan 17:3). Uelis tikchiuas tla timomachtis Biblia ika nin amochtli. Ijkuak okachi tikixmatis Jehová okachi tiktlasojtlas. Uan ijkuak okachi tiktlasojtlas, okachi tiknekis tikchiuas tlen ye kineki (1 Juan 5:3).

20 Xitlaneltoka itech nin tlaxtlauili. Biblia techiluia itech Jesús: “Akin kineltoka Ikone Dios, yolitos nochipa” (Juan 3:36). ¿Ken uelis tikteititiskej titlaneltokaj itech Jesús? Amo san ma tikijtokan. Ken kijtoa Santiago 2:26, “totlaneltokalis amitla ipati tla amo itla tikchiwah”. Tla tikpiaj tlaneltokilistli tlen melauak tikteititiskej ika tlen tikchiuaj. Moneki tikchiuaskej tlen Jesús okichi, ijkon tikteititiskej titlaneltokaj itech Jesús uan moitas itech tlen tikijtoaj uan tlen tikchiuaj (Juan 13:15).

21, 22. 1) ¿Tleka moneki timonechikoskej sejse xiuitl itech iCena toTeko? 2) ¿Tlen timomachtiskej itech tlamachtilmej 6 uan 7?

21 Ximonechiko sejse xiuitl itech iCena toTeko. Itech tonal 14 metstli nisán xiuitl 33, ijkuak yiyoak, Jesús okitlali se iluitl tlen miak ipati tlen Biblia kitokayotia ‘icena in toTeko’ (1 Corintios 11:20; Mateo 26:26-28). Noijki moixmati ken ijkuak Moilnamiki imikilis Cristo. Jesús ijkon okichi pampa itlatitlaniluan uan akinmej melauak  kichiuaj ken Cristo ma kilnamikikan nin tlamantli tlen miak ipati: ijkuak Jesús omikik okitemakak iyolilis tlen amo okipiaya tlajtlakoli ken se tlaxtlauili. Jesús okijto nin tlamantli ijkuak otlanauati: “Ijkí xikchiwakah para nonnechilnamikiskeh” (Lucas 22:19). Ijkuak moilnamiki imikilis Jesús techilnamiktia Jehová uan Jesús sapanoa techtlasojtlaj pampa yejuan okitemakakej tlaxtlauili. Ijkuak tiauij itech nin nechikol tlen mochiua sejse xiuitl, tikteititiaj melauak tiktlasojkamatiliaj toTajtsin Dios pampa okitemakak nin tlaxtlauili. *

22 Nin tlaxtlauili se tetliokolil tlen sapanoa miak ipati tlen otechmakak Jehová (2 Corintios 9:14, 15). Noijki uelis kinpaleuis tlaltikpaktlakamej akinmej yomikej, ken timomachtiskej itech tlamachtilmej 6 uan 7.

^ párr. 21 Itech tlamachtil “ICena toTeko: se iluitl tlen kiueyichiua toTajtsin Dios”, tikitas okseki tlamantli pampa tikmatis tlen kijtosneki iCena toTeko.