Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 OKSEKI TLAMACHTILMEJ

Teotlajtojki Daniel okijto keman ualaskia Mesías

Teotlajtojki Daniel okijto keman ualaskia Mesías

TEOTLAJTOJKI Daniel okatka kanaj 500 xiuitl achto nesiskia Jesús. Maski ijkon, Jehová okimatilti Daniel ken uelis momatiskia keman kipejpenaskia noso kitokayotiskia Jesús ken Mesías noso Cristo. ToTajtsin Dios okilui Daniel: “Moneki tikmatis, ijkuak moijtos moyektlalis Jerusalén uan hasta ijkuak uits Mesías Tlayekanki, panoskej 7 semanas, noijki 62 semanas” (Daniel 9:25).

Ma tikitakan ken uelis momatiskia keman ualaskia ­Mesías. Achto moneki tikmatiskej keman peuaskia mopoaskia semanas hasta ijkuak ualaskia Mesías. Daniel okijto ninmej semanas peuaskiaj itech tonal “ijkuak moijtos moyektlalis Jerusalén”. ¿Keman omoijto non? Nehemías tlen noijki okijkuilo se amochtli tlen kajki itech Biblia, okijto “ijkuak Artajerjes yotlanauatijtoka 20 xiuitl”, omoijto ma moyektlali tepamitl tlen okiyaualoaya Jerusalén (Nehemías 2:1, 5-8). Miakej ixtlamatkej kijtoaj ­Artajerjes opejki tlanauatia itech xiuitl 475 a.i.x. 1. Ijkuak tikitaj nochi nin tikajsikamatij itech xiuitl 455 a.i.x. 1 tekiua Artajerjes yotlanauatijtoka 20 xiuitl. Ik non, tlen okijto Daniel itech Mesías peua mochiua itech xiuitl 455 a.i.x. 1.

Daniel okijto panoskiaj 7 semanas uan 62 semanas, nochi nin mochiuaj 69 semanas. Ninmej semanas opejkej itech xiuitl 455 a.i.x. 1 uan tlamiskiaj ijkuak ualaskia Mesías. ¿Keski uejkauaskiaj ninmej semanas? Ijkon ken kijtoaj okseki biblias, ninmej semanas amo kijtosnekij semanas tlen kipiaj chikome tonalmej, ninmej semanas kijtosneki xiuitl. Nin kijtosneki se semana kipia chikome xiuitl. Judíos tlen yiuejkika okatkaj kuali okimatiayaj tlen kijtosneki semanas ika xiuitl, noso chikome xiuitl. Se neskayotl, ijkuak oajsiaya xiuitl chikome judíos omoseuiayaj sábado (Éxodo 23:10, 11). Ik non, 69 semanas tlen okijto Daniel kijtosneki xiuitl, nochi kichiuaj 483 xiuitl.

Axkan san moneki ma tikpoakan nochi. Tla tejuan peua tikpoaj ninmej 483 xiuitl itech xiuitl 455 a.i.x. 1 tiajsij itech xiuitl 29, ijkuak omoapolakti Jesús uan omochi Mesías (Lucas 3:1, 2, 21, 22). * ¿Amo melauak nochi tlen okijto Daniel omochi?

^ párr. 4 Tla tipeuaj itech xiuitl 455 a.i.x. 1 uan titlamij itech xiuitl 1 a.i.x. 1 panoaj 454 xiuitl. Uan tla tipeuaj itech xiuitl 1 a.i.x. 1 uan titlamij itech xiuitl 29, panoaj 29 xiuitl. Tla tikpoaj ninmej xiuitl (454+29) mochiua 483 xiuitl. Jesús “okimiktijkej” itech xiuitl 33, itech semana 70 (Daniel 9:24, 26). Tla tikneki tikmatis okachi, uelis tikitas amochtli Prestemos atención a las profecías de Daniel itech capítulo 11, uan noijki amochtli Perspicacia para comprender las escrituras volumen 2, itech páginas 1014 a 1017. Ninmej amochmej kinchijchiuaj iTlaixpantijkauan Jehová.