Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 OKSEKI TLAMACHTILMEJ

¿Tlen “weyi Babilonia“?

¿Tlen “weyi Babilonia“?

AMOCHTLI Apocalipsis kipia tlajtolmej tlen amo moneki tikajsikamatiskej ijkon ken ijkuilitok (Apocalipsis 1:1). Ken neskayotl, tlajtoa itech se siuatl tlen sapanoa auilnemi tlen itech ixkuak ijkuilitok “weyi Babilonia”. Noijki kijtoa “non ewatok ipan miaktilkeh ameh” (Apocalipsis 17:1, 5, 15). Non amo uelis kichiuaskia se siuatl tlen kipia itlalnakayo uan iomio, ik non, “weyi Babilonia” itlaj kineskayotia. ¿Tlen kineskayotia?

 Itech Apocalipsis 17:18 kijtoa “weyi altepetl non kinawatia nochteh n wejweyi tlanawatijkeh itech nin tlaltíkpaktli”. Tlajtoli “weyi altepetl” techilnamiktia san sekimej tlaltikpaktlakamej. Noijki “n weyi altepetl” kinnauatijtok “wejweyi tlanawatijkeh itech nin tlaltíkpaktli”. Ik non, “weyi Babilonia” uelis yetos se altepetl tlen mokajkalakia itech nochi Tlaltikpak. Uelis tikijtoskej se tlanauatijkayotl tlen kajki itech nochi Tlaltikpak. Uan ¿tlen tlanauatijkayotl? Se tlanauatijkayotl itech tlaneltokalistli. Ma tikitakan tlen kijtoaj seki tlaxelolmej itech amochtli Apocalipsis.

Tlanauatijkayotl uelis yetos itech política, uejueyij tlanemakakej noso itech tlaneltokalismej. Tejuan tikmatij “weyi Babilonia” amo uelis yetos se tlanauatijkayotl itech política pampa iTlajtol toTajtsin Dios techiluia “wejweyi tlanawatijkeh itech nin tlaltíkpaktli okimomekatijkeh n Babilonia”. Yomomekatij iuan tekiuajkej pampa iuan mouikaj uan kichiua nochi tlen moneki pampa ueyititos uan ma kichiuakan tlen ye kineki. Ik non, motokayotia “weyi mekatanajsiwatl” (Apocalipsis 17:1, 2; Santiago 4:4).

Biblia kijtoa ijkuak kixpoloskej nin siuatl, moyolkokoskej “tlasemankeh de nochi n tlaltíkpaktli”, nin kijtosneki, uejueyij tlanemakakej. Ik non, “weyi Babilonia” amo se tlanauatijkayotl itech uejueyij tlanemakakej. Noijki seki tlaxelolmej kijtoa “wejweyi tlanawatijkeh” uan “tlasemankeh” “san wejka konitoskeh” (Apocalipsis 18:3, 9, 10, 15-17). Ik non, “weyi Babilonia” amo se tlanauatijkayotl itech política nion itech uejueyij tlanemakakej, se tlanauatijkayotl itech tlaneltokalismej.

Onka okse tlamantli tlen techititia kijtosneki se tlanauatijkayotl itech tlaneltokalismej: moijtoa kinkajkayaua nochi uejueyi altepemej “ika [i]tetlajchiwilis” (Apocalipsis 18:23). Nochi tlatlamantli tetlajchiuilistli uits itech amo kuali ejekamej. Ik non, amo techtlajtlachialtia itech Biblia ma kitokayoti “weyi Babilonia” kanin “ompa yomochachantijkeh n demóniojteh” (Apocalipsis 18:2; Deuteronomio 18:10-12). Noijki nin tlanauatijkayotl kixtopeua tlaneltokalistli tlen melauak pampa kintlajyouiltia “profetas” uan “nochteh akimeh iaxkawah Dios” (Apocalipsis 18:24). Sapanoa kikokolia tlaneltokalistli tlen melauak uan sapanoa kintlajyouiltiaj “akinmeh [...] otetlapowiayah de Jesús” uan kinmiktia. Ik non, “weyi Babilonia” kineskayotia nochi tlaneltokalismej  tlen amo melauak uan noijki nochtin akinmej kixnamikij toTajtsin Jehová.